Sang Septiembre 10, 2019, ginsentensiahan sang Khujand City Court sa Tajikistan si Brother Shamil Khakimov nga mapriso sing pito ka tuig kag tunga bangod lang ginasugid niya sa iban ang iya relihioso nga mga pagpati. Ginaapelar sang mga Saksi ni Jehova ini nga kaso.

Ining mabudlay nga sitwasyon nga ginaatubang ni Brother Khakimov nagsugod sang una nga mga bulan sang 2019. Sang Pebrero 26, gin-aresto sang mga awtoridad ang 68-anyos nga si Shamil sa kaso nga “pagsugyot nga magdumtanay ang mga relihion.” Sang ulihi, ginpriso sia bisan wala pa mabista, nga naglab-ot sing anom ka bulan. Magluwas nga ginpriso sia sing indi makatarunganon, si Brother Khakimov may high blood kag nagapaayo pa pagkatapos sang iya pagpabulong.

Amo ini ang una nga tion nga ang isa sa mga Saksi ni Jehova ginpriso sa Tajikistan halin sang 2017, sang ang 18-anyos nga si Daniil Islamov ginpriso sing anom ka bulan bangod nangindi sia magsuksok sang uniporme sang mga soldado. Ang Tajikistan isa na subong sa lima ka pungsod nga may ginpriso nga Saksi ni Jehova. Ang iban nga apat ka pungsod amo ang Eritrea, Russia, Singapore, kag Turkmenistan.

Ginapangamuyo naton nga padayon nga hatagan ni Jehova si Brother Khakimov sang tanan niya nga kinahanglan para mabatas ini nga pagtilaw.—Roma 15:5.