Sang Enero 18, 2021, ginpahibalo sang isa ka korte sa Turkmenistan ang desisyon sini sa kaso ni Brother Azamatjan Narkuliyev. Ginsentensiahan sia nga mapriso sing duha ka tuig sa isa ka strict-regime prison colony kay nagpangindi sia nga magsoldado bangod sa iya konsiensia. Ikaduha na ini nga bes nga ginpriso sia bangod sa iya neutral nga panindugan.

Azamatjan Narkuliyev

• Natawo: 2000

• Biograpiya: Nabawtismuhan sia sang 2018. Maayo ang iya reputasyon bangod mapainubuson sia, maugdang, kag mapisan. Ang iya nanay kag duha ka utod nga babayi mga Saksi ni Jehova man

Sang Enero 7, 2020, natapos sang 20 anyos nga si Azamatjan ang sentensia sa iya nga mapriso sing isa ka tuig, kay indi sia magsoldado bangod sa iya konsiensia. Sa Turkmenistan, ang mga nagapangindi nga magsoldado mahimo kasuhan sa ikaduha nga bes. Gani pagligad lang sang lima ka bulan, ginpatawag sia liwat sang mga opisyal sang militar. Naghimo sia sing sulat nga nagapaathag nga indi niya mahimo nga magsoldado ukon magserbisyo bisan upod sa mga soldado nga wala sing armas. Pero, liwat sia nga gin-akusar nga may nahimo sia nga krimen.

Sang Disiembre 20, 2020, ginpasakaan sia sing kaso kriminal sang piskal sa ila lugar. Ginkuha man sang mga awtoridad ang iya passport.

Ginapangamuyo naton si Azamatjan kag ang iya pamilya. Kabalo kita nga padyaan gid ang ila determinasyon nga magpadayon nga matutom. Ginapasalig kita sang Biblia nga ‘mainunungon si Jehova sa tawo nga mainunungon sa iya.”—Salmo 18:25.