SEPTIEMBRE 17, 2019
UNITED KINGDOM
Dali Na Lang Matapos ang Pagtukod sang Branch sa Britain, nga Isa ka Model sang Landscaping kag Restoration
Ang pagtukod sang branch office sa Britain nga malapit sa Chelmsford, Essex, ginabulubanta nga matapos sa Disiembre 2019. Subong pa lang, ginkilala na ini sang mga eksperto bilang isa ka halimbawa sa pagpatahom liwat sang palibot.
Sang ginbakal sang mga brother ang propiedad sang 2015, talambakan ini sang daan nga mga salakyan kag iban nga mga basura. Ginkutkot kag gin-recycle sang mga boluntaryo ang mga basura, lakip ang linibo ka daan nga mga guma, nga ang iban halin pa sang World War II. Dayon gin-ayag nila ang mahigko nga duta kag ginpanguha bisan ang magagmay nga mga basura. Gin-recycle ang puede pa gamiton nga mga basura kag ginbalik ang natinluan nga duta sa site. Sobra 11,000 ka kauturan ang nagboluntaryo sa sulod sang apat ka milyon ka oras para mapatahom liwat ining 34-ka ektarya nga propiedad.
Sa wala: Ginhanas nga mga boluntaryo nga nagatinlo sang site sang 2015; Sa tuo: Ang isa sa matahom nga hardin nga makita subong sa site
Himuan ini sang mga hardin para butangan sang lokal nga mga tanom ukon mga tanom halin sa iban nga lugar, mga pond, kag talamnan sang ilahas nga mga bulak kag nagapamunga nga mga kahoy. Ini nga desinyo indi lang para magpatahom sa lugar kundi para may maistaran man ang ilahas nga mga sapat, para indi mausik ang tubig, para maprotektahan ang dalagku kag magagmay nga mga kahoy, para magdamo ang lokal nga mga tanom, kag para manamian ang mga pumuluyo sa palibot nga makakita sini.
Si Brother Paul Rogers, miembro sang Construction Project Committee (CPC), nagsiling: “Ini nga propiedad nga ginbakal namon ginpabay-an kag gin-abuso sa madamo nga tinuig. Nagsugod nga nagtahom ini liwat kay gin-utihan sang madamo nga boluntaryo ang pagkuha sang mga basura. Sang natinluan na ang duta, naghimo sila sing mga bakulod kag mga patag nga pareho sa palibot kag gintamnan ini sang ginatos ka dalagku kag magagmay nga mga kahoy kag iban pa nga mga tanom. Ang matahom nga resulta sini pareho gid sa ginsiling sang Ezequiel 36:35, 36: ‘Kag magasiling ang mga tawo: “Ang duta nga mamingaw nangin kaangay sang hardin sang Eden” . . . Kag mahibaluan sang . . . mga pungsod . . . nga ako, si Jehova, amo ang nagtukod sang narumpag nga siudad, kag nagtanom sa mamingaw nga lugar.’”
Duha ka sister nga nagakuha sang mga basura sa isa ka pond. Ginkuha sa mga pond ang dalagku nga mga basura kag lunang paagi sa traktora. Pero ang magagmay nga mga basura kag mga tanom nga indi kinahanglan ginkuha sing manomano. Sobra 8,000 ka bag-o nga mga tanom nga mabuhi sa tubig ang ginbutang, nga nagabulig sa pagtinlo sang tubig
Isa sa mga pond nga bahin sang drainage system nga nagatipon sang tubig halin sa malapit nga dalan kag sa propiedad sang branch. Makita sa wala sang piktyur ang isa ka bus stop nga may viewing area para matan-aw sang lokal nga pumuluyo ang hardin
Ang tatlo ka miembro sang isa ka landscaping team nga nagatanom sang kahoy sa site. Halos 15,000 ka kahoy kag iban pa nga mga tanom ang gindugang
Anom ka kahoy nga olibo, nga ginabulubanta nga mga 100 ka tuig na ang edad, ang gintanom sa atubang sang office complex
Grupo sang mga sister nga nagapapiktyur samtang nagapang-landscape. Sobra 18,000 ka mga bulak ang gintanom sa may kakahuyan nga bahin sang propiedad. Indi magnubo sa 80 porsiento sang mga tanom sa sini nga proyekto ang nagapamuhi mismo sa sini nga lugar
Mga bulak, hilamon, kag kahoy nga ginplastar sing maayo sa gua sang entrance pasulod sa Residence F
Basi Manamian Ka Man
MGA PIRME GINAPAMANGKOT
Paano Ginasuportahan sang mga Saksi ni Jehova ang Ila Hilikuton?
Wala namon ginasunod ang paagi sang madamo nga relihion.