Jeremias 48:1-47
-
Ang tagna batok sa Moab (1-47)
48 Tuhoy sa Moab,+ amo ini ang ginasiling ni Jehova sang mga kasuldadusan, ang Dios sang Israel:
“Makaluluoy ang Nebo+ kay ginlaglag sia!
Ginsakop kag nahuy-an ang Kiryataim.+
Nahuy-an kag hinadlukan ang malig-on nga dalangpan.*+
2 Indi na nila pagdayawon ang Moab.
Ginplano nila sa Hesbon+ ang iya pagkapukan:
‘Dali kamo, laglagon naton ini nga pungsod.’
Maghipos ka man Madmen,Kay nagasunod sa imo ang espada.
3 Mabatian ang singgit halin sa Horonaim,+Tuhoy sa kalaglagan kag daku nga pagkapukan.
4 Nalaglag ang Moab.
Nagasinggit ang iya magagmay nga kabataan.
5 Nagahinibi sila samtang nagataklad sila sa Luhit.
Kag samtang nagadulhog sila halin sa Horonaim, mabatian nila ang mga pagtiyabaw tungod sa kalaglagan.+
6 Magpalagyo kamo kag luwasa ang inyo kabuhi!*
Mangin pareho kamo sang kahoy nga junipero sa kamingawan.
7 Bangod nagasalig ka sa imo mga hinimuan kag mga bahandi,Pagabihagon ka man.
Kag pagabihagon man si Kemos,+Pati ang iya mga saserdote kag mga prinsipe.
8 Salakayon sang manuglaglag ang tanan nga siudad,Kag wala sing siudad nga makapalagyo.+
Mahapay ang nalupyakan,*Kag malaglag ang kapatagan, suno sa ginsiling ni Jehova.
9 Magbutang kamo sing tanda agod makita sang Moab ang dalan,Kay malagyo ang iya katawhan kon malaglag ang iya mga siudad,Kag ang iya mga siudad mangin butang nga kahadlukan,Nga wala sing pumuluyo.+
10 Pakamalauton ang nagapatumbaya sa ginapahimo ni Jehova!
Pakamalauton ang nagapugong sang iya espada sa pagpaagay sing dugo!
11 Ang mga Moabnon nagakabuhi sing malinong halin sa ila pagkapamatan-on,Pareho sang alak nga may lalod.
Wala sila mahuwad sa iban nga suludlan,Kag wala pa gid sila mabihag.
Gani amo lang gihapon ang sabor sini,Kag wala magbag-o ang baho sini.
12 “‘Magaabot ang tion,’ siling ni Jehova, ‘nga ipadala ko ang magahuwad sa ila. Ihuwad nila ang ila mga suludlan kag dugmukon nila ang ila dalagku nga mga tibod.
13 Ikahuya sang mga Moabnon si Kemos, subong nga ginakahuya sang panimalay ni Israel ang Betel, nga ila anay ginsaligan.+
14 Ngaa nagapahambog kamo sa pagsiling: “Isganan kami nga mga hangaway nga handa sa pagpakig-away”?’+
15 ‘Ginlaglag ang Moab,Ginsalakay ang iya mga siudad,+Kag ginpamatay ang iya pinakamaayo nga mga pamatan-on nga lalaki,’+
Siling sang Hari, nga ang iya ngalan amo si Jehova sang mga kasuldadusan.+
16 Malapit na ang kalaglagan sang mga Moabnon,Kag nagadalidali sa pag-abot ang ila pagkapukan.+
17 Magapakita sing simpatiya ang tanan sa palibot nila,Ang tanan nga nakakilala sa ila.
Sugiri sila: ‘Nabali ang mabakod nga baston, ang matahom nga sungkod!’
18 Ihatag ang imo himaya,Kag magpungko ka sa kauhaw,* ikaw nga anak nga babayi nga nagaistar sa Dibon,+Kay ginsalakay ka sang naglaglag sa Moab,Kag rumpagon niya ang imo mga lugar nga may mabakod nga depensa.+
19 Magtindog ka sa higad sang dalan kag magbantay, ikaw nga nagaistar sa Aroer.+
Pamangkuta ang lalaki kag ang babayi nga nagapalagyo, ‘Ano ang natabo?’
20 Nahuy-an kag hinadlukan ang Moab.
Maghaya kamo kag magsinggit.
Ipahibalo ninyo sa Arnon+ nga ginlaglag ang Moab.
21 “Ginhukman ang kapatagan,+ ang Holon, ang Jahaz,+ kag ang Mefaat;+
22 ang Dibon,+ ang Nebo,+ kag ang Bet-diblataim;
23 ang Kiryataim,+ ang Bet-gamul, kag ang Bet-meon;+
24 ang Keriot+ kag ang Bozra; kag ang tanan nga siudad sang Moab, ang malayo kag ang malapit.
25 ‘Gin-utod ang kusog* sang Moab;Ginbali ang iya butkon,’ siling ni Jehova.
26 ‘Hubuga ninyo sia,+ kay nagpabugal sia batok kay Jehova.+
Nagligid ang Moab sa iya suka,Kag nangin kaladlawan sia.
27 Indi bala nga ginkadlawan mo ang Israel?+
Ukon kawatan bala sia,Amo nga nagalungolungo ka kag nagahambal batok sa iya?
28 Bayai ang mga siudad kag mag-istar kamo sa daku nga bato, kamo nga mga pumuluyo sang Moab,Kag mangin kaangay kamo sang salampati nga nagahimo sing pugad sa mga banglid.’”
29 “Nabatian namon ang pagpabugal sang Moab, ang iya tuman nga pagkahambog,Ang iya pagkaarogante, pagkabugalon, pagkahambog, kag pagkamatinaastaason sang iya tagipusuon.”+
30 “‘Nahibaluan ko ang iya kaakig,’ siling ni Jehova,‘Apang mangin wala sing pulos ang iya pagpabugal.
Indi matabo ang iya ginapanikal.
31 Amo kon ngaa magahaya ako tungod sa Moab,Magasinggit ako tungod sa bug-os nga MoabKag magakasubo ako tungod sa katawhan sang Kir-heres.+
32 Sobra pa sa paghibi ko sa Jazer,+Magahibi ako sa imo, ikaw nga puno sang ubas sang Sibma.+
Nagtabok sa dagat ang imo madabong nga mga sanga.
Nakalambot ini sa dagat, tubtob sa Jazer.
Ginsalakay sang manuglaglagAng imo mga prutas sa tingadlaw* kag ang imo pinupo nga mga ubas.+
33 Wala na sing pagkinasadya kag paghinugyaw sa mga kakahuyanKag sa duta sang Moab.+
Ginpauntat ko ang pag-ilig sang alak sa mga linasan sang ubas.
Wala na sing magalinas nga nagahugyaw.
Magasinggit sila apang indi tungod sa kalipay.’”+
34 “‘Nagasinggit sila sa Hesbon+ kag nabatian ini tubtob sa Eleale.+
Nabatian ang ila singgit tubtob sa Jahaz,+Ang singgit sa Zoar nabatian tubtob sa Horonaim+ kag sa Eglat-selisiya.
Magahubas bisan ang katubigan sang Nimrim.+
35 Pauntaton ko sa Moab,’ siling ni Jehova,‘Ang isa nga nagahalad sa sagrado nga mataas nga duogKag ang isa nga nagahalad sa iya dios.
36 Amo kon ngaa tungod sa Moab ang akon tagipusuon magapanghayhay* nga daw nagapanghayhay nga tunog sang plawta,*+Kag tungod sa katawhan sang Kir-heres ang akon tagipusuon magapanghayhay* nga daw nagapanghayhay nga tunog sang plawta.*
Kay madula ang bugana nga manggad nga iya natipon.
37 Kay ang tanan nagpakalbo,+Kag ang tanan nagpamarbas.
Ginpilasan sang tanan ang ila kamot,+Kag nagasuksok sila sing sako sa ila balikawang!’”+
38 “‘Nagahaya ang mga tawo sang MoabSa tanan nila nga atopKag sa tanan nila nga plasa.
Kay ginbuka ko ang MoabPareho sang ginhaboy nga tibod,’ siling ni Jehova.
39 ‘Nahadlok gid sia! Maghaya kamo!
Nagpalagyo ang Moab tungod sa kahuya!
Ang Moab nangin butang nga kaladlawan,Butang nga ginakahadlukan sang tanan sa palibot niya.’”
40 “Kay amo ini ang ginasiling ni Jehova:
‘Subong sang agila nga nagapangdagit,+Humlaron niya ang iya mga pakpak sa Moab.+
41 Sakupon ang mga banwa,Kag agawon ang iya mga kuta.
Sa sina nga adlaw ang mga hangaway sang Moab makulbaanPareho sang babayi nga manugbata.’”
42 “‘Ang Moab malaglag subong isa ka pungsod,+Kay nagpahambog sia batok kay Jehova.+
43 Ang kahadlok kag ang buho kag ang siod yara sa atubangan mo,Ikaw nga pumuluyo sang Moab,’ siling ni Jehova.
44 ‘Ang bisan sin-o nga malagyo tungod sa kahadlok mahulog sa buho,Kag ang bisan sin-o nga maggua sa buho madakpan sa siod.’
‘Kay silutan ko ang Moab sa gintalana nga tuig,’ siling ni Jehova.
45 ‘Ang mga nagpalagyo nagtindog nga wala sing kusog sa landong sang Hesbon.Kay may kalayo halin sa Hesbon
Kag may dabdab halin sa siudad sang Sihon.+
Sunugon sini ang agtang sang MoabKag ang bagol sang magahod nga mga hangaway.’+
46 ‘Makaluluoy ka, Moab!
Nalaglag ang katawhan ni Kemos.+
Kay nabihag ang imo mga anak nga lalaki,Kag gintapok ang imo mga anak nga babayi.+
47 Apang tipunon ko ang mga nabihag sa Moab sa hingapusan nga mga adlaw,’ siling ni Jehova.
‘Diri natapos ang mensahe tuhoy sa paghukom sa Moab.’”+
Footnote
^ Ukon “malig-on nga kahitaasan.”
^ Ukon “kalag.”
^ Ukon “manubo nga patag.”
^ Ukon mahimo, “sa mamala nga duta.”
^ Sa literal, “sungay.”
^ Mahimo gid nga mga igos kag ayhan mga bunga sang palma.
^ Ang plawta nga ginatokar sa panalambiton sa lubong.
^ Ukon “magagahod.”
^ Ang plawta nga ginatokar sa panalambiton sa lubong.
^ Ukon “magagahod.”
