Oseas 6:1-11
6 “Kari kamo, magbalik kita kay Jehova,Kay ginlapalapa niya kita,+ apang ayuhon niya kita.
Ginsakit niya kita, apang bugkusan niya ang aton mga pilas.
2 Buhion niya kita pagligad sang duha ka adlaw.
Sa ikatlo nga adlaw pabangunon niya kita,Kag magakabuhi kita sa iya atubangan.
3 Makilala naton kag tinguhaan gid naton nga makilala si Jehova.
Subong kapat-od sang pamanagbanag, pat-od nga magaabot sia;Magakadto sia sa aton pareho sang nagatupa nga ulan,Pareho sang ulan sa tigpamulak nga nagapanalupsop sa duta.”
4 “Ano ang himuon ko sa imo, O Efraim?
Ano ang himuon ko sa imo, O Juda?
Kay ang inyo mainunungon nga gugma daw alipuop sa aga,Daw tun-og nga madasig nga nagakadula.
5 Amo kon ngaa utdon ko sila paagi sa mga manalagna;+Patyon ko sila paagi sa mga pulong sang akon baba.+
Ang paghukom sa inyo magasilak nga daw kapawa.+
6 Kay nahamuot ako sa mainunungon nga gugma,* kag indi sa halad,Kag sa ihibalo tuhoy sa Dios, sa baylo nga sa bug-os nga mga dulot nga sinunog.+
7 Apang kaangay sang tawo, ginlapas nila ang katipan.+
Ginluiban nila ako didto.
8 Ang Gilead isa ka banwa sang mga malauton,+Puno ini sang agi sang mga tiil nga may dugo.+
9 Ang mga saserdote daw guban sang mga tulisan nga nagapanglambat sing tawo.
Nagapamatay sila sa dalan sa Siquem,+Kay makahuluya ang ila ginahimo.
10 Nakakita ako sing makangilil-ad nga butang sa panimalay ni Israel.
Nagpakighilawas didto ang Efraim;+Gindagtaan sang Israel ang iya kaugalingon.+
11 Dugang pa, O Juda, may gintalana nga pag-ani sa imo,Kon tipunon ko liwat ang akon katawhan nga nabihag.”+
Footnote
^ Ukon “sa kaluoy.”
