Rut 2:1-23
2 Si Noemi may paryente nga si Boaz.+ Manggaranon sia kag kilala nga tawo halin sa panimalay sang iya bana nga si Elimelec.
2 Si Rut nga Moabnon nagsiling kay Noemi: “Palihug, tuguti ako nga magkadto sa uma kag managhaw+ sing mga uhay sang tawo nga magtugot sa akon sa paghimo sini.” Gani si Noemi nagsiling sa iya: “Sige, lakat ka, anak ko.”
3 Gani naglakat sia kag nagkadto sa uma agod managhaw sa mabilin sang mga mangangani. Natabuan man nga ang tag-iya sang uma nga nakadtuan niya amo si Boaz,+ nga katapo sang panimalay ni Elimelec.+
4 Amo man ang pag-abot ni Boaz halin sa Betlehem kag nagsiling sia sa iya mga mangangani: “Kabay nga si Jehova mangin kaupod ninyo.” Kag nagsabat man sila: “Kabay nga pakamaayuhon ka ni Jehova.”
5 Namangkot si Boaz sa bataon pa nga lalaki nga nagadumala sang iya mga mangangani: “Sin-o ang pamilya sining bataon nga babayi?”
6 Nagsabat sia: “Sia ang Moabnon+ nga nag-upod kay Noemi sang pagbalik niya halin sa Moab.+
7 Nagsiling sia sa akon, ‘Tuguti ako nga managhaw+ kag mamulot sing mga uhay* nga mabilin sang mga mangangani.’ Kag aga pa sia nagsugod sa pagpanaghaw kag bag-o lang gid sia magpahuwayhuway sa payag.”
8 Nagsiling si Boaz kay Rut: “Pamatii ako, anak ko. Indi ka na magkadto sa iban nga uma. Diri ka na lang magpanaghaw upod sa akon mga mangangani nga babayi.+
9 Bantayi kon diin sila mangani kag mag-upod ka sa ila. Ginsilingan ko na ang akon mga tinawo nga lalaki nga indi ka paghilabtan.* Kon uhawon ka gani, mag-inom ka lang sa mga banga nga ginsag-uban nila.”
10 Kag nagluhod sia nga halos nagahapa sa duta kag nagsiling sa iya: “Ngaa maayo ka gid sa akon bisan isa ako ka dumuluong?”+
11 Si Boaz nagsabat sa iya: “Ginsugiran ako sang tanan nga ginhimo mo para sa imo ugangan sang mapatay ang imo bana kag kon paano nga ginbayaan mo ang imo amay kag ang imo iloy kag ang imo duta nga natawhan kag nag-istar upod sa katawhan nga wala mo makilala sang una.+
12 Kabay nga padyaan ni Jehova ang imo ginahimo+ kag kabay nga makabaton ka sing himpit nga suhol* halin kay Jehova nga Dios sang Israel, nga sa idalom sang iya mga pakpak nagdangop ka.”+
13 Kag si Rut nagsiling: “Kabay nga mahamuot ka sa akon, ginuo ko, bangod ginlugpayan mo ako kag naghambal ka nga may pag-ulikid sa* imo alagad, bisan pa indi ako isa sa imo mga alagad.”
14 Sang tion na sa pagkaon, si Boaz nagsiling kay Rut: “Dali diri, magkaon ka sing tinapay kag isawsaw ini sa langgaw.” Gani, nagpungko sia upod sa mga mangangani kag ginhatagan sia ni Boaz sang sinanlag nga uyas, kag nagkaon sia kag nabusog, kag may nabilin pa sia nga pagkaon.
15 Sang nagtindog sia agod managhaw,+ ginsilingan ni Boaz ang iya mga tinawo nga lalaki: “Pabay-i ninyo sia nga magpanaghaw sing mga uhay* kag indi ninyo sia paghilabti.+
16 Magkuha man kamo sing mga uhay sa mga binugkos kag ibilin ini agod masaghaw niya kag indi ninyo sia pagsawaya.”
17 Gani nagpanaghaw sia sa uma tubtob sa gab-i.+ Sang ginpaspas niya ang iya nasaghaw, mga isa ka efa* nga sebada ini.
18 Dayon, gindala niya ini kag nagpauli sia sa siudad, kag nakita sang iya ugangan ang iya nasaghaw. Ginpagua man ni Rut kag ginhatag sa iya ugangan ang iya nabilin nga pagkaon+ sang nabusog na sia.
19 Namangkot sa iya ang iya ugangan: “Diin ka nanaghaw kaina kag kay sin-o uma? Kabay nga pakamaayuhon ang nagpakita sa imo sing kahamuot.”+ Ginsugiran niya ang iya ugangan kon kay sin-o uma sia nanaghaw: “Nanaghaw ako sa uma ni Boaz.”
20 Kag si Noemi nagsiling sa iya umagad: “Kabay nga pakamaayuhon sia ni Jehova, nga padayon nga nagapakita sang iya mainunungon nga gugma sa mga buhi kag mga patay.”+ Kag nagsiling pa si Noemi: “Paryente naton sia+ kag may katungdanan sia* sa aton.”+
21 Si Rut nga Moabnon nagsiling: “Ginsilingan pa gani niya ako, ‘Upod ka lang sa akon mga mangangani nga babayi tubtob matapos ang tanan ko nga alanyon.’ ”+
22 Gani, si Noemi nagsiling sa iya umagad: “Mas maayo, anak ko, nga mag-upod ka sa iya mga mangangani nga babayi, kay basi gamuhon ka lang kon sa iban nga uma ka magpanaghaw.”
23 Gani, padayon sia nga nag-upod sa mga mangangani nga babayi ni Boaz kag nagpanaghaw tubtob natapos ang tig-alani sang sebada+ kag ang tig-alani sang trigo. Kag padayon sia nga nagaistar upod sa iya ugangan.+
Footnote
^ Ukon mahimo, “mga linaylay.”
^ Ukon “pagdisturbuhon.”
^ Ukon “sing bug-os nga padya.”
^ Sa literal, “naghambal ka sa tagipusuon sang.”
^ Ukon mahimo, “mga linaylay.”
^ Mga 22 ka litro. Tan-awa ang Apendise B14.
^ Ukon “Paryente naton sia nga may kinamatarong sa paggawad (pagtubos).”
