Salmo 147:1-20
147 Dayawa ninyo si Jah!*
Maayo nga mag-amba sing mga pagdayaw* sa aton Dios;Maayo gid kag nagakaigo nga dayawon naton sia!+
2 Ginatukod ni Jehova ang Jerusalem;+Ginatipon niya ang naglinapta nga mga pumuluyo sang Israel.+
3 Ginaayo niya ang buong sing tagipusuon;Kag ginabugkusan niya ang ila mga pilas.
4 Ginaisip niya ang kadamuon sang mga bituon;Ginatawag niya sila tanan sa ngalan.+
5 Ang aton Ginuo gamhanan gid;+Indi matungkad ang iya kaalam.*+
6 Ginabayaw ni Jehova ang mahagop,+Apang ginapaubos niya ang malauton sa duta.
7 Mag-amba kamo nga may pagpasalamat kay Jehova;Mag-amba sing mga pagdayaw sa aton Dios nga ginatukaran sang arpa,
8 Ang Isa nga nagatabon sang kalangitan sing mga panganod,Ang Isa nga nagahatag sang ulan sa duta,+Ang Isa nga nagapatubo sang mga hilamon+ sa kabukiran.
9 Ginahatagan niya sing pagkaon ang kasapatan,+Kag ang nagasiniyak nga mga boto sang uwak.+
10 Wala sia nagadayaw sa kusog sang kabayo;+Ukon sa kadasigon sang tawo.+
11 Kundi nagakalipay si Jehova sa mga nagakahadlok sa iya,+Sa mga nagahulat sang iya mainunungon nga gugma.+
12 Himayaa si Jehova, O Jerusalem.
Dayawa ang imo Dios, O Sion.
13 Ginapabakod niya ang mga pintal sang mga gawang sang imo siudad;Ginapakamaayo niya ang imo mga anak sa sulod mo.
14 Nagahatag sia sing paghidait sa imo teritoryo;+Ginabusog niya ikaw sang pinakamaayo nga* trigo.+
15 Ginapadala niya ang iya sugo sa duta;Madasig ini nga nakalab-ot didto.
16 Ginatabunan niya ang duta sang niebe nga daw kaangay sang habol nga puti;+Ginalapta niya ang mapino nga yelo kaangay sang abo.+
17 Ginapaulan niya ang iya mga yelo kaangay sang magagmay nga tinipik sang tinapay.+
Sin-o ang makaagwanta sang katugnaw sini?+
18 Nagasugo sia, kag nagakatunaw ang yelo.
Ginapahuyop niya ang iya hangin,+ kag nagailig dayon ang tubig.
19 Ginasugid niya ang iya pulong kay Jacob,Ang iya mga pagsulundan kag mga sugo sa Israel.+
20 Wala niya ini ginhimo sa iban nga pungsod;+Wala sila makahibalo sang iya mga sugo.
Dayawa ninyo si Jah!*+
Footnote
^ Ukon “Hallelujah!” Ang “Jah” amo ang ginpalip-ot nga ngalan ni Jehova.
^ Ukon “nga maglanton.”
^ Ukon “paghangop.”
^ Sa literal, “sang tambok sang.”
^ Ukon “Hallelujah!” Ang “Jah” amo ang ginpalip-ot nga ngalan ni Jehova.
