Salmo 148:1-14
148 Dayawa ninyo si Jah!*
Dayawa ninyo si Jehova, kamo nga yara sa kalangitan;+Dayawa ninyo sia, kamo nga yara sa kahitaasan.
2 Dayawa ninyo sia, kamo tanan nga iya mga anghel.+
Dayawa ninyo sia, kamo tanan nga iya kasuldadusan.+
3 Dayawa ninyo sia, adlaw kag bulan.
Dayawa ninyo sia, kamo tanan nga nagasiga nga mga bituon.+
4 Dayawa ninyo sia, kamo nga pinakamataas nga kalangitan*Kag kamo nga mga panganod sa kalangitan.
5 Magdayaw sila sa ngalan ni Jehova,Kay nagsugo sia, kag natuga sila.+
6 Ginpaluntad niya sila sa wala sing katubtuban;+Naghatag sia sing pagsulundan nga magapabilin tubtob san-o.+
7 Dayawa si Jehova, kamo nga yara sa duta,Kamo nga dalagku nga mga sapat sa dagat kag kamo tanan nga madalom nga katubigan,
8 Kamo nga kilat kag ulan nga yelo, niebe kag madamol nga panganod,Kamo nga mabaskog nga hangin, nga nagatuman sang iya pulong,+
9 Kamo nga kabukiran kag kamo tanan nga kabakuluran,+Kamo nga mga kahoy nga nagapamunga kag kamo tanan nga sedro,+
10 Kamo nga ilahas nga mga sapat+ kag kamo tanan nga mahagop nga mga sapat,Kamo nga nagakamang nga mga sapat kag mga kapispisan,
11 Kamo nga mga hari sang duta kag kamo tanan nga pungsod,Kamo nga mga prinsipe kag kamo tanan nga hukom sang duta,+
12 Kamo nga mga pamatan-on nga lalaki kag mga pamatan-on nga babayi,*Kaupod ang tigulang nga mga lalaki kag mga bata.*
13 Magdayaw sila sa ngalan ni Jehova,Kay ang iya ngalan lamang ang labaw sa tanan.+
Ang iya kadungganan mataas pa sa duta kag langit.+
14 Bayawon niya ang kusog* sang iya katawhan,Para sa kadayawan sang tanan nga mainunungon sa iya,Sang mga anak sang Israel, ang katawhan nga suod sa iya.
Dayawa ninyo si Jah!*
Footnote
^ Ukon “Hallelujah!” Ang “Jah” amo ang ginpalip-ot nga ngalan ni Jehova.
^ Sa literal, “nga mga langit sang mga langit.”
^ Sa literal, “mga birhen.”
^ Ukon “Kaupod ang mga tigulang kag mga bata.”
^ Sa literal, “sungay.”
^ Ukon “Hallelujah!” Ang “Jah” amo ang ginpalip-ot nga ngalan ni Jehova.
