Bug-os Kalibutan nga Report

◼ Aprika

Kadamuon sang pungsod: 56

Populasyon: 770,301,093

Kadamuon sang manugbantala: 983,057

Kadamuon sang pagtuon sa Biblia: 1,769,182

Nakahibalo ka bala nga ginabantala ang maayong balita sa Sahara? Ang 17-anyos nga si Nafissatou nagaistar sa banwa nga may minahan sa naaminhan nga Niger. Sang ang ginaistoryahan sang iya mga kabutho parte na sa pornograpiya, naglakat si Nafissatou. Ginsundan sia sang isa ka estudyante kag ginpamangkot kon ngaa. Nagsabat si Nafissatou nga wala niya maluyagi yadto nga sahi sang paghambalanay. Sang primero ginyamuhat niya sia, nga nagsiling nga wala sing malain sa pagtan-aw sing pornograpiya. Nagsabat si Nafissatou nga serioso ini nga butang bangod wala mahamuot sa sini ang Manunuga. Ginkuha niya dayon ang libro nga Questions  Young People Ask​​—Answers That Work sa iya bag kag ginpakita sa dalagita ang bahin nga nagabinagbinag sang mga katalagman sang pornograpiya. Masunod ginkuha niya ang iya Biblia kag ginbasa sa iya ang 2 Corinto 7:1. Gin-ako sang estudyante nga kon magtan-aw sia sing imoral nga mga video, may mabatyagan sia nga indi niya mapaathag. Nagpangabay sia sing isa ka kopya sang Young People Ask nga libro. Ginhatagan sia ni Nafissatou kag nagsiling sang ulihi: “Sang nakita ko sia liwat, nagaisahanon na lang sia, gani ginpamangkot ko sia kon diin na ang iya mga abyan. Nagsiling sia, ‘Ini nga libro ang akon abyan.’ Ginsugdan ko ang pagtuon upod sa iya, kag nagtambong sia sa Memoryal.”

Kapin na sa 15 ka tuig, nga nagtuon sing Biblia ang isa ka babayi upod sa misyonera sa Tanzania. Pila ka tuig sila nga nagtuon. Nagpangalag-ag ang babayi nga manindugan sa kamatuoran bangod sang pagpamatok sang iya pamilya, kag sang ulihi nag-untat sia sa pagtuon. Apang, mahipos gali nga nagapamati ang iya duha ka bata nga babayi samtang nagatuon ang ila iloy. Sang maghalin na sa balay ang magulang nga bata sang mag-18 anyos sia, nagkadto sia gilayon sa Kingdom Hall kag nagpangabay sing isa ka pagtuon. Madasig sia nga nag-uswag kag nabawtismuhan. Nagpangabay man ang iya manghod nga magtuon sa Biblia, kag nabawtismuhan man sia. Bangod napalig-on sa malig-on nga panindugan sang iya mga anak sa kamatuoran, namat-od ang iloy nga magtuon liwat sa Biblia. Sini nga tion nalandas na niya ang kahadlok sa tawo nga nagpugong anay sa iya nga mag-uswag, kag nabawtismuhan sia sa isa ka sirkito nga asambleya sang Mayo 2004.

Kon tumanon sang kongregasyon ang sugo nga “atipanon ang mga ilo kag ang balo nga mga babayi sa ila kapipit-an,” pat-od gid nga pakamaayuhon ini ni Jehova. (Sant. 1:27) Natabo ini sa isa ka kongregasyon sa Lesotho. Isa sa mga bawtismado nga katapo sang kongregasyon si Mapolo, isa ka nagasolo nga iloy nga may apat ka magagmay nga mga anak nga lalaki. Nahibaluan ni Mapolo nga malapit na sia mapatay bangod sang iya balatian, gani ginhanas niya ang iya kabataan sa pag-atipan sa ila kaugalingon. Gintudluan niya sila sa Biblia, ginpaupod sila sa mga miting, kag gintudluan sila  sa paghimo sing silhig, nga ila ginbaligya sa higad-dalan. Sang napatay si Mapolo sang 1998, gin-atipan ang iya nailo nga kabataan sang ila lola. Ang misyonera nga nagbulig kay Mapolo nga mangin bawtismado nga Saksi nagpalapit sa ahensia sang social welfare kag ginbuligan niya ang mga ilo nga makakuha sing bulig agod mabayaran ang ila matrikula. Ginhatagan sang iban nga mga Saksi sing panapton ang mga bata. Sang ulihi, napatay ang ila lola. Isa ka utod nga lalaki sa kongregasyon ang nagtuon sing Biblia upod sa ila kag nagbayad sang ila arkila sa balay. Regular nga nagatambong sa mga miting ang apat ka bata. Ang duha sa ila di-bawtismado na nga mga manugbantala, kag ang kamagulangan, si Rantso, nga 20 anyos na karon, ginbawtismuhan sa isa ka sirkito nga asambleya sang Marso 2004. Nagdumala sia sing pagtuon sa Biblia sa iya pakaisa, nga si Retselisitsoe, nga nabawtismuhan sa amo man nga adlaw. Nagapasalamat gid si Rantso sa mahigugmaon nga pag-atipan sang mga kauturan sa iya kag sa iya mga manghod sa sulod sang mga tinuig.

Ang isa ka misyonero sa Cameroon nagreport: “Kada semana, samtang nagatuon ako sing Biblia sa isa ka pamatan-on nga lalaki, mabatian ko nga may nagaamba sing relihioso nga mga ambahanon sa sulod sang balay. Ginpamangkot ko ang akon ginatun-an, ‘Sin-o inang nagaamba?’ Ang manghod gali niya nga bulag nga si Stephen. Gingamit ko ang audiocassette sang brosyur nga Ano ang Ginapatuman Sang Dios sa Aton? agod sugdan ang pagtuon sa Biblia kay Stephen. Tulumuron namon nga sauluhon ang isa ka teksto sa Biblia sa kada leksion. Matinandaon si Stephen kag madamo nga teksto sa Biblia ang iya nasaulo. Nagatambong man sia sa mga miting kag pirme nagakomento. Sining karon lang, ginhatag niya ang iya nahauna nga bahin sa Teokratikong Eskwelahan Para sa Ministeryo. Isa ini ka pagbasa sa Biblia, kag bangod indi makahibalo si Stephen sing Braille, dapat niya ini sauluhon. Ginalauman ko nga madapit ko si Stephen kag maupdan sia sa ministeryo sa ulihi. Ang isa sa paborito nga mga teksto ni Stephen sa Biblia amo ang Isaias 35:​5, nga nagasiling: ‘Ang mga mata sang mga bulag pamuklaton.’ Nalipay si Stephen nga namuklat na ang iya espirituwal nga mga mata, kag nagaamba na sia karon sing pagdayaw  kay Jehova, nagapasalamat sa Iya nga sa palaabuton ipasag-uli man ang iya literal nga panulok.”

Sa Liberia, diin may inaway, nagpalapit ang babayi nga si Nancy sa isa ka Saksi kag nagpangabay nga magtuon sing Biblia. Ginsilingan sia sang pastor sang ila simbahan nga dalhon sang Dios sa impierno ang mga Saksi ni Jehova bangod indi sila matuod nga mga Cristiano. Apang, nagapuyo sia malapit sa pila ka Saksi, kag naobserbahan niya nga kon magtahaw na ang linupok, ginahibalo pirme sang mga gulang sang kongregasyon sa ila lugar ang kahimtangan sang ila mga kauturan. Natalupangdan man niya nga ginakalitan sang mga Saksi ang matawhay nga kahimtangan agod makapanaksi sa iban. Dayaw gid si Nancy kag ang madamo pa sa banwa sang ang salakyan halin sa sanga talatapan amo ang una nga nakatabok sa dulunan sang nagaaway nga mga grupo kag may dala nga kinahanglanon gid nga mga butang, nga gindonar sang mga Saksi sa Pransia kag Belgium. “Sa banta ko yara sa inyo ang kamatuoran,” siling niya. Nagauswag sia sa iya pagtuon.

Isa ka lamharon nga lalaki ang nagkadto sa isa ka minuro sa Uganda agod magtrabaho subong kantero sa balay nga ginahiwatan sang miting sang mga kauturan. Ginkalitan sang isa sa mga payunir nga magpanaksi sa kantero, kag naluyagan niya ang iya nabatian. Apang, wala madugay kinahanglan na nga magpauli sia sa iya minuro sa bukid. Bangod wala sing mga Saksi sa ginaistaran sang lalaki, gintudlo sang payunir ang pinakamalapit nga Kingdom Hall. Nagbisikleta sia sing 30 kilometros sa makitid kag yab-ukon nga dalan padulhog halin sa bukid agod pangitaon ang mga kauturan. Bangod wala sing tawo sa Kingdom Hall, nagbilin sia sing malip-ot nga sulat sa idalom sang puertahan, nga nagapangabay sing pagtuon sa Biblia. Sang ginkadtuan sia sang ulihi sang payunir sa iya minuro, nakibot ang payunir sang makita niya ang 200 ka tawo nga nagahulat nga makabati sang mensahe sang Biblia! Madamo sa ila ang nagpakita sing sinsero nga interes sa pagtuon sing Biblia. Ginahiwat na karon ang mga miting sa sining nabaw-ing nga duog.

Sang isa ka kasisidmon sa gamay nga minuro nga may mga 600 ka pumuluyo sa nabagatnan-sidlangan sang Nigeria, nakakita  ang mga tagaminuro sing kapawa sa langit nga nagabanaag sa suba. Daw nagapakadto sa ila ang kapawa, gani nagpalagyo ang mga tagaminuro. Abi sang madamo amo na ini ang kalaglagan nga ginabantala sang mga Saksi ni Jehova, gani nagkadto sila sa Kingdom Hall, nga nagasiling, “Indi paglaglagon sang Armagedon ini nga tinukod.” Sang ulihi, sang mga alas 10:00 sang gab-i, natukiban sang mga tagaminuro nga naghalin gali ang kasanag sa daku nga sunog sa kagulangan. Sang ginpamangkot sang mga kauturan ang mga tagaminuro kon ngaa wala sila magkadto sa malapit nga mga simbahan, nagsabat ang isa ka tawo: “Wala sing pulos ang iban nga mga simbahan. Ang inyo Armagedon magalaglag sini apang indi sini paglaglagon ang Kingdom Hall.”

Ang isa ka utod nga babayi nga regular payunir sa isa ka kampo sang mga refugee sa Guinea nag-asoy: “Samtang nagapamalaybalay, nasugilanon ko ang isa ka otso anyos nga bata nga babayi sa ila balay. Indi sia makalakat. Ginsugiran niya ako nga masami sia ginabilin sang iya mga ginikanan sa ila balay sa bug-os nga adlaw kag ginakandaduhan ang ganhaan. Ginsilingan ko sia nga gusto ko sia mangin amiga. Ginpamangkot ko sia dayon kon ano ang gusto niya nga himuon sang Dios sa iya. Ginsilingan niya ako nga gusto niya nga palakton sia sang Dios. Ginbuksan ko ang Biblia sa Isaias 35:​5, 6 kag ginpakita sa iya ang saad ni Jehova nga palakton ang piang. Gintudlo ko dayon ang laragway sa brosyur nga Agoma ang Kabuhi sa Duta Sing Dayon! nga nagapakita nga ginaayo ni Jesus ang mga masakiton. Ginsilingan ko man sia nga matigayon niya ini nga mga pagpakamaayo kon magtuon sia sing Biblia kag himuon ang ginapatuman ni Jehova sa iya. Nagpasugot sia nga magtuon sing Biblia sa ila balay. Natapos na namon ang Kabuhi sa Duta nga brosyur kag manugtapos na kami sa brosyur nga Mahimo Ka Mangin Abyan Sang Dios! Pagkatapos sang tatlo ka semana nga pagtuon, nagsiling sia nga luyag niya magtambong sa mga miting. Sanglit indi sia makalakat, ginasugat ko sia sa iya balay kag ginaaba ko sia pakadto sa miting. Naluyagan gid niya ang mga miting amo nga kon indi ko gani sia masugat, nagalain ang iya buot sa akon kag nagahibi pa sia.”

 MGA KADUTAAN SA AMERIKA

Kadamuon sang pungsod: 56

Populasyon: 868,871,739

Kadamuon sang manugbantala: 3,165,925

Kadamuon sang pagtuon sa Biblia: 3,089,453

Si Marie nga taga-Guadeloupe nagreport: “Sa ginaobrahan ko nga hotel malapit sa baybay, ginsilingan ako sang pila ka kostumer nga duha ka adlaw na nga nabilin ang pila ka bayo kag sapatos nga natungtong sa bato. Ginkuha ko ini agod hibaluon kon sin-o ang tag-iya. Ang akon nakita amo ang kahita nga nagaunod sing 1,067 ka euro [$1,372 U.S.]! Ginsilingan ako sang pila nga nakakita nga tulungaon na lang namon ang kuarta. Ginsilingan ko sila gilayon nga isa ako sang mga Saksi ni Jehova kag ang akon konsiensia nagadikta sa akon nga mangin bunayag. Gani gindala ko ang tanan sa reception desk sang hotel. Natingala man ang mga  empleyado didto nga wala ko ginkuha ang kuarta. Ginpaathag ko liwat ang akon pagtamod. Sang nagbalik ako sa higad-baybay, ang iban nga mga tawo interesado nga makahibalo sing dugang pa tuhoy sa aton mga ginapatihan. Gingamit ko ang Biblia sa pagpanaksi sa ila. Ang isa ka babayi sa grupo nagsiling, ‘Mga Saksi ni Jehova lang ang paobrahon ko sa akon.’ ” Sang ulihi nakita ang tag-iya sang mga gamit kag gindayaw sang pulis ang utod nga babayi tungod sang iya pagkabunayag.

Si Antonio nga isa ka Bethelite sa Mexico nagapanginpulos gid sang tagsa ka higayon agod masugilanon ang mga tawo tuhoy sa kamatuoran. Sining karon lang, samtang nagasakay sa bus pakadto sa miting sang kongregasyon, nakapahamtang sia sing tract sa maayo sing pamiste nga lalaki kag babayi. Ginsundan yadto sing maayo nga paghambalanay. “Nagpaalam ako sa ila sang manaug na ako,” siling ni Antonio, “apang nakibot ako sang manaug man sila upod sa akon agod padayunon ang amon paghambalanay, bisan indi pa amo yadto ang ila palanaugan. Sang nakapanaug na kami, nag-istoryahanay pa kami sing makadali, kag liwat ako nga nagpaalam. Namangkot sila, ‘Diin ka makadto?’ ‘Sa miting sang amon kongregasyon,’ sabat ko. Nagtulukay sila kag dayon namangkot, ‘Puede bala kami makaupod sa imo?’ ‘Sige!’ siling ko.” Ang bataon nga babayi, nga isa ka abogada, kag ang iya hinablos nga lalaki, nga nagaeskwela sa isa ka unibersidad, nakabati na anay sang mensahe sang kamatuoran mga tinuig antes sini apang wala sila nagpadayon bangod sang pagpamatok sang ila pamilya. Samtang nagalakat upod kay Antonio pakadto sa miting, nagsiling sila nga gusto gid tani nila makita ang tawo nga una nga nagbantala sa ila tuhoy sa Biblia. Nakibot gid sila sang nakita nila sia didto! Nalipay gid sila nga nakatambong sa miting kag luyag gid nila nga magtuon sa Biblia. “Si Jehova ang nagtuytoy sa amon diri, kag sugod subong magapadayon na kami nga magatuon kag magatambong,” siling sang bataon nga babayi. Ginhimo ang mga kahimusan para sa pagtuon, nga ginahiwat makaduha sa isa ka semana.

 Sa Haiti, si Jacqueline, asawa sang nagalakbay nga manugtatap, nag-upod sa isa ka payunir nga utod nga babayi sa pagbantala sang nakita nila ang isa ka lin-ay nga isahanon nga nagapungko sa higad sang dalan kag nagahibi. Ginpalapitan sia sang mga utod kag ginpamangkot kon ngaa nagahibi sia. Sang primero, ang lin-ay wala magsabat, apang bangod sa pag-uloulo sang mga utod, nagsabat sia, “Nahimo ko na ang luyag ko himuon.” Nahantop gilayon ni Jacqueline nga nag-inom sia sing hilo kag sang ginpamangkot sia ni Jacqueline kon nakainom na sia, naghangdo sia. Dalidali nga gindala sia sang mga utod nga babayi sa ospital para ipabulong. Pagkasunod nga semana, ginduaw kag ginpalig-on sia sang payunir nga utod nga babayi. Nasugdan ang isa ka pagtuon sa Biblia.

Sa checkout counter sang isa ka balaligyaan sa Paraguay, nakibot gid si Lourdes sang nahibaluan niya nga peke gali nga kuarta ang iya ginbayad. Gintawag gilayon sang kahera ang guardia. Si Lourdes kag ang iya lima ka tuig nga bata nga babayi nga si Ingrid, ginpasulod sa gamay nga kuarto kag ginpahulat sa mga pulis. Ginpilit sang manedyer sang baligyaan kag sang guardia ang utod nga babayi nga isugid sa ila kon diin niya nakuha ang peke nga kuarta. Indi na madumduman ni Lourdes kon diin niya ini nakuha kag ginsilingan niya sila nga wala sia makahibalo nga peke gali ato. Naugot nga gintulok ni Ingrid ang manedyer kag ang guardia kag nagsiling: “Ginatrato ninyo kami nga daw mga makawat. Indi makawat ang iloy ko. Mga Saksi ni Jehova kami, kag wala kami nagabutig.” Ginpamangkot sang manedyer si Lourdes kon Saksi sia, kag nagsiling sia, “huo.” Nakumbinsi sang ulihi ang mga lalaki nga si Lourdes isa gid man ka Saksi sang nagtelepono sila sa ulong talatapan sang mga Saksi ni Jehova. Nangayo sila sing pasaylo kay Lourdes kag kay Ingrid sa natabo kag ginpalakat sila. Sang ulihi, si Ingrid nagsiling nga ang ginainitan gid niya sa tanan amo nga wala sila makabakal sang paborito gid niya nga popcorn.

Ang isa ka utod nga lalaki sa Costa Rica namat-od nga bantalaan ang iya Katoliko nga kaingod. Natahap ang utod bangod  wala maluyagi sining tawo ang mga Saksi; ginapasipalahan pa gani niya sila. Sa kakibot sang utod, ginpadayon sia sang tawo kag ginpaathag kon ngaa nagbag-o ang iya panimuot. Gin-imbitar sia sang iya abyan sa pagkadto sa isa ka malayo nga komunidad sa pagtambong sa simbahan sang Evangelical. Pag-abot niya didto, gin-agda sia sa paghatag sang “testimonya.” Ang ginsiling lang niya amo nga isa sia ka Katoliko. Wala yadto maluyagi sang mga tawo kag gintabog sia sa simbahan kag ginsilingan ang iya abyan nga basi sikwayon sia sa ila simbahan bangod nakig-upod sia sa isa ka Katoliko. Naghalin ang tawo sa simbahan, apang bangod malayo ang iya balay kag indi niya sunado ang lugar, indi niya mahibaluan kon diin sia mapaligad sing gab-i. Nagkadto sia sa isa ka balay kag ginsugid ang natabo, kag ginpadayon sia. Ginpakaon sia didto, kag gintanyagan sing duog nga matulugan sadto nga gab-i. Ginpanaksihan man sia sang tag-iya sang balay. Huo, mga Saksi ni Jehova sila. Natandog gid sia nga mahibaluan nga ang mga Saksi nagahigugma gid sing matuodtuod sa ila kaingod! Nagatuon na sia subong sa Biblia upod sa mga Saksi.

Ang isa ka utod nga babayi sa Trinidad nagsulat: “Samtang nagapanaksi ako sa dalan, may isa ka babayi nga nagpalapit sa akon kag nangayo sing pinakaulihi nga gua sang magasin. Pagkatapos nga napahamtangan ko sia sing pila ka magasin, gintanyagan ko sia sing walay bayad nga pagtuon sa Biblia sa puluy-an. Siling niya nakatuon na sia sang una apang bag-o lang sia nagsaylo sa sini nga duog. Ginpamangkot ko ang iya ngalan kag direksion, apang namalibad sia kag nagsiling nga kon matuod gid man nga Dios ang amon ginaalagad, itudlo Niya sa amon kon diin sia nagaistar. Pagkasunod nga adlaw samtang nagapamalaybalay, nanuktok ako sa isa ka ganhaan, kag ang amo nga babayi ang nagbukas sa amon. Sang nakita niya ako kag ang akon kaupod, nagkadlaw sia sa kakibot kag nagsiling, ‘Paano ninyo ako gilayon natultulan?’ Ginpamangkot ko sia kon nadumduman niya ang ginsiling niya sang nagligad nga adlaw. Ginpasulod niya kami sa iya balay, kag nasugdan ang pagtuon. Karon ining babayi isa na ka di-bawtismado nga manugbantala.”

 ◼ ASIA KAG NATUNG-AN NGA SIDLANGAN

Kadamuon sang pungsod: 47

Populasyon: 3,971,703,969

Kadamuon sang manugbantala: 574,927

Kadamuon sang pagtuon sa Biblia: 444,717

Si Ghanshyam isa ka regular payunir sa Nepal. Tsuper sia sang taksi. Bangod sang iya trabaho, madamo nga sahi sang tawo ang iya nasumalang kag nakita niya nga ang kalabanan sa ila pirme lang nagadali bisan gab-i na, kag halos wala sila sing tion sa pagpakigsugilanon. Apang, nagtinguha gid sia nga masugilanon sila. Kon posible, ginahatagan niya ang iya mga pasahero sang nagakaigo nga tract kag direksion sang pinakamalapit nga Kingdom Hall. Madamo nga pasahero ang nagpakita sing apresasyon. Lima sa ila ang nagatuon na karon sing Biblia upod kay Ghanshyam.

Sa Taiwan ang bana sang isa ka utod nga babayi pirme nagagamit sang iya mabaskog nga tingog sa pag-akig sa iya asawa, ilabi  na kon manugkadto na sia sa Cristianong miting. Isa ka adlaw na-stroke ining lalaki. Naparalisar sia kag naospital. Mapailubon nga gin-atipan sia sang utod kag mataktikanhon nga gingamit ang tion nga nagapaayo ang iya bana agod buligan sia nga mahangpan ang kamatuoran sa Biblia. Nagsiling sia: “Kinahanglan mo gamiton pirme ang imo utok, gani sugiran ko ikaw sang pila ka impormasyon, kag tinguhaan mo nga tandaan ini, OK?” Nahibaluan sang bana nga dapat niya ini himuon, gani nagpasugot sia. Gingamit sang utod ang mga impormasyon gikan sa lainlain nga mga brosyur agod tudluan sia sing pila ka sadsaran nga mga kamatuoran, subong sang ngalan kag mga kinaiya sang Dios, kag sang tema sang Biblia. Dugang pa, madamo nga mga utod ang nagduaw sa iya kag nagpakita sa iya sing kaayo. Natandog gid sia sa sini amo nga pagpauli niya halin sa ospital, nagpasugot sia nga magtuon sing Biblia. Karon nagatambong na sia sa mga miting nga naga-wheelchair kag nagagamit sang iya mabaskog nga tingog sa pagkomento.

Si Rohana, nga isa ka espesyal payunir sa kaumhan nga duog sang Sri Lanka, nakaatubang sing pagpamatok gikan sa drayber sang traysikad. Kon makita niya si Rohana nga nagaministeryo, nagasinggitan nga ginamulay niya sia. Isa ka bes ginpahog niya si Rohana nga kon indi sia mag-untat sa pagbantala sa ila lugar, basi mabun-an sia. Si Rohana nagpabilin nga kalmado. Sang ulihi, naaksidente ining lalaki kag naospital nga may madamo nga kasamaran. Ginduaw sia ni Rohana sa ospital kag gindalhan sing regalo. Sang makita sang lalaki ang nagduaw sa iya, naghibi sia kag nagpangayo sing pasaylo kay Rohana sa tanan nga ginhimo niya sa iya. “Sir, bangod sang akon mga ginhimo sa imo, mas maayo pa kon bakulon mo ako sangsa magkadto ka diri agod lugpayan ako,” siling sang lalaki. Sa karon nakagua na sia sa ospital kag nagapamasahero gihapon. Regular man sia nga nagabasa sang aton mga magasin.

Madamo nga mga dumuluong ang nagakadto sa Hongkong agod magtrabaho subong kabulig sa balay. Isa ka babayi nga nagtuon na anay sa brosyur nga Ano ang Ginapatuman Sang Dios sa Aton? sa Pilipinas ang luyag nga magpadayon sang iya pagtuon sa Biblia. Apang, wala sia makahibalo kon paano makita ang mga  Saksi ni Jehova, gani nagpangamuyo sia sing bulig nga makita sila. Sang adlaw nga wala sia sing trabaho, nagbiyahe sia patabok sa dagat padulong sa nagapanguna nga distrito sang negosyo kag sentral nga parke diin madamo nga mga Filipino ang nagatipon kon talipuspusan sang semana. Nagpangita sia apang wala sia sing nakita nga Saksi ni Jehova, bisan pa nga regular sila nga nagabantala sa parke kon talipuspusan sang semana. Walay sapayan sini, nakakita sia sing Ginapatuman nga brosyur sa basurahan. Ginpudyot niya ang brosyur kag nakita niya nga may nasulat sa sini nga numero sang telepono. Ang numero iya gali sang utod nga babayi nga nakapahamtang sing brosyur. Ang babayi nakibot kag nalipay gid sang mahibaluan niya nga ang utod nga babayi nagatrabaho sa balay sa amo man nga housing complex. Ginpadayon niya ang iya pagtuon sa Biblia kag nagatambong na sia karon sa mga miting.

Isa ka manugtatap sa sirkito kag isa pa ka gulang sa Republika sang Korea ang nag-shepherding sa nagakaigo gid nga tion. Ginduaw nila ang isa ka utod nga babayi nga nangin di-aktibo sing napulo ka tuig. Ang iya bana, nga isa ka ateista, luyag na magtambong sa simbahan pagkatapos maoperahan. Sang magduaw ang mga utod, nasugilanon nila ang iya bana, nga pagkatapos sang isa ka mainabyanon nga paghambalanay nagbaton sang Ginapatuman nga brosyur. Ginpalig-on sang gulang ang utod nga babayi samtang ginatun-an niya ang bana. Ginbaton sang bana ang imbitasyon nga magtambong sa distrito nga kombension, kag pagkatapos sini, nag-untat sia sa pagpasimbahan kag nangin regular sa mga miting. Ang utod nga babayi nag-uswag man kag nagpangabay sia nga duawon man ang iya apat ka anak nga nagapuyo sa lain nga siudad. Subong resulta, ang bana sining utod, ang iya magulang nga anak nga babayi kag ang iya umagad, kag ang iya kinagot nga anak nga babayi nabawtismuhan. Sang ulihi, ang iya magulang nga anak nga lalaki kag ang asawa sini nabawtismuhan man, sa amo anom ang nangin bag-o nga mga Saksi.

Si Yuki, nga isa ka estudyante sa hayskul sa Japan nabudlayan magsugid sa iya mga klasmeyt nga isa sia ka Saksi ni Jehova. Bangod nahibaluan niya nga kinahanglan sia magpanaksi, narealisar niya  nga sia ang dapat maghimo sing una nga tikang bangod wala nagaistorya tuhoy sa relihion ang iya mga klasmeyt. Namat-od sia nga ipakita sa iya mga abyan ang iya pagpangamuyo kon tigpalanyaga. Sa bug-os nga aga, hanuot sia nga nagpangamuyo sing kaisog. Nian, sa baylo nga lip-uton lang ang iya pagpangamuyo agod wala sing makatalupangod, nagduko sia kag nagpangamuyo sing mas malawig. Sang makatapos sia, ginpamangkot sia sang iya klasmeyt kon malain ang iya pamatyag. Apang, wala gihapon makapanaksi si Yuki. Nasubuan gid sa sini, nagpangayo sia sing pasaylo kay Jehova sa pangamuyo kag liwat nga nagpangayo sing kaisog. Sang madason nga adlaw, pagkatapos makapangamuyo si Yuki, ginpamangkot sia liwat sang iya klasmeyt kon kamusta ang iya pamatyag, kag si Yuki naghunahuna, ‘Karon na ako dapat manaksi!’ Ginpaathag niya nga isa sia ka Saksi ni Jehova. Sang primero nakibot ang iya klasmeyt, apang pagkatapos sini madamo sia sing ginpamangkot kay Yuki​—Ano ang imo ginapangamuyo? Ano ang ngalan sang Dios? Sin-o si Jesus? kag madamo pa. Nalipay gid sa sini si Yuki.

Sa Kupang, Indonesia, si Glenn kilala nga palahubog kag nagiyan sa droga. Ginasuhulan sia sang mga tawo agod pahugon ukon kastiguhon ang iban. Nagapuyo sia upod sa iya mga ginikanan sang magduaw ang duha ka Saksi ni Jehova kag ginpaathag ang Biblia sa ila. Wala madugay si Glenn nagtuon sa Biblia kag upod ang daku nga panikasog ginbiyaan niya ang iya anay malain nga mga bisyo. Isa ka adlaw ang isa ka tag-iya sang balaligyaan naghatag sa iya sing daku nga kantidad subong una nga bayad agod kastiguhon niya ang isa ka tawo. Ginpamensaran ni Glenn ini kag nagdesisyon nga untatan na ini nga trabaho. Gin-uli niya ang kuarta kag ginbalibaran ang trabaho. Sang ulihi sang nagkadto si Glenn sa lain naman nga balaligyaan, hinadlukan ang tag-iya kay basi kastiguhon niya sia. Ginkumbinsi niya ang tag-iya nga nagatuon na sia karon sing Biblia kag nagakabuhi sing malinong. Ang tag-iya sang balaligyaan nagbaton sing pagtuon sa Biblia kag ginpatrabaho man sia sa balaligyaan. Nabawtismuhan si Glenn sang nagligad nga tuig sa distrito nga kombension kag nagtambong man ang tag-iya sang balaligyaan.

 ◼ EUROPA

Kadamuon sang pungsod: 46

Populasyon: 728,373,014

Kadamuon sang manugbantala: 1,490,345

Kadamuon sang pagtuon sa Biblia: 733,728

Sang mapatay ang 88 anyos nga utod nga babayi, nga si Jacoba, sa Netherlands, nakabaton ang iya mga paryente sing isa ka opisyal nga sulat gikan sa mga pulis sa ila lugar. Sa madamo nga tinuig pirme sia nagadul-ong sing mga magasin sa estasyon sang mga pulis. Ang isa ka bahin sang sulat, mabasa: “Palangga gid sia namon. Regular sia nga nagaduaw sa amon estasyon, kag nalipay kami nga mag-inom sing tsa kaupod niya. Nagdayaw kami sa iya kaisog​—nga walay sapayan sang iya katigulangon nagabisikleta gihapon sia, bisan ano man ang paniempo, sa pagduaw sa mga tawo agod sugiran sila sang iya mga ginapatihan. Hidlawon gid kami sa iya.”

 Gikan sa Switzerland ini nga eksperiensia. Ginbilin sang manugbakasyon nga pamilya sang mga Saksi ni Jehova ang yabi sang ila apartment sa bata nga lalaki sang isa man ka Saksi nga pamilya, kag ginlihug sia nga buburan niya ang isda sa ila aquarium samtang wala sila. Sang una nga pagkadto niya sa apartment, ginbudlayan sia sa pagbukas sang puertahan. Nabatian sang babayi sa tabok nga apartment ang gahod gani naglili sia sa puertahan. Sang makita niya ang bata nga nagabukas sang puertahan, nagtawag sia sing pulis kay abi niya makawat ini. Sang maggua ang bata pagkatapos niya mabuburan ang isda, ginsugata sia sang duha ka armado nga pulis! “Ano ang ginahimo mo diri?” pamangkot nila. “Ginbuburan ko lang ang isda, kay ginlihug ini sa akon,” sabat niya. Indi magpati sa iya ang mga pulis. Nagpaathag sia: “Isa ako sang mga Saksi ni Jehova kaangay man sang pamilya nga nagapuyo diri. Ginlihug nila ako nga buburan ang isda samtang wala sila, gani ginbilin nila sa akon ang ila mga yabi.” Wala makumbinsi ang mga pulis kag luyag nila sia dalhon sa estasyon sang pulis. “Hulat anay,” siling sang bata. “Ginsulat sang akon mga abyan ang numero sang ila cell phone diri sa papel, mahimo ninyo sila matawgan karon gid kag pamangkuton kon matuod ang akon ginasiling.” Gintawgan sang pulis ang numero kag napamatud-an nga matuod ang ginasiling sang bata. Gani, nagpangayo sing pasaylo ang mga pulis kag naglakat. Sang magpauli ang pamilya halin sa bakasyon, ginduaw nila ang babayi sa tabok nga apartment, nga bag-o lang nagsaylo didto. Nagpasalamat sila sa iya pagkabalaka. Dayon ginpaathag nila nga kaangay sa ila, ang bata isa man ka Saksi ni Jehova kag masaligan gid sia. Bangod halos wala sing nahibaluan ang babayi tuhoy sa mga Saksi ni Jehova, naghambalanay sila, nga nagresulta sa pagpasugot niya nga magtuon sa Biblia.

Samtang nagapamalaybalay sa Italya, nasugilanon sang utod nga babayi ang isa ka lamharon nga iloy nga isa man ka masako nga empleyada. Bangod indi sia masugilanon sang utod sa pila ka beses niya nga pagduaw liwat, gintawgan sia sang utod sa  telepono. Ginpaathag sang babayi sa telepono nga wala gid sia sing tion nga makighambal tuhoy sa Biblia. Ang utod nagsiling: “Sa sulod sang 10 ukon 15 minutos, may bag-o ka nga matun-an, bisan sa telepono lang.” “Sige, basta sa telepono lang!” sabat sang babayi. Sining karon lang, ginbilinan sia sang utod sing libro nga Ang Ihibalo nga Nagadul-ong sa Kabuhi nga Walay Katapusan kag ginsugdan nila ang pagtuon paagi sa telepono. Nagatuon sila kada Sabado sing aga, apang ang 10 ukon15 minutos nahimo na karon nga 30 minutos.

Isa si Angela sa madamo nga manugbantala sa Britanya nga nagatinguha nga mapanaksihan ang madamo nga mga dumuluong nga didto na karon nagapuyo. Sang magduaw sia sa isa ka balaligyaan sing linuto nga pagkaon sang mga Intsik, gintabog sia sang isa sang mga empleyado. Apang, sang manuglakat na si Angela, isa ka babayi nga Intsik ang naglagas sa iya gikan sa likod sang balaligyaan, nga nagasinggit sang ngalan sang Dios sa Inintsik. Pagkatapos sadto nga paghambalanay, regular nga ginabilinan sia ni Angela sing mga magasin. Bisan pa nga naluyagan sang babayi ang mga publikasyon, nagsiling sia nga nabudlayan sia magpati nga gintuga sang Dios ang uniberso. Nagapati sia nga ang tanan nagtuhaw lang.

Ang trabaho sang babayi sa balaligyaan amo ang paghimo sing egg roll. Ginpamangkot sia ni Angela kon pila ka ingrediente ang gingamit niya sa paghimo sing egg roll. “Lima,” sabat niya. Nagpanugyan si Angela nga sa masunod  nga paghimo niya sing egg roll, iitsa niya ang lima ka ingrediente kag tan-awon kon pila ka egg roll ang mahimo sini. Sang magduaw si Angela sa balaligyaan sa masunod nga semana, ginsugata sia sang Intsik nga babayi, ginpakita sa iya ang bag-ong himo nga egg roll, kag nagsiling nga nagapati na sia nga gintuga sang Dios ang uniberso. Nasugdan ang isa ka regular nga pagtuon sa Biblia, kag ining babayi nagauswag sa pagtuon sang kamatuoran gikan sa Pulong sang Dios.

Sa Alemanya, kon ginahakot sang tren gikan sa mga nuclear power plant ang may radioactive nga basura, ang mga aktibista nga nagakabalaka sa palibot pirme nagaprotesta. Gani, antes pa mag-abot ang tren, guardiado na sang mga pulis ang riles. Sang Nobiembre 2003, amo man sini ang ginhimo malapit sa lugar diin nagapayunir si Gudrun. “Nahunahuna ko ang mga pulis nga nagapungko kag nagahulat sing inoras,” paathag niya, “gani nagpamat-od ako nga sugilanunon sila kag tanyagan sing balasahon.” Nasapwan ni Gudrun nga mainabyanon ang mga pulis. Dala ang isa ka alat nga puno sang mga kopya sang Ang Lalantawan kag Magmata!, gintugutan sia nga masugilanon ang mga pulis. Ginretratuhan pa gani sia sang isa ka grupo gikan sa Bavaria samtang nagatanyag sing Magmata! sa ila salakyan. Nagbiyahe sia sing 120 kilometros sa sulod sang duha ka adlaw, kag nakapakighambal sa kapin sa 100 ka pulis. Nakapahamtang sia sing 184 ka magasin. “Indi ko gid malipatan ini nga eksperiensia!” may kapagsik nga siling niya.

Sa Espanya, paghalin sa trabaho isa ka adlaw, nagkadto si Ana María sa dululugan sang bus, kag samtang nagahulat sia, ginbasa niya ang pila ka pahibalo sa sini. Natalupangdan niya dayon ang isa sini. Ini nagasiling: “Kinahanglan ko gid masugilanon ang mga Saksi ni Jehova agod mapadayon ko ang akon pagtuon sa Biblia.” Gintawgan gilayon ni Ana María ang numero kag ginhimo ang kahimusan agod magkitaay sila sang babayi, nga si Felicitas. Bag-o lang sia nag-abot gikan sa Ecuador, diin duha ka tuig sia nga nagtuon sing Biblia. Ginpadayon nila gilayon ang  pagtuon, kag sugod sadto, si Felicitas kag ang iya anak nga lalaki nagtambong sa tanan nga miting. Nagapasalamat sila nga ang ila pag-uswag sa espirituwal makadali lamang nauntat.

Isa ka babayi sa Bulgaria ang nagbuylog sa iya apo sa pagtuon sing Biblia sa mga Saksi. Nalipay gid sia sa paghibalo nga ang ngalan sang Dios amo si Jehova. Bangod wala sing ngalan sang Dios ang iya Biblia, nagkadto sia sa isa ka balaligyaan sing libro agod magbakal sing Biblia nga may ngalan sang Dios. Ginpamangkot sia sang tindero kon ano ang iya ginapangita. Sang ginsugiran niya ang tindero sang iya ginapangita, ginsinggitan sia sang tindero: “Miembro ka sinang sekta!” Sa amo man nga tion, isa ka pari ang nagsulod sa balaligyaan. Sang ginpamangkot ang pari, “Ano ang ngalan sang Dios?” nagsabat sia: “Siempre, Jehova. Indi na pagsinggiti ining babayi.” Nakibot gid ang tindero. Ang babayi kag ang tatlo pa ka miembro sang iya pamilya may maayo nga pag-uswag sa espirituwal.

Isa ka pamilya sa Rusya ang nakaeksperiensia sing trahedya: namatyan ang mga ginikanan sang ila hinigugma nga anak nga lalaki. Sang gab-i antes ilubong ang ila anak, ginteleponohan sang iloy ang tanan nga abyan sang iya anak. Nakita niya ang ila numero sa kuaderno sang iya anak. Nalakip sa sini ang numero sang telepono sang isa ka pamilya nga Saksi ni Jehova, kag gin-agda man sila sang iloy nga magtambong sa lubong. Indi kilala sang Saksi nga pamilya ang mga ginikanan, apang ginhimuslan nila ang kahigayunan agod lugpayan ang pamilya. Ginsugiran sang utod nga lalaki ang amay tuhoy sa paglaum nga pagkabanhaw kag ginbilinan sia sing brosyur nga Kon ang Isa nga Ginahigugma Mo Mapatay. Ginduaw sia sang utod pagligad sang duha ka adlaw. Ang amay nagsiling: “Natandog gid kami sa brosyur. Namat-od kami nga hatagan namon sing tion ang pagtuon sing Biblia.” Ang asawa nagpalista na sa Teokratikong Eskwelahan Para sa Ministeryo kag nagahanda na nga mangin di-bawtismado nga manugbantala.

 ◼ OCEANIA

Kadamuon sang pungsod: 30

Populasyon: 34,820,382

Kadamuon sang manugbantala: 94,087

Kadamuon sang pagtuon sa Biblia: 48,307

Si Olena 12 anyos lang sang ginbawtismuhan sia sang Disiembre 2003, sa Hawaii. Indi kaangay sang iban nga mga pamatan-on nga mahuyugon sa kalingawan, si Olena may espesipiko nga espirituwal nga mga tulumuron. Sia nagsiling: “Nalipay gid ako nga mag-auxiliary payunir sa bulan sang Marso kag Mayo, kag nasadyahan gid ako mag-upod sa mga payunir kag sa mga tigulang. Halimbawa, kada Sabado sang hapon pribilehiyo ko nga mag-upod sa anay misyonera sa iya mga ginabalik-duaw kag mga ginatun-an sa Biblia nga mga Intsik. Makawiwili gid ang ila lenguahe. Handum ko gid nga mangin regular payunir  sa dumuluong-sing-lenguahe nga kongregasyon. Para malab-ot ini nga tulumuron, nagabantala ako pagkatapos sang klase kada Mierkoles subong man kada Sabado kag Domingo. Nagaplano man ako nga mag-auxiliary payunir sing masunson.” Ano pa sa banta ni Olena ang makabulig sa iya sa paglab-ot sang iya mga tulumuron? “Ang pag-amlig sang akon tagipusuon nagakahulugan nga dapat ipakita ko sa akon paggawi nga importante sa akon nga pahamut-an si Jehova,” siling niya. “Ang pagpakig-upod sa iban nga may amo man sini nga balatyagon kay Jehova magabulig sa akon nga magpabilin sa banas sang pagkamatarong. Ang paghinguyang sing kapin nga tion sa pag-alagad kay Jehova nagakahulugan sang paghinguyang sing mas diutay nga tion sa mga tawo nga may kalibutanon nga mga pagtamod. Ini magaamlig sa akon sa paghunahuna nga ang materyal nga mga butang kag imoral nga kalingawan makapahalipay sa akon.”

Kinaandan na sa Solomon Islands nga ginapasagod sang mga ginikanan ang isa ukon duha nila ka magagmay nga mga bata sa ila mga paryente. Sang matun-an sang mag-asawa ang ginapaabot ni Jehova sa mga ginikanan, gin-areglo nila nga papaulion ang ila bata nga babayi nga si Deborah, nga sadto nga tion dalagita na. Ano ayhan ang reaksion niya sang hinali nga masapwan niya ang iya kaugalingon nga nangin bahin sang isa ka Saksi nga pamilya, nga may masako nga iskedyul sa mga miting, pagbantala, kag pagtuon sa Biblia sang pamilya? Naghinumdom si Deborah: “Bisan sa una pa lang nga pagtambong ko sa miting, nabatyagan ko nga ang mga nagatambong nalipay gid nga nagkari ako. Tuhay sa ginapaabot ko, wala ako sing nakita nga nakasutana. Daw halos tanan nagapakigbahin sa miting, bisan ang magagmay pa nga kabataan.” Wala madugay si Deborah nakigbahin man. Ang isa pa ka butang nga ginadayaw gid niya amo ang paagi sang iya amay sa pagtudlo sa ila nga mag-ulutod. Nagsiling sia: “Ginabuligan kami ni Tatay nga pamalandungan sing maayo ang mga halimbawa sang mga katawhan sa Biblia. Nakabulig gid ini sa tion nga may problema ako.” Nagsiling si Deborah, nga karon isa na ka di-bawtismado nga manugbantala, nga nalipay gid sia nga ang kamatuoran sang  Pulong sang Dios nagpahulag sa iya mga ginikanan nga pabalikon sia sa iya pamilya kag sa dalan padulong sa kabuhi.

Ang iban nga bahin sang Papua New Guinea mga kabukiran, kag madamo nga mga minuro ang wala sing dalan. Ang iban sa sini nga mga minuro malayo sa modernong sibilisasyon. Apang, ang maayong balita sang Ginharian nakalab-ot sa sini nga mga duog. Ang lalaki nga si Leanna nagtambong sa miting sang kongregasyon sa kapital sini, ang Port Moresby. Nakibot ang mga kauturan sang nahibaluan nila nga isa gali sia ka pangulo sang naligwin nga grupo sa mataas nga kabukiran, diin ang iya mga sakop wala sing moderno nga mga kasulhayan. Lima ka adlaw nga nagpanglakaton si Leanna sa mga katalunan tubtob nakaabot sia sa haywey. Halin didto nagsakay sia sa trak pakadto sa kapital. Nagsiling sia nga mga apat ka tuig na ang nagligad, nagkadto sia sa siudad kag napahamtangan sia sing Ang Lalantawan nga magasin sang isa ka utod nga lalaki sa dalan. Gindala ni Leanna ang magasin sa iya minuro, kag sa tapos mabasa ini, gingamit niya ang magasin sa pagtudlo sa mga tawo sa iya minuro. Ginahimo niya ini kada Domingo sa sulod sang mga tinuig, ginhapinan pa gani niya ini sang plastik agod indi magisi. Sang ulihi, ginhingyo sia sang mga tawo sa minuro nga pangitaon ang mga manugbalhag sang magasin. Nagdulhog sia sa siudad kag ginkadtuan ang mga kauturan, nga naghimo sing kahimusan sa pagtuon sa iya. Nagdayon si Leanna sing mga duha ka semana sa isa ka Saksi nga pamilya kag natapos ang pagtuon sa Ginapatuman nga brosyur. Sang ginsugiran sia nga may kongregasyon sa banwa nga indi gid man tama kalayo sa iya minuro, nalangkag gid sia kag nagsiling: “Kalapit sina! Duha lang ina ka adlaw nga paglakat halin sa akon minuro!” Nasangkapan sang bag nga puno sing literatura kag sing mas madalom nga paghangop sa kamatuoran sang Pulong sang Dios, ginhimo niya ang malawig nga paglakbay pauli sa iya minuro. May mga kahimusan nga ginhimo agod duawon ini nga minuro sa nagahilapit nga palaabuton agod ang mga tawo didto matudluan sing sibu sa Biblia.

Sa isla nga pungsod sang Kiribati, ang isa ka utod nga babayi nga nagatrabaho sa opisina sang pagbadbad sang mga Saksi ni  Jehova nagsugid sining eksperiensia: “Isa ka adlaw ginsulod ko sa akon bag ang magasin nga Ang Lalantawan nga may topiko nahanungod sa impierno kag namat-od nga itanyag ini, bisan pa daan na ini nga gua. May nasugata kami sang akon kaupod nga isa ka lalaki. Nagpakilala kami kag gintanyag namon ang magasin sa iya pagkatapos mapaathag sa iya sing malip-ot ang ginasiling sang Biblia nahanungod sa impierno. Nagduko sia kag wala nagtimuktimuk sing medyo malawig nga tion, gani ginpamangkot ko sia kon malain ang iya pamatyag. Sang nagtungkaaw sia, natalupangdan ko nga nagahibi sia. Ginsilingan niya kami nga natandog gid sia sa topiko sang magasin. Mga pila pa lang ka semana nga napatay ang iya bata nga lalaki, kag nagapangalisod pa sila sang iya asawa. Pirme sila nagapangamuyo nga lugpayan sila sang Dios bangod nagapati sila nga ang ila bata yara sa kalayuhon nga impierno. Nakibot kag nalipay gid sia sang nabatian niya ang ginasiling sang Biblia nahanungod sa kahimtangan sang patay. Nasugdan ang pagtuon sang nagbalik-duaw kami. Pirme niya ginasiling nga nagpangamuyo sia sa Dios nga ipakita sa iya ang kamatuoran kag luyag gid niya makita ang matuod nga relihion nga nagatudlo sang Biblia. Nagatambong na sia sa mga miting kag nagahanda sing maayo agod makasabat sing tinagipusuon sa Pagtinuon sa Ang Lalantawan.”

Sang Disiembre 2003, kapin sa 60,000 ka delegado ang nagtambong sa pinakadaku nga kombension sang mga Saksi ni Jehova nga ginhiwat sa Australia. Pagpauli halin sa kombension sa Sydney, ang anom ka tuig nga si Alyscea nalangkag gid nga ipakita sa iya mga kabutho ang bag-o nga libro, nga Magtuon Gikan sa Daku nga Manunudlo. Sang ginsugat si Alyscea sang iya iloy sadto nga hapon, nakibot ang iya iloy sang nakita niya nga nasulat sa pisara, sa dalagku nga letra ang mga tinaga nga, “Himayaa ang Dios.” Sadto nga aga ginsaysay ni Alyscea ang programa sa kombension sa iya tatlo ka manunudlo kag 24 ka kabutho. Nanamian gid ang tanan sa bag-o nga libro kag sa mapagsik nga pagrepaso ni Alyscea sa dalagku nga mga punto sang programa. Ang mga tinaga nga “Himayaa ang Dios” wala ginpanas sa pisara sa bug-os nga adlaw.

[Retrato sa pahina 43]

Si Nafissatou, Niger

[Retrato sa pahina 43]

Si Rantso (ikaduha halin sa tuo) upod sa iya pakaisa kag mga manghod, Lesotho

[Retrato sa pahina 48]

Si Marie, Guadeloupe

[Retrato sa pahina 48]

Si Antonio, Mexico

[Retrato sa pahina 52]

Si Ghanshyam, Nepal

[Retrato sa pahina 56]

Si Jacoba, Netherlands

[Retrato sa pahina 58]

Si Angela, Britanya

[Retrato sa pahina 61]

Si Olena, Hawaii