Palangga nga mga Utod:

Ang aton Amay sa langit nga si Jehova, amo ang pinakamaayo nga halimbawa sang gugma. Gani, ang Biblia nagsiling: “Ang Dios gugma.” (1 Juan 4:8) Bisan pa si Jehova ang Labing Gamhanan, ang iya Pulong wala nagsiling, “Ang Dios gahom.” Ang iya paggahom napasad sa gugma. Bangod sini nagasuod kita sa iya!

Makalilipay nga wala kita ginapilit ni Jehova nga mag-alagad sa iya. Indi sia diktador. Luyag niya nga alagaron naton sia bangod ginahigugma naton sia. Kon himuon naton ini, ginapakita naton nga luyag naton magpasakop sa iya kay matarong kag mahigugmaon ang iya paggahom. Napamatud-an gid ini halin sa pagsugod sang kasaysayan sang tawo.

Sa baylo nga piliton si Adan kag si Eva nga magtuman sa iya, ginhatagan sila ni Jehova sing kahigayunan nga magpili. Kon ginahigugma gid nila si Jehova kag ginapabaloran ang  iya ginhimo para sa ila, kuntani ginpamatukan nila ang pagsulay ni Satanas nga magrebelde.

Sang ulihi, nagsiling si Moises sa iya katapusan nga pamulongpulong sa pungsod sang Israel: “Tan-awa, ginbutang ko sining adlaw sa atubangan nimo ang kabuhi kag ang kaayohan, ang kamatayon kag ang kalaut.” (Deut. 30:15) Ang mga tawo may kahilwayan sa pagpili sa ila kabuhi. Sing kaanggid, si Josue nagsiling sa mga Israelinhon: “Kon daw malaut sa inyo ang pag-alagad sa GINOO, magpili kamo sini nga adlaw kon sin-o ang inyo alagdon.” Bilang sabat, ang katawhan nagsiling: “Malayo sa amon nga magbiya kami sa GINOO.” (Jos. 24:15, 16) Amo man sini ang aton ginabatyag. Bangod ginahigugma naton si Jehova, “malayo” sa aton nga biyaan sia.

Subong matuod nga mga Cristiano, nahangpan naton kon ano ang nalakip sa kahilwayan sa pagpili. Bisan may kinamatarong ang mga gulang sa paglaygay kag pagdisiplina, wala nila ginakontrol ang kabuhi kag pagtuo sang iban. Si apostol Pablo nagsiling: “Indi nga mga agalon kami sang inyo pagtuo, kundi mga  masigkamanugpangabudlay kami para sa inyo kalipay, kay nagatindog kamo bangod sa inyo pagtuo.”—2 Cor. 1:24.

Makalilipay kon ginahimo naton ang isa ka butang bangod luyag naton sa baylo nga napilitan lang kita! Luyag ni Jehova nga himuon naton ang maayo bangod sa gugma. Ginpadaku ini ni Pablo sa iya gin-inspirar nga pinamulong: “Kon ipanghatag ko ang tanan ko nga pagkabutang agod mapakaon ang iban, kag kon itugyan ko ang akon lawas, agod makapabugal ako, apang wala ako sing gugma, wala ini sing nahatag nga kaayuhan sa akon.”—1 Cor. 13:3.

Makahatag gid sing kalipay kag pagdayaw kay Jehova nga makita ang minilyon sang aton mga kauturan nga nagaalagad sa iya bangod ginahigugma nila sia sing bug-os tagipusuon!

Ginahigugma man ni Jehova ang tanan niya nga alagad, lakip kamo nga mga kabataan kag pamatan-on kay ginahigugma ninyo sia sa baylo sang kalibutan kag sang mga ginatanyag sini nga kalipay. Makasalig kamo nga palangga man namon kamo.—Luc. 12:42, 43.

 Bangod ginahigugma ninyo si Jehova, sang nagligad nga tuig naghinguyang kamo sing 1,748,697,447 ka oras sa pagbantala sang maayong balita. Tungod sa gugma, 7,782,346 ang nagpakigbahin sa pag-alagad sa latagon sa bug-os kalibutan. Nalipay kita kay may 268,777 ka mga bag-uhan, lakip sa sini ang madamo nga pamatan-on, nga nagdedikar sang ila kabuhi kay Jehova paagi sa pagpabawtismo. Buot silingon, may aberids nga 5,168 ang ginabawtismuhan kada semana. Makalilipay gid ini!

Sa sining tion sang katapusan, ang katawhan sang Dios nagaatubang sing madamo nga problema, kabudlayan, paghingabot, balatian, kag ang iban bangod sa katigulangon. Apang determinado kita nga indi ‘mag-isol’ ukon ‘mangampo.’ Ginahigugma gid namon kamo tanan.—Heb. 10:39; 2 Cor. 4:16.

Ang inyo mga utod,