Sa Sweden, ang isa ka babayi nga taga-Somalia gin-agda nga magtambong sa miting sa Kingdom Hall. Nagpasugot sia, pero indi maayo ang natabo. Wala sing may nag-abiabi sa iya kag gintulok lang sia sang mga tawo. Daw makupos sia sa kahuya. May nakatalupangod sa iya, gani ginpamangkot sia, “Nagtalang ka?”

“Siguro,” sabat niya. Dayon naglakat sia. Sang magkitaay  ang babayi kag ang mga Saksi nga nag-agda sa iya, naakig sia kag ginsilingan sila nga indi na gid sia magbalik. Natingala sila kon ano ang natabo, kay wala man nila sia makita sa Kingdom Hall. Sang ulihi, naathagan gid man nga sa simbahan gali sia nagkadto!

Ginpalig-on sia sang mga Saksi nga tilawan lang nga magkadto sa Kingdom Hall. Nagpasugot sia sa kondisyon nga indi sia magtener sing sobra dies minutos kon pamatyag niya indi sia komportable. Pero pagsulod niya sa Kingdom Hall, gin-abiabi sia sang tanan! Sa sobra niya nga kalipay, sia ang pinakaulihi nga nagpauli pagkatapos sang miting. Sugod sadto, regular na sia nga  nagatambong sa mga miting, kag isa na ka bawtismado nga manugbantala karon.

Si Stergios isa ka pamatan-on nga lalaki nga taga-Gresya. Isa ka aga, samtang nagapauli halin sa iya ulubrahan, napensaran niya nga mag-agi sa lain nga alagyan. May nakita sia sa dalan nga nagpainteres sa iya. Imbitasyon ini sa Memoryal sang kamatayon ni Cristo. Nabasahan niya ang pamangkot nga: “Ano si Jesus para sa imo?” Bangod may mga tawo sa palibot niya, nahuya sia nga puluton ini. Pag-abot niya sa balay, ginpamensar niya ang pamangkot sa imbitasyon kag gusto niya nga mahibaluan ang sabat sini.

Pagkahapon, gin-agda ni Stergios ang iya mga abyan nga mangape. Samtang nagalakat sia para tabuon sila, nag-agi sia sa amo gihapon nga alagyan, kag nagalaum nga ara pa ang imbitasyon. Ara pa gid man, galing madamo gihapon sing tawo, gani nahuya sia nga puluton ini. Pagkatapos nga makapangape upod sa iya mga abyan, nag-agi sia liwat sa amo nga alagyan pauli, kag ara gihapon ang imbitasyon. Sa sini nga tion, ginpulot na niya ini kag ginbasa. Dayon namat-od sia nga magtambong sa Memoryal.

Pagkatapos sang Memoryal, ginbaton ni Stergios ang tanyag nga libre nga pagtuon sa Biblia sa puluy-an. Dayon, nagtambong man sia sa mga miting kag nag-uswag sa espirituwal. Nabawtismuhan sia sa adlaw sang pinasahi nga asembleya sang Marso 2013.

Sang Enero 2010, si Finn, isa ka brother sa Copenhagen, Denmark, nagdala sing mga magasin sa iya  paglakatlakat. Pag-agi niya sa makitid nga dalan, nakita niya nga may nagapadulong nga tigulang nga lalaki. Gintanyagan niya ini sing mga magasin nga Disiembre 2009 nga may mga artikulo parte sa Krismas. Sang naghambal ang tigulang, pamilyar si Finn sa iya tingog. Isa sia ka host sa programa sa radyo kag may mataas sing tinun-an. Pagkadason nga adlaw namati si Finn sa iya programa kag nakibot gid nga ginpaathag niya nga nakabaton sia sing mga magasin sang nagligad nga adlaw. Dayon ginbasa niya ang pila ka bahin sang mga artikulo. Nalakip sa iya ginbasa ang tuhoy sa misteryoso nga “bituon” nga naangot sa pagkabun-ag ni Jesus. Ginbaton niya nga naghalin gid ini kay Satanas.

Napalig-on si Finn sa iya nabatian, gani gintawgan niya ang host. Sa ila pag-istoryahanay, nangabay si Finn kon puede maghimo sing isa ka programa sa radyo nga magabinagbinag sing mga topiko sa Biblia. Pagligad sang duha ka semana, ginpasugtan ang iya pangabay. Kapin sa 30 ka tag-duha ka oras nga programa ang nahimo, kag tanan ini parte sa mga Saksi ni Jehova kag sa Biblia. Ginabinagbinag ni Finn kag sang host ang napili nga mga tema kag ginasabat man nila ang ginatos ka tawag halin sa mga tagpalamati.

Ang isa ka tagpalamati nagtawag sa teknisyan sang estasyon sang radyo kag nagbilin sang iya numero sang telepono. Luyag niya nga kontakon sia sang mga utod. Sang gintawgan sia, ginsugid niya nga madugay na ginapasipalahan sang iya mga abyan kag pamilya ang mga Saksi ni Jehova. Pero bangod sa mga programa sa radyo, nagbag-o ang iya pagtamod sa mga Saksi. Gani nasugdan ang isa ka pagtuon sa Biblia. Sang 2013 nagtambong sia sa Memoryal kag sa pinasahi nga  pamulongpulong. Nagatambong man sia sa mga miting kada Domingo kag nagahatag sing makapalig-on nga komento sa Pagtinuon sa Ang Lalantawan. May mga nagbaton man sing kamatuoran sa sini nga lugar bangod sa nabatian nila sa sining mga programa sa radyo.

Katapusan na nga adlaw sang distrito nga kombension sa Italya. Samtang nagapaalam si Lucio sa iya mga abyan, may nagpalapit sa ila nga mag-asawa. Ginpamangkot ni Lucio kon taga-diin sila nga kongregasyon. “Indi kami halin sa kongregasyon,” sabat nila.

“May nag-imbitar bala sa inyo?” pamangkot ni Lucio.

“Wala, nagmatumato lang kami kadto,” sabat nila.

Natingala gid si Lucio gani namangkot sia, “Ti, ngaa nakakadto man kamo?”

Nagsabat sila, “May nakita kami nga imbitasyon sa amon puertahan, gani nagkadto kami.”

Sang ginsugid nila kay Lucio kon diin sila nagaistar, ang iya asawa nga si Ester nagtuaw: “Ako ang nagbilin sadto nga imbitasyon! Katapusan na nga adlaw sang kampanya, kag nahunahuna ko nga sa baylo ihaboy ang nabilin nga mga imbitasyon, mas maayo nga ibilin ini sa mga balay nga wala sing tawo.” Bangod sadto, nagbiyahe ang mag-asawa pakadto sa Assembly Hall para mamati sa programa pagkadason nga Domingo. Pagkatapos nga makahambalanay, gin-agda sila nanday Lucio kag Ester nga magkaon sa ila balay, kag ginpadayon ang pag-istoryahanay. Ining interesado nga mag-asawa nagbaton sing pagtuon sa Biblia. Ginahandaan gid nila ang kada pagtuon, kag nagatambong na sila kag nagapakigbahin sa mga miting.