Nakaatubang sing kabudlayan ang mga kauturan bangod sa pagdumili sang ila hilikuton. ‘Ginpasira ang mga Kingdom Hall, kag gindumilian ang hilikuton,’ siling sang misyonera nga si Alma Parson. ‘Madamo nga pagtilaw kag pag-antos ang naatubang sang mga kauturan  didto.’ Madamo man ang nadulaan sing obra kag ginpriso. Pero, malipayon sia nga nagsiling: ‘Ang pagtuytoy kag pag-amlig ni Jehova nabatyagan gid namon sa madamo nga beses.’ Bangod sa pagsalig sang mga kauturan sa pagtuytoy ni Jehova, sekreto nga ginpadayon nila ang hilikuton.

Ginadumilian kami nga maghiwat sing mga miting sa kongregasyon. Si Lennart Johnson nagsiling: ‘Ang mga kauturan sekreto nga nagatipon sa gamay nga mga grupo sa pribado nga mga puluy-an. Ginatun-an namon didto ang mga artikulo sa Lalantawan nga ginkopya paagi sa mimeograph. Ginpabaloran gid sang tanan nga matutom ang espirituwal nga kusog nga padayon nga ginaaman ni Jehova sa amon sa sining gamay nga mga grupo.’

Padayon nga ginabantayan sang gobierno ang mga kauturan kag nagbaskog pa gid ang paghingabot. Pero wala nahadlok ang mga kauturan. Sang Septiembre 15, 1950, nagsulat si Secretary Hungría sa Presidente: “Si Mr. Lee Roy Brandt kag ang iban pa nga nagadumala sang grupo sang mga Saksi ni Jehova pila ka beses nga ginpatawag sa opisina kag ginmanduan nga untaton ang tanan nila nga ginahimo kay ginadumilian ini sang kasuguan sang [Dominican] Republic—ang mando nga wala gid nila ginatuman. Kada adlaw, makabaton kami sang mga report halin sa lainlain nga bahin sang pungsod nga sekreto nila nga ginapadayon ang ila hilikuton, nga nagapakita nga wala sila nagatahod sa gobierno.” Mabasa sa katapusan nga bahin sang sulat nga ginapahalin sa pungsod ang mga dumuluong nga nagadumala sa mga Saksi ni Jehova.

Sang katapusan nga bahin sang 1950, nagbisita sa pungsod sanday Brother Knorr kag Brother Henschel.  Dayon, ang pila ka misyonero ginsaylo sa Argentina, Guatemala, kag Puerto Rico. Ang iban naman nangita sing trabaho para makapabilin sa pungsod. Halimbawa, si Brother Brandt nagtrabaho sa kompanya sang elektrisidad, kag ang iban nangin manunudlo sang Ingles. Ang 1951 Yearbook nagsiling parte sa sina nga mga misyonero: “Bangod nagpabilin sila sa pungsod, kag wala nalagyo, nangin tuburan sila sang kusog sa matutom nga mga sumulunod sang Ginuo nga nakatuon sing kamatuoran sa ila. Nalipay gid ang tanan nga makita ang ila kaisog paagi sa pagpabilin sa ila hilikuton.”

Si Dorothy Lawrence isa sa mga misyonera nga nagatudlo sing Ingles. Magluwas sa pagtudlo sing Ingles, nagatudlo man sia sing Biblia sa mga interesado. Subong resulta, madamo sia sing nabuligan nga makatuon sing kamatuoran.

Ang matutom nga mga sumilimba ni Jehova naghimo sing iban nga paagi para makapadayon sila sa pag-alagad sa latagon bisan pa padayon ang pagbantay sa ila. Kon kaisa, ginapaksi nila ang pila ka panid sang mga libro kag ginabutang sa ila bulsa ukon sa suludlan sang ila ginpamakal para makabantala sila nga indi madakpan. Ginahimo nila nga daw listahan sang balaklon ang ila report para sa pag-alagad sa latagon. Sa baylo nga mga libro, bukleta, magasin, pagduaw liwat, kag oras ang isulat sa ila report, ginasulat nila  ang kapayas, beans, itlog, repolyo, kag spinach. Ang Lalantawan nga ginkopya paagi sa mimeograph, gintawag nga yuca, nga halin sa ngalan sang tanom nga yuca, ukon balinghoy, nga madamo sa ila lugar.

Sang Hunyo 16, 1954, si Rafael Trujillo nagpirma sang isa ka kasugtanan sa Vatican nga nagahatag sing pinasahi nga pribilehiyo sa mga klero sang Romano Katoliko sang Dominican Republic. Sa sina nga tion, mga apat na ka tuig nga ginadumilian ang mga Saksi. Pero sang 1955, may 478 na ka manugbantala sa Dominican Republic. Paano nag-uswag ang hilikuton bisan pa may mga kabudlayan? “Ang sekreto sang amon kusog amo ang espiritu ni Jehova,” siling sang 1956 Yearbook. “Ang mga kauturan nahiusa kag malig-on sa pagtuo, kag nagapadayon sila nga may kaisog.”

Sang Hulyo 1955, ang pormal kag nanotaryuhan nga sulat halin sa ulong talatapan ginpadala kay Trujillo. Detalyado nga ginpaathag sa sulat ang neutral nga tindog sang mga Saksi ni Jehova kag ginpangabay si Trujillo nga ‘kuhaon ang pagdumili sa mga Saksi ni Jehova kag sa Watch Tower Bible and Tract Society.’ Ano ang resulta?