Pungsod Ang Indonesia, nga nahamtang sa ekuador sa tunga sang Australia kag Asia, amo ang may pinakamadamo nga isla sa kalibutan. Ang kalabanan sang kapin sa 17,500 ka isla sini may kabukiran kag madabong nga kagulangan. May kapin sa 100 ka buhi nga bulkan diri, kag sa bilog nga kalibutan amo ini nga lugar ang pirme may nagalupok nga mga bulkan.

Pumuluyo Ang Indonesia amo ang ikap-at nga may pinakamadamo nga populasyon sa kalibutan (nga nagasunod sa China, India, kag Estados Unidos) kag may kapin sa 300 ka etniko  nga grupo. Sobra katunga sang populasyon sini amo ang etniko nga mga grupo sang Javanese kag Sundanese.

Relihion Muslim ang mga 90 porsiento sang mga Indonesian. Ang iban Hindu, Budhista, ukon nagapangangkon nga mga Cristiano. Madamo man ang nagasunod sa tumandok nga relihioso nga mga kustombre.

Lenguahe Kapin sa 700 ka lenguahe ang ginahambal sa bilog nga Indonesia. Ang pungsudnon nga lenguahe amo ang Indonesian, nga ginbase sa Malayo. Ang kalabanan nagahambal sang ila dialekto sa ila balay.

Palangabuhian Madamo nga tawo ang mangunguma ukon ginagmay nga mga negosyante. Ang pungsod madamo sing mineral, troso, krudo, kag natural gas kag panguna man nga suplayer sang goma kag lana sang palma.

Pagkaon Kan-on ang ila panguna nga kalan-on. Popular man ang pagkaon nga nasi goréng (kalukalo nga may itlog kag utan), satay (inasal nga karne), kag gado-gado (ensalada nga may sarsa nga mani).

Klima Mainit kag mapaang. Bangod sa habagat kag amihan, may tig-ululan kag tig-ilinit. Pirme nagapangilat kag nagapanaguob.