Kapitulo 19

Ang Tion nga ang Ihibalo Sang Dios Magatugob sa Duta

1, 2. Paano naguba ang tinuga ni Jehova?

 IBUTANG ta nga bag-o lang matapos sang isa ka dungganon nga pintor ang isa ka matahom nga paint­ing. Husto gid nga kabigon niya ini nga tama kaayo​—⁠isa ka obra-maestra! Apang pagkagab-i sadto ginguba ini sang isa ka mahisaon nga karibal. Halangpunon nga nagsakit gid ang buot sang pintor. Daw indi sia makahulat nga makita ang naghimo sini nga mabilanggo! Kag mahanduraw mo kon daw ano ang kalangkag sang pintor nga ipasag-uli ang iya binuhatan sa katahom sini anay.

² Kaangay sina nga pintor, si Jehova naghimo sing isa ka obra-maestra sang ginhanda niya ang duta kag ginpahamtang sa sini ang katawhan. Sa tapos matuga ang lalaki kag babayi, ginkabig niya ang iya tanan nga binuhatan sa duta subong “tama gid kaayo.” (Genesis 1:31) Sanday Adan kag Eva mga anak mismo sang Dios, kag ginhigugma niya sila. Ginpanan-aw niya ang isa ka malipayon, mahimayaon nga palaabuton para sa ila. Matuod, ginsulay sila ni Satanas sa pagrebelde, apang wala maguba ang matahom nga tinuga sang Dios nga indi na maremedyuhan.​—⁠Genesis 3:​23, 24; 6:​11, 12.

3. Ano ang “matuod nga kabuhi”?

³ Determinado ang Dios nga husayon ang mga butang. Luyag gid niya nga magkabuhi kita suno sa iya orihinal nga katuyuan. Ang aton malip-ot kag magamo nga pagluntad indi amo ang “matuod nga kabuhi,” kay wala gid ini kon ipaanggid sa ginahunahuna ni Jehova. Ang “matuod nga kabuhi” nga luyag sang Dios para  sa aton amo ang “kabuhi nga walay katapusan” sa idalom sang himpit nga mga kahimtangan.​—⁠1 Timoteo 6:​12, 19.

4, 5. (a) Paano matuman ang paglaum sa Paraiso? (b) Ngaa dapat naton hunahunaon ang aton ginalauman sa palaabuton?

⁴ Ang ihibalo gikan sa Dios nagadala sing salabton sa atubangan ni Jehova. (Santiago 4:17) Apang hunahunaa ang mga pagpakamaayo nga matigayon mo kon iaplikar mo ina nga ihibalo kag tinguhaan ang kabuhi nga walay katapusan. Sa iya Pulong, ang Biblia, naghimo si Jehova sing isa ka matahom nga laragway sang kon ano ang mangin kahimtangan sang kabuhi sa Paraiso nga duta nga tuman na kalapit. Sa pagkamatuod, subong katawhan ni Jehova wala kita nagaalagad sa Dios bangod lamang sang handum sa padya. Nagaalagad kita sa Dios bangod ginahigugma naton sia. (Marcos 12:​29, 30) Dugang pa, indi naton matigayon ang kinamatarong sa kabuhi paagi sa pag-alagad kay Jehova. Ang kabuhi nga walay katapusan isa ka regalo sang Dios. (Roma 6:23) Makabenepisyo kita kon pamalandungan naton ina nga kabuhi kay ang ginalauman nga Paraiso nagapahanumdom sa aton kon ano nga sahi sang Dios si Jehova​—⁠isa ka mahigugmaon nga “manugpadya sa mga hanuot nga nagapangita sa iya.” (Hebreo 11:⁠6) Ang paglaum nga nagapabilin nga masanag sa aton hunahuna kag tagipusuon magabulig sa aton sa pagbatas sang mga kabudlayan sa kalibutan ni Satanas.​—⁠Jeremias 23:⁠20.

⁵ Ipatuhoy naton karon ang aton igtalupangod sa napasad sa Biblia nga paglaum sa kabuhi nga walay katapusan sa palaabuton nga dutan-on nga Paraiso. Ano ang mangin kahimtangan sang kabuhi sa tion nga ang ihibalo sang Dios magatugob sa duta?

SA TAPOS SANG ARMAGEDON​—⁠ISA KA PARAISO NGA DUTA

6. Ano ang Armagedon, kag ano ang mangin kahulugan sini para sa katawhan?

⁶ Subong napaathag na anay, sa indi madugay laglagon ni Jehova nga Dios ang karon nga malaut nga sistema sang mga butang. Ang kalibutan madasig nga nagapadulong sa ginatawag sang Biblia nga Har–​Magedon, ukon Armagedon. Ina nga tinaga mahimo nga magapahunahuna sa pila ka tawo sing isa ka nuk­lear nga kalaglagan nga ginapahanabo sang nagainaway nga mga pungsod, apang indi subong sina ang Armagedon. Subong ginapakita  sang Bugna 16:​14-16, ang Armagedon amo “ang inaway sang dakung adlaw sang Dios nga Labing Gamhanan.” Isa ini ka inaway nga nagadalahig sa “mga hari sang bug-os napuy-an nga duta,” ukon mga pungsod. Ang Anak ni Jehova nga Dios, ang gintangdo nga Hari, magasugod sa pagpakig-away sa indi madugay. Sigurado na ang mangin resulta. Ang tanan nga nagapamatok sa Ginharian sang Dios kag bahin sang malaut nga sistema ni Satanas pagalaglagon. Ang mga matutom lamang kay Jehova ang maluwas.​—⁠Bugna 7:​9, 14; 19:​11-21.

7. Diin si Satanas kag ang iya mga demonyo sa tion sang Isa ka Libo ka Tuig nga Paghari ni Cristo, kag paano ang katawhan makabenepisyo sa sini?

⁷ Handurawa nga naluwas ikaw sa sina nga kalaglagan. Ano ang mangin kahimtangan sang kabuhi sa duta sa ginsaad nga bag-ong kalibutan sang Dios? (2 Pedro 3:13) Indi na kita dapat maghaumhaum pa, kay ginasugiran kita sang Biblia, kag ang ginasiling sini makakulunyag. Natun-an naton nga si Satanas kag ang iya mga demonyo dakpon kag bilangguon sa isa ka kadadalman sang walay pagpanghikot sa sulod sang Isa ka Libo ka Tuig nga Paghari ni Jesucristo. Ining malauton, mahaliton nga mga tinuga indi na magpasalipod, nagatuga sing gamo kag nagatinguha sa pagsugyot sa aton sa mga buhat sang pagkadimatutom sa Dios. Daw ano nga paumpaw!​—⁠Bugna 20:​1-3.

8, 9. Sa bag-ong kalibutan, ano ang matabo sa mga pag-antos, balatian, kag pagtigulang?

⁸ Sa ulihi, ang tanan nga sahi sang balatian madula. (Isaias 33:24) Sa amo nga tion ang mga piang magatindog, magalakat, magadalagan, kag magasaot nga may mabakod kag mapagros nga mga tiil. Sa tapos sang tinuig nga pagkabuhi sa ila walay gahod nga kalibutan, mabatian sang mga bungol ang malipayon nga mga tunog sa palibot nila. Ang mga bulag mahayanghag sa katingala kon makita na nila ang matahom nga kalibutan sang mga duag kag mga porma. (Isaias 35:​5, 6) Sa katapusan, makita na nila ang mga nawong sang ila mga hinigugma! Ayhan sa amo nga tion ang ila panulok magaburon sing umalagi lang bangod sang mga luha sang kalipay.

⁹ Hunahunaa lamang! Wala na sing mga antipara, wala na sing mga saklay kag mga baston, wala na sing mga bulong, wala na sing mga klinika sang dentista ukon mga ospital! Indi na liwat  dulaon sang balatian sa emosyon kag sang kapung-aw ang kalipay sang katawhan. Wala na sing bata nga magabalatian. Ang mga halit sang pagtigulang baliskaron. (Job 33:25) Mangin mas mapagros kita kag mabaskog. Sa kada aga magabugtaw kita gikan sa isa ka makapapresko nga pagtulog sang gab-i nga may bag-o nga kusog, puno sing kapagsik kag nalangkag sa isa ka bag-o nga adlaw sang makakulunyag nga pagkabuhi kag makaalayaw nga trabaho.

10. Ano ang gintangdo nga hilikuton para sa mga makalampuwas sa Armagedon?

¹⁰ Mangin bugana ang makalilipay nga hilikuton para sa mga makalampuwas sa Armagedon. Himuon nila nga paraiso ang duta. Ang bisan ano nga marka sang nadagtaan nga daan nga sistema pagapanason. Ang mga parke kag mga hardin magabulos sa mga iskwater kag naguba nga duta. Ang tanan makatigayon sing masulhay, matahom nga puluy-an. (Isaias 65:21) Sa pagligad sang tion, ang tulad-paraiso nga mga bahin sang duta magasangkad kag magatingob tubtob malab-ot sang bug-os nga globo ang talaksan sang katahom nga ginpahamtang sang Manunuga didto anay sa hardin sang Eden. Daw ano ka makaalayaw nga makapakigbahin sa sina nga hilikuton sang pagpasag-uli!

11. Ano ang mangin kaangtanan sang katawhan sa palaabuton sa palibot sang duta kag sa mga sapat?

¹¹ Ini tanan pagahimuon sa idalom sang pagtuytoy sang Dios agod nga indi mahalitan ang palibot. Ang mga tawo mangin mahidaiton sa mga sapat. Sa baylo sang mapintas nga pagpatay sa ila, ipasag-uli sang tawo ang responsable nga pagdumala sa duta, nga ginaatipan sila sing maayo. Handurawa ang mga lobo kag mga kordero, ang mga leon kag mga tinday nga baka, nga nagapanginaon nga magkaupod​—⁠kag ang mahagop nga mga sapat wala gid sing katalagman. Bisan ang diutay nga bata wala sing kahadlukan nga mapintas nga mga sapat, ukon ang kalinong sang bag-ong kalibutan tublagon sang mapintas, mabangis nga katawhan. (Isaias 11:​6-8) Daw ano ina kalinong nga bag-ong kalibutan!

ANG KATAWHAN NABAG-O

12. Paano nagakatuman karon ang Isaias 11:​9, kag paano ini matuman sa Paraiso?

¹² Ang Isaias 11:9 nagasugid sa aton kon ngaa wala na sing halit nga himuon sa bug-os nga duta. Ini nagasiling: “Ang duta pat-od  nga matugob sang ihibalo ni Jehova subong nga ang mga tubig nagatabon sang dagat.” Nagapatuhoy ini sa katawhan bangod ang mga sapat indi makakuha sing “ihibalo ni Jehova” kag makahimo sing mga pagbag-o, kay nagakabuhi sila suno sa duna. Apang ang ihibalo gikan sa aton Manunuga nagapabag-o sa katawhan. Walay duhaduha nga ikaw mismo nakahimo na sing pila ka pagbag-o subong resulta sang imo pag-aplikar sa imo kabuhi sang ihibalo gikan sa Dios. Minilyon ang nakahimo sini. Busa, ining tagna nasugdan na nga matuman sa mga nagaalagad kay Jehova. Apang, nagatudlo man ini sa tion nga ang katawhan sa bug-os nga kalibutan magahuklas sang bisan anong sapatsapaton ukon masingki nga mga kinaiya kag mangin mahidaiton sing dayon.

13. Anong programa sa pagtudlo ang mahanabo sa duta?

¹³ Daw mangin ano katahom kon ang ihibalo tuhoy sa Dios magatugob sa duta! Himuon ang isa ka maid-id nga programa sa pagtudlo sa idalom sang pagtuytoy ni Hari Jesucristo kag sang iya 144,000 ka kaupod nga mga manuggahom. Sa amo nga tion may bag-o nga “mga linukot” nga pagagamiton. Mahimo gid nga amo ini ang nasulat nga mga instruksion sang Dios nga mangin sadsaran sang pagtudlo sa mga pumuluyo sang duta. (Bugna 20:12) Ang katawhan magatuon, indi sing inaway, kundi sing paghidait. Ang tanan nga malaglagon nga hinganiban madula sing dayon. (Salmo 46:⁠9) Ang mga pumuluyo sang bag-ong kalibutan pagatudluan sa paghigugma, sa pagtahod, kag sa pagpadungog sa ila isigkatawo.

14. Paano mangin tuhay ang kalibutan kon ang katawhan isa ka nahiusa nga pamilya?

¹⁴ Ang katawhan mangin isa ka nahiusa nga pamilya. Wala na sing magasablag sa paghiusa kag paghiliutod. (Salmo 133:​1-3) Wala sing puluy-an ang dapat kandaduhan batok sa mga kawatan. Ang paghidait magahari sa tanan nga tagipusuon, sa tanan nga balay, sa tanan nga bahin sang duta.​—⁠Miqueas 4:⁠4.

ANG MAKALILIPAY NGA PAGKABANHAW

15. Anong duha ka grupo ang pagabanhawon sa duta?

¹⁵ Sa tion sang Milenyo, ang pagkabanhaw mahanabo. Ang mga hungod nga nagpakasala batok sa balaan nga espiritu ukon aktibo nga puwersa sang Dios, paagi sa dimahinulsulon nga pagpanghikot  batok sa pagpadayag ukon mga pagtuytoy sini indi pagbanhawon. (Mateo 23:​15, 33; Hebreo 6:​4-6) Sa pagkamatuod, ang Dios ang mamat-od kon sin-o ang nakasala sa sinang paagi. Apang duha ka magkatuhay nga grupo ang pagabanhawon​—⁠ang “mga matarong kag mga dimatarong.” (Binuhatan 24:15) Sanglit may sundon nga kahimusan, rasonable ihinakop nga ang una nga banhawon sa duta amo ang mga matarong, ang mga nag-alagad kay Jehova sing matutom.​—⁠Hebreo 11:​35-39.

16. (a) Sin-o ang malakip sa “mga matarong” nga ginbanhaw sa duta? (b) Sin-o sa mga matutom sang dumaan nga mga tion ang labi na nga luyag mo makita, kag ngaa?

¹⁶ Sa baylo sang pagpamati sing mga balita nahanungod sa mga inaway, mga kalamidad, kag kamatayon, ang mga alagad ni Jehova magabaton sing matahom nga mga report tuhoy sa pagkabanhaw. Mangin makakulunyag mahibaluan ang pagbalik sang matutom nga mga lalaki kag mga babayi subong nanday Abel, Enoc, Noe, Abraham, Sara, Job, Moises, Rahab, Rut, David, Elias, Ester. Daw ano ka makapulukaw nga maragtason nga mga katunayan ang ipahayag nila samtang ginasugid nila ang iban pa nga mga detalye sang madamo nga kasaysayan sa Biblia! Walay duhaduha nga sila kag ang mga matarong nga napatay sang ulihi lang malangkag sa paghibalo nahanungod sa katapusan sang sistema ni Satanas kag kon paano ginpakabalaan ni Jehova ang iya balaan nga ngalan kag ginbindikar ang iya pagkasoberano.

17. Ano nga bulig ang ihatag sang mga matutom sa iban pa nga ginbanhaw?

¹⁷ Makabulig gid ining mga matutom sa tion sang masunod nga bahin sang pagkabanhaw, kon ang binilyon sang “mga dimatarong” hilwayon gikan sa mga gapos sang kamatayon! Ang kalabanan sang katawhan wala gid anay makahigayon sa pagkilala kay Jehova. Si Satanas ‘nagbulag sang ila mga painuino.’ (2 Corinto 4:⁠4) Apang dulaon ang binuhatan sang Yawa. Ang mga dimatarong magabalik sa isa ka matahom kag malinong nga duta. Pagaabiabihon sila sang isa ka katawhan nga organisado sa pagtudlo sa ila nahanungod kay Jehova kag sa iya nagahari nga Anak, si Jesucristo. Samtang binilyon sang mga ginbanhaw ang magakilala kag magahigugma sa ila Manunuga, ang ihibalo tuhoy kay Jehova magatugob sa duta sa isa ka walay katulad nga paagi. 

18. Ano sa banta mo ang batyagon mo kon abiabihon ang ginbanhaw nga mga hinigugma?

¹⁸ Daw ano nga kalipay ang ihatag sang pagkabanhaw sa aton tagipusuon! Sin-o ang wala mag-antos bangod sang aton kaaway nga kamatayon? Sa pagkamatuod, sin-o ang wala makabatyag sing daku nga kasubo sang ang higot sang gugma ukon pag-abyanay nabugto sang ginkutol sang balatian, katigulangon, aksidente, ukon kasingki ang kabuhi sang isa nga hinigugma? Handurawa, nian, ang kalipay sang pagkitaay liwat sa Paraiso. Ang mga iloy kag mga amay, ang mga anak nga lalaki kag mga anak nga babayi, ang mga abyan kag mga paryente, magahaksanay, nga nagakadlaw kag nagahibi sa kalipay.

KAHIMPITAN SA KATAPUSAN!

19. Ano nga milagro ang mahanabo sa tion sang Milenyo?

¹⁹ Sa sulod sang Milenyo, isa ka dalayawon nga milagro ang mahanabo. Para sa katawhan, ayhan mangin amo ini ang labing makakulunyag nga bahin sang Isa ka Libo ka Tuig nga Paghari ni Cristo. Tuytuyan ni Jehova ang iya Anak sa pag-aplikar sang mga benepisyo sang halad nga gawad sa tagsa ka matutom kag matinumanon nga lalaki kag babayi. Paagi sa sina, ang tanan nga sala pagadulaon kag ang katawhan bayawon sa kahimpitan.​—⁠1 Juan 2:2; Bugna 21:​1-4.

20. (a) Ano ang kahulugan sang mangin himpit? (b) San-o ang mga nakalampuwas sa Armagedon kag mga ginbanhaw magasugod sa pagkabuhi sa pinakabug-os nga kahulugan?

²⁰ Kahimpitan! Ano ang mangin kahulugan sini? Magakahulugan ini sing pagbalik sa kabuhi nga naagom anay nanday Adan kag Eva antes sila makasala batok kay Jehova nga Dios. Sa pisikal, sa mental, sa emosyon, sa moral, sa espirituwal​—⁠sa tanan nga paagi nga mahanduraw​—⁠malab-ot sing bug-os sang himpit nga mga tawo ang talaksan sang Dios. Apang mangin palareho bala ang tanan nga katawhan sa amo nga tion? Indi gid! Ang mga tinuga ni Jehova​—⁠ang mga kahoy, mga bulak, mga sapat​—⁠tanan nagatudlo sa aton nga maluyagon sia sa pagkananuhaytuhay. Ang himpit nga mga tawo magapanag-iya sing nanuhaytuhay nga personalidad kag mga kinaadman. Ang tagsatagsa magakalipay sa kabuhi nga gintuyo sang Dios. Ang Bugna 20:5 nagasiling: “Ang nabilin nga mga patay wala mabuhi tubtob nga matapos ang isa ka libo ka tuig.” Kaangay sang dakung kadam-an nga  nakalampuwas sa Armagedon, ang mga ginbanhaw mabuhi sing bug-os kon malab-ot na nila ang walay sala nga kahimpitan.

21. (a) Ano ang mahanabo sa katapusan sang Isa ka Libo ka Tuig nga Paghari ni Cristo? (b) Ano sa ulihi ang mahanabo kay Satanas kag sa tanan nga nagadampig sa iya?

²¹ Ang himpit nga mga tawo magaatubang sing isa ka hingapusan nga pagtilaw. Sa katapusan sang Milenyo, si Satanas kag ang iya mga demonyo paguwaon gikan sa kadadalman sa malip-ot nga tion kag tugutan sa paghimo sing hingapusan nga panikasog sa pagpatalikod sa katawhan kay Jehova. Ang iban magauna sang sayop nga mga handum sangsa gugma sa Dios, apang ining pagrebelde palip-uton. Laglagon ni Jehova ining mga makagod upod kay Satanas kag sa tanan niya nga demonyo. Nian ang tanan nga makasasala madula sing dayon.​—⁠Bugna 20:​7-10.

ANO ANG HIMUON MO?

22. Ano ang ginapaabot mo nga himuon sa Paraiso?

²² Ang mga nagahigugma kay Jehova nga Dios kag nagapuyo sa Paraiso nga duta magakabuhi sing dayon. Daw indi naton mahanduraw ang ila kalipay​—⁠kag ikaw man makaambit sa sini. Sa musika, sa taliambong, sa kinaadman​—⁠ang mga mahimuan sang himpit nga katawhan magalabaw sa pinakamatahom nga mga binuhatan sang labing dungganon nga mga sampaton sang daan nga kalibutan! Kay ang mga tawo mangin himpit kag wala na sing latid ang ila tion. Handurawa kon ano ang imo mahimo subong isa ka himpit nga tawo. Hunahunaa man, kon ano ang matun-an mo kag sang imo mga isigkatawo nahanungod sa mga tinuga ni Jehova​—⁠halin sa binilyon ka galaksiya sa bug-os nga uniberso tubtob sa diutay pa sa atomo nga mga partikulo. Ang tanan nga mahimuan sang katawhan dugang pa nga magapahalipay sa tagipusuon sang aton mahigugmaon langitnon nga Amay, si Jehova.​—⁠Salmo 150:​1-6.

23. Ngaa indi gid mangin makatalaka ang kabuhi sa Paraiso?

²³ Ang kabuhi sa amo nga tion indi mangin makatalaka. Mangin makawiwili ini sing dugang kag dugang pa samtang nagaligad ang tion. Kay ang ihibalo sang Dios wala sing katapusan. (Roma 11:33) Sa sulod sang walay katapusan nga tion, may yara pirme dugang pa nga matun-an kag bag-o nga mga butang nga mausisa. (Manugwali 3:11) Kag samtang nagapadayon ikaw sa  pagtuon nahanungod kay Jehova nga Dios, magapadayon ikaw sa pagkabuhi​—⁠indi sa pila ka tuig lamang kundi sing dayon!​—⁠Salmo 22:⁠26.

24, 25. Ngaa dapat ka karon magkabuhi nahisuno sa ihibalo sang Dios?

²⁴ Indi bala ang makalilipay nga palaabuton sa paraiso nga duta takus sa bisan anong panikasog ukon sakripisyo nga ginahimo mo? Amo gid sa pagkamatuod! Ti, ginatanyag sa imo ni Jehova ang yabi sa sinang matahom nga palaabuton. Ina nga yabi amo ang ihibalo sang Dios. Gamiton mo bala ini?

²⁵ Kon ginahigugma mo si Jehova, makasapo ikaw sing kalipay sa paghimo sang iya kabubut-on. (1 Juan 5:⁠3) Samtang ginapadayon mo ina nga dalanon, daw ano nga mga pagpakamaayo ang maeksperiensiahan mo! Kon iaplikar mo ang ihibalo gikan sa Dios, makahatag ini sa imo sing mas malipayon nga kabuhi bisan sa sining magamo nga kalibutan. Kag daku gid ang palaabuton nga mga padya, kay amo ini ang ihibalo nga nagadul-ong sa kabuhi nga walay katapusan! Karon na ang maayo nga tion nga maghulag ka. Mangin determinado nga magkabuhi nahisuno sa ihibalo sang Dios. Ipasundayag ang imo gugma kay Jehova. Padunggi ang iya balaan nga ngalan kag pamatud-i si Satanas nga butigon. Nian, si Jehova nga Dios, ang Tuburan sang matuod nga kaalam kag ihibalo, magakalipay bangod sa imo sa iya daku kag mahigugmaon nga tagipusuon. (Jeremias 31:3; Sofonias 3:17) Kag higugmaon ka niya sing dayon!

TILAWI ANG IMO IHIBALO

Ano ang “matuod nga kabuhi”?

Sa tapos sang Armagedon, ano ang mahanabo sa duta?

Sin-o ang pagabanhawon sa duta?

Paano ang katawhan mangin himpit kag tilawan sa hingapusan nga tion?

Ano ang imo paglaum tuhoy sa Paraiso?

[Mga Pamangkot sa Pagtinuon]

 [Piktyur sa pahina 188, 189]

Nagalaum ka bala nga mabuhi sa Paraiso, kon ang ihibalo tuhoy sa Dios magatugob sa duta?