Kapitulo 37

Ginpaugdaw ni Jesus ang Kasubo sang Balo

SA TAPOS maayo ang suluguon sang kapitan, si Jesus nagkadto sa Nain, ang siudad nga kapin sa 32 kilometros ang kalayuon pa bagatnan-aminhan sang Capernaum. Gin-updan sia sang iya mga disipulo kag sang isa ka dakung kadam-an. Ayhan sirom na sang makalab-ot sila sa ilaya sang Nain, diin nasugata nila ang isa ka lubong. Ang bangkay sang pamatan-on nga lalaki ginadala paguwa sa siudad agod ilubong.

Ang kahimtangan sang iloy masubo gid katama, bangod isa sia ka balo kag amo ini ang iya bugtong nga anak. Sang mapatay ang iya bana, ang kamatuoran nga may anak sia naglipay sa iya. Ang iya mga paglaum, mga handum, kag mga ambisyon nahugod sa buwas-damlag sang iya anak. Apang karon wala sing makalugpay sa iya. Daku gid ang iya kalisod samtang ginaupdan sia sang madamo nga tawo pakadto sa duog nga lulubngan.

Sang makita ni Jesus ang babayi, naluoy sia sa iya. ­Gani sing mapinalanggaon, apang sing malig-on nga nagapakita sing pagsalig, nagsiling sia sa iya: “Dili maghibi.” Ang iya ginhimo kag ginbuhat nagganyat sa igtalupangod sang kadam-an. Gani sang nagpalapit sia kag gintandog ang yayungan sang lungon, ang mga nagayayong nagdulog. Ayhan nagpalibog ang tanan kon ano ang himuon niya.

Matuod nga yadtong mga kaupod ni Jesus nakakita sa iya nga nag-ayo sing milagruso sa madamong tawo nga masakiton. Apang wala pa nila sia makita nga nagbanhaw kay bisan sin-o gikan sa minatay. Mahimo bala niya ina? Nagapatuhoy sa bangkay, si Jesus nagsugo: “Pamatan-on, nagasiling ako sa imo, Bangon ka!” Kag ang patay nagbangon! Nagsugod sia sa paghambal, kag ginhatag sia ni Jesus sa iya iloy.

Sang makita sang mga tawo nga buhi matuod ang pamatan-on, nagsugod sila sa pagsiling: “Ang isa ka dakung manalagna naglutaw sa tunga naton.” Ang iban nagsiling: “Ang Dios nagduaw sang iya katawhan.” Madasig nga naglapnag ang balita nahanungod sining makatilingala nga buhat sa bug-os nga Judea kag sa bug-os nga palibot nga teritoryo.

Si Juan Bautista yara gihapon sa bilangguan, kag luyag niya makabati sing dugang pa nahanungod sa mga buhat nga nasarangan niya nga himuon. Ginsugiran si Juan sang iya mga disipulo nahanungod sining mga milagro. Ano ang iya reaksion? Lucas 7:11-18.

▪ Ano ang natabo samtang nagahinampot si Jesus sa Nain?

▪ Paano naapektohan si Jesus sang iya nakita, kag ano ang ginhimo niya?

▪ Ano ang reaksion sang mga tawo sa milagro ni Jesus?