Kapitulo 52

Milagruso nga Ginpakaon ni Jesus ang Linibolibo

TUMALAGSAHON ang pagbantala sang 12 ka apostoles sa bug-os nga Galilea. Karon, wala madugay sa tapos ginpatay si Juan, nagbalik sila kay Jesus kag gin-asoy ang ila makalilipay nga mga eksperiensia. Sang makita nga lapyo sila kag madamo gid nga tawo ang nagapakadto-pakari nga wala gani sila sing tion sa pagkaon, si Jesus nagsiling: ‘Makadto kita nga kitahanon lamang sa isa ka mamingaw nga duog agod makapahuway kamo.’

Nagsakay sila sa sakayan, ayhan malapit sa Capernaum, agod magpakadto sa nabaw-ing nga duog nga ayhan sa sidlangan nga bahin sang Jordan sa pihak sang Betsaida. Apang, madamo nga tawo ang nakakita sang maglakat sila, kag ang iban nakabati sini. Sila tanan nag-agi sa higad sang baybay, kag sang magdungka ang sakayan, didto na ang mga tawo sa pagsugata sa ila.

Pagpanaug nila sa sakayan kag nakita ang daku nga kadam-an, natandog si Jesus sang kaluoy kay ang tanan kaangay sang mga karnero nga wala sing manugbantay. Gani ginpang-ayo niya ang mga nagabalatian sa ila kag nagtudlo sa ila sing madamo nga butang.

Madasig nga nagligad ang tion, kag ang mga disipulo ni Jesus nagpalapit sa iya kag nagsiling: “Ang duog baw-ing, kag hapon na gid. Papaulia sila, agod nga magkadto sila sa palibot kag magbakal sing kaunon nila.”

Apang, bilang sabat si Jesus nagsiling: “Hatagi ninyo sila sing kaunon.” Nian, sanglit nahibaluan na ni Jesus kon ano ang iya himuon, gintilawan niya si Felipe paagi sa pagpamangkot sa iya: “Diin bala kita mabakal sing tinapay agod ining katawhan makakakon?”

Gikan sa pagtamod ni Felipe wala sing mahimo sa kahimtangan. Ti, mga 5,000 ang mga lalaki, kag ayhan kapin sa 10,000 ang mga tawo pati ang mga babayi man kag mga kabataan! Nagsabat si Felipe nga “ang duha ka gatos ka denario [ang isa ka denaryo katumbas sadto sa isa ka adlaw nga suweldo] nga tinapay indi makaigo sa ila agod nga ang tagsatagsa makakuha sing diutay.”

Ayhan agod ipakita nga indi mahimo nga mapakaon ang madamo gid, si Andres nagboluntaryo: “May bata diri nga lalaki nga may lima ka tinapay nga sebada kag duha ka isda,” nga nagadugang, “apang daw ano man lamang ini sa sina nga kadamuon?”

Sanglit tigpamulak sadto, kag malapit na ang Paskuwa sang 32 C.⁠E., madabong ang berde nga hilamon. Gani ginsingganan ni Jesus ang iya mga disipulo nga pahilayon ang mga tawo sa hilamon sa mga grupo sang 50 kag 100. Ginkuha niya ang lima ka tinapay kag duha ka isda, nagtangla sa langit, kag nagpasalamat. Dayon gintipiktipik niya ang mga tinapay kag gintunga ang mga isda. Ginhatag niya ini sa mga disipulo, nga dayon, nanagtag sini sa mga tawo. Sing makatilingala, ang tanan nga tawo nakakaon tubtob nabusog na sila!

Pagkatapos ginsugo ni Jesus ang iya mga disipulo: “Tipuna ninyo ang mga tinipik nga nabilin, agod nga wala sing mausik.” Sang mahimo nila ini, 12 ka alat ang napuno nila sang nabilin sa kinaon nila! Mateo 14:13-21; Marcos 6:30-44; Lucas 9:10-17; Juan 6:1-13.

▪ Ngaa nangita si Jesus sing mamingaw nga duog para sa iya mga apostoles?

▪ Sa diin gindala ni Jesus ang iya mga disipulo, kag ngaa wala sila makapahuway?

▪ Sang hapon na, ano ang ginpanugda sang mga disipulo, apang paano nagpakita si Jesus sing pag-ulikid sa mga tawo?