Kapitulo 98

Nagbaisay ang mga Disipulo Samtang Nagahilapit ang Kamatayon ni Jesus

SI Jesus kag ang iya mga disipulo malapit nayon sa Suba Jordan, nga sa diin nagtabok sila gikan sa distrito sang Perea pakadto sa Judea. Madamo nga iban pa ang nagalakbay upod sa ila padulong sa Paskuwa sang 33 C.⁠E., nga mga isa ka semana na lamang ang kalayuon.

Nauna nga nagalakat si Jesus sa mga disipulo, kag natingala sila sa iya maisog nga determinasyon. Dumduma nga sang pila ka semana antes sini sang mapatay si Lazaro kag si Jesus manughalin sa Perea padulong sa Judea, ginpalig-on ni Tomas ang iban: “Malakat man kita, agod nga mapatay kita kaupod niya.” Dumduma man nga sa tapos mabanhaw ni Jesus si Lazaro, ang Sanhedrin nagplano nga ipapatay sia. Indi katingalahan nga ang mga disipulo ginahadlukan samtang nagapasulod sila sa Judea liwat.

Agod ihanda sila para sa mahimo matabo, gin-upod ni Jesus ang 12 sing pribado kag ginsilingan sila: “Yari karon, mataklad kita sa Jerusalem, kag ang Anak sang tawo itugyan sa mga puno nga saserdote kag sa mga escriba, kag sila magatagudili sa iya sa kamatayon kag magatugyan sa iya sa mga tawo sang mga pungsod, kag uligyaton nila sia kag duplaan sia kag bunalon sia kag patyon sia, apang sa ikatlo nga adlaw banhawon sia.”

Ikatlo na ini nga tion sa nagligad nga mga binulan nga ginsilingan ni Jesus ang iya mga disipulo nahanungod sa iya kamatayon kag pagkabanhaw. Kag bisan pa nagapamati sila sa iya, wala sila makahangop. Ayhan bangod nagapati sila nga ang ginharian sang Israel ipasag-uli sa duta, kag nagapaabot sila nga makatigayon sing himaya kag kadungganan sa isa ka dutan-on nga ginharian upod kay Cristo.

Lakip sa mga naglakbay padulong sa Paskuwa amo si Salome, ang iloy sang mga apostoles nga sanday Santiago kag Juan. Gintawag ni Jesus ining mga lalaki nga “Mga Anak sang Daguob,” wala sing duhaduha bangod sang ila kalayuhon nga mga disposisyon. Sa sulod sang pila ka tion ining duha naghandum nga mangin kilala sa Ginharian ni Cristo, kag ginsugid nila ini sa ila iloy. Ginpalapitan niya karon si Jesus para sa ila, nagyaub sa atubangan niya, kag nangayo sing pabor.

“Ano ang luyag mo?” pamangkot ni Jesus.

Sia nagsabat: “Isugo nga ining duha ko ka anak maglingkod, ang isa sa imo tuo kag isa sa wala, sa imo ginharian.”

Sang marealisar kon sa diin maghalin ang pangabay, si Jesus nagsiling kanday Santiago kag Juan: “Wala ninyo mahibalui ang inyo ginapangayo. Sarang bala kamo makainom sa tagayan nga akon imnan?”

“Sarang kami,” sabat nila. Bisan pa bag-o lang masugid sa ila ni Jesus nga nagaatubang sia sing daku nga paghingabot kag sa ulihi sing kamatayon, mahimo gid nga wala nila mahangpi nga amo sini ang buot niya silingon sa “tagayan” nga buot na niya imnon.

Walay sapayan, si Jesus nagsiling sa ila: “Magainom kamo matuod sa akon agayan, apang ang paglingkod sa akon too kag sa akon wala indi akon ang paghatag, kundi ila ini sang gin-amanan sang akon Amay.”

Sang ulihi nahibal-an sang napulo pa ka apostoles ang ginpangabay nanday Santiago kag Juan, kag naakig sila. Mahimo nga sanday Santiago kag Juan ang nagapangibabaw sa pagbaisay anay sang mga apostoles sa kon sin-o ang labing daku. Ang ila pagpangabay nagapakita nga wala nila gin-aplikar ang laygay ni Jesus tuhoy sa sini nga butang. Sing makapasubo, ang ila handum nga mangin kilala mabaskog gihapon.

Gani agod husayon ining bag-o lang nga ginamo kag ang malain nga resulta sini, gintawag ni Jesus ang 12. Ginlaygayan sila sing mahigugmaon, sia nagsiling: “Nahibaluan ninyo nga ang mga punuan sang mga pungsod nagapakaginuo sa ila kag ang ila mga kadalagkuan nagagamit sing pagbulut-an sa ila. Indi mangin subong sini sa inyo; kundi ang bisan sin-o sa inyo nga buot mangin daku mangin alagad ninyo, kag ang bisan sin-o sa inyo nga buot mangin nahauna mangin ulipon ninyo.”

Nagpakita si Jesus sing huwaran nga dapat nila ilugon, subong iya ginapaathag: “Subong nga ang Anak sang tawo wala magkari nga alagdon kundi sa pag-alagad kag sa paghatag sang iya kabuhi nga gawad sang madamo.” Si Jesus wala lamang mag-alagad para sa iban kundi himuon niya ini tubtob sa kasangkaron nga mapatay sia para sa katawhan! Kinahanglan sang mga disipulo ina nga tulad-Cristo nga disposisyon nga maghandum sa pag-alagad sa baylo nga alagdon kag mangin kubos sa baylo nga mangin sa kilala nga posisyon. Mateo 20:​17-28; Marcos 3:​17; 9:​33-37; 10:​32-45; Lucas 18:​31-34; Juan 11:⁠16.

▪ Ngaa ginahadlukan karon ang mga disipulo?

▪ Paano ginhanda ni Jesus ang iya mga disipulo para sa mahimo matabo?

▪ Ano ang ginpangabay kay Jesus, kag paano naapektohan ang iban nga mga apostoles?

▪ Paano ginhusay ni Jesus ang problema sa tunga sang iya mga apostoles?