Kapitulo 121

Sa Atubangan sang Sanhedrin, Dayon ni Pilato

MALAPIT na magligad ang kagab-ihon. Ginpanghiwala ni Pedro si Jesus sa ikatlo nga tion, kag nakatapos na ang mga katapo sang Sanhedrin sa ila mayagutaon nga pagbista kag nagbululagay na. Apang, magasinapol sila liwat sa pamanagbanag sang Biernes, sini nga tion sa ila tinukod sang Sanhedrin. Mahimo gid nga ang ila katuyuan amo ang paghatag sing legalidad sa bista nga natabo sang nagligad nga gab-i. Sang gindala si Jesus sa atubangan nila, nagsiling sila, subong sang ginsiling man nila sang nagli­gad nga gab-i: “Kon ikaw ang Cristo, sugiri kami.”

“Bisan kon sugiran ko kamo, indi kamo magtuo,” sabat ni Jesus. “Dugang pa, kon pamangkuton ko kamo, indi kamo magsabat.” Apang, maisugon nga nagpakilala si Jesus, nga nagasiling: “Kutob karon ang Anak sang tawo magalingkod sa tuo sang gahom sang Dios.”

“Ikaw bala nian ang Anak sang Dios?” luyag nila tanan mahi­bal-an.

“Ginasiling ninyo nga amo ako,” sabat ni Jesus.

Para sa sining mga tawo nga may tuyo sa pagpatay, tuman na ini nga sabat. Ginkabig nila ini nga pasipala. “Ngaa nagakinahanglan pa kita sing dugang nga saksi?” pamangkot nila. “Kay kita gid nakabati sa iya baba.” Gani gingapos nila si Jesus kag gindala sia kag gintugyan sa Romanong gobernador nga si Poncio Pilato.

Si Judas, nga nagtugyan kay Jesus, nagatan-aw sang mga nagakatabo. Sang makita niya nga ginkondenar si Jesus, ginsukmaan sia sang iya konsiensia. Gani nagkadto sia sa puno nga mga saserdote kag mga gulang agod iuli ang 30 ka bilog nga pilak, nga nagapaathag: “Nakasala ako sa pagtugyan ko sang dugo nga wala sing sala.”

“Ano bala ang labot namon sina? Ikaw ang mahibalo!” matigdas nga sabat nila. Gani ginpilak ni Judas ang mga binilog sang pilak sa templo kag naglakat sia kag nagbitay sang iya kaugalingon. Apang, ang sanga nga ginhigtan ni Judas sang kalat mahimo nga nabali, kag ang iya lawas nahulog sa mga bato sa ubos, nga sa diin nawasak ini.

Indi mahibal-an sang puno nga mga saserdote kon ano ang himuon sa mga binilog sang pilak. “Indi tugot nga ibutang ini sa bahandi,” hinakop nila, “sanglit bili ini sang dugo.” Gani, sa tapos sila magsinapol, gingamit nila ang kuwarta sa pagtaba sing latagon sang maninihon agod lubngan sang mga dumuluong. Sa amo ang latagon gintawag nga “Latagon sang Dugo.”

Aga pa sang gindala si Jesus sa palasyo sang gobernador. Apang ang mga Judiyo nga nag-upod sa iya wala magsulod kay nagapati sila nga ang pagpakigsuod sa mga Gentil magadagta sa ila. Gani nagguwa si Pilato agod atubangon sila. “Ano bala nga sumbong ang ginadala ninyo batok sa sini nga tawo?” pamangkot niya.

“Kon ini nga tawo indi manugbuhat sing kalautan, wala namon sia kuntani pag-itugyan sa imo,” sabat nila.

Agod indi maulamid, si Pilato nagsabat: “Dalha ninyo sia kag hukmi sia suno sa inyo kasuguan.”

Nagapahayag sang ila tuyo nga magpatay, ang mga Judiyo nagsiling: “Indi tugot sa amon ang pagpatay bisan kay sin-o nga tawo.” Sa pagkamatuod, kon ginpatay nila si Jesus sa tion sang Piesta sang Paskuwa, mahimo gid nga nagtuga ini sing kinagula sa publiko, kay madamo ang nagatahod kay Jesus. Apang kon mahaylo nila ang mga Romano nga patyon sia bangod sa politikal nga sumbong, magahilway ini sa ila sa salabton sa atubangan sang mga tawo.

Gani ang relihioso nga mga lider, nga wala magsambit sang ila nauna sa sini nga bista nga sa diin ginkondenar nila si Jesus sing pasipala, nagbutangbutang sing lainlain nga mga sumbong. Tatlo ang ila panumbungon: “Nakita namon ini nga tawo nga [1] nagapatalang sang aton pungsod kag [2] nagadumili sa amon sa pagbayad sang buhis kay Cesar kag [3] nagasiling nga sia gid amo ang Cristo nga isa ka hari.”

Interesado si Pilato sa sumbong nga si Jesus nagapangangkon nga hari. Busa, nagsulod sia liwat sa palasyo, gintawag si Jesus, kag namangkot: “Ikaw bala ang hari sang mga Judiyo?” Kon sa aton pa, nalapas mo bala ang kasuguan paagi sa pagdeklarar sang imo kaugalingon nga hari batok kay Cesar?

Luyag mahibaluan ni Jesus kon daw ano na ang nabatian ni Pilato nahanungod sa iya, gani namangkot sia: “Nagasiling ka bala sini sing kinaugalingon, ukon ginsugiran ka sini sang iban nahanungod sa akon?”

Ginpakita ni Pilato nga wala sia sing nahibaluan nahanungod sa iya kag luyag niya mahibaluan ang mga kamatuoran. “Judio bala ako?” sabat niya. “Ikaw gintugyan sa akon sang imo kaugalingon nga pungsod kag sang puno nga mga saserdote. Ano bala ang nahimo mo?”

Wala magtinguha si Jesus nga likawan ang hulusayon, nga amo ang tuhoy sa pagkahari. Ang sabat nga ginhatag karon ni Jesus wala sing duhaduha nga nagpakibot kay Pilato. Lucas 22:​66⁠–​23:​3; Mateo 27:​1-11; Marcos 15:​1; Juan 18:​28-35; Binuhatan 1:​16-20.

▪ Sa anong katuyuan nga nagsinapol liwat ang Sanhedrin pagkaaga?

▪ Paano napatay si Judas, kag ano ang ginhimo sa 30 ka bilog nga pilak?

▪ Sa baylo nga sila ang magpatay kay Jesus, ngaa luyag sang mga Judiyo nga ang mga Romano ang magpatay kay Jesus?

▪ Ano ang mga panumbungon sang mga Judiyo batok kay Jesus?