Ang Mangangaway nga Hari Magadaug sa Armagedon
Kapitulo 39
Ang Mangangaway nga Hari Magadaug sa Armagedon
Palanan-awon 13—Bugna 19:11-21
Tema: Pangunahan ni Jesus ang mga kasuldadusan sang langit sa paglaglag sa sistema sang mga butang ni Satanas
Tion sang katumanan: Sa tapos malaglag ang Babilonia nga Daku
1. Ano ang Armagedon, kag ano ang nagadul-ong sa sini?
ARMAGEDON—isa ini ka makahaladlok nga tinaga para sa madamo! Apang para sa mga nagahigugma sa pagkamatarong, nagapatimaan ini sang madugay na ginahulat nga adlaw nga himuon ni Jehova ang katapusan nga paghukom sa mga pungsod. Indi ini inaway sang tawo kundi “inaway sang daku nga adlaw sang Dios nga Labing Gamhanan”—ang iya adlaw sang pagtimalos batok sa mga gumalahom sang duta. (Bugna 16:14, 16; Ezequiel 25:17) Magasugod ang dakung kapipit-an sa tapos mahapay ang Babilonia nga Daku. Nian, sa sugyot ni Satanas, ang duag-eskarlata nga sapat nga mapintas kag ang napulo ka sungay sini magasalakay sa katawhan ni Jehova. Ang Yawa, nga mas akig gid karon sa tulad-babayi nga organisasyon sang Dios, determinado nga gamiton ang iya mga sakop sa pagpakig-away tubtob sa katapusan batok sa nagkalabilin sang iya binhi. (Bugna 12:17) Katapusan na ini nga kahigayunan ni Satanas!
2. Sin-o si Gog sang Magog, kag paano sia maniobrahon ni Jehova agod salakayon niya ang katawhan mismo ni Jehova?
2 Ang mapintas nga pagsalakay sang Yawa maathag nga ginalaragway sa Ezequiel kapitulo 38. Ang napukan na nga si Satanas ginatawag diri nga “Gog sa duta sang Magog.” Butangan ni Jehova sing malaragwayon nga kaw-it ang sag-ang ni Gog, agod butungon sia kag ang iya daku nga puersa militar sa pagsalakay. Paano niya himuon ini? Paagi sa pagpakita kay Gog sang Iya mga Saksi subong isa ka wala sing depensa nga katawhan nga ‘gintipon gikan sa mga pungsod, nga nagatipon sing manggad kag pagkabutang, nga nagapuyo sa tunga sang duta.’ Mangin sentro sila sang igtalupangod sa duta subong isa ka katawhan nga nangindi sa pagsimba sa sapat nga mapintas kag sa larawan sini. Ang ila espirituwal nga kusog kag kauswagan magapaakig kay Gog. Gani si Gog kag ang iya madamo nga puersa militar, lakip ang sapat nga mapintas gikan sa dagat upod ang napulo ka sungay sini, magasalakay sa pagpatay. Apang, indi kaangay sang Babilonia nga Daku, amligan sang Dios ang iya matinlo nga katawhan!—Ezequiel 38:1, 4, 11, 12, 15; Bugna 13:1.
3. Paano laglagon ni Jehova ang puersa militar ni Gog?
3 Paano laglagon ni Jehova si Gog kag ang tanan niya nga kadam-an? Pamatii! “‘Magatawag ako sing espada batok sa iya sa akon bug-os nga bulubukid nga duog,’ siling sang Soberano nga Ginuong Jehova. ‘Ang espada sang tagsa ka tawo mangin batok sa iya utod.’” Kag mangin wala sing pulos bisan gamiton ang nuklear ukon kombensional nga mga armas sa sina nga inaway, kay si Jehova nagsiling: “Hukman ko sia, nga may mga peste kag dugo; kag isa ka mabunok gid nga ulan kag mga ulan nga yelo, paulanan ko sia kag ang iya mga guban kag ang madamo nga katawhan nga upod sa iya sing kalayo kag asupre. Kag pat-od nga pakadakuon ko ang akon kaugalingon kag pakabalaanon ang akon kaugalingon sa itululok sang madamo nga pungsod; kag makilala gid nila nga ako amo si Jehova.”—Ezequiel 38:21-23; 39:11; ipaanggid ang Josue 10:8-14; Hukom 7:19-22; 2 Cronica 20:15, 22-24; Job 38:22, 23.
Ang Isa nga Ginatawag nga “Matutom kag Matuod”
4. Paano ginlaragway ni Juan si Jesucristo nga napanaptan para sa inaway?
4 Matawag si Jehova sing isa ka espada. Sin-o ang nagauyat sini nga espada? Sa aton pagbalik liwat sa Bugna, makita naton ang sabat sa isa pa ka makakulunyag nga palanan-awon. Nagbukas ang langit sa itululok ni Juan agod ipakita ang butang nga makapulunaw gid—si Jesucristo nga napanaptan para sa inaway! Ginasugiran kita ni Juan: “Kag nakita ko nga nabuksan ang langit, kag, yari karon! isa ka puti nga kabayo. Kag ang isa nga nagasakay sa sini ginatawag nga Matutom kag Matuod, kag nagahukom sia kag nagapakig-away suno sa pagkamatarong. Ang iya mga mata nagadabdab nga kalayo, kag sa iya ulo may madamo nga diadema.”—Bugna 19:11, 12a.
5, 6. Ano ang ginapahangop sang (a) “puti nga kabayo”? (b) ngalan nga “Matutom kag Matuod”? (c) mga mata kaangay sa “nagadabdab nga kalayo”? (d) “madamo nga diadema”?
5 Subong sang sa nauna nga palanan-awon tuhoy sa apat ka mangangabayo, ining “puti nga kabayo” isa ka nagakaigo nga simbulo sang matarong nga inaway. (Bugna 6:2) Kag sin-o sa mga anak sang Dios ang mas matarong pa sa sining gamhanan nga Mangangaway? Bangod “ginatawag nga Matutom kag Matuod,” sia amo gid “ang matutom kag matuod nga saksi,” si Jesucristo. (Bugna 3:14) Magapakig-away sia agod himuon ang matarong nga mga paghukom ni Jehova. Sa sini, nagahikot sia sa iya katungdanan subong ang tinangdo ni Jehova nga Hukom, ang “Gamhanan nga Dios.” (Isaias 9:6) Makahaladlok ang iya mga mata, kaangay sa “nagadabdab nga kalayo,” nga nagatulok sa nagapakari nga kalayuhon nga kalaglagan sang iya mga kaaway.
6 Nakoronahan sing mga diadema ang ulo sining Mangangaway nga Hari. Ang sapat nga mapintas nga nakita ni Juan nga nagtakas sa dagat may napulo ka diadema, nga nagalaragway sang temporaryo nga paggahom sini sa duta. (Bugna 13:1) Apang, si Jesus may “madamo nga diadema.” Ang iya mahimayaon nga paggahom wala sing tupong, kay sia ang “Hari sang mga nagagahom subong mga hari kag Ginuo sang mga nagagahom subong mga ginuo.”—1 Timoteo 6:15.
7. Ano ang nasulat nga ngalan ni Jesus?
7 Nagpadayon ang paglaragway ni Juan: “May ngalan sia nga nasulat nga wala sing nakahibalo kundi sia lamang.” (Bugna 19:12b) Nasambit na sang Biblia ang mga ngalan nga Jesus, Immanuel, kag Miguel nga nagapatuhoy sa Anak sang Dios. Apang ining wala masambit nga “ngalan” daw nagalaragway sang posisyon kag mga pribilehiyo ni Jesus sa tion sang adlaw sang Ginuo. (Ipaanggid ang Bugna 2:17.) Sa paglaragway kay Jesus kutob sang 1914, nagsiling si Isaias: “Ang iya ngalan pagatawgon nga Makatilingala nga Manuglaygay, Gamhanan nga Dios, Dayon nga Amay, Prinsipe sang Paghidait.” (Isaias 9:6) Gin-angot ni apostol Pablo ang ngalan ni Jesus sa Iya mataas gid nga mga pribilehiyo sang pag-alagad sang magsulat sia: “Ginbayaw sia [Jesus] sang Dios sa mataas gid nga posisyon kag mainayuhon nga ginhatagan sia sing ngalan nga labaw sa tanan nga iban pa nga ngalan, agod sa ngalan ni Jesus magluhod ang tagsa ka tuhod.”—Filipos 2:9, 10.
8. Ngaa si Jesus lamang ang nakahibalo sang nasulat nga ngalan, kag upod kay sin-o niya ginapaambit ang iban sang iya mataas nga mga pribilehiyo?
8 Tumalagsahon ang mga pribilehiyo ni Jesus. Luwas kay Jehova, si Jesus lamang ang nakahangop kon ano ang buot silingon sang pag-uyat sining mataas nga posisyon. (Ipaanggid ang Mateo 11:27.) Busa, sa tanan nga tinuga sang Dios, si Jesus lamang ang bug-os nga makahangop sini nga ngalan. Apang, ginalakip ni Jesus ang iya nobya sa pila sining mga pribilehiyo. Gani ginsaad niya ini: “Ang isa nga nagadaug . . . isulat ko sa iya . . . ang akon bag-o nga ngalan.”—Bugna 3:12.
9. Ano ang ginapakita sang (a) si Jesus ‘nagasuksok sing panapton nga nawisikan sing dugo’? (b) pagtawag kay Jesus nga “Ang Pulong sang Dios”?
9 Nagsiling pa si Juan: “Kag nagasuksok sia sing panapton nga nawisikan sing dugo, kag ginatawag sia sa ngalan nga Ang Pulong sang Dios.” (Bugna 19:13) Kay sin-o ini “dugo”? Mahimo nga dugo ini ni Jesus, nga ginpaagay para sa katawhan. (Bugna 1:5) Apang, sa sini nga konteksto, mahimo gid nga nagapatuhoy ini sa dugo sang iya mga kaaway nga mapaagay kon ang mga paghukom ni Jehova himuon na batok sa ila. Ginapahanumdom kita sang nauna nga palanan-awon diin ang puno sang ubas sang duta gin-ani kag gintasak sa daku nga linasan sang ubas sang kaakig sang Dios tubtob ang dugo nakalab-ot “tubtob sa mga busal sang kabayo”—nga nagakahulugan sang daku nga kadalag-an batok sa mga kaaway sang Dios. (Bugna 14:18-20) Subong man, ang dugo nga nawisik sa panapton ni Jesus nagapamatuod nga ang iya kadalag-an katapusan na kag bug-os. (Ipaanggid ang Isaias 63:1-6.) Gintawag liwat karon ni Juan si Jesus sa isa pa ka ngalan. Sini nga tion isa ini ka kilala nga ngalan—“Ang Pulong sang Dios”—nga nagapakilala sa sining Mangangaway nga Hari subong amo ang iya ni Jehova Panguna nga Humalambal kag Tagpangapin sang kamatuoran.—Juan 1:1; Bugna 1:1.
Ang Kaupod nga mga Mangangaway ni Jesus
10, 11. (a) Paano ginapakita ni Juan nga wala nagaisahanon si Jesus sa pagpakig-away? (b) Ano ang ginapahangop sang katunayan nga ang mga kabayo puti kag ang mga mangangabayo napanaptan sing “puti, matinlo, kag pino nga lino”? (c) Sin-o ang langitnon nga “mga kasuldadusan”?
10 Wala nagaisahanon si Jesus sa sini nga pagpakig-away. Ginasugiran kita ni Juan: “Subong man, ang mga kasuldadusan sa langit nga nagasunod sa iya nagasakay sa puti nga mga kabayo, kag napanaptan sila sing puti, matinlo, kag pino nga lino.” (Bugna 19:14) Ang katunayan nga “puti” ang mga kabayo nagapahangop sing matarong nga inaway. Ang “pino nga lino” nagakabagay para sa mga mangangabayo sang Hari, kag ang nagabadlak, matinlo nga kapution sini nagapakita sing isa ka putli, matarong nga tindog sa atubangan ni Jehova. Sin-o, kon amo, ang “mga kasuldadusan”? Walay duhaduha nga nagalakip sila sa balaan nga mga anghel. Sang magsugod ang adlaw sang Ginuo gintagbong ni Miguel kag sang iya mga anghel si Satanas kag ang iya mga demonyo gikan sa langit. (Bugna 12:7-9) Dugang pa, “ang tanan nga anghel” magaalagad kay Jesus samtang nagalingkod sia sa iya mahimayaon nga trono kag nagahukom sa mga pungsod kag katawhan sang duta. (Mateo 25:31, 32) Sa pagkamatuod, sa katapusan nga inaway, kon himuon na ang mga paghukom sang Dios sa hingapusan nga tion, updan sa liwat si Jesus sang iya mga anghel.
11 May iban pa nga madalahig. Sang ginpadala ang iya mensahe sa kongregasyon sa Tiatira, nagsaad si Jesus: “Sia nga nagadaug kag nagasunod sang akon mga buhat tubtob sa katapusan hatagan ko sing awtoridad sa mga pungsod, kag bantayan niya ang katawhan paagi sa bilugon nga salsalon agod madugmok sila kaangay sa mga suludlan nga daga, subong sang nabaton ko gikan sa akon Amay.” (Bugna 2:26, 27) Walay duhaduha nga sa pag-abot sang tion, ang mga kauturan ni Cristo nga nakakayab na sa langit magapakigbahin sa pagbantay sa katawhan kag mga pungsod paagi sa sina nga bilugon nga salsalon.
12. (a) Magapakigbahin bala ang mga alagad sang Dios sa duta sa pagpakig-away sa Armagedon? (b) Paano ang katawhan ni Jehova sa duta madalahig sa Armagedon?
12 Apang, kamusta naman ang mga alagad sang Dios diri sa duta? Ang Juan nga klase indi magapakigbahin sing aktibo sa pagpakig-away sa Armagedon; ukon ang matutom nga mga kaupod sini, ang katawhan gikan sa tanan nga pungsod nga nagapanong sa iya ni Jehova espirituwal nga balay sang pagsimba. Ginsalsal na sining mahidaiton nga mga tawo ang ila mga espada nga mangin mga punta sang arado. (Isaias 2:2-4) Apang, madalahig gid sila! Subong sang nabinagbinag na naton, ang daw wala sing depensa nga katawhan ni Jehova mapintas nga salakayon ni Gog kag sang iya bug-os nga kadam-an. Amo ina ang mangin sinyales agod sugdan sang gintangdo ni Jehova nga Mangangaway nga Hari, nga ginasakdag sang mga kasuldadusan sang langit, ang inaway nga magalaglag sa sina nga mga pungsod. (Ezequiel 39:6, 7, 11; ipaanggid ang Daniel 11:44–12:1.) Subong mga tumalan-aw, mangin interesado gid ang katawhan sang Dios sa duta. Ang Armagedon magakahulugan sang ila kaluwasan, kag magakabuhi sila sing dayon subong mga nakasaksi sa daku nga inaway ni Jehova sa pagbindikar sa iya pagkasoberano.
13. Paano naton nahibal-an nga ang mga Saksi ni Jehova indi batok sa tanan nga gobierno?
13 Nagakahulugan bala ini nga ang mga Saksi ni Jehova batok sa tanan nga gobierno? Indi gid! Ginatuman nila ang laygay ni apostol Pablo: “Ang tagsa ka tawo magpasakop sa superyor nga mga awtoridad.” Nahangpan nila nga tubtob nagapadayon ang sistema karon, ginatugutan sang Dios ang “superyor nga mga awtoridad” agod mahuptan ang kahim-ong sa katilingban sang tawo. Amo kon ngaa, ang mga Saksi ni Jehova nagabayad sang ila mga buhis, nagatuman sa kasuguan, nagatahod sa mga kasuguan sa trapiko, nagasunod sa mga pagparehistro, kag sa iban pa. (Roma 13:1, 6, 7) Dugang pa, ginasunod nila ang mga prinsipio sang Biblia nga mangin maminatud-on kag bunayag; nagapakita sing gugma sa isigkatawo; nagatukod sing malig-on nga pamilya nga may maayo nga moral; kag nagahanas sa ila mga anak nga mangin huwaran nga mga banwahanon. Sa sining paagi ginabayad nila kay “Cesar ang mga butang nga iya ni Cesar, apang sa Dios ang mga butang nga iya sang Dios.” (Lucas 20:25; 1 Pedro 2:13-17) Sanglit ginapakita sang Pulong sang Dios nga ang paggahom sang mga gobierno sini nga kalibutan temporaryo lamang, nagahanda karon ang mga Saksi ni Jehova para sa bug-os nga kabuhi, ang matuod nga kabuhi, nga sa indi madugay maagom sa idalom sang paggahom sang Ginharian ni Cristo. (1 Timoteo 6:17-19) Bisan pa indi magapakigbahin ang mga Saksi sa pagpukan sa mga kagamhanan sini nga kalibutan, ginadayaw nila nga may kahadlok ang ginasiling sang inspirado nga Pulong sang Dios, ang Balaan nga Biblia, tuhoy sa paghukom nga malapit na himuon ni Jehova sa Armagedon.—Isaias 26:20, 21; Hebreo 12:28, 29.
Padulong sa Katapusan nga Inaway!
14. Ano ang ginasimbulo sang “matalom kag malaba nga espada” nga nagagua gikan sa baba ni Jesus?
14 Sa ano nga awtoridad tapuson ni Jesus ang iya pagdaug? Ginapahibalo kita ni Juan: “Kag gikan sa iya baba nagagua ang isa ka matalom kag malaba nga espada, agod lab-on niya ang mga pungsod paagi sini, kag bantayan niya sila paagi sa bilugon nga salsalon.” (Bugna 19:15a) Ining “matalom kag malaba nga espada” nagalaragway sa awtoridad nga ginhatag sang Dios kay Jesus sa paghatag sing mga mando nga laglagon ang tanan nga nagapangindi sa pagsakdag sa Ginharian sang Dios. (Bugna 1:16; 2:16) Ining maathag nga simbulismo nagaanggid sa ginhambal ni Isaias: “Ginhimo niya [Jehova] ang akon baba nga kaangay sang matalom nga espada. Sa landong sang iya kamot gintago niya ako. Kag amat-amat nga ginhimo niya ako nga isa ka ginpahining nga baslay.” (Isaias 49:2) Ginlaragway diri ni Isaias si Jesus, nga nagapahayag sang mga paghukom sang Dios kag nagapadapat sini, subong sang wala nagatalang nga baslay.
15. Sa sini nga hut-ong sang tion, sin-o ang nabuyagyag na kag nahukman agod mangin patimaan sang pagsugod sang ano?
15 Sa sini nga hut-ong sang tion, nahimo na ni Jesus ang katumanan sang ginhambal ni Pablo: “Nian, ibuyagyag gid ang malinapason, nga patyon ni Ginuong Jesus paagi sa espiritu sang iya baba kag laglagon paagi sa pagpahayag sang iya presensia.” Huo, ang presensia ni Jesus (Griego, pa·rou·siʹa) nagsugod na kutob sang 1914 padayon paagi sa pagbuyagyag kag paghukom sa tawo sang pagkamalinapason, ang klero sang Cristiandad. Ina nga presensia talalupangdon nga mapahayag kon himuon na sang napulo ka sungay sang duag-eskarlata nga sapat nga mapintas ina nga paghukom kag laglagon ang Cristiandad, upod sa nabilin nga bahin sang Babilonia nga Daku. (2 Tesalonica 2:1-3, 8) Amo ina ang mangin pamuno sang dakung kapipit-an! Pagkatapos sina, iliso ni Jesus ang iya igtalupangod sa nabilin nga bahin sang organisasyon ni Satanas, nahisuno sa tagna: “Sakiton niya ang duta paagi sa bilugon sang iya baba; kag patyon niya ang malauton paagi sa espiritu sang iya mga bibig.”—Isaias 11:4.
16. Paano ginalaragway sang Salmo kag sang Jeremias ang himuon sang gintangdo ni Jehova nga Mangangaway nga Hari?
16 Subong tinangdo ni Jehova, ipakita sang Mangangaway nga Hari ang kinatuhayan sang mga maluwas kag mga mapatay. Nagahambal sing matagnaon tuhoy sa sini nga Anak sang Dios, nagsiling si Jehova: “Balion mo sila [mga gumalahom sang duta] paagi sa setro nga salsalon, dugmukon mo sila kaangay sang suludlan sang maninihon.” Kag sa malaut nga mga lider sang gobierno kag sa ila mga sakop, nagasiling si Jeremias: “Magsugahaw, kamo nga mga manugbantay, kag magsinggit kamo! Kag magligid kamo, kamo nga mga kadalagkuan sang panong, kay ang mga adlaw sang pagpatay kag ang pagpaaplaag sa inyo natuman na, kag mahulog kamo kaangay sang matahom nga suludlan!” Bisan pa daw ano katahom ang mga gumalahom sa itululok sang malaut nga kalibutan, ang isa lamang ka paglampos sang salsalon nga setro sang Hari magadugmok sa ila, subong sang pagdugmok sa isa ka matahom nga suludlan. Mangin subong gid ini sang gintagna ni David tuhoy kay Ginuong Jesus: “Ang sungkod sang imo kusog ipadala ni Jehova gikan sa Sion, nga nagasiling: ‘Magpanglutos ka sa tunga sang imo mga kaaway.’ Si Jehova sa imo tuo ang magadugmok sa mga hari sa adlaw sang iya kasingkal. Magahukom sia sa tunga sang mga pungsod; pahanabuon niya nga mapuno ini sing mga bangkay.”—Salmo 2:9, 12; 83:17, 18; 110:1, 2, 5, 6; Jeremias 25:34.
17. (a) Paano ginlaragway ni Juan ang buhat sa paglaglag sang Mangangaway nga Hari? (b) Sambita ang pila ka tagna nga nagapakita kon daw ano ka malaglagon ang adlaw sang kaakig sang Dios para sa mga pungsod.
17 Makita liwat ining gamhanan nga Mangangaway nga Hari sa masunod nga danyag sang palanan-awon: “Linason man niya ang linasan sang ubas sang masingkal nga kaakig sang Dios nga Labing Gamhanan.” (Bugna 19:15b) Sa isa ka nauna nga palanan-awon, nakita na ni Juan ang pagtasak sa “linasan sang ubas sang kaakig sang Dios.” (Bugna 14:18-20) Ginlaragway man ni Isaias ang isa ka malaglagon nga linasan sang ubas, kag may ginsugid man ang iban nga mga manalagna kon daw ano ka malaglagon ang adlaw sang kasingkal sang Dios para sa tanan nga pungsod.—Isaias 24:1-6; 63:1-4; Jeremias 25:30-33; Daniel 2:44; Sofonias 3:8; Zacarias 14:3, 12, 13; Bugna 6:15-17.
18. Ano ang ginpahayag ni manalagna Joel tuhoy sa paghukom ni Jehova sa tanan nga pungsod?
18 Gin-angot ni manalagna Joel ang linasan sang ubas sa pag-abot ni Jehova agod ‘hukman ang tanan nga mga pungsod sa palibot.’ Kag si Jehova ang nagahatag sang mando, walay duhaduha sa Iya kaupod nga Hukom, si Jesus, kag sa iya langitnon nga mga kasuldadusan: “Ihagbas ninyo ang garab kay gulang na ang alanyon. Kari kamo, manaug kamo, kay puno na ang linasan sang ubas. Ang linasan nga tangke puno na; kay nagdamo ang ila kalautan. Ang mga kadam-an, mga kadam-an yara sa manubo nga kapatagan sang desisyon, kay ang adlaw ni Jehova malapit na sa manubo nga kapatagan sang desisyon. Ang adlaw kag ang bulan magadulom, kag ang kabituunan magauntat sa ila pagsilak. Kag gikan sa Sion magangurob si Jehova, kag gikan sa Jerusalem baskugon niya ang iya tingog. Kag pat-od nga magatay-ug ang langit kag ang duta; apang si Jehova mangin dalangpan sa iya katawhan, kag pamakod para sa mga anak sang Israel. Kag makilala gid ninyo nga ako amo si Jehova nga inyo Dios.”—Joel 3:12-17.
19. (a) Paano sabton ang pamangkot sa 1 Pedro 4:17? (b) Ano nga ngalan ang nasulat sa panapton ni Jesus, kag ngaa nagakabagay gid ini?
19 Sa pagkamatuod, mangin adlaw ina sang kalaglagan, para sa di-matinumanon nga mga pungsod kag mga tawo apang isa ka adlaw sang paumpaw para sa tanan nga naghimo kay Jehova kag sa iya Mangangaway nga Hari nga ila dalangpan! (2 Tesalonica 1:6-9) Ang paghukom nga nagsugod sa balay sang Dios sang 1918 matapos na tubtob sa talipuspusan sini, bilang sabat sa pamangkot sa 1 Pedro 4:17: “Ano ayhan ang madangatan sang mga wala nagatuman sa maayong balita sang Dios?” Natapos na sang mahimayaon nga Mandadaug ang pagtasak sa linasan sang ubas, nga nagapakita nga sia ang Isa nga nabayaw nga tuhoy sa iya si Juan nagsiling: “Kag sa iya panapton, sa iya paa nayon, may ngalan sia nga nasulat, Hari sang mga hari kag Ginuo sang mga ginuo.” (Bugna 19:16) Napamatud-an na niya nga labi sia ka gamhanan sa bisan sin-o nga gumalahom sang duta, sa bisan sin-o nga tawhanon nga hari ukon ginuo. Ang iya kadungganan kag himaya labaw sa kinaandan. Nagsakay sia “para sa kamatuoran kag sa pagkamapainubuson kag sa pagkamatarong” kag nagdaug sia tubtob sa walay katubtuban! (Salmo 45:4) Nasulat sa iya nawisikan sing dugo nga mga panapton ang ngalan nga ginhatag sa iya sang Soberano nga Ginuong Jehova, subong iya Manugbindikar!
Ang Daku nga Panihapon Sang Dios
20. Paano ginlaragway ni Juan “ang daku nga panihapon sang Dios,” nga nagapahanumdom sang ano nga nauna, apang kaanggid, nga tagna?
20 Sa palanan-awon ni Ezequiel, sa tapos malaglag ang kadam-an ni Gog, gin-agda ang kapispisan kag ang ilahas nga mga sapat sa isa ka sinalusalo! Gintinluan nila ang duta paagi sa pagkaon sang mga bangkay sang mga kaaway ni Jehova. (Ezequiel 39:11, 17-20) Ang masunod nga ginhambal ni Juan maathag nga nagapahanumdom sina nga tagna anay: “Nakita ko man ang isa ka anghel nga nagatindog sa adlaw, kag nagsinggit sia sa mabaskog nga tingog kag nagsiling sa tanan nga pispis nga nagalupad sa tunga sang kalangitan: ‘Kari kamo, magtipon kamo sa daku nga panihapon sang Dios, agod kaunon ninyo ang unod sang mga hari kag ang unod sang mga kumander sang militar kag ang unod sang makusog nga mga tawo kag ang unod sang mga kabayo kag ang unod sang mga nagasakay sa sini, kag ang unod sang tanan, sang hilway nga mga tawo subong man sang mga ulipon kag sang mga kubos kag sang kadalagkuan.’”—Bugna 19:17, 18.
21. Ano ang ginapakita sang (a) ‘pagtindog sang anghel sa adlaw’? (b) sang katunayan nga ang mga patay ginpabay-an sa kadaygan sang duta? (c) sang listahan sang mga bangkay nga pabay-an lang sa duta? (d) sang ekspresyon nga “daku nga panihapon sang Dios”?
21 Ang anghel “nagatindog sa adlaw,” isa ka mataas nga posisyon nga makatawag sang igtalupangod sang mga pispis. Ginaagda niya sila nga magpakabusog sa unod sang palatyon sang Mangangaway nga Hari kag sang iya langitnon nga mga kasuldadusan. Ang katunayan nga ang mga bangkay pabay-an sa kadaygan sang duta nagapakita nga mapatay sila sa makahuluya nga paagi. Kaangay ni Jezebel anay, indi sila paghatagan sing dungganon nga lubong. (2 Hari 9:36, 37) Ang listahan sang mga bangkay nga pabay-an sa kadaygan sang duta nagapakita nga pagalaglagon ang tanan nga sahi sang mga tawo: mga hari, mga kumander sang militar, makusog nga mga tawo, hilway nga mga tawo, kag mga ulipon. Wala sing puera. Panason ang tanan nga marka sang rebelyuso nga kalibutan nga nagapamatok kay Jehova. Pagkatapos sini, wala na sing nagaalimbukad nga dagat sang nagumon nga katawhan. (Bugna 21:1) Amo ini “ang daku nga panihapon sang Dios,” kay si Jehova ang nagaagda sa mga pispis sa pag-ambit sa sini.
22. Paano ginsumaryo ni Juan ang matabo sa katapusan nga inaway?
22 Ginsumaryo ni Juan ang matabo sa katapusan nga inaway: “Kag nakita ko ang sapat nga mapintas kag ang mga hari sang duta kag ang ila mga kasuldadusan nga nagtipon agod magpakig-away sa isa nga nagasakay sa kabayo kag sa iya kasuldadusan. Kag gindakop ang sapat nga mapintas, kag kaupod sini ang butig nga manalagna nga naghimo sa atubangan sini sing mga tanda nga gingamit niya agod patalangon ang mga nagbaton sing marka sang sapat nga mapintas kag ang mga nagasimba sa larawan sini. Samtang buhi pa, sila nga duha gintagbong sa linaw nga kalayo nga nagadabdab sa asupre. Apang ang nabilin ginpatay paagi sa malaba nga espada nga nagagua sa baba sang isa nga nagasakay sa kabayo. Kag nabusog sang ila unod ang tanan nga pispis.”—Bugna 19:19-21.
23. (a) Sa ano nga kahulugan “ang inaway sang daku nga adlaw sang Dios nga Labing Gamhanan” natabo sa “Armagedon”? (b) Ano nga paandam ang wala pagpamatii sang “mga hari sang duta,” kag ano ang resulta?
23 Pagkatapos maula ang ikan-om nga yahong sang kasingkal ni Jehova, nagsugid si Juan nga “ang mga hari sang duta kag sang bug-os nga kalibutan” gintipon sang demonyohanon nga propaganda sa “inaway sang daku nga adlaw sang Dios nga Labing Gamhanan.” Matabo ini sa Armagedon—indi isa ka literal nga lokasyon, kundi bug-os kalibutan nga kahimtangan nga magakinahanglan sang paghukom ni Jehova. (Bugna 16:12, 14, 16, King James Version) Nakita karon ni Juan kon sin-o ang nadalahig sa pagpakig-away. Ang tanan nga “hari sang duta kag ang ila mga kasuldadusan” nagapakig-away batok sa Dios. Matig-a sila nga nagapangindi sa pagpasakop sa Hari ni Jehova. Ginhatagan niya sila sing bastante nga paandam sa inspirado nga mensahe: “Haluki ninyo ang anak, agod indi sia [Jehova] maakig kag indi kamo malaglag sa dalanon.” Bangod wala sila magpasakop sa paggahom ni Cristo, dapat sila mapatay.—Salmo 2:12.
24. (a) Ano nga paghukom ang himuon sa sapat nga mapintas kag sa butig nga manalagna, kag sa ano nga kahulugan nga sila “buhi pa”? (b) Ngaa malaragwayon ang “linaw nga kalayo”?
24 Ang pito sing ulo, napulo sing sungay nga sapat nga mapintas gikan sa dagat, nga nagalaragway sa politikal nga organisasyon ni Satanas, mapukan sing dayon, kag upod sa sini ang butig nga manalagna, ang ikapito nga kagamhanan sa kalibutan. (Bugna 13:1, 11-13; 16:13) Samtang “buhi” pa, ukon samtang nagapanghikot pa sila sa ila nahiusa nga pagpamatok sa katawhan sang Dios sa duta, itagbong sila sa “linaw nga kalayo.” Literal bala ini nga linaw nga kalayo? Indi, subong nga ang sapat nga mapintas kag ang butig nga manalagna indi man literal nga mga sapat. Sa baylo, nagasimbulo ini sa bug-os kag katapusan nga kalaglagan, nga gikan diin indi na sila makagua. Diri sini, itagbong sa ulihi ang kamatayon kag Hades, subong man ang Yawa. (Bugna 20:10, 14) Sa pagkamatuod indi ini isa ka impierno sang dayon nga pag-antos para sa malauton, kay ang ideya lamang sang subong sina nga sahi sang duog makangilil-ad gid kay Jehova.—Jeremias 19:5; 32:35; 1 Juan 4:8, 16.
25. (a) Sin-o ang ‘ginpatay paagi sa malaba nga espada sang isa nga nagasakay sa kabayo’? (b) Paabuton bala naton nga ang “ginpatay” banhawon pa?
25 Ang tanan nga iban pa nga indi direkta nga bahin sang gobierno apang walay sapayan sini nangin isa ka indi na mapabag-o nga bahin sining malaut nga kalibutan sang katawhan ‘ginpatay man paagi sa malaba nga espada sang isa nga nagasakay sa kabayo.’ Hukman sila ni Jesus nga takus sa kamatayon. Sanglit wala ginsambit ang linaw nga kalayo para sa ila, mapaabot bala naton nga banhawon sila? Wala kita ginasugiran nga ang mga pamatyon sang Hukom ni Jehova sa sina nga tion pagabanhawon. Subong sang ginsiling mismo ni Jesus, ang tanan nga indi “karnero” magataliwan sa “kalayo nga walay katapusan nga gin-aman sa Yawa kag sa iya mga anghel,” buot silingon, “sa kamatayon nga walay katapusan.” (Mateo 25:33, 41, 46) Amo ini ang talipuspusan sang “adlaw sang paghukom kag sang kalaglagan sang di-diosnon nga mga tawo.”—2 Pedro 3:7; Nahum 1:2, 7-9; Malaquias 4:1.
26. Isugid sa malip-ot ang resulta sang Armagedon.
26 Sa sini nga paagi, malaglag ang bug-os nga organisasyon ni Satanas sa duta. Ang “daan nga langit” sang politikal nga paggahom nagtaliwan na. Ang “duta,” ang daw permanente nga sistema nga gintukod ni Satanas sa sulod sang mga siglo, nalaglag na karon sing bug-os. Ang “dagat,” ang malaut nga katawhan nga nagapamatok kay Jehova, wala na. (Bugna 21:1; 2 Pedro 3:10) Apang, ano ang himuon ni Jehova kay Satanas? Nagpadayon si Juan sa pagsugid sa aton.
[Mga Pamangkot sa Pagtinuon]
