Kapitulo 7

Painita Liwat ang Una nga Gugma!

EFESO

1. Sa ano nga kongregasyon ginpatuhoy ang una nga mensahe ni Jesus, kag ano ang ginpahanumdom niya sa mga manugtatap?

 ANG una nga mensahe ni Jesus ginpatuhoy sa kongregasyon sa Efeso, nga sadtong tion isa ka mauswagon nga higad-baybay nga siudad sang Asia Minor malapit sa isla sang Patmos. Ginsugo niya si Juan: “Sa anghel sang kongregasyon sa Efeso isulat mo: Amo ini ang mga butang nga ginsiling niya nga nagauyat sang pito ka bituon sa iya tuo nga kamot, sia nga nagalakat sa tunga sang pito ka kandelero nga bulawan.” (Bugna 2:1) Subong sang sa anom ka mensahe, ginapatalupangod diri ni Jesus ang isa ka butang nga nagapakita sang iya awtoridad. Ginapahanumdom niya ang mga manugtatap sa Efeso nga ang tanan nga gulang yara sa idalom sang iya maamligon nga pagtatap kag ginausisa niya ang tanan nga kongregasyon. Tubtob sa aton tion karon, padayon gihapon nga ginapakita niya ining mahigugmaon nga pagkaulo, nga ginabantayan ang mga gulang kag ang tanan nga nagapakig-upod sa kongregasyon. Sa tion kag tion, ginapasibu niya ang mga kahimusan sa sulod sang kongregasyon agod nga magsilak sing masanag pa ang kapawa. Huo, si Jesus amo ang Pangulo nga Manugbantay sang panong sang Dios.—Mateo 11:28-30; 1 Pedro 5:2-4.

2. (a) Tungod sa ano nga maayong mga butang ginhatagan ni Jesus sing komendasyon ang kongregasyon sang Efeso? (b) Ano nga laygay ni apostol Pablo ang mahimo gid nga gintuman sang mga gulang sa Efeso?

² Nian nagsugod si Jesus paagi sa paghatag sing mahinuklugon nga komendasyon, subong sang ginhimo niya sa lima sang iya pito ka mensahe. Para sa mga taga-Efeso, amo ini ang iya mensahe: “Nahibaluan ko ang imo mga buhat, kag ang imo pagpangabudlay kag pagbatas, nga indi ka makaagwanta sa malain nga mga tawo, nga ginatilawan mo ang nagasiling nga mga apostoles sila, apang indi gali, kag nasapwan mo nga butigon sila. Nagapakita man ikaw sang pagbatas, kag nag-agwanta ka tungod sa akon ngalan kag wala ginlapyo.” (Bugna 2:2, 3) Mga tinuig antes sini, ginpaandaman ni apostol Pablo ang mga gulang sa Efeso tuhoy sa “mapiguson nga mga lobo,” ang mga apostata nga nagatublag sa panong, kag ginsilingan niya ini nga mga gulang nga “padayon nga magbantay,” nga ginasunod ang iya huwaran sa kapisan. (Binuhatan 20:29, 31) Sanglit ginahatagan sila karon ni Jesus sing komendasyon bangod sang ila pagpangabudlay kag pagbatas kag indi pagkalapyo, mahimo gid nga gin-aplikar nila ini nga laygay.

3. (a) Paano ang “butig nga mga apostoles” nagtinguha sa paglimbong sa mga matutom sa aton mga adlaw? (b) Ano nga paandam tuhoy sa mga apostata ang ginhatag ni Pedro?

³ Sang adlaw sang Ginuo, naglutaw man ang “butig nga mga apostoles” nga ‘nagapamulong sing tiko nga mga butang agod ipahilayo ang mga disipulo kag pasundon sa ila.’ (2 Corinto 11:13; Binuhatan 20:30; Bugna 1:10) Nagasiling sila nga may butang nga maayo sa tanan nga nagasumpakilay nga mga sekta sang relihion, nga wala sing organisasyon ang Dios, kag wala nila ginabaton nga naggahom na si Jesus sa Ginharian sang 1914. Ginatuman nila ang tagna sa 2 Pedro 3:3, 4: “Sa katapusan nga mga adlaw ang mga mayubiton magaabot nga may pagyubit, nga nagalakat suno sa ila kaugalingon nga mga kailigbon kag nagasiling: ‘Diin bala ining ginsaad nga pag-abot niya? Ti, kutob sang magtulog sa kamatayon ang aton mga ginikanan, ang tanan nga butang nagapadayon nga amo gid gihapon kutob sa ginsuguran sang mga tinuga.’”

4. (a) Paano ginapadayag ang bugal kag pagkarebelyuso sang mga manugyubit? (b) Ginapakita sang mga Cristiano karon nga kaangay sila sang mga taga-Efeso kon maghimo sila sing ano nga aksion batok sa butigon nga mga manugpamatok?

⁴ Nagarebelde ining mga manugyubit sa paghunahuna nga magahimo sila sing dayag nga  pagpahayag sang ila pagtuo. (Roma 10:10) Ginpangayo nila ang suporta sang mga klero sang Cristiandad kag ang bulig sang mga pamantalaan kag sang mga estasyon sang telebisyon agod magpalapta sing mga kabutigan batok sa ila mga kaupod anay. Gilayon nga natukiban sang mga matutom nga ang panghambal kag paggawi sining mga manuglimbong wala sing kamatuoran. Kaangay sang mga taga-Efeso, ang mga Cristiano karon ‘indi makaagwanta sa malain nga mga tawo,’ gani gin-disfellowship nila sila gikan sa ila mga kongregasyon. *

5. (a) Ano ang siling ni Jesus nga kaluyahon sang mga taga-Efeso? (b) Ano nga mga pulong ang dapat kuntani nadumduman sang mga taga-Efeso?

⁵ Apang karon, subong sang ginhimo niya sa lima sang pito ka kongregasyon, ginsambit ni Jesus ang isa ka mabug-at nga problema. Nagsiling sia sa mga taga-Efeso: “Apang, amo ini ang naindi-an ko sa imo, nga ginbiyaan mo ang imo una nga gugma.” (Bugna 2:4) Indi ini dapat matabo sa ila, kay ginsulatan na sila anay ni Pablo sang nagligad nga 35 ka tuig tuhoy sa “daku nga gugma [sang Dios] nga ginhigugma niya sa aton,” kag ginpalig-on niya sila: “Mangin mga manug-ilog kamo sa Dios, subong mga anak nga hinigugma, kag padayon kamo nga maglakat sa gugma, subong nga si Cristo naghigugma man sa inyo.” (Efeso 2:4; 5:1, 2) Dugang pa, dapat nga indi gid nila kalipatan ang ginsiling ni Jesus: “Si Jehova nga aton Dios isa lamang nga Jehova, kag higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Marcos 12:29-31) Nadula sang mga taga-Efeso ang ila una nga gugma.

6. (a) Bisan madugay na kita ukon bag-uhan pa lamang nga mga kaupod sa kongregasyon, batok sa ano nga katalagman kag mga huyog dapat kita magbantay? (b) Ang gugma sa Dios dapat magtiklod sa aton sa paghimo sing ano?

⁶ Bisan madugay na kita ukon bag-uhan pa lamang nga mga kaupod sa kongregasyon, dapat kita maghalong nga indi madula ang aton una nga gugma kay Jehova. Paano ini mahimo matabo? Mahimo naton matugutan ang sobra nga interes sa aton sekular nga trabaho, ang handum nga makatigayon sing madamo nga kuarta, ukon ang huyog sa paglipaylipay nga mangin panguna nga butang sa aton kabuhi. Kon amo sini, mahimo nga ang aton panghunahuna mangin undanon sa baylo nga espirituwal. (Roma 8:5-8; 1 Timoteo 4:8; 6:9, 10) Ang aton gugma kay Jehova dapat magtiklod sa aton nga tadlungon ina nga mga huyog kag ‘padayon nga pangitaon anay ang ginharian sang Dios kag ang iya pagkamatarong,’ agod ‘makatipon para sa aton kaugalingon sing mga bahandi sa langit.’—Mateo 6:19-21, 31-33.

7. (a) Ano ang dapat magpahulag sa aton sa pag-alagad kay Jehova? (b) Ano ang ginsiling ni Juan tuhoy sa gugma?

⁷ Kabay nga ang aton tudok nga gugma kay Jehova amo pirme ang magpahulag sa aton sa pag-alagad sa iya. Magpakita kita sing daku gid nga apresasyon sa tanan nga nahimo ni Jehova kag ni  Cristo para sa aton. Subong sang ginsulat mismo ni Juan sang ulihi: “Ang gugma sa sini nga bahin amo, indi nga kita ang naghigugma sa Dios kundi sia ang naghigugma sa aton kag ginpadala ang iya Anak subong isa ka katumbasan nga halad para sa aton mga sala.” Nagpadayon pa si Juan sa pagsiling sa aton: “Ang Dios gugma, kag sia nga nagapabilin sa gugma nagapabilin nga nahiusa sa Dios kag ang Dios nagapabilin nga nahiusa sa iya.” Kabay nga indi gid naton pagtugutan nga magbugnaw ang aton gugma kay Jehova, kay Ginuong Jesucristo, kag sa buhi nga Pulong sang Dios! Mapabutyag naton ini nga gugma indi lamang paagi sa makugi nga pag-alagad sa Dios kundi paagi man sa pagtuman ‘sini nga sugo nga nabaton naton gikan sa iya, nga ang isa nga nagahigugma sa Dios dapat man maghigugma sa iya utod.’—1 Juan 4:10, 16, 21; Hebreo 4:12; tan-awa man ang 1 Pedro 4:8; Colosas 3:10-14; Efeso 4:15.

“Himua ang Imo mga Ginabuhat Sang Una”

8. Ano ang siling ni Jesus nga dapat himuon sang mga taga-Efeso?

⁸ Dapat painiton liwat sadtong mga taga-Efeso ang ila gugma anay kon indi nila luyag malaglag. “Busa,” siling ni Jesus sa ila, “dumduma kon gikan sa ano ka nahulog, kag maghinulsol kag himua ang mga buluhaton sang una. Kon indi ka, makadto ako sa imo, kag kuhaon ko ang imo kandelero sa nahamtangan sini, luwas lamang kon maghinulsol ka.” (Bugna 2:5) Paano ginbaton sang mga Cristiano sa kongregasyon sang Efeso ining mga pulong? Wala kita makahibalo. Kabay kuntani nga naghinulsol sila kag nagmadinalag-on sa pagpainit liwat sang ila gugma kay Jehova. Kon wala, nian mapalong ang ila suga kag kuhaon ang ila kandelero. Madula nila ang ila pribilehiyo sa pagpasilak sang kapawa sang kamatuoran.

9. (a) Ano nga makapalig-on nga pulong ang ginhatag ni Jesus sa mga taga-Efeso? (b) Paano ang mga kongregasyon sang wala na si Juan napaslawan sa pagpamati sa laygay ni Jesus sa mga taga-Efeso?

⁹ Walay sapayan sini, may yara si Jesus sining makapalig-on nga pulong para sa mga taga-Efeso: “Apang, amo ka sini gihapon, nga ginadumtan mo ang mga buhat sang sekta ni Nicolas, nga ginadumtan ko man.” (Bugna 2:6) Bisan paano ginadumtan nila ang nagabahinbahin nga mga sekta, subong nga ginadumtan man ini ni Jesus. Apang, samtang nagaligad ang mga tinuig, madamo nga kongregasyon ang wala mamati sa sini nga pulong ni Jesus. Ang kakulang sing gugma kay Jehova, sa kamatuoran, kag sa isa kag isa amat-amat nga nagdul-ong sa ila sa espirituwal nga kadudulman. Nabahinbahin sila sa madamo nga nagabangigay nga mga sekta. Ang mismo ngalan sang Dios ginkuha sang “Cristiano” nga mga manugkopya nga wala sing gugma kay Jehova gikan sa Griegong mga manuskrito sang Biblia. Bangod sang kakulang sing gugma gintudlo man ang mga doktrina nga naghalin sa Babilonia kag Gresya, subong sang kalayuhon nga impierno, purgatoryo, kag Trinidad, sa ngalan sang Cristianismo. Bangod wala sing gugma sa Dios kag sa kamatuoran, ang kalabanan sang nagapangangkon nga mga Cristiano nag-untat sa pagbantala sing maayong balita sang Ginharian sang Dios. Gingamhan sila sang makagod nga klero nga klase nga nagtukod sang ila kaugalingon nga ginharian diri sa duta.—Ipaanggid ang 1 Corinto 4:8.

10. Ano ang relihioso nga kahimtangan sa Cristiandad sang 1918?

¹⁰ Sang magsugod ang paghukom sa panimalay sang Dios sang 1918, ang sektaryan nga klero sang Cristiandad dayag nga nagsakdag sa Bug-os Kalibutan nga Inaway I, kag nagduso sa mga Katoliko kag mga Protestante sa magtimbang nga bahin nga magpinatyanay. (1 Pedro 4:17) Indi kaangay sang kongregasyon sa Efeso nga nagdumot sa ginhimo anay sang sekta ni Nicolas, ang mga relihion sang Cristiandad madugay na nga napuno sang nagasumpakilay, batok sa Dios nga mga doktrina, kag nagbuylog ang ila mga klero sa kalibutan, nga siling ni Jesus indi dapat pakigbahinan sang iya mga disipulo. (Juan 15:17-19) Bangod walay hinalung-ong nga ang tema sang Biblia amo ang Ginharian sang Dios, ang ila mga kongregasyon indi mga kandelero nga nagapasilak sing kapawa sang Makasulatanhon nga kamatuoran, kag ang ila mga katapo indi man bahin sang espirituwal nga templo ni Jehova. Ang ila nagapanguna nga mga lalaki (kag mga babayi) indi mga bituon kundi ginbuyagyag nga mga katapo sang “tawo nga malinapason.”—2 Tesalonica 2:3; Malaquias 3:1-3.

11. (a) Ano nga grupo sang mga Cristiano sa kalibutan sang 1918 ang nag-aplikar sang mga pulong ni Jesus sa mga taga-Efeso? (b) Ano ang ginhimo sang Juan nga klase kutob sang 1919 padayon?

¹¹ Apang, ang Juan nga klase nakalampuwas  sa magamo nga mga adlaw sang nahauna nga bug-os kalibutan nga inaway nga may gugma kay Jehova kag sa kamatuoran kag amo ini ang nagtiklod sa ila sa pag-alagad sa iya nga may nagadabdab nga kakugi. Ginpamatukan nila ang mga nagtinguha sa pagpasulod sang sektaryanismo paagi sa halos pagsimba sa una nga presidente sang Watch Tower Society, nga si Charles T. Russell, sang mapatay sia sang 1916. Nadisiplina paagi sa mga paghingabot kag mga kabudlayan, maathag nga ini nga grupo sang mga Cristiano ginhukman sang ila Agalon nga “maayo gid” kag gin-agda sila nga magsulod sa iya kalipay. (Mateo 25:21, 23) Nahangpan nila sa lakat sang mga hitabo sa kalibutan, kag pasad sa ila mga eksperiensia, ang katumanan sang tanda nga ginhatag ni Jesus nga magatanda sang iya di-kitaon nga presensia nga may gahom sa Ginharian. Kutob sang 1919 padayon, nagpadayon sila sa pagpakigbahin sa dugang pa nga katumanan sang daku nga tagna ni Jesus: “Kag ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mateo 6:9, 10; 24:3-14) Kon ang ila gugma kay Jehova sa pila ka paagi kulang, ginpadabdab ini kutob sadtong tion padayon.

12. (a) Sa isa ka maragtason nga kombension sang 1922, ano nga panawag ang naglanog? (b) Ano nga ngalan ang ginbaton sang matuod nga mga Cristiano sang 1931, kag ano ang ginhinulsulan nila?

¹² Sa isa ka maragtason nga kombension, nga gintambungan sang 18,000 sini nga mga Cristiano, sa Cedar Point, Ohio, E.U.A., sang Septiembre 5-13, 1922, ang panawag naglanog: “Balik kamo sa latagon, O kamo nga mga anak sang labing mataas nga Dios! . . . Dapat mahibaluan sang kalibutan nga si Jehova amo ang Dios kag si Jesucristo amo ang Hari sang mga hari kag Ginuo sang mga ginuo. . . . Busa ibantala, ibantala, ibantala, ang Hari kag ang iya ginharian.” Ang hamili nga ngalan ni Jehova ginpakilala sing kapin pa. Sang 1931 ining mga Cristiano, nga nagtipon sa kombension sa Columbus, Ohio, E.U.A., nalipay sa pagbaton sang ngalan nga ginsambit sang Dios sa tagna ni Isaias—mga Saksi ni Jehova. (Isaias 43:10, 12) Sa gua sini sang Marso 1, 1939, ang ngalan sang nagapanguna nga balasahon sang organisasyon gin-islan sing Ang Lalantawan nga Nagabantala sang Ginharian ni Jehova, sa amo nagahatag sing panguna nga kadungganan sa aton Manunuga kag sa iya harianon nga panguluhan. Ang mga Saksi ni Jehova, upod ang napainit liwat nga gugma kay Jehova, naghinulsol sa ila anay kapaslawan sa pagpadungog kag sa pagpakadaku sa iya kilala nga ngalan kag Ginharian.—Salmo 106:6, 47, 48.

“Sia nga Nagadaug”

13. (a) Ano nga pagpakamaayo ang mabaton sang mga taga-Efeso kon ‘magdaug’ sila? (b) Paano ‘magadaug’ ang taga-Efeso nga mga Cristiano?

¹³ Sa katapusan, subong sang ginhimo niya sa iban sang iya mga mensahe, ginpatalupangod ni Jesus nga ang espiritu sang Dios amo ang nagapahibalo paagi kay Jesus sang mga padya para sa pagkatutom. Sa mga taga-Efeso sia nagsiling: “Ang isa nga may dulunggan magpamati sa ginasiling sang espiritu sa mga kongregasyon: Sia nga nagadaug, tugutan ko nga magkaon gikan sa kahoy sang kabuhi, nga yara sa paraiso sang Dios.” (Bugna 2:7) Ang mga may nagapamati nga mga dulunggan nalangkag nga mamati sa sinang importante nga mensahe, bangod nahibaluan nila nga indi si Jesus ang ginhalinan sini kundi ang Soberano nga Ginuong Jehova paagi sa Iya balaan nga espiritu, ukon aktibo nga puersa. Paano sila ‘magadaug’? Paagi sa bug-os nga pagsunod sa mga tikang ni Jesus, nga naghupot sing integridad tubtob sa kamatayon kag gani nakasiling sia:  “Magpakaisog kamo! Nadaug ko ang kalibutan.”—Juan 8:28; 16:33; tan-awa man ang 1 Juan 5:4.

14. Sa ano mahimo gid nagapatuhoy “ang paraiso sang Dios” nga ginsambit ni Jesus?

¹⁴ Sanglit wala sila nagalaum nga magkabuhi sa dutan-on nga paraiso, paano nga ang hinaplas nga mga Cristiano, subong sang mga taga-Efeso, padyaan sa pagkaon “sa kahoy sang kabuhi, nga yara sa paraiso sang Dios”? Indi mahimo nga amo ini ang napasag-uli nga Paraiso sa duta, kay ang 144,000 ka hinaplas nga mga Cristiano, lakip ang mga katapo sang kongregasyon sa Efeso, ginbakal gikan sa katawhan agod maggahom upod sa Kordero, nga si Cristo Jesus, sa langitnon nga Bukid Sion subong espiritu nga mga anak. (Efeso 1:5-12; Bugna 14:1, 4) Busa, ang ginapatuhuyan diri mahimo gid nga amo ang langitnon nga tulad-hardin nga duog nga napanubli sini nga mga mandadaug. Didto, “sa paraiso sang Dios,” huo, sa atubangan mismo ni Jehova, ining mga mandadaug nga ginhatagan sing pagkadimamalatyon magapadayon sa pagkabuhi sing dayon, subong ginasimbulo diri sang ila pagkaon sa kahoy sang kabuhi.

15. Ngaa interesado gid ang dakung kadam-an karon sa pagpalig-on ni Jesus nga magdaug?

¹⁵ Ano naman ang matabo sa matutom nga dutan-on nga mga sumalakdag sang 144,000 ka hinaplas? Ang dakung kadam-an sining kaupod nga mga Saksi magadaug man. Apang ang paglaum nila amo ang pagsulod sa isa ka dutan-on nga paraiso, diin magainom sila gikan “sa suba sang tubig sang kabuhi” kag makasapo sing pag-ayo gikan sa “mga dahon sang mga kahoy” nga natanom sa higad sadto nga suba. (Bugna 7:4, 9, 17; 22:1, 2) Kon isa ikaw sa sini nga grupo, kabay nga ikaw man magpabutyag sang imo mainit nga gugma kay Jehova kag magdaug paagi sa imo pagtuo. Sa amo matigayon mo ang kalipay nga mabuhi sing walay katapusan sa Paraiso nga duta.—Ipaanggid ang 1 Juan 2:13, 14.

[Nota]

[Mga Pamangkot sa Pagtinuon]

[Kahon sa pahina 36]

Mahigugmaon nga Pagdayaw kay Jehova kag sa Iya Anak

Sa libro sang ambahanon nga ginbalhag sang katawhan ni Jehova sang 1905, doble ang kadamuon sang mga ambahanon nga nagadayaw kay Jesus sangsa kay Jehova nga Dios. Sa ila libro sang ambahanon sang 1928, halos pareho lang ang kadamuon sang mga ambahanon nga nagadayaw kay Jesus kag kay Jehova. Apang sa pinakaulihi nga libro sang ambahanon sang 1984, ginapadunggan si Jehova sang mga ambahanon nga apat ka beses ang kadamuon sangsa mga ambahanon tuhoy kay Jesus. Nagahisanto ini sa ginsiling mismo ni Jesus: “Ang Amay daku pa sa akon.” (Juan 14:28) Ang gugma kay Jehova dapat mangin labaw sa tanan, nga ginaupdan sang tudok nga gugma kay Jesus kag pag-apresyar sa iya hamili nga halad kag katungdanan subong Mataas nga Saserdote kag Hari sang Dios.

[Chart sa pahina 34]

Ang Huwaran nga Paagi Sang Paglaygay ni Jesus

(nga ginasambit ang mga kapitulo kag mga bersikulo sang Bugna)

Mensahe Awtoridad Panugod nga Ang problema Pagtadlong Resulta sa kongre- sa paghatag komendasyon maathag nga kag/ukon nga

gasyon sing laygay ginasugid pagpalig-on mga

pagpaka-

maayo

Efeso 2:1 2:2, 3 2:4 2:5, 6 2:7

Smirna 2:8 2:9 — 2:10 2:11

Pergamo 2:12 2:13 2:14, 15 2:16 2:17

Tiatira 2:18 2:19 2:20, 21 2:24, 25 2:26-28

Sardis 3:1 — 3:1, 2 3:3, 4 3:5

Filadelfia 3:7 3:8 — 3:8-11 3:12

Laodicea 3:14 — 3:15-17 3:18-20 3:21