Kapitulo 15

“Sin-o ang Takus sa Pagbukad Sang Linukot?”

1. Ano karon ang natabo sa palanan-awon ni Juan?

 MAHIMAYAON! MAKAPULUNAW! Amo sina ang makatalandog nga palanan-awon tuhoy sa trono ni Jehova nga yara sa tunga sang mga suga nga kalayo, sang mga kerubin, sang 24 ka gulang, kag sang daw salaming nga dagat. Apang Juan, ano ang masunod nga nakita mo? Ginhimutaran ni Juan ang sentro gid sini nga talan-awon sa langit, kag ginasugiran niya kita: “Kag nakita ko sa tuo nga kamot sang Isa nga nagalingkod sa trono ang isa ka linukot nga nasulatan sa sulod kag sa likod, nga nasiraduhan gid sang pito ka pat-in. Kag nakita ko ang isa ka makusog nga anghel nga nagapahayag paagi sa mabaskog nga tingog: ‘Sin-o ang takus sa pagbukad sang linukot kag sa paghukas sang mga pat-in sini?’ Apang wala sing isa sa langit ukon sa duta ukon sa idalom sang duta ang sarang makabukad sang linukot ukon makatan-aw sang sulod sini. Kag naghibi ako sing tuman bangod wala sing isa nga nakita nga takus sa pagbukad sang linukot ukon sa pagtan-aw sang sulod sini.”—Bugna 5:1-4.

2, 3. (a) Ngaa nalangkag si Juan nga may isa nga makita nga magabukad sang linukot, apang ano ang posibilidad para sa sina? (b) Ano ang malangkagon nga ginahulat sang hinaplas nga katawhan sang Dios sa aton tion?

² Si Jehova mismo nga Soberano nga Ginuo sang tanan nga tinuga ang nagaduhol sina nga linukot. Mahimo gid nga puno ini sing importante nga impormasyon, kay nasulatan ini sa atubang kag sa likod. Luyag naton mahibaluan ini. Ano ang unod sang linukot? Madumduman naton nga gin-agda ni Jehova si Juan: “Saka diri, kag ipakita ko sa imo ang mga butang nga dapat mahanabo.” (Bugna 4:1) Nalangkag gid kita nga mahibaluan kon ano ini nga mga butang. Apang ahay, sirado gid ang linukot, napit-agan sing maayo sang pito ka pat-in!

³ Makakita ayhan ang makusog nga anghel sing isa nga takus sa pagbukad sang linukot? Suno sa Kingdom Interlinear, ang linukot yara sa “tuo nga kamot” ni Jehova. Nagapahangop ini nga ginaduhol ini sang iya bukas nga palad. Apang daw wala sing isa sa langit ukon sa duta ang takus sa pagdaho kag sa pagbukad sang linukot. Wala bisan sa idalom sang duta, sa tunga sang matutom nga mga alagad sang Dios nga napatay na, ang kalipikado para sa sining daku nga dungog. Indi katingalahan nga nabalaka gid si Juan! Ayhan indi na niya mahibaluan “ang mga butang nga dapat mahanabo.” Sa aton man adlaw, malangkagon nga ginahulat sang hinaplas nga katawhan sang Dios ang pagpadala ni Jehova sang iya kapawa kag kamatuoran tuhoy sa Bugna. Himuon niya ini sing amat-amat sa gintalana nga tion para sa katumanan sang tagna,  agod tuytuyan ang iya katawhan sa dalanon sang “daku nga kaluwasan.”—Salmo 43:3, 5.

Ang Isa nga Takus

4. (a) Sin-o ang natukiban nga takus sa pagbukad sang linukot kag sa paghukas sang mga pat-in sini? (b) Ano nga padya kag pribilehiyo ang ginaambitan karon sang Juan nga klase kag sang ila mga kaupod?

⁴ Huo, may isa nga sarang makabukad sang linukot! Nag-asoy si Juan: “Apang ang isa sa mga gulang nagsiling sa akon: ‘Untati ang paghibi. Yari karon! Ang Leon sa tribo ni Juda, ang gamot ni David, nagdaug kag gani takus sia sa pagbukad sang linukot kag sa paghukas sang pito ka pat-in sini.’” (Bugna 5:5) Gani Juan, pahiri ang imo mga luha! Ang Juan nga klase kag ang ila matutom nga mga kaupod karon nagbatas man sing mabudlay nga mga pagtilaw sa sulod sang mga tinuig samtang mapailubon nga nagahulat sila sing kasanagan. Daw ano ka makalugpay nga padya nga nahangpan na naton karon ang palanan-awon, kag daw ano nga pribilehiyo nga makapakigbahin kita sa katumanan sini paagi sa pagbantala sang mensahe sini sa iban!

5. (a) Ano nga tagna ang ginpamulong tuhoy kay Juda, kag diin naggahom ang mga kaliwat ni Juda? (b) Sin-o ang Silo?

⁵ Ah, “ang Leon sa tribo ni Juda”! Pamilyar si Juan sa tagna nga ginpamulong ni Jacob, nga katigulangan sang Judiyo nga kaliwatan, tuhoy sa iya ikap-at nga anak nga si Juda: “Isa ka totoy nga leon si Juda. Gikan sa pagpanukob, anak ko, pat-od nga magasaka ka. Nagluko sia, nag-untay sia subong sang leon kag, subong sang leon, sin-o ang mangahas sa pagpukaw sa iya? Ang setro indi mahamulag kay Juda, ukon ang sungkod sang kumander gikan sa tunga sang iya mga tiil, tubtob nga mag-abot ang Silo; kag sa iya matungod ang pagkamasinulundon sang katawhan.” (Genesis 49:9, 10) Ang harianon nga kaliwatan sang katawhan sang Dios naggikan kay Juda. Sugod kay David, mga kaliwat tanan ni Juda ang mga hari nga naggahom sa Jerusalem tubtob sang ginlaglag sang mga Babilonianhon ang siudad. Apang wala sa ila ang Silo nga gintagna ni Jacob. Ang Silo nagakahulugan sing “Sia nga May [Kinamatarong].” Sing matagnaon, ini nga ngalan nagtudlo kay Jesus, ang isa nga amo karon ang permanente nga nagapanag-iya sang Ginharian ni David.—Ezequiel 21:25-27; Lucas 1:32, 33; Bugna 19:16.

6. Paano si Jesus nangin “salingsing” ni Jesse kag amo man “ang gamot ni David”?

⁶ Nahangpan gilayon ni Juan ang pagpatuhoy sa “gamot ni David.” Ang ginsaad nga Mesias matagnaon nga gintawag nga “salingsing gikan sa tuod ni Jesse [amay ni Hari David] . . . isa ka sanga” kag ‘ang gamot ni Jesse nga magatindog subong hayahay sang katawhan.’ (Isaias 11:1, 10) Si Jesus amo ang salingsing ni Jesse, kay natawo sia sa harianon nga kaliwatan ni David, nga anak ni Jesse. Dugang pa, subong gamot ni Jesse, sia ang Isa nga nagpahanabo sa Davidiko nga dinastiya nga magpanalingsing liwat, nga nagahatag sa sini sing kabuhi kag sustento sing dayon.—2 Samuel 7:16.

7. Ngaa si Jesus ang takus sa pagdaho sang linukot gikan sa kamot sang Isa nga nagalingkod sa trono?

⁷ Subong himpit nga tawo, si Jesus amo ang  talalupangdon nga naghupot sing integridad sa pag-alagad kay Jehova kag sa idalom sang masakit nga mga pagtilaw. Sia ang naghatag sing kompleto nga sabat sa hangkat ni Satanas. (Hulubaton 27:11) Sa amo, sang gab-i antes sang iya mahalaron nga kamatayon, nakasiling sia, “Nadaug ko ang kalibutan.” (Juan 16:33) Bangod sini, gintugyan ni Jehova kay Jesus nga ginbanhaw ang “bug-os nga awtoridad sa langit kag sa duta.” Sia lamang sa tanan nga alagad sang Dios ang kalipikado sa pagdaho sang linukot, sa tuyo nga ipahibalo ang importante nga mensahe sini.—Mateo 28:18.

8. (a) Tuhoy sa Ginharian, ngaa takus sa sini si Jesus? (b) Ngaa nagakaigo nga isa sa 24 ka gulang ang magpahayag kay Juan kon sin-o ang takus sa pagbukad sang linukot?

⁸ Nagakaigo gid, sa pagkamatuod, nga dapat bukaron ni Jesus ang linukot. Sugod sang 1914 naglingkod sia sa trono subong Hari sa Mesianiko nga Ginharian sang Dios, kag yadto nga linukot nagapahayag sing madamo nga impormasyon tuhoy sa Ginharian kag kon ano ang himuon sini. Matutom nga nagpanaksi si Jesus sa kamatuoran sang Ginharian sang yari sia sa duta. (Juan 18:36, 37) Gintudluan niya ang iya mga sumulunod nga ipangamuyo ang pagkari sang Ginharian. (Mateo 6:9, 10) Ginsugdan niya ang pagbantala sing maayong balita sang Ginharian sa pamuno sang Cristiano nga dag-on kag gintagna niya nga matapos ina nga pagbantala sa tion sang katapusan. (Mateo 4:23; Marcos 13:10) Nagakaigo man nga dapat isa sa 24 ka gulang ang magpahayag kay Juan nga si Jesus amo ang isa nga magahukas sang mga pat-in. Ngaa? Bangod ini nga mga gulang nagalingkod sa mga trono kag may mga korona, subong kaupod nga mga manunubli ni Cristo sa iya Ginharian.—Roma 8:17; Bugna 4:4.

‘Ang Kordero nga Ginpatay’

9. Sa baylo sang leon, ano ang nakita ni Juan nga nagatindog “sa tunga malapit sa trono,” kag paano niya ginlaragway ini?

⁹ Nagtulok si Juan agod makita ining “Leon sa tribo ni Juda.” Apang makatilingala gid! Isa ka tuhay gid nga simbuliko nga dagway ang nagpakita: “Kag nakita ko nga nagatindog sa tunga malapit sa trono kag sa apat ka buhi nga tinuga kag sa tunga sang mga gulang ang isa ka kordero nga daw ginpatay, nga may pito ka sungay kag pito ka mata, nga ang mga mata nagakahulugan sang pito ka espiritu sang Dios nga ginpadala sa bug-os nga duta.”—Bugna 5:6.

10. Sin-o ang “kordero” nga nakita ni Juan, kag ngaa nagakaigo ang termino?

¹⁰ Sa tunga mismo, sa luyo sang trono, sa sulod sang tipulon nga ginporma sang apat ka buhi nga tinuga kag sang 24 ka gulang, may isa ka kordero! Walay duhaduha nga nakilal-an dayon ni Juan ining kordero subong amo “ang Leon sa tribo ni Juda” kag “ang gamot ni David.” Nahibaluan niya nga, sang nagligad nga kapin sa 60 ka tuig antes sini, ginpakilala ni Juan Bautista si Jesus sa nagatan-aw nga mga Judiyo subong “ang Kordero sang Dios nga nagakuha sing sala sang kalibutan!” (Juan 1:29) Sa iya bug-os nga kabuhi sa duta, nagpabilin si Jesus nga wala madagtai sang kalibutan—subong gid sang wala madagtai nga kordero—agod mahalad niya ang iya walay sala nga kabuhi subong isa ka halad para sa katawhan.—1 Corinto 5:7; Hebreo 7:26.

11. Ngaa indi makapanubo nga ilaragway ang ginhimaya nga si Jesus subong “isa ka kordero nga daw ginpatay”?

¹¹ Makapanubo bala ukon indi dungganon nga ilaragway ang ginhimaya nga si Jesus subong “isa ka kordero nga daw ginpatay?” Indi gid! Ang pagpabilin ni Jesus nga matutom tubtob sa kamatayon isa ka daku nga kalutusan para kay Satanas kag isa ka daku nga kadalag-an para kay Jehova nga Dios. Ang paglaragway kay Jesus sing subong sini maathag nga nagalaragway sang iya pagdaug sa kalibutan ni Satanas kag isa ka pahanumdom sang daku nga gugma ni Jehova kag ni Jesus para sa katawhan. (Juan 3:16; 15:13; ipaanggid ang Colosas 2:15.) Sa amo ginatudlo si Jesus subong amo ang ginsaad nga Binhi, nga kalipikado gid sa pagbukad sang linukot.—Genesis 3:15.

12. Ano ang ginalaragway sang pito ka sungay sang Kordero?

¹² Ngaa maapresyar pa naton ini nga “kordero”? May pito sia ka sungay. Ang sungay masami nga ginagamit sa Biblia subong isa ka simbulo sang gahom ukon awtoridad, kag ang pito nagapahangop sing pagkakompleto. (Ipaanggid ang 1 Samuel 2:1, 10; Salmo 112:9; 148:14.) Busa, ang pito ka sungay sang Kordero nagalaragway sa bug-os nga gahom nga gintugyan ni Jehova kay Jesus. Sia “labaw gid sa tagsa ka panguluhan kag awtoridad kag gahom kag pagkaginuo kag sa tagsa ka ngalan nga ginhingalan, indi lamang sa sini nga sistema sang mga butang, kundi sa palaabuton  man.” (Efeso 1:20-23; 1 Pedro 3:22) Labi na nga gingamit ni Jesus ang gahom, ang gahom sa pagpamuno, sugod sang 1914 sang ginpalingkod sia ni Jehova sa trono subong langitnon nga Hari.—Salmo 2:6.

13. (a) Ano ang ginalaragway sang pito ka mata sang Kordero? (b) Ano ang ginhimo sang Kordero?

¹³ Dugang pa, bug-os nga napuno si Jesus sing balaan nga espiritu, subong ginalaragway sang pito ka mata sang Kordero, nga “amo ang pito ka espiritu sang Dios.” Si Jesus isa ka alagyan nga ginagamit agod ang aktibo nga puersa ni Jehova bug-os nga magailig padulong sa Iya dutan-on nga mga alagad. (Tito 3:6) Mahimo gid nga paagi sa sini man nga espiritu, makita niya gikan sa langit ang nagakatabo diri sa duta. Kaangay sang iya Amay, si Jesus may himpit nga paghantop. Wala sing makalampas sa iya panulok. (Ipaanggid ang Salmo 11:4; Zacarias 4:10.) Maathag nga ini nga Anak—ang naghupot sing integridad nga nagdaug sa kalibutan; ang Leon sa tribo ni Juda; ang gamot ni David; ang isa nga naghalad sang iya kabuhi para sa katawhan; ang isa nga may bug-os nga awtoridad, puno sing balaan nga espiritu, kag may himpit nga paghantop gikan kay Jehova nga Dios—huo, sia ang pinasahi gid nga takus sa pagdaho sang linukot gikan sa kamot ni Jehova. Nagapangalag-ag bala sia sa pagbaton sini nga tulumanon sang pag-alagad sa mataas nga organisasyon ni Jehova? Wala! Sa baylo, “nagpalapit sia kag ginkuha ini [ang linukot] gilayon sa tuo nga kamot sang Isa nga nagalingkod sa trono.” (Bugna 5:7) Daw ano ka maayo nga huwaran sang kinabubut-on nga pagsunod!

Mga Ambahanon Sang Pagdayaw

14. (a) Ano ang ginhimo sang apat ka buhi nga tinuga kag sang 24 ka gulang sang gindaho ni Jesus ang linukot? (b) Paano ang impormasyon nga nabaton ni Juan tuhoy sa 24 ka gulang nagapamatuod sa kon sin-o sila kag kon ano ang ila katungdanan?

¹⁴ Ano ang ginhimo sang iban pa sa atubangan sang trono ni Jehova? “Kag sang nakuha na niya ang linukot, nagluhod sa atubangan sang Kordero ang apat ka buhi nga tinuga kag ang duha ka pulo kag apat ka gulang, nga ang kada isa may arpa kag mga yahong nga bulawan nga puno sang incienso, kag ang incienso nagakahulugan sang mga pangamuyo sang mga balaan.” (Bugna 5:8) Kaangay sang apat ka kerubin nga buhi nga tinuga sa atubangan sang trono sang Dios, ang 24 ka gulang nagayaub kay Jesus bilang pagkilala sa iya awtoridad. Apang ini nga mga gulang amo lamang ang may mga arpa kag mga yahong sang incienso. * Kag sila lamang ang nagaamba sing bag-o nga ambahanon. (Bugna 5:9) Sa amo nagaanggid sila sa 144,000 sang balaan nga “Israel sang Dios,” nga nagadala man sing mga arpa kag nagaamba sing bag-o nga ambahanon. (Galacia 6:16; Colosas 1:12; Bugna 7:3-8; 14:1-4) Dugang pa, ang 24 ka gulang ginapakita nga nagahimo sang hilikuton sang mga saserdote sa langit, nga ginlaragway sang mga saserdote sa dumaan nga Israel nga nagsunog sing incienso para kay Jehova sa tabernakulo—isa ka hilikuton nga natapos sa duta sang gindula sang Dios ang Mosaiko nga Kasuguan paagi sa paglansang sini sa usok sang pag-antos ni Jesus. (Colosas 2:14) Ano ang mahinakop naton gikan sa sini tanan? Nga ang hinaplas nga mga mandadaug ginalaragway diri sa ila labing daku nga tulumanon subong ‘mga saserdote sang Dios kag ni Cristo, nga nagagahom subong mga hari upod sa iya sa sulod sang isa ka libo ka tuig.’—Bugna 20:6.

15. (a) Sa dumaan nga Israel, sin-o lamang ang may pribilehiyo sa pagsulod sa Labing Balaan sang tabernakulo? (b) Ngaa ang pagsunog sang mataas nga saserdote sing incienso antes magsulod sa Labing Balaan nagakahulugan sing kabuhi ukon kamatayon?

¹⁵ Sa dumaan nga Israel, ang mataas nga saserdote lamang ang makasulod sa Labing Balaan sa atubangan sang simbuliko nga presensia ni Jehova. Para sa iya, ang pagdala sing incienso isa ka butang nga mahimo magkahulugan sing kabuhi ukon kamatayon. Ang sugo ni Jehova nagasiling: “Dapat niya [Aaron] kuhaon ang incensario nga puno sing masingkal nga mga baga gikan sa halaran sa atubangan ni Jehova, kag ang mga palad sang iya duha ka kamot puno sing mapino nga mahamot nga incienso, kag dalhon niya ini sa sulod sang kurtina. Dapat man niya ibutang ang incienso sa kalayo sa atubangan ni Jehova, kag ang aso sang incienso dapat magkulap sa tabon sang Kaban, nga yara sa ibabaw sang Pagpamatuod, agod nga indi sia mapatay.” (Levitico 16:12, 13) Indi gid magmadinalag-on ang pagsulod sang mataas nga saserdote sa Labing Balaan luwas kon magsunog sia sing incienso.

16. (a) Sa Cristiano nga sistema sang mga butang, sin-o ang magasulod sa antitipiko nga Labing Balaan? (b) Ngaa dapat ‘magsunog sing incienso’ ang hinaplas nga mga Cristiano?

 ¹⁶ Sa Cristiano nga sistema sang mga butang, indi lamang ang antitipiko nga Mataas nga Saserdote nga si Jesucristo, kundi ang tagsatagsa man sang 144,000 ka kabulig nga mga saserdote ang magasulod sa ulihi sa antitipiko nga Labing Balaan, ang duog nga nahamtangan ni Jehova sa langit. (Hebreo 10:19-23) Indi gid makasulod sa Labing Balaan ini nga mga saserdote, nga ginalaragway diri sang 24 ka gulang, luwas kon ‘magsunog sila sing incienso,’ buot silingon, maghalad pirme sing mga pangamuyo kag mga pag-ampo kay Jehova.—Hebreo 5:7; Judas 20, 21; ipaanggid ang Salmo 141:2.

Isa ka Bag-o nga Ambahanon

17. (a) Ano ang bag-o nga ambahanon nga ginaamba sang 24 ka gulang? (b) Paano ang ekspresyon nga “bag-o nga ambahanon” masami nga ginagamit sa Biblia?

¹⁷ Ang isa ka matahom nga ambahanon nagalanog karon. Ginaamba ini sa Kordero sang iya kaupod nga mga saserdote, ang 24 ka gulang: “Kag nagaamba sila sing isa ka bag-o nga ambahanon, nga nagasiling: ‘Takus ka sa pagkuha sang linukot kag sa paghukas sa mga pat-in sini, bangod ginpatay ka kag paagi sa imo dugo ginbakal mo ang mga tawo para sa Dios gikan sa tagsa ka tribo kag hambal kag katawhan kag pungsod.’” (Bugna 5:9) Ang ekspresyon nga “bag-o nga ambahanon” makapila nga ginasambit sa Biblia kag masami nga nagapatuhoy sa pagdayaw kay Jehova bangod sang iya pila ka gamhanan nga buhat sang pagluwas. (Salmo 96:1; 98:1; 144:9) Sa amo, bag-o ang ambahanon bangod makapahayag karon ang umalamba sing dugang pa nga makatilingala nga mga buhat ni Jehova kag makapabutyag liwat sing apresasyon sa Iya mahimayaon nga ngalan.

18. Ngaa ginadayaw sang 24 ka gulang si Jesus paagi sa ila bag-o nga ambahanon?

¹⁸ Apang, ang 24 ka gulang, nagaamba diri sing bag-o nga ambahanon indi sa atubangan ni Jehova kundi sa atubangan ni Jesus. Apang pareho gihapon ang prinsipio. Ginadayaw nila si Jesus bangod sang bag-o nga mga butang nga, subong Anak sang Dios, ginhimo niya para sa ila. Paagi sa iya dugo, ginpatung-an niya ang bag-o nga katipan, amo nga nabun-ag ang isa ka bag-o nga pungsod subong pinasahi nga pagkabutang ni Jehova. (Roma 2:28, 29; 1 Corinto 11:25; Hebreo 7:18-25) Ang mga katapo sining bag-o nga espirituwal nga pungsod naghalin sa madamo nga undanon nga mga pungsod, apang ginhiusa sila ni Jesus sa isa ka kongregasyon subong isa ka pungsod.—Isaias 26:2; 1 Pedro 2:9, 10.

19. (a) Ano nga pagpakamaayo ang wala matigayon sang undanon nga Israel bangod sang ila pagkadimatutom? (b) Ano nga pagpakamaayo ang natigayon sang bag-o nga pungsod ni Jehova?

¹⁹ Sang ginhimo ni Jehova ang mga Israelinhon nga isa ka pungsod sang panahon ni Moises, nagpakigkatipan sia sa ila kag nagsaad nga kon magmatutom sila sa sadto nga katipan, mangin isa sila ka ginharian sang mga saserdote sa atubangan niya. (Exodo 19:5, 6) Wala magmatutom ang mga Israelinhon, gani wala nila matigayon ang katumanan sadto nga saad. Apang, ang bag-o nga pungsod, nga naporma paagi sa bag-o nga katipan nga ginpatung-an ni Jesus, nagpabilin nga matutom. Busa ang mga katapo sini magagahom sa ibabaw sang duta subong mga hari kag magaalagad man subong mga saserdote, agod buligan ang matarong nga mga tawo nga manumbalik kay Jehova. (Colosas 1:20) Subong gid ini sang ginapabutyag sang bag-o nga ambahanon: “Kag ginhimo mo sila nga isa ka ginharian kag mga saserdote sa aton Dios, kag magagahom sila sa duta subong mga hari.” (Bugna 5:10) Daw ano gid ang kalipay sadtong 24 ka gulang sa pag-amba sini nga bag-o nga ambahanon sang pagdayaw sa ginhimaya nga si Jesus!

Isa ka Langitnon nga Koro

20. Ano nga ambahanon sang pagdayaw sa Kordero ang ginapalanog karon?

²⁰ Ano ang ginhimo sang iban pa sa daku gid nga hubon sang langitnon nga organisasyon ni Jehova sa sining bag-o nga ambahanon? Nakunyag si Juan sang makita niya ang ila tinagipusuon nga pag-ugyon: “Kag nagtulok ako, kag nabatian ko ang tingog sang madamo nga anghel sa palibot sang trono kag sang buhi nga mga tinuga kag sang mga gulang, kag ang kadamuon nila linaksa ka linaksa kag linibo ka linibo, nga nagasiling sa mabaskog nga tingog: ‘Ang Kordero nga ginpatay takus sa pagbaton sing gahom kag manggad kag kaalam kag kusog kag dungog kag himaya kag pagpakamaayo.’” (Bugna 5:11, 12) Daw ano gid ka makapahamuot nga ambahanon sang pagdayaw!

21. Ang pagdayaw bala sa Kordero nakabuhin sa pagkasoberano ukon posisyon ni Jehova? Ipaathag.

²¹ Nagakahulugan bala ini nga ginbuslan na ni Jesus si Jehova nga Dios kag indi na ang iya Amay kundi sia na karon ang ginadayaw sang tanan nga  tinuga? Indi gid subong sina! Sa baylo, ini nga ambahanon sang pagdayaw nagahisanto sa ginsulat ni apostol Pablo: “Ginbayaw [si Jesus] sang Dios sa isa ka mataas gid nga posisyon kag mainayuhon nga ginhatagan sia sing ngalan nga labaw sa tanan nga iban pa nga ngalan, agod nga sa ngalan ni Jesus magluhod ang tagsa ka tuhod sa langit kag sa duta kag sa idalom sang duta, kag ang tagsa ka dila dayag nga magakilala nga si Jesucristo Ginuo sa himaya sang Dios nga Amay.” (Filipos 2:9-11) Ginadayaw diri si Jesus bangod sang iya bahin sa paghusay sang una nga hulusayon sa atubangan sang tanan nga tinuga—ang pagbindikar sa matarong nga pagkasoberano ni Jehova. Daw ano gid nga himaya, sa pagkamatuod, ang ginhatag sini sa iya Amay!

Isa ka Nagabaskog nga Ambahanon

22. Ano nga ambahanon ang ginabuylugan sang mga tingog gikan sa duta?

²² Sa talan-awon nga ginlaragway ni Juan, ang mga hubon sang langit nagaamba sing pagdayaw kay Jesus bilang pagkilala sa iya katutom kag sa iya langitnon nga awtoridad. Sa sini, ginabuylugan sila sang mga tingog gikan sa duta kay nagaambit man ini sila sa pagdayaw sa Amay kag sa Anak. Subong nga ang mga hinimuan sang isa ka tawhanon nga anak makadala sing dakung kadungganan sa mga ginikanan, ang matutom nga dalanon ni Jesus nakahatag man sing benepisyo sa tanan nga tinuga “sa himaya sang Dios nga Amay.” Gani, nagpadayon si Juan sa pagsugid: “Kag nabatian ko ang tagsa ka tinuga nga yara sa langit kag sa duta kag sa idalom sang duta kag sa dagat, kag ang tanan nga butang nga yara sa ila, nga nagasiling: ‘Ang kadayawan kag ang dungog kag ang himaya kag ang gahom mangin sa Isa nga nagalingkod sa trono kag sa Kordero tubtob sa walay katubtuban.’”—Bugna 5:13.

23, 24. (a) Ano ang nagapakita kon san-o magasugod ang pag-amba sa langit, kag kon san-o sa duta? (b) Paano ang pag-amba nagabaskog samtang nagaligad ang mga tinuig?

²³ San-o magalanog ining matahom gid nga ambahanon? Nagsugod ini sing temprano sa adlaw sang Ginuo. Sa tapos matagbong si Satanas kag ang iya mga demonyo gikan sa langit, “ang tagsa ka tinuga nga yara sa langit” mahimo magbuylog sa sini nga ambahanon sang pagdayaw. Kag, suno sa ginapakita sang rekord, kutob sang 1919 isa ka nagadaku nga kadam-an sa duta ang naghiusa sang ila tingog sa pagdayaw kay Jehova, nga nagdugang pa halin sa pila ka libo tubtob sa kapin sa anom ka milyon sang tuig 2005. * Kon malaglag na ang dutan-on nga sistema ni Satanas, ang “tagsa ka tinuga . . . sa duta” magaamba sing mga pagdayaw kay Jehova kag sa iya Anak. Sa gintalana nga tion ni Jehova, magasugod ang pagkabanhaw sang di-maisip nga minilyon ka minatay, kag nian ang “tagsa ka tinuga . . . sa idalom sang duta” nga yara sa memorya sang Dios may kahigayunan man sa pagbuylog sa pag-amba sang ambahanon.

²⁴ “Gikan sa ukbong sang duta . . . sa dagat kag . . . kapuluan,” minilyon ka katawhan ang nagaamba sing bag-o nga ambahanon upod sa bug-os kalibutan nga organisasyon ni Jehova. (Isaias 42:10; Salmo 150:1-6) Ini nga makalilipay nga pagdayaw magabaskog gid sa katapusan sang Milenyo, kon ang katawhan mangin himpit na. Sa tapos sina, ang dumaan nga man-ug, ang panguna nga manuglimbong nga si Satanas, malaglag subong bug-os nga katumanan sang Genesis 3:15, kag sa isa ka madaugon nga talipuspusan, ang tanan nga buhi nga tinuga, espiritu kag tawo, magahiusa sa pag-amba: “Ang kadayawan kag ang dungog kag ang himaya kag ang gahom mangin sa Isa nga nagalingkod sa trono kag sa Kordero tubtob sa walay katubtuban.” Wala sing nagakontra nga tingog sa bug-os nga uniberso.

25. (a) Ang pagbasa sang ginasugid ni Juan tuhoy sa bug-os uniberso nga pag-amba nagapahulag sa aton nga himuon ang ano? (b) Ano nga maayo gid nga huwaran ang ginahatag sa aton sang apat ka buhi nga tinuga kag sang 24 ka gulang samtang nagahingapos ang palanan-awon?

²⁵ Mangin makalilipay gid ina nga tion! Sa pagkamatuod, ang ginalaragway diri ni Juan nagapuno sang aton tagipusuon sing kalipay kag nagapahulag sa aton nga magbuylog sa langitnon nga mga hubon sa pag-amba sing tinagipusuon nga mga pagdayaw kay Jehova nga Dios kag kay Jesucristo. Indi bala nga mas determinado pa kita karon nga padayunon ang matarong nga mga buhat? Kon himuon naton ina, mapaabot naton nga, sa bulig ni Jehova, kita nga mga indibiduwal mangin didto sa makalilipay nga talipuspusan, nga nagadugang sang aton tingog sa bug-os uniberso nga koro sang pagdayaw. Sa pagkamatuod, ang kerubin nga apat ka buhi nga tinuga kag ang ginbanhaw nga hinaplas nga mga Cristiano nagahiusa sing bug-os, kay ang palanan-awon natapos  paagi sa sini nga mga pulong: “Kag ang apat ka buhi nga tinuga nagsiling: ‘Kabay pa!’ kag ang mga gulang nagluhod kag nagsimba.”—Bugna 5:14.

26. Sa ano kita dapat magpakita sing pagtuo, kag ano ang ginahanda sang Kordero nga himuon?

²⁶ Kabay nga ikaw man, mahal nga bumalasa, magpakita sing pagtuo sa halad sang Kordero—ang ‘isa nga takus’—kag pakamaayuhon ka sa imo mapainubuson nga mga panikasog nga magsimba kag mag-alagad kay Jehova—ang “Isa nga nagalingkod sa trono.” Tuguti ang Juan nga klase nga buligan ka karon samtang ginaaman sini ang kinahanglanon nga “[espirituwal] nga pagkaon sa nagakaigo nga tion.” (Lucas 12:42) Apang yari karon! Nagahanda na ang Kordero sa paghukas sang pito ka pat-in. Ano nga makakulunyag nga mga pagpahayag ang nagahulat karon sa aton?

[Mga nota]

[Mga Pamangkot sa Pagtinuon]

 [Retrato sa pahina 86]