Ginatipon kag Ginasangkapan ni Jehova ang Iya Katawhan Para sa Hilikuton

Sa bug-os nga mga siglo, ang apostasya naglapnag sa bilog nga duta. Ang madamo nga denominasyon sang iglesia may pila ka panudlo sang Biblia apang sa daku nga bahin ginsunod nila ang mga tradisyon sang tawo kag madamo nga mga kinabatasan nga naghalin sa pagano. Ang mga pagpaabot sa pagbalik ni Cristo ginpahigad.—Ipaanggid ang Mateo 13:24-30, 37-43.

Apang, nagsiling si Jesus nga bantayan ang iya pagbalik! Ang isa ka grupo nga naghimo sini makita sa Allegheny, Pennsylvania, E.⁠U.⁠A. Sang maaga nga bahin sang katuigan 1870 si Charles Taze Russell kag ang pila sang iya mga abyan, nagsugod sa paghimo sing maid-id, wala sing nadampigan nga pagtuon sa Biblia tuhoy sa pagbalik ni Cristo. Ginpangita man nila ang kamatuoran sang Biblia tuhoy sa madamo pa nga sadsaran nga mga panudlo. Amo ini ang umpisa sang modernong-adlaw nga mga hilikuton sang mga Saksi ni Jehova.—Mateo 24:​42.

Nahangpan sining grupo nga ang doktrina sang Trinidad indi Biblikanhon kundi si Jehova lamang ang labing gamhanan nga Dios kag Manunuga; si Jesucristo amo ang Iya una nga tinuga kag bugtong nga Anak; kag ang balaan nga espiritu indi persona kundi dimakita nga aktibo nga kusog sang Dios. Nahangpan sining grupo nga ang kalag indi dimamalatyon kundi mamalatyon, nga ang paglaum sang mga patay amo ang pagkabanhaw, kag nga ang silot para sa dimahinulsulon nga malaut indi ang dayon nga pagpaantos kundi kalaglagan.

Ang paghatag ni Jesus sang iya kabuhi subong gawad para sa katawhan nakita nga amo ang sadsaran nga panudlo sang Biblia. Una, 144,000 ka lalaki kag babayi, nga pinili kutob sang unang siglo tubtob sa aton tion, ang gawaron gikan sa duta agod mangin kabuylog nga mga manunubli ni Cristo sa langitnon nga Ginharian. Nian paagi sa gawad ni Jesus binilyon sang katawhan, nga ang kalabanan banhawon gikan sa minatay, ang makatigayon sing tawhanon nga kahimpitan nga may paglaum sa kabuhi nga walay katapusan sa duta sa idalom sang paggahom sang Ginharian.

Nahangpan man ni Russell kag sang iya mga kaupod nga ang presensia ni Cristo mangin indi makita sa espiritu. Ang Panag-on sang mga Gentil, nga sa sulod sining tion ang pagkasoberano sang Dios wala ginpabutyag sa bisan anong pangulohan sa duta, natapos sang 1914. Nian gintukod ang Ginharian sang Dios sa langit. Ining mga panudlo makilala karon upod sa mga Saksi ni Jehova.

Ginbantala ni Russell kag sang iya mga kaupod ining mga kamatuoran sing lapnag paagi sa mga pamulongpulong kag naimprinta nga mga pahina. Sang Hulyo 1879 ginsugdan ni Russell ang pagbalhag sing Zion’s Watch Tower (karon ginatawag The Watchtower). Ginpat-od niya nga ang pagbantala nga hilikuton sang mga Estudyante sang Biblia dapat bug-os nga masandig sa boluntaryo nga mga amot kag wala sing pagpangolekta nga himuon. Subong man, ang mensahe dapat ipalapnag paagi sa wala sing bayad, boluntaryo nga panikasog sang mga nagpati nga si Russell mismo nag-amot gikan sa iya natipon nga kuwarta sa negosyo tubtob sadto nga tion.

Ang mga Estudyante sang Biblia nagtipon sa mga klase, subong amo anay ang pagtawag sa ila mga kongregasyon. Nagatipon sila anay sing tubtob sa tatlo ka beses kada semana, para sa mga pamulongpulong, pagtuon sa Kasulatan, kag mga miting sa pagtestimonya. Regular nga nagapili sila sing sangkol nga mga lalaki subong mga gulang agod magdumala sa espirituwal nga mga hilikuton sang tagsa ka klase.

Sang 1884 ang Zion’s Watch Tower Tract Society ginhimo nga isa ka indi negosyo nga korporasyon sa Pennsylvania. Ang presidente sang korporasyon  ginapili kada tuig. Naghatag ini sing isa ka legal nga instrumento, nga indi nasandig sa kabuhi sang bisan sin-o nga indibiduwal, sa pagpadayon sang hilikuton nga pagtudlo sing Biblia. Si Charles T. Russell napilian nga presidente, kag ang iya opisina ginkilala subong amo ang ulong-talatapan.

Daku nga panikasog ang ginhimo agod pasangkaron ang hilikuton tubtob sa iban nga mga pungsod. Nakalab-ot ini sa Canada kag Inglaterra sang maaga nga bahin sang katuigan 1880. Sang 1891 naglibot si Russell sa Europa kag sa Natung-an nga Sidlangan agod tan-awon kon ano ang mahimo sa pagpauswag sang paglapnag sang kamatuoran didto. Sang maaga nga bahin sang katuigan 1900, ang mga sanga talatapan sang Sosiedad gintukod sa Britanya, Alemanya, kag Australia.

Sang 1909 ang ulong-talatapan sang Watch Tower Society ginsaylo sa Brooklyn, Nueva York, agod pasangkaron pa ang pagbantala nga hilikuton sa bug-os nga kalibutan. Nangin kinahanglanon nga magporma sing kaupod nga korporasyon sa idalom sang kasugoan sang Estado sang Nueva York, nga karon nakilal-an subong Watchtower Bible and Tract Society of New York, Inc. Sang 1914 ang International Bible Students Association ginporma sa London, Inglaterra, agod pauswagon ang mga hilikuton sang mga Estudyante sang Biblia sa bug-os nga British Commonwealth. Sa karon mga 70 ka legal nga korporasyon kag mga asosasyon sa madamo nga pungsod sa bilog nga kalibutan ang nagapangalagad para sa mga katuyoan sang Watch Tower Society. Ang tanan pilantropiko, nga ginasakdag sang boluntaryo nga mga amot kag boluntaryo nga mga manugpangabudlay.

Sang 1916 napatay si Charles Taze Russell, kag si Joseph Franklin Rutherford ang nagbulos sa iya subong presidente sang Watch Tower Society. Sa tion sang nagahingapos nga mga tuig sang Inaway Kalibutanon I, ang mga Estudyante sang Biblia mabaskog nga gintilawan sang paghingabot, kag ang putukputukan sini amo ang sayop nga pagbilanggo sa walo ka utod nga may responsable nga mga palangakoan sa ulong-talatapan sang Sosiedad sa Amerika. Ang hilikuton sang mga Estudyante sang Biblia daw yara sa katalagman. Apang, sang 1919 ining mga utod ginpaguwa kag gindeklarar nga wala sing sala, kag kutob sadto nagsugod ang daku pa nga pagpasangkad sang pagbantala nga hilikuton.

Paagi sa ulong-talatapan sang Sosiedad, ang nahiusa nga hubon sang hinaplas nga Cristianong mga Estudyante sang Biblia nagpadayon sa pag-aman sing espirituwal nga kalan-on sa nagakaigo nga tion para sa tanan nga indibiduwal nga kaupod sang organisasyon. Subong nga ang kongregasyon sang hinaplas nga mga Cristiano sang nahaunang siglo naghuman sang “matutom kag mainandamon nga ulipon” nga ginsambit ni Jesus, ang hinaplas man nga grupo sang dedikado nga mga Estudyante sang Biblia, nga nagapakigbahin sa hilikuton sang Ginharian, nagahuman sang “matutom kag mainandamon nga ulipon” nga klase sa aton tion. Sang mag-abot si Jesus agod usisaon ang kongregasyon, nasapwan niya ining klase nga nagaaman sing kalan-on para sa mga katapo sang panimalay; nian gintangdo niya ini sa pagdumala sang tanan niya nga pagkabutang.—Mateo 24:45-47; Lucas 12:​42.

Wala madugay pagkatapos sang Inaway Kalibutanon I, maathag nga nakita nga ang Ginharian sang Dios paagi kay Cristo Jesus natukod na sa mga langit sang 1914. Gani matuman na karon sing bug-os ang mga pulong ni Jesus: “Iwali ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” Si Joseph F. Rutherford  naghimo sing paagi agod ining mensahe sang Ginharian mabatian sang madamo pa nga tawo.—Mateo 24:​14.

Busa, namat-od ang Sosiedad nga mag-imprinta sang kaugalingon nga ginagamit ang boluntaryo nga mga manugpangabudlay nga dedikado nga mga tawo, agod mapasalig ang padayon nga pag-imprinta sing literatura sang Biblia sa pinakamanubo nga bili. Ang tanan nga Estudyante sang Biblia ginpalig-on sa pagpakigbahin sing tayuyon sa pagbantala sing maayong balita sang Ginharian. Ang pagpalayag sa radyo sang mga pamulongpulong sa Biblia gingamit sa pila ka pungsod.

Sa wala pa ang 1918 nahangpan sang mga Estudyante sang Biblia nga ang ila katuyoan sa pagbantala amo ang pagtipon sa mga nagkalabilin sang mga pinili nga mangin kaupod ni Cristo Jesus sa langit kag sa pagpaandam sa kalibutan sang nagapakari nga paghukom sang Dios. Wala pa ginhatagan sing igtalupangod sadto ang pagtipon sa mga makalampuwas sa katapusan sang malaut nga sistema karon agod mabuhi sa duta. Nian kutob sang 1918 ang pamulongpulong nga “Minilyon sang Nagakabuhi Karon ang Mahimo Indi na Mapatay!” lapnag nga ginpamulongpulong.

Sang 1923 ang pagtuon sa parabola ni Jesus tuhoy sa mga karnero kag mga kanding sa Mateo 25:​31-46 nagpakita nga sa wala pa ang Armageddon ang matarong nga mga tawo nga indi para sa langitnon nga Ginharian makatigayon man sing kahamuot sang Dios kag maluwas sa Armageddon. Sang 1935 ang dugang pa nga pagtuon nagpakita nga ining tulad-karnero nga mga tawo pareho sa daku, dimaisip nga kadam-an sang mga tawo nga ginlaragway sa Bugna 7:​9-17. Tipunon ini sila gikan sa tanan nga kapungsuran kag may paglaum nga maluwas sa Dakung Kapipit-an kag makatigayon sing kabuhi nga walay katapusan sa duta. Ining paghangop naghatag sing daku nga kusog sa pagbantala nga hilikuton.​—⁠Juan 10:​16.

Sang 1931 ginbaton sang mga Estudyante sang Biblia ang ngalan nga mga Saksi ni Jehova. Sang una gintawag sila nga mga Estudyante sang Biblia, Internasyonal nga mga Estudyante sang Biblia, Millennial Dawn people, kag Watch Tower people. Ginbansagan pa gani sila nga mga Russellites, kag Rutherfordites. Wala sing bisan diin sa sini nga mga ngalan ang nagakaigo nga nagapakilala sa ila. Bisan pa sarang nila magamit ang ngalan nga Cristiano, nga ginhatag sang Dios sa mga  gintoton-an ni Jesus sang nahaunang siglo, ginagamit man ini sang madamo nga grupo nga nagasunod sa dimatuod nga mga panudlo. Agod ipatuhay ang ila kaugalingon sa minilyon ka Cristiano sa ngalan lamang, dapat may yara isa ka ngalan nga magapatuhay sa matuod nga mga sumulunod ni Cristo sa sini nga adlaw.

Paagi sa pagbinagbinag sa Kasulatan, nag-athag nga subong nga gintawag ni Jehova ang iya katawhan anay nga Israel subong iya mga saksi, gani man ang iya katawhan sa katapusan nga sistema sang mga butang, nga nakadedikar sa pagpakilala sang iya ngalan kag katuyoan, dapat nga tawgon subong mga Saksi ni Jehova. Ini nga ngalan nagakaigo nga nagpatuhay sa matuod nga Cristianong mga sumilimba ni Jehova gikan sa tanan nga nagapangangkon nga Cristiano karon.—Salmo 83:18; Isaias 43:​10-12.

Sang 1942, sa tion sang Inaway Kalibutanon II, si Joseph F. Rutherford napatay, kag si Nathan H. Knorr nagbulos sa iya subong presidente sang Watch Tower Society. Sining tion nahangpan nga ang mga tagna maathag nga nagapakita nga sa tapos sang inaway may yara relatibo nga paghidait kag kahilwayan nga magatugot sa daku nga pagsangkad sang pagbantala nga hilikuton sa wala pa ang katapusan sining sistema. Sang Pebrero 1943 ang Watchtower Bible School of Gilead gintukod sa paghanas sing bug-os tion nga mga ministro para sa misyonero nga hilikuton sa iban nga mga pungsod. Sang talipuspusan sadto nga tuig, ang isa ka pinasahi nga programa sa paghanas para sa ministeryo gindugang sa semanal nga iskedyul sang miting sang mga Saksi ni Jehova.

Sang 1950 ginpaguwa sang Sosiedad ang mga bahin sang New World Translation of the Holy Scriptures, isa ka badbad sang Biblia sa modernong Ingles nga ginpasad sa mga teksto sang orihinal nga hambal. Ining nabadbad sing sibu, mahapos hangpon nga Biblia, kag naimprinta sa manubo nga bili sa mga makina sang Sosiedad, nangin daku nga bulig sa pagbantala nga hilikuton. Tubtob sa karon, kapin sa 40 ka milyon ka kopya ang nabalhag sa 11 ka hambal.

Sang katapusan sang 1985, kapin sa tatlo ka milyon ka Saksi ni Jehova ang nagpakigbahin sa pagbantala nga hilikuton sa kapin sa 200 ka kadutaan kag kapuloan sang dagat. Para sa Memoryal sang kamatayon ni Cristo, ang miting nga may pinakamadamo nga tumalambong sa ila 49,716 ka kongregasyon sang 1985, 7,792,109 ka tawo ang kabilogan nga nagtambong.

Nga ginagamit gid sang Dios ang mga Saksi ni Jehova makita sa ila pagpabilin nga aktibo sa pag-alagad sa iya, sa ila paghiusa sa bug-os nga kalibutan, sa ila kakugi sa pagsakdag sang ngalan ni Jehova kag pagbantala sang iya Ginharian, sa ila matinlo nga mga talaksan sang moral, sa ila pagbaton sa bug-os nga Biblia subong wala nagasayop nga Pulong sang Dios, kag sa ila kahilwayan gikan sa disparatis kag espiritismo.

Ang masunod nga mga bahin nagapakita kon paano kamo makabenepisyo gikan sa sining pagpasag-uli sang matuod nga pagsimba sa Dios:

● Anong sadsaran nga mga panudlo sang Biblia ang nagpatuhay sa mga Estudyante sang Biblia gikan sa mga denominasyon sang iglesia?

● Ano nga mga pag-uswag sa organisasyon ang naeksperiensiahan sang mga Estudyante sang Biblia tubtob sang 1918?

● Paano masiling nga ang grupo sang hinaplas nga mga Estudyante sang Biblia naghuman sang “matutom kag mainandamon nga ulipon” sa Mateo 24:​45-47?

● Ano nga paghangop sa katuyoan sang Dios ang naghatag sing daku nga kusog sa pagsangkad sang pagbantala nga hilikuton?

● Ano nga katuyoan ang gin-alagdan sang ngalan nga mga Saksi ni Jehova?

● Ano ang mga pamatuod nga ginagamit gid sang Dios ang mga Saksi ni Jehova?

[Mga piktyur sa pahina 8]

C. T. Russell sang 1879

Hulyo 1879 nga guwa

Una nga Grupo sang mga Estudyante sang Biblia, Pittsburgh, Pa.

[Mga piktyur sa pahina 9]

Ulong-talatapan, 1889-1909, Pittsburgh, Pa.

Puno nga mga talatapan, 1909-1918, Brooklyn, N.Y.

Puluy-an sa ulong-talatapan, 1909-1926, Brooklyn, N.Y.

Bug-os kalibutan nga ulong talatapan sang mga Saksi ni Jehova, Brooklyn, Nueva York, E.⁠U.⁠A.

[Mga piktyur sa pahina 10]

Nawala sa ibabaw: Mga talatapan

Natuo sa ibabaw: Puluy-an nga mga tinukod

Nawala sa ubos: Mga Pabrika

Natuo sa ubos: Sentro sang shipping

[Mga piktyur sa pahina 11]

Pagpalayag sa radyo ni J. F. Rutherford

Una nga rotary press sang Watchtower Society, nga ginpaandar sang mga boluntaryo

Biblia nga New World Translation, nabalhag karon sa 11 ka hambal