Pagbantay sa Panong sang Dios nga Nahiusa

Ang iban nagapamangkot: ‘Paano ginadumalahan ang bug-os kalibutan nga kongregasyon sang mga Saksi ni Jehova?’ Kami nagasabat: Ang kahimusan sa pagdumala nagailog sa Cristianong kongregasyon sang nahaunang siglo.

Sang katuigan 1870 si Charles T. Russell kag ang iya mga kaupod nagbuot sa pagpalapnag sang mga resulta sang ila pagtuon sa Biblia paagi sa mga pamulongpulong kag naimprinta nga mga butang. Sa bilog nga pungsod, ang mga nagbuylog sa sining hilikuton nagsandig kay Russell kag sa iya suod nga mga kaupod subong hubon sang mga tawo nga labing eksperiensiado sa paghimo sang hilikuton sang Ginuo kag gikan sa ila makapangayo sila sing laygay may kaangtanan sa ila mga hilikuton.

Sang 1884 ang Zion’s Watch Tower Tract Society ginhimo nga korporasyon sa idalom sang kasugoan sang Commonwealth of Pennsylvania. Si Russell kag ang iya responsable nga mga kaupod amo ang nagdumala sining Sosiedad subong man sang mga hilikuton sang mga Estudyante sang Biblia. Sang 1909 ginsaylo nila ang ila ulong-talatapan sa Brooklyn, Nueva York. Sa bug-os nga tinuig ang mga direktor sang Watch Tower Society kag ang iban pa nga mga kaupod nga sangkol sa espirituwal kag hinaplas nga mga lalaki nag-alagad subong nagadumala nga hubon para sa mga Saksi ni Jehova.

Ang Nagadumala nga Hubon ginahuman sang isa ka grupo sang hinaplas nga Cristianong mga lalaki (13 sang 1986), lakip ang 7 nga nagaalagad subong board of directors sang Watch Tower Society. Sila ang nagadumala sang mga hilikuton sang mga Saksi ni Jehova sa bug-os nga kalibutan. Indi sila inspirado sang Dios kag busa indi nga wala nagasayop, apang nagasandig sila sa wala nagasayop nga Pulong sang Dios, subong ang labing mataas nga awtoridad sa duta, kag may eksperiensia sa pagpasakop sa kabubut-on sang Dios. Ang kada isa may rekord sang kapin sa 40 ka tuig sa bug-os tion nga ministeryo upod sa mga Saksi ni Jehova.

Ginatuytuyan sang Nagadumala nga Hubon ang ginabalhag sang Sosiedad. Ang ginasulat napasad sa pagbantay sa espirituwal nga mga kinahanglanon sang panong kag resulta sang mapangamuyuon kag maid-id nga pagtuon kag pagpanalawsaw sa Pulong sang Dios. Samtang ining mga lalaki nagapadayon sa pagtuon sang Biblia kag sa pagtan-aw sang amat-amat nga pagkatuman sang mga katuyoan sang Dios,  sang katumanan sang tagna sa mga nagakatabo sa kalibutan, kag sang kahimtangan sang katawhan sang Dios sa kalibutan, kon kaisa mahimo ginatan-aw nila nga kinahanglanon ang nasanagan nga mga pagpasibu sa paghangop sang pila ka panudlo. Sa sining paagi, ang ihibalo tuhoy sa kamatuoran nagabugana sing dugang pa.—⁠Salmo 97:​11; Hulubaton 4:​18; Daniel 12:4.

Ang Nagadumala nga Hubon nagtangdo sing Komite sang Sanga nga ginahuman sang tatlo ukon kapin pa sang sangkol sa espirituwal nga mga lalaki sa tagsa sang kapin sa 90 ka sanga sa bug-os nga duta agod magdumala sang mga hilikuton sa kapin sa 200 ka kadutaan kag mga kapuloan. Ang mga sanga nagapakigkomunikar sa mga kongregasyon nga ila ginadumalahan. May yara regular nga komunikasyon sa ulot sang Nagadumala nga Hubon kag sang mga Komite sang Sanga, kag ang mga katapo sang Nagadumala nga Hubon personal nga nagaduaw sa madamo nga sanga kada tuig agod mahibaloan ang mga kahimtangan.

Ining mga lalaki indi agalon sang pagtuo sang iban kundi mga ministro sila nga nagapangabudlay sing lakas agod nga madamo pa ang makatuon sang Pulong sang Dios. Wala sila nagaalagad para sa pinansial nga daug, kundi ang materyal nga mga kinahanglanon nga ginaaman sa ila pareho man sa tanan nga katapo sang Bethel nga mga panimalay. Ang pamatuod nga sila nagaalagad sing matutom makita sa kakugi, paghiusa, mataas nga mga talaksan sang moral, kag katutom sa mga panudlo sang Biblia nga ginapakita sang mga Saksi ni Jehova sa bug-os nga kalibutan.—1 Corinto 3:​5-9; 4:​1, 2; 2 Corinto 1:​24; 3:​1-3; 1 Pedro 5:​2, 3.

● Ano nga kahimusan sa pagdumala ang ginhimo?

● Sin-o ang nagaalagad sa Nagadumala nga Hubon karon, kag ano ang ila mga salabton?

● Paano ginadumalahan ang hilikuton sa iban nga kadutaan?

[Mapa sa pahina 26]

(Para sa aktual nga pormat, tan-awa ang publikasyon)

Mga duog nga sa diin ang mga Saksi ni Jehova nagahimo sang kabubut-on sang Dios

[Mga piktyur sa pahina 26]

Nagligad nga mga presidente sang Watch Tower Society

C. T. Russell, 1884-1916

J. F. Rutherford, 1916-1942

N. H. Knorr, 1942-1977

F. W. Franz, 1977-1992

[Mga piktyur sa pahina 27]

Pila sang kapin sa 90 ka sanga talatapan nga paagi sa amo ginadumalahan ang mga hilikuton sang mga Saksi ni Jehova sa bug-os nga kalibutan

Canada

Zambia

Alemanya

Hapon

Australia

Brazil