Kapitulo 27

Kon Paano Makatigayon sing Bulig Paagi sa Pangamuyo

1. Ano nga bulig ang ginakinahanglan naton gikan sa Dios, kag paano naton ginabaton ini?

 AGOD MAKALIKAW sa malaut nga impluensia sang kalibutan, labi nga kinahanglan sang mga Cristiano ang bulig nga mabaton paagi sa pangamuyo. Si Jesus nagsiling: “Ang Amay nga yara sa langit magahatag sing balaan nga espiritu sa mga nagapangayo sa iya.” (Lucas 11:​13) Kinahanglan naton ang balaan nga espiritu, ukon aktibo nga kusog sang Dios, kon paano nga kinahanglan man naton ton-an ang iya Pulong kag magpakig-upod sa iya organisasyon. Apang agod mabaton ang balaan nga espiritu, dapat naton ipangamuyo ini.

2. (a) Ano ang pangamuyo? (b) Ano ang nanuhaytuhay nga porma sang pangamuyo? (c) Ngaa importante ang pangamuyo?

² Ang pangamuyo isa ka matinahuron nga pagpakighambal sa Dios. Mahimu ini sa porma sang pangabay, subong sang kon may ginapangayo ka sa Dios. Apang ang pangamuyo mahimu man mangin isa ka pagpabutyag sing pasalamat ukon pagdayaw sa Dios. (1 Cronica 29:​10-13) Agod makatigayon sing maayong kaangtanan sa aton langitnon nga Amay, dapat kita makighambal sa iya sing tayuyon paagi sa pangamuyo. (Roma 12:​12; Efeso 6:​18) Ang iya aktibo nga kusog, nga mabaton kon pangayuon naton, makapalig-on sa aton sa paghimu sang iya kabubut-on walay sapayan sang bisan anong palaligban ukon pagsulay nga dalhon sa aton ni Satanas ukon sang iya kalibutan.​—⁠1 Corinto 10:​13; Efeso 3:20.

3. (a) Ano nga kusog ang mabaton naton gikan sa Dios? (b) Paano lamang naton mahuptan ang maayong kaangtanan sa Dios?

³ Mahimu nga nagapakig-away ikaw sing matuod agod mautod ang isa ka bisyo ukon buhat nga indi kalahamut-an sa Dios. Kon amo, pangayoa ang bulig ni Jehova. Magdangop sa iya sa pangamuyo. Amo sini ang ginhimu ni apostol Pablo, kag sia nagsulat: “Nasarangan ko ang tanan nga butang bangod sa iya nga nagapabakod sa akon.” (Filipos 4:​13; Salmo 55:​22; 121:​1, 2) Ang isa ka babayi nga nakapalos sa gapos sang imoralidad nagsiling: “Sia lamang ang may gahom sa pagbulig sa imo nga makaguwa sa sina nga kahimtangan. Kinahanglan nga matigayon mo ang personal nga kaangtanan kay Jehova, kag ang lamang nga paagi agod mahuptan inang personal nga kaangtanan amo ang mangamuyo.”

4. Paano ang isa ka tawo nakabaton sing kusog sa pag-untat sang pagpanigarilyo?

 ⁴ Apang ang isa mahimu magasiling: ‘Makapila na ako nangayo sing bulig sa Dios sa pangamuyo, apang indi gihapon ako makapugong sa paghimu sing malain.’ Ang mga tawo nga nagapanigarilyo nakasiling sini. Sang ginpamangkot ang subong sina nga tawo: “San-o ikaw nagapangamuyo?” sia nagsabat: “Kon gab-i antes magtulog, kon aga pagbugtaw ko, kag kon magluya ang akon buot kag nagsigarilyo ako, nagapangayo ako sing pasaylo kay Jehova sa nahimu ko.” Ang iya abyan nagsiling: “Indi bala nga ang tion nga kinahanglan mo gid ang bulig sang Dios amo ang tinion nga luyag mo magsigarilyo? Amo ina ang tion nga dapat ka mangamuyo kay Jehova agod pabaskugon ikaw.” Sang ginhimu ini sang tawo, nakabaton sia sing bulig nga untatan ang pagpanigarilyo.

5. (a) Ano ang kinahanglan sa pag-alagad sa Dios sing nagakaigo? (b) Ano ang nagapakita nga ang pag-antos masami nga nadalahig sa pagbiya sa makasasala nga buhat?

⁵ Indi buot silingon nga ang pangamuyo sa Dios, upod ang pagtuon sa iya Pulong kag pagpakig-upod sa iya makita nga organisasyon, magapahapos para sa imo sa paghimu sing maayo. Kinahanglan gihapon ang panikasog; huo, ang lakas nga pagpakig-away, nga mahimu maglakip sing pag-antos. (1 Corinto 9:​27) Ang malain nga mga bisyo nagaresulta sa lakas nga paghandum sa malain. Gani masami nga pag-antos ang resulta kon ang isa ka tawo magbiya sa makasasala nga buhat. Handa ka bala sa pag-antos agod mahimu ang maayo?​—⁠1 Pedro 2:​20, 21.

MGA PANGAMUYO NGA GINAPAMATIAN SANG DIOS

6. (a) Ngaa madamu ang nabudlayan sa pagpangamuyo? (b) Ano ang kinahanglan naton agod pamatian ang aton pangamuyo?

⁶ Madamu ang nabudlayan sa pagpangamuyo. “Nabudlayan ako sa pagpangamuyo sa isa nga indi ko makita,” tu-ad sang isa ka lin-ay. Sanglit wala sing tawo nga nakakita sa Dios, kinahanglan naton ang pagtuo agod makapangamuyo kag mapamatian sang Dios. Dapat kita magtuo nga si Jehova nagakabuhi kag nga mahimu niya ang aton ginapangayo. (Hebreo 11:6) Kon may yara kita sina nga pagtuo, kag kon magpalapit kita sa Dios nga may sinsero nga tagipusuon, mapat-od naton nga buligan niya kita. (Marcos 9:​23) Sa amo, bisan pa ang Romanong opisyal sang hangaway nga si Cornelio indi pa sadto bahin sang organisasyon sang Dios, sang sinsero nga nangayo sia sing bulig sa pangamuyo, ginsabat sia sang Dios.​—⁠Binuhatan 10:​30-33.

7. (a) Ano nga sahi sang pangamuyo ang ginakahamut-an sang Dios? (b) Sa ano nga sahi sang pangamuyo indi mamati ang Dios?

⁷ Ang iban nabudlayan sa pagpabutyag sang ila kaugalingon. Apang, indi ini dapat mangin sablag sa ila sa pagpakighambal sa Dios sa pangamuyo. Mapat-od naton nga nahibaloan niya ang aton mga  kinahanglanon kag mahangpan niya kon ano ang buot naton silingon. (Mateo 6:8) Hunahunaa ini: Diin nga mga pulong ang imo labi nga ginaapresyar gikan sa isa ka bata​—⁠ang iya simple, sinsero nga mga pasalamat ukon ang pinasahi nga mga tinaga nga gintudlo sa iya sang iban? Gani ginaapresyar man sang aton Amay sa langit ang simple, sinsero nga mga pulong gikan sa aton. (Santiago 4:​6; Lucas 18:​9-14) Indi kinahanglan ang pinasahi nga mga tinaga ukon relihioso nga mga pulong. Indi gani sia mamati sa mga nagapangamuyo nga may tumalagsahon ukon mataas nga mga pulong agod dayawon sang iban, ukon nagasulitsulit sang amo gihapon nga mga pulong sa isa ka indi sinsero nga paagi.​—⁠Mateo 6:​5, 7.

8. (a) Ano ang nagapakita nga mabatian sang Dios ang hipos nga mga pangamuyo? (b) Ginapakita bala sang Biblia nga dapat kita mangamuyo sa isa ka posisyon ukon duog?

⁸ Bisan pa kon nagapangamuyo ikaw sing hipos, makabati ang Dios. Sang ginhimu ini ni Nehemias, ginsabat sang Dios ang iya sinsero nga pangabay, kag subong man ang kay Ana. (Nehemias 2:​4-8; 1 Samuel 1:​11-13, 19, 20) Indi man importante ang posisyon sang isa kon nagapangamuyo. Makapangamuyo ikaw sa bisan anong posisyon, sa bisan anong oras kag sa bisan anong duog. Apang, ginapakita sang Biblia nga ang mapainubuson nga posisyon, subong sang pagduko  sang ulo ukon pagluhod, nagakaigo. (1 Hari 8:​54; Nehemias 8:​6; Daniel 6:​10; Marcos 11:​25; Juan 11:​41) Kag ginpakita ni Jesus nga maayo himuon ang personal nga mga pangamuyo sa duog nga pribado, nga indi makita sang mga tawo.​—⁠Mateo 6:6.

9. (a) Sa kay sin-o dapat ipatuhoy ang tanan naton nga pangamuyo, kag ngaa? (b) Agod mahamut-an sang Dios ang aton pangamuyo, sa kay sin-o ngalan dapat ini ihalad?

⁹ Ang pangamuyo bahin sang aton pagsimba. Bangod sini ang aton pangamuyo dapat lamang ipatuhoy sa aton Manunuga, nga si Jehova nga Dios, indi sa bisan kay sin-o. (Mateo 4:​10) Kag ginapakita sang Biblia nga ang mga Cristiano dapat magpalapit sa Dios paagi kay Jesus, nga naghatag sang iya kabuhi agod madula ang aton sala. Nagakahulugan ini nga dapat kita mangamuyo sa ngalan ni Jesus.​—⁠Juan 14:​6, 14; 16:​23; Efeso 5:​20; 1 Juan 2:​1, 2.

10. (a) Kay sin-o mga pangamuyo ang indi kalahamut-an sa Dios? (b) Anong sadsaran nga kinahanglanon ang dapat matuman naton agod pamatian sang Dios ang aton pangamuyo?

¹⁰ Apang, ang tanan bala nga pangamuyo kalahamut-an kay Jehova? Ang Biblia nagasiling: “Ang nagapabungol sa kasugoan​—⁠bisan ang iya pangamuyo kangil-aran.” (Hulubaton 28:​9; 15:​29; Isaias 1:​15) Busa kon luyag naton nga pamatian sang Dios ang aton pangamuyo, ang sadsaran nga kinahanglanon amo nga himuon naton ang iya kabubut-on, nga tumanon naton ang iya kasugoan. Kay kon indi, indi kita pagpamatian sang Dios, subong nga ang isa ka matarong nga tawo indi magapamati sa programa sa radyo nga iya ginakabig imoral. Ang Biblia nagasiling: “Ang bisan ano nga ginapangayo ta mabaton ta sa iya, kay ginabantayan ta ang iya mga sugo kag nagahimu sang nahamut-an niya.”​—⁠1 Juan 3:22.

11. Ano ang buot silingon sang pagpangabudlay sa aton ginapangamuyo?

¹¹ Nagakahulugan ini nga dapat naton pangabudlayan ang aton ginapangamuyo. Halimbawa, sayop para sa isa ka tawo ang mangayo sing bulig sa Dios nga untatan ang iya paggamit sing tabako ukon marijuana kag dayon magguwa kag magbakal sini. Ukon pangayuon ang bulig ni Jehova nga likawan ang imoralidad kag dayon magbasa sing balasahon kag magtan-aw sing mga sine kag programa sa telebisyon nga nagapakita sing imoralidad. Ukon kon ang pagsugal ang kaluyahon sang isa ka tawo, indi sia makapangamuyo sa Dios nga buligan sia sa pag-untat kag dayon magkadto sia sa mga karerahan ukon iban pa nga duog nga may sugal. Agod pamatian sang Dios ang aton pangamuyo, dapat naton ipakita paagi sa aton mga buhat nga tuodtuoron gid naton ang aton ginasiling.

12. (a) Ano ang mga butang nga sarang naton malakip sa aton pangamuyo? (b) Agod mangin kalahamut-an sa Dios ang aton pangamuyo, ano ang dapat naton ton-an?

¹² Ano, nian, ang personal nga mga butang nga sarang naton malakip sa aton pangamuyo kay Jehova? Ang matuod, ang bisan anong butang nga magaapektar sang aton kaangtanan sa Dios isa ka  nagakaigo nga tema sang pangamuyo, lakip ang aton pisikal nga lawas, subong man ang pagpadaku sa kabataan. (2 Hari 20:​1-3; Hukom 13:8) Si apostol Juan nagsulat: “Kon magpangayo kita sing bisan anong butang suno sa iya kabubut-on, nagapamati sia sa aton.” (1 Juan 5:​14) Gani ang importante amo nga ang aton mga ginapangabay dapat nahisuno sa kabubut-on sang Dios. Nagakahulugan ini nga dapat naton anay hibaluon kon ano ang iya kabubut-on. (Hulubaton 3:​5, 6) Nian kon binagbinagon naton ang kabubut-on kag katuyoan sang Dios kon nagapangamuyo kita, sa baylo nga kabalak-an lamang ang aton personal nga mga kaayohan, ang aton pangamuyo mangin kalahamut-an kay Jehova. Nagakaigo nga pasalamatan naton si Jehova kada adlaw para sa maayong mga butang nga iya ginaaman.​—⁠Juan 6:​11, 23; Binuhatan 14:​16, 17.

13. (a) Paano ginpakita ni Jesus kon ano ang dapat unahon sa aton pangamuyo? (b) Anong mga butang nga ikaduha lamang ang dapat naton ipangamuyo?

¹³ Naghatag si Jesus sa iya mga sumulunod sing modelo nga pangamuyo agod magtuytoy sa ila tuhoy sa sahi sang pangamuyo nga ginabaton sang Dios. (Mateo 6:​9-13) Ginapakita sining pangamuyo nga ang mauna amo ang ngalan sang Dios, ang iya ginharian kag ang paghimu sang iya kabubut-on sa duta. Masunod, mahimu kita mangabay para sa aton personal nga mga kinahanglanon, subong sang aton adlaw-adlaw nga pagkaon, kapatawaran sang aton mga sala, kag kaluwasan gikan sa pagsulay kag gikan sa malauton, nga si Satanas nga Yawa.

MGA PANGAMUYO AGOD BULIGAN ANG IBAN

14. Paano ginapakita sang Biblia ang importansia sang pagpangamuyo para sa iban?

¹⁴ Ginpakita ni Jesus paagi sa iya halimbawa ang importansia sang  pagpangamuyo para sa iban. (Lucas 22:​32; 23:​34; Juan 17:​20) Nahibaloan ni apostol Pablo ang bili sang amo nga pangamuyo kag masami nga nangabay sia sa iban nga ipangamuyo sia. (1 Tesalonica 5:​25; 2 Tesalonica 3:​1; Roma 15:​30) Samtang didto sa bilanggoan sia nagsulat: “Nagalaum ako nga paagi sa inyo pangamuyo hilwayon ako.” (Filemon 22; Efeso 6:​18-20) Mapuslanon gid ang mga pangamuyo para sa iban bangod wala madugay ginpaguwa si Pablo sa bilanggoan.

15. Ano nga sahi sang mga pangabay ang aton mahimu tuhoy sa mga tawo nga aton ginahigugma?

¹⁵ Nangamuyo man si Pablo agod buligan ang iban. “Nagapangamuyo man kami sing dayon para sa inyo, nga ang aton Dios magpakatakus sa inyo sa iya pagtawag,” sulat niya. (2 Tesalonica 1:​11) Kag sa isa pa ka kongregasyon sia nagpaathag: “Nagapangamuyo kami sa Dios nga indi kamo maghimu sing malaut . . . kundi nga mahimu ninyo ang matarong.” (2 Corinto 13:7) Sa pagkamatuod maayo nga sundon ang halimbawa ni Pablo kag espesipiko nga mangamuyo para sa iban nga aton ginahigugma. Sa pagkamatuod, “ang pangamuyo [sinsero nga pagpakiluoy] sang isa ka tawo, kon may gahom ini, may daku nga mahimu.”​—⁠Santiago 5:​13-16.

16. (a) Agod makatigayon sing ginakinahanglan nga bulig, san-o kita dapat mangamuyo? (b) Ngaa isa ka daku nga pribilehiyo ang pangamuyo?

¹⁶ Kon nagadumala sing pagtuon sa Biblia, ang isa ka ministro pirme nagapamangkot: “Nagapangamuyo ka bala sa iban nga tion luwas sa okasyon sang imo semanal nga pagtuon sa Biblia?” Agod matigayon ang bulig nga ginakinahanglan naton, dapat kita pirme makighambal sa Dios sa pangamuyo. (1 Tesalonica 5:​17; Lucas 18:​1-8) Ton-i ang pagpakighambal sing mapainubuson sa iya subong sang himuon mo sa isa ka hinigugma kag ginasaligan nga abyan. Sa pagkamatuod, daw ano ka dalayawon nga pribilehiyo nga makapangamuyo kita sa mahimayaon nga Manuggahom sang bug-os nga uniberso, ang Manugpamati sa pangamuyo, kag mahibaloan nga ginapamatian niya ikaw!​—⁠Salmo 65:2.

[Mga Pamangkot sa Pagtinuon]

[Piktyur sa pahina 227]

Ano ang dapat himuon sang isa kon ginasulay sa pagpanigarilyo⁠—​mangayo sing bulig sa pangamuyo ukon magpadaug?

[Piktyur sa pahina 229]

Nagapangayo ka bala sing bulig sa pangamuyo kag dayon nagahimu sing butang nga makadul-ong sa pagpakasala?

[Piktyur sa pahina 230]

Nagapangamuyo ka bala sing isahanon ukon kon upod lamang sa iban?