Kapitulo 25

Para sa Kalibutan ni Satanas, Ukon para sa Bag-ong Sistema sang Dios?

1. Ano gid ang nagapamatuod nga ikaw para sa bag-ong sistema sang Dios?

 PARA KA BALA sa matarong nga bag-ong sistema sang Dios, kag luyag mo bala magkari ini? Batok ka bala kay Satanas, kag luyag mo bala malaglag ang iya kalibutan? Mahimu, Huo, ang sabat mo sa duha ka pamangkot. Apang tuman na bala ini? May yara dumaan nga hulubaton nga ang hulag mabaskog maghambal sang sa mga pulong. Kon nagapati ikaw sa bag-ong sistema sang Dios, pamatod-an ini sang imo pagkabuhi.​—⁠Mateo 7:​21-23; 15:​7, 8.

2. (a) Sin-o ang duha ka agalon nga aton maalagad? (b) Ano ang nagapakita kon kay sin-o kita ulipon ukon alagad?

² Ang kamatuoran amo, ang imo pagkabuhi kalahamut-an sa isa lamang sa duha ka agalon. Diin sa ikaw nagaalagad kay Jehova nga Dios ukon kay Satanas nga Yawa. Ang isa ka prinsipio sa Biblia makabulig sa aton nga mahangpan ini. Ini nagasiling: “Wala bala kamo makahibalo nga kon ginatugyan ninyo ang inyo kaugalingon sa bisan kay sin-o subong nga mga ulipon agod tumanon sia, mga ulipon kamo niya bangod ginatuman ninyo sia?” (Roma 6:​16) Sin-o ang imo ginatuman? Kay sin-o kabubut-on ang imo himuon? Bisan ano ang imo sabat, kon sundon mo ang dimatarong nga dalanon sang kalibutan indi ka makaalagad sa matuod nga Dios, nga si Jehova.

ANG KALIBUTAN NI SATANAS​—⁠ANO INI?

3. (a) Sin-o ang ginapakita sang Biblia nga amo ang manuggahom sang kalibutan? (b) Sa pangamuyo, paano ginpakita ni Jesus ang kinatuhayan sang kalibutan kag sang iya mga disipulo?

³ Gintawag ni Jesus si Satanas “ang manuggahom sining kalibutan.” Kag si apostol Juan nagsiling nga “ang bug-os nga kalibutan yara sa gahom sang malauton.” (Juan 12:​31; 1 Juan 5:​19) Talupangda nga sa pangamuyo sa Dios wala ginlakip ni Jesus ang iya mga disipulo subong bahin sang kalibutan ni Satanas. Sia nagsiling: “Ako nagapangamuyo para sa ila [mga disipulo niya]; ako nagapangamuyo, indi  para sa kalibutan . . . Sila indi bahin sang kalibutan, subong nga ako indi bahin sang kalibutan.” (Juan 17:​9, 16; 15:​18, 19) Maathag nga ang matuod nga mga Cristiano dapat magpain sa kalibutan.

4. (a) Sa Juan 3:​16, sa ano nagapatuhoy ang tinaga nga “kalibutan”? (b) Ano ang “kalibutan” nga gikan sa amo dapat magpain ang mga sumulunod ni Cristo?

⁴ Apang ano ang ginapatuhoyan ni Jesus sang ginsambit niya ang “kalibutan”? Sa Biblia ang tinaga nga “kalibutan” nagapatuhoy kon kaisa sa katawhan. Ginpadala sang Dios ang iya Anak agod ihatag ang iya kabuhi subong gawad para sa sining kalibutan sang katawhan. (Juan 3:​16) Apang gin-organisar ni Satanas ang kalabanan sang katawhan sa pagpamatok sa Dios. Gani ang kalibutan ni Satanas amo ining organisado nga katilingban sang tawo nga napain ukon naguwa sa makita nga organisasyon sang Dios. Ang matuod nga mga Cristiano dapat magpain sa sini nga kalibutan.​—⁠Santiago 1:27.

5. Ano ang importante nga bahin sang kalibutan, kag paano ini ginlaragway sa Biblia?

⁵ Ang kalibutan ni Satanas​—⁠ang iya organisado nga katilingban sang tawo​—⁠ginahuman sang nanuhaytuhay nagainangot nga mga bahin. Ang isa ka importante nga bahin amo ang dimatuod nga relihion. Sa Biblia ang dimatuod nga relihion ginalaragway subong isa ka “daku nga bigaon,” ukon pampam, nga may ngalan nga “Babilonia nga Daku.” Isa sia ka bug-os kalibutan nga imperyo, subong ginapakita sang kamatuoran nga sia “may ginharian sa ibabaw sang mga hari sang duta.” (Bugna 17:​1, 5, 18) Apang ano ang nagapamatuod nga ang Babilonia nga Daku isa ka relihioso bug-os kalibutan nga imperyo?

6, 7. (a) Ano ang nagapamatuod nga ang Babilonia nga Daku isa ka relihioso nga imperyo? (b) Ano ang kaangtanan sang dimatuod nga relihion sa politikal nga mga pangulohan?

⁶ Sanglit “ang mga hari sang duta” ginasiling nga ‘nagapakighilawas’ sa iya, ang Babilonia nga Daku indi mahimu nga isa ka politikal bug-os kalibutan nga imperyo. Kag sanglit ang “mga manugpatikang” sang duta nagatindog sa malayo kag nagalalaw sa iya pagkalaglag, indi sia isa ka komersial bug-os kalibutan nga imperyo. (Bugna 17:​2; 18:​15) Apang, ginapakita sang Biblia nga sia isa gid ka relihioso nga imperyo sa pagsiling nga iya “nadaya ang tanan nga pungsod paagi sa espiritismo.”​—⁠Bugna 18:23.

⁷ Ang kaangtanan sang Babilonia nga Daku sa “sapat nga mapintas” nagapamatuod man nga sia  isa ka relihioso nga imperyo. Sa Biblia ang mga sapat nagalaragway sa politikal nga mga pangulohan. (Daniel 8:​20, 21) Ang Babilonia nga Daku ginalaragway nga “nagasakay sa pula nga sapat nga mapintas . . . nga may pito ka ulo kag napulo ka sungay.” Sa amo nagtinguha sia nga impluensiahan ining “sapat nga mapintas,” ukon bug-os kalibutan nga pangulohan. (Bugna 17:3) Kag ang bug-os nga maragtas nagapamatuod nga ang relihion ginsamo sa politika, sa masami nagadikta sa mga pangulohan kon ano ang himuon. Gani matuod gid nga sia may “ginharian sa ibabaw sang mga hari sang duta.”​—⁠Bugna 17:18.

8. Ano pa ang isa ka importante nga bahin sang kalibutan ni Satanas, kag paano sila ginlaragway sa Biblia?

⁸ Ining politikal nga mga pangulohan isa pa ka importante nga bahin sang kalibutan ni Satanas. Subong nakita na naton, ginalaragway sila sa Biblia subong mga sapat. (Daniel 7:​1-8, 17, 23) Ginapakita sang isa ka palanan-awon ni apostol Juan nga ining katulad-sapat nga mga pangulohan nagabaton sang ila gahom gikan kay Satanas: “Nakita ko ang sapat nga mapintas nga nagatakas gikan sa dagat, nga may napulo ka sungay kag pito ka ulo . . . Kag ginhatag sang dragon sa sapat ang iya gahom.” (Bugna 13:​1, 2; 12:9) Ang nagapamatuod pa nga ining mga ginharian, ukon mga pangulohan bahin sang kalibutan ni Satanas amo ang kamatuoran nga ginsulay ni Satanas si Jesus paagi sa pagtanyag sa iya sining mga ginharian. Wala kuntani ini mahimu ni Satanas kon indi sia ang manuggahom sini.​—⁠Mateo 4:​8, 9.

9. (a) Paano ang isa pa ka bahin sang kalibutan ni Satanas ginlaragway sa Bugna 18:​11? (b) Ano ang ginahimu kag ginapauswag sini, nga nagapakita si Satanas ang yara sa likod sini?

⁹ Apang ang isa pa ka talalupangdon nga bahin sang kalibutan ni Satanas amo ang makagud kag mapiguson nga sistema komersial, nga ginapatuhoyan sa Bugna 18:​11 subong “mga manugpatikang.” Ginapukaw sining sistema komersial ang makagud nga handum sang mga tawo sa pagtigayon sang mga butang nga ginaprodukto sini, bisan pa mahimu nga indi nila kinahanglan ini kag maayo pa gani kon wala sila sini. Sa amo man nga tion ang makagud nga sistema komersial nagatipon sing pagkaon sa mga bodega apang ginapabay-an ang minilyon ka tawo nga mapatay sa gutom bangod wala sila sing ibayad sa pagkaon. Sa pihak nga bahin, ang mga hinganiban militar nga makalaglag sa bug-os nga pamilya sang tawo ginapatubas kag ginabaligya nga may daku nga ganansia. Sa amo ang sistema komersial ni Satanas, upod ang dimatuod nga relihion kag politikal nga mga pangulohan, nagapauswag sang kakagud, krimen kag makakulugmat nga mga inaway.

10, 11. (a) Ano pa ang isa ka bahin sang kalibutan ni Satanas? (b) Ano ang mga paandam sang Biblia batok sa pagpadalahig sa sini nga bahin?

 ¹⁰ Matuod gid nga malaut kag tiku ang organisado nga katilingban sang tawo sa idalom ni Satanas nga Yawa. Batok ini sa matarong nga kasugoan sang Dios, kag puno sang tanan nga sahi sang imoral nga mga buhat. Gani ang isa pa ka bahin sang kalibutan ni Satanas masiling nga amo ang lugak nga pagkabuhi sini, ang imoral nga mga dalanon sini. Bangod sini nagpaandam sanday apostol Pablo kag Pedro sa mga Cristiano nga likawan ang malain nga mga buhat sang katawhan sang mga pungsod.​—⁠Efeso 2:​1-3; 4:​17-19; 1 Pedro 4:​3, 4.

¹¹ Ginpadaku man ni apostol Juan ang kinahanglanon nga magbantay ang mga Cristiano batok sa malain nga mga handum kag imoral nga mga dalanon sang kalibutan. Sia nagsulat: “Dili ninyo paghigugmaon ang kalibutan ukon ang mga butang nga yara sa kalibutan. Kon ang bisan sin-o nagahigugma sa kalibutan, ang gugma sang Amay wala sa iya; kay ang tanan nga yara sa kalibutan​—⁠ang kailigbon sang unod kag ang kailigbon  sang mga mata kag ang bugal sang kabuhi​—⁠indi iya sang Amay kundi iya sang kalibutan.” (1 Juan 2:​15, 16) Si disipulo Santiago nagsiling nga ‘kon ang bisan sin-o luyag mangin abyan sang kalibutan, ginahimu niya ang iya kaugalingon nga kaaway sang Dios.’​—⁠Santiago 4:4.

KON PAANO MALIKAWAN NGA MANGIN BAHIN SANG KALIBUTAN

12, 13. (a) Paano ginpakita ni Jesus nga ang mga Cristiano dapat mangin sa kalibutan? (b) Paano mahimu nga ikaw yara sa kalibutan apang indi bahin sini?

¹² Tubtob nagaluntad ang kalibutan ni Satanas, ang mga Cristiano dapat magpuyo sa sini. Ginpakita ini ni Jesus sang mangamuyo sia sa iya Amay: “Ako wala nagapangamuyo nga kuhaon mo sila sa kalibutan.” Apang nagdugang pa si Jesus tuhoy sa iya mga sumulunod: “Sila indi bahin sang kalibutan.” (Juan 17:​15, 16) Paano mahimu nga mangin sa kalibutan ni Satanas apang indi bahin sini?

¹³ Bueno, nagapuyo ikaw sa tunga sang mga tawo nga nagahuman sang organisado nga katilingban sang tawo karon. Upod sa sini nga mga tawo ang mga makihilawason, makagud kag iban pa nga nagahimu sing kalautan. Mahimu nga nagatrabaho ka upod sa ila, nagaeskwela upod sa ila, nagakaon upod sa ila, kag nagaambit sa iban pa nga hilikuton upod sa ila. (1 Corinto 5:​9, 10) Dapat mo pa gani sila higugmaon, subong sang ginahimu sang Dios. (Juan 3:​16) Apang wala ginahigugma sang matuod nga Cristiano ang kalautan sini nga mga tawo. Wala niya ginasunod ang ila mga panimuot, hulag ukon mga tulumuron sa labuhi. Wala sia nagapakigbahin sa ila malaut nga relihion kag politika. Kag bisan pa nagatrabaho sia sa komersial nga kalibutan agod may ipangabuhi, wala sia nagapaduyog sa dibunayag nga mga buhat; kag indi ang pagtigayon sing materyal nga mga butang ang iya daku nga tulumuron sa kabuhi. Sanglit sia para sa bag-ong sistema sang Dios, nagalikaw sia sa malain nga pagpakig-upod sang mga nagakabuhi para sa kalibutan ni Satanas. (1 Corinto 15:​33; Salmo 1:​1; 26:​3-6, 9, 10) Subong resulta, sia yara sa kalibutan ni Satanas apang indi bahin sini.

14. Kon ikaw para sa bag-ong sistema sang Dios, anong sugo sang Biblia ang tumanon mo?

¹⁴ Kamusta ikaw? Luyag mo bala mangin bahin sang kalibutan ni Satanas? Ukon ikaw bala para sa bag-ong sistema sang Dios? Kon ikaw para sa bag-ong sistema sang Dios, dapat ka magpain sa kalibutan, pati sa dimatuod nga relihion sini. Sundon mo ang sugo: “Guwa ka sa iya [Babilonia nga Daku], katawhan ko.” (Bugna 18:4) Apang, ang pagguwa sa Babilonia nga Daku, ang bug-os kalibutan nga imperyo sang dimatuod nga relihion indi lamang ang pag-utod sang  tanan nga kaangtanan sa dimatuod nga relihiosong mga organisasyon. Nagakahulugan man ini sing paglikaw sa relihioso nga mga selebrasyon sang kalibutan.​—⁠2 Corinto 6:​14-18.

15. (a) Sa baylo sang pagkatawo ni Jesus, ano ang ginsugo sa mga Cristiano nga saulugon nila? (b) Ano ang nagapakita nga si Jesus indi mahimu nga natawo sang tigtulugnaw? (c) Ngaa ginpili ang petsa nga Disiembre 25 nga mangin adlaw sa pagsaulog sang kaadlawan ni Jesus?

¹⁵ Ang Paskua isa ka bantog nga piesta sang relihion karon. Apang suno sa maragtas wala ini anay ginasaulog sang nahaunang mga Cristiano. Ginsugo ni Jesus ang iya mga sumulunod nga saulogon ang memoryal sang iya kamatayon, indi sang iya pagkatawo. (1 Corinto 11:​24-26) Ang matuod, ang Disiembre 25 indi amo ang petsa sang pagkatawo ni Jesus. Indi ini mahimu, kay suno sa Biblia sang matawo si Jesus ang mga manugbantay sing karnero didto pa sa latagon sa kagab-ihon. Indi sila kuntani makapabilin didto sa matugnaw kag maulan nga tigtulugnaw. (Lucas 2:​8-12) Ang Disiembre 25 ginpili subong petsa nga isaulog ang pagkatawo ni Jesus bangod, suno sa The ­World ­Book En­cy­clo­pe­dia: “Ginasaulog na ini sang mga taga-Roma subong Piesta ni Saturno, sa pagsaulog sang pagkabun-ag sang adlaw.”

16. (a) Ano pa nga bantog nga relihiosong selebrasyon ang nagsugod sa indi mga Cristiano? (b) Ano ang maayong mga rason nga ang matuod nga mga Cristiano wala nagasaulog sing Paskua kag Eas­ter?

¹⁶ Ang Paskua sang Pagkabanhaw (Eas­ter) isa pa ka bantog nga relihiosong selebrasyon. Kaangay ini sang Cuaresma sa madamu nga pungsod sang Latin Amerika. Apang ang Eas­ter wala man pagsauloga sang nahaunang mga Cristiano. Nagsugod man ini sa di-Cristiano nga  mga selebrasyon. Ang The En­cy­clo­pæ­dia Bri­tan­ni­ca nagasiling: “Wala ginapakita sang Bag-ong Testamento nga ang Eas­ter ginsaulog anay.” Apang importante gid bala kon ang Paskua kag Eas­ter indi Cristiano nga mga selebrasyon kundi naghalin sa mga sumilimba sang dimatuod nga mga dios? Si apostol Pablo nagpaandam batok sa pagsamu sa matuod kag dimatuod, sa pagsiling nga bisan ang “diutay nga lebadura makapakumbo sa bug-os nga linamas.” (Galacia 5:9) Ginsilingan niya ang nahaunang mga Cristiano nga sala nga saulugon nila ang mga adlaw nga sang una ginapatuman sang kasugoan ni Moises apang ginpanas na sang Dios para sa mga Cristiano. (Galacia 4:​10, 11) Daw ano pa ka importante nga maglikaw karon ang matuod nga mga Cristiano sa mga selebrasyon nga wala gid pag-isugo sang Dios kag naghalin sa dimatuod nga relihion!

17. (a) Ano ang malain sa mga selebrasyon nga nagapadungog sa bantog nga mga tawo ukon mga pungsod? (b) Paano ginapakita sang Biblia kon ano ang dapat himuon sang mga Cristiano?

¹⁷ Ang iban nga mga selebrasyon sang kalibutan nagapadungog sa bantog nga mga tawo. Ang iban pa gid nagapadungog kag nagabayaw sa mga pungsod ukon kalibutanon nga mga organisasyon. Apang ang Biblia nagapaandam batok sa masimbahon nga pagpadungog sa mga tawo, ukon pagsalig sa tawhanon nga mga organisasyon sa paghimu sang mahimu lamang sang Dios. (Binuhatan 10:​25, 26; 12:​21-23; Bugna 19:​10; Jeremias 17:​5-7) Gani ang mga selebrasyon nga nagabayaw sa tawo ukon sa tawhanon nga organisasyon wala nahisuno  sa kabubut-on sang Dios, kag dapat likawan sang mga Cristiano.​—⁠Roma 12:2.

18. (a) Anong mga butang ang ginhimu sang tawo agod padunggan kag simbahon? (b) Ano ang ginasiling sang sugo sang Dios tuhoy sa paghatag sing masimbahon nga pagpadungog sa isa ka butang?

¹⁸ Madamu nga butang nga hinimu sang tawo ang ginapadunggan ukon ginapasimba sa mga tawo. Ang iban sini nahuman sa metal ukon kahoy. Ang iban pa nahuman sa tela kag mahimu nga gintahian ukon gindibuhoan sang laragway sang butang sa langit ukon sa duta. Ang isa ka pungsod mahimu magpapanaug sing sugo nga ang tanan dapat maghatag sing masimbahon nga pagpadungog sa amo nga butang. Apang ginadilian ini sang sugo sang Dios sa iya mga alagad. (Exodo 20:​4, 5; Mateo 4:​10) Ano ang ginhimu sang katawhan sang Dios sa amo sina nga kahimtangan?

19. (a) Ano ang ginsugo sang hari sang Babilonia nga himuon sang tanan? (b) Kay sin-o halimbawa ang maayo nga sundon sang mga Cristiano?

¹⁹ Sa dumaan nga Babilonia nagpatindog si Hari Nabokodonosor sing daku nga larawan nga bulawan kag nagsugo nga yauban ini. ‘Ang bisan sin-o nga indi,’ siling niya, ‘idap-ong sa tunga sang nagadabdab nga hurno sang kalayo.’ Ang Biblia nagasugid sa aton nga ang tatlo ka pamatan-on nga Hebreo nga sanday Sadrac, Mesac kag Abednego, wala magsunod sa sugo sang hari. Ngaa? Bangod pagsimba ini, kag si Jehova lamang ang ila ginasimba. Nahamuot ang Dios sa ila ginhimu, kag ginluwas niya sila gikan sa kaakig sang hari. Sa kamatuoran, nakita ni Nabokodonosor nga ining mga alagad ni Jehova indi katalagman sa Estado, gani nagpapanaug sia sing sugo agod amligan ang ila kahilwayan. (Daniel 3:​1-30) Wala mo bala ginadayaw ang katutom sining mga pamatan-on nga lalaki? Ipakita mo bala nga ikaw para gid sa bag-ong sistema sang Dios paagi sa pagtuman sa tanan nga kasugoan sang Dios?​—⁠Binuhatan 5:29.

20. Ano ang nanuhaytuhay nga mga paagi ni Satanas agod sulayon kita sa paglalis sa kasugoan sang Dios tuhoy sa seksuwal nga moralidad?

²⁰ Sa pagkamatuod, indi luyag ni Satanas nga mag-alagad kita kay Jehova. Luyag niya nga sia ang aton alagdon. Gani ginasulay niya kita sa paghimu sang luyag niya, bangod nahibaloan niya nga kita mangin mga ulipon, ukon mga alagad sang aton ginatuman. (Roma 6:​16) Sa nanuhaytuhay nga paagi, lakip ang telebisyon, sine, pila ka porma sang saot kag imoral nga balasahon, ginapalig-on ni Satanas ang seksuwal nga relasyon sa ulot sang indi kasal nga mga tawo, subong man ang panglahi. Ina nga paggawi ginahimu nga daw mabaton, kag nagakaigo pa gani. Apang batok ini sa kasugoan sang Dios. (Hebreo 13:​4; Efeso 5:​3-5) Kag ang tawo nga nagapaduyog sa sina nga paggawi nagapamatuod nga sia para sa kalibutan ni Satanas.

21. Ano pa ang iban nga buhat nga, kon himuon sang isa ka tawo, magapakita nga sia para sa kalibutan ni Satanas?

 ²¹ May iban pa nga mga buhat nga ginpalapnag sang kalibutan ni Satanas apang batok sa kasugoan sang Dios. Ang pagpahubog sa alkoholiko nga mga ilimnon isa sini. (1 Corinto 6:​9, 10) Ang isa pa amo ang paggamit sing mga droga subong sang marijuana kag heroina sa pagpangalipay, subong man ang tabako. Makahalalit ini sa lawas kag mahigku. Ang paggamit sini maathag nga paglalis sa sugo sang Dios nga “tinloan ta ang aton kaugalingon sang tanan nga kadagtaan sang lawas kag espiritu.” (2 Corinto 7:1) Ang pagpanabako nagahalit man sa lawas sang katupad naton nga nagahaklo sa aso, gani ginalalis sang nagapanabako ang sugo sang Dios nga dapat higugmaon sang Cristiano ang iya isigkatawo.​—⁠Mateo 22:39.

22. (a) Ano ang ginasiling sang Biblia tuhoy sa dugo? (b) Ngaa ang pagpatughong sing dugo indi tuhay sa “pagkaon” sing dugo? (c) Ano ang nagapakita nga ang ‘paglikaw sa dugo’ nagakahulugan sing indi gid pagpasulod sini sa imo lawas?

²² Ang isa pa ka kinaandan nga buhat sa madamu nga bahin sang kalibutan amo ang pagkaon sing dugo. Ang mga sapat nga wala mapatulo ang dugo ginakaon ukon ang dugo ginapatulo kag ginaluto subong sud-an. Apang ginadumilian sang Pulong sang Dios ang pagkaon sing dugo. (Genesis 9:​3, 4; Levitico 17:​10) Kamusta ang pagpatughong sing dugo? Mahimu mangatarungan ang iban nga ang pagpatughong sing dugo indi “pagkaon.” Apang indi bala matuod nga kon ang pasyente indi makakaon, masami nga ginarekomendar ang pagpakaon sa iya paagi sa metodo nga pareho sa pagtughong sing dugo? Ang Biblia nagasugo sa aton nga “maglikaw . . . sa dugo.” (Binuhatan 15:​20, 29) Ano ang buot silingon sini? Kon silingan ka sang doktor nga maglikaw sa alkohol, nagakahulugan bala ina nga indi ka mag-inum sini apang mahimu mo ini matughong sa imo kaugalingon paagi sa imo mga ugat? Indi sa pagkamatuod! Gani, man, ang ‘paglikaw sa dugo’ nagakahulugan sing indi gid pagpasulod sini sa lawas.

23. (a) Anong desisyon ang dapat mo himuon? (b) Ano ang magapakita sang desisyon nga imo nahimu?

²³ Dapat mo ipakita kay Jehova nga Dios nga ikaw para sa iya bag-ong sistema kag indi bahin sining kalibutan. Kinahanglan nga magdesisyon ka. Ang desisyon nga dapat mo himuon amo ang mag-alagad kay Jehova kag himuon ang iya kabubut-on. Indi mahimu nga magduhaduha ka, subong sang mga Israelinhon anay. (1 Hari 18:​21) Kay dumduma, kon indi si Jehova ang imo ginaalagad, nian si Satanas ang imo ginaalagad. Ayhan magasiling ikaw nga para ka sa bag-ong sistema sang Dios, apang ano ang ginahambal sang imo paggawi? Kon ikaw para sa bag-ong sistema sang Dios likawan mo ang tanan nga buhat nga ginapakamalaut sang Dios kag indi makita sa iya matarong nga bag-ong sistema.

[Mga Pamangkot sa Pagtinuon]

[Piktyur sa pahina 209]

Ano ang kalibutan nga wala ginpangamuyo ni Jesus kag indi bahin sini ang iya mga disipulo?

[Mga piktyur sa pahina 211]

Sa Biblia, ang dimatuod nga relihion ginalaragway subong hubog nga pampam, kag ang bug-os-kalibutan nga pangulohan nga iya ginasakyan subong sapat nga mapintas

Ang lugak nga pagkabuhi isa ka bahin sang kalibutan ni Satanas. Ang makagud sistema komersial isa man ka talalupangdon nga bahin sini

[Piktyur sa pahina 213]

Sanglit sang matawo si Jesus didto pa sa latagon ang mga manugbantay upod sa ila panong sa kagab-ihon, indi mahimu nga natawo sia sang Disiembre 25

[Piktyur sa pahina 214]

Ang mga alagad sang Dios wala magsimba sa larawan nga ginpatindog sang hari. Ano ang himuon mo sa kaanggid sini nga kahimtangan?