Ang manuggahom sang Emperyo sang Roma nga si Cesar Augusto nagsugo nga pabalikon ang tanan nga Judiyo sa lugar nga ila natawhan para magparehistro. Gani nagpauli si Jose kag si Maria sa Betlehem, kay tagadidto ang pamilya ni Jose. Manugbata na sadto nga tion si Maria.

Pag-abot nila sa Betlehem, wala na sila sing iban nga madayunan kundi sa kuadra na lang. Didto ginbun-ag ni Maria si Jesus. Ginputos niya sia sang lampin kag mahinay nga ginpahigda sa pasungan.

Ang pila ka manugbantay sang karnero ara sa wayang malapit sa Betlehem para bantayan ang ila mga panong. Dayon gulpi lang nagpakita sa ila ang anghel kag nagsanag ang ila palibot bangod sa himaya ni Jehova. Hinadlukan ang mga manugbantay, pero ang anghel nagsiling: ‘Indi kamo magkahadlok. May makalilipay ako nga  balita. Ang Mesias natawo subong sa Betlehem.’ Sa sina nga tion, nagpakita ang madamo nga anghel sa langit, nga nagasiling: ‘Dayawon ang Dios sa langit, kag paghidait sa duta.’ Dayon, nadula ang mga anghel. Ano ang reaksion sang mga manugbantay?

Ang mga manugbantay nagsiling: “Makadto kita subong sa Betlehem.” Naglakat sila dayon kag nakita nila si Jose kag si Maria sa kuadra upod sa ila bag-o nabun-ag nga lapsag.

Ang tanan nga nakabati parte sa ginsiling sang anghel sa mga manugbantay nagdayaw gid. Ginpamensaran gid sing maayo ni Maria ang ginsiling sang anghel kag wala gid niya ini ginkalimtan. Nagbalik ang mga manugbantay sa ila mga panong, nga nagapasalamat kay Jehova sa tanan nila nga nakita kag nabatian.