Pagkatapos sang Paskua, si Jesus kag ang iya mga disipulo naglakbay sa Samaria pabalik sa Galilea. Nagdulog si Jesus malapit sa siudad sang Sicar, sa lugar nga ginatawag bubon ni Jacob. Samtang nagapahuway sia didto, ang iya mga disipulo nagkadto sa siudad para magbakal sing pagkaon.

May babayi nga nagkadto sa bubon para magsag-ub sing tubig. Si Jesus nagsiling sa iya: “Paimna ako.” Nagsiling ang babayi: ‘Ngaa ginaistorya mo ako? Samaritana ako. Wala nagapakig-istorya ang mga Judiyo sa mga taga-Samaria.’ Si Jesus naghambal sa iya: ‘Kon nahibaluan mo kon sin-o ako, mangayo ka gid sing tubig sa akon kag hatagan ko ikaw sang tubig nga nagahatag sang kabuhi.’ ‘Ano ang buot mo silingon?’ pamangkot sang babayi. ‘Wala ka gani sing timba.’ Si Jesus nagsiling: ‘Ang tanan nga nagainom sang tubig nga ginahatag ko indi gid pag-uhawon.’ Nagsabat ang babayi: “Ginuo, hatagi ako sini nga tubig.”

Dayon ginsilingan sia ni Jesus: ‘Dal-a diri ang imo bana.’ Nagsiling ang babayi: “Wala ako sing bana.” Nagsiling si Jesus: ‘Husto ang imo ginsiling. Lima ka beses ka na namana, kag ang ginapuyo mo karon indi mo bana.’ Nagsiling ang babayi: ‘Nahantop ko nga ikaw isa ka manalagna. Ang amon katawhan nagapati nga makasimba kami sa Dios sa sini nga bukid, pero ang mga Judiyo nagasiling nga dapat sa Jerusalem lang kami magsimba. Nagapati ako nga kon mag-abot ang Mesias, tudluan niya kami kon paano dapat magsimba.’ Dayon ginsugid ni Jesus sa iya ang wala pa gid niya masugid sa iban: ‘Ako ang Mesias.’

 Nagdalidali pauli ang babayi sa ila siudad kag ginsugiran ang mga Samaritano: ‘Sa banta ko nakita ko na ang Mesias. Nahibaluan niya ang tanan parte sa akon. Dali kadtuan naton sia!’ Nag-upod sila sa iya pabalik sa bubon kag namati sila sa panudlo ni Jesus.

Gin-agda sang mga taga-Samaria si Jesus nga magtener sa ila siudad. Duha ka adlaw sia nga nagpanudlo didto, kag madamo ang nagtuo sa iya. Ginsilingan nila ang Samaritana: ‘Sa tapos kami nakapamati sa sini nga tawo, nahibaluan namon nga sia gid ang manluluwas sang kalibutan.’