Sa tapos makapili si Jesus sang 12 ka apostoles, nanaug sia sa bukid kag nagkadto sa lugar nga ginatipunan sang madamo nga tawo. Halin sila sa Galilea, Judea, Tiro, Sidon, Siria, kag sa tabok sang Jordan. Gindala nila ang mga tawo nga nagaantos sa balatian kag ang pila nga ginapaantos sang mga demonyo. Gin-ayo sila tanan ni Jesus. Dayon nagpungko sia sa higad sang bukid kag nakighambal sa ila. Ginpaathag niya kon ano ang dapat naton himuon para mangin abyan kita sang Dios. Dapat naton batunon nga kinahanglan naton si Jehova kag tun-an nga palanggaon sia. Pero indi naton mapalangga ang Dios kon wala naton ginapalangga ang iban nga tawo. Dapat mangin maayo kita sa tanan, bisan pa sa aton mga kontra.

Si Jesus nagsiling: ‘Indi lang nga higugmaon mo ang imo mga abyan. Dapat mo man higugmaon ang imo mga kontra kag patawaron ang mga tawo. Kon maakig ang iban sa imo, kadtuan mo sia dayon kag mangayo ka sing pasaylo. Himuon mo sa iban ang gusto mo nga himuon nila sa imo.’

 Naghatag man si Jesus sa mga tawo sing maayo nga laygay parte sa materyal nga mga butang. Sia nagsiling: ‘Mas importante nga abyan naton si Jehova sangsa madamo nga kuarta. Puede kawaton ang imo kuarta, pero wala sing makaguba sa pag-abyanay ninyo ni Jehova. Indi na pagkabalak-i kon ano ang imo imnon, kaunon, ukon isuksok nga bayo. Tan-awa ang mga pispis. Ginsiguro sang Dios nga makakaon gid sila. Kon mabalaka ka, indi sini madugangan sing isa ka adlaw ang imo kabuhi. Tandai nga nahibaluan ni Jehova ang imo kinahanglanon.’

Ang mga tawo wala pa gid sing may nabatian nga naghambal pareho kay Jesus. Ang ila mga lider sa relihion wala nagtudlo sini sa ila. Ngaa maayo gid nga manunudlo si Jesus? Kay ang tanan niya nga ginatudlo naghalin kay Jehova.