Si Timoteo isa ka pamatan-on nga utod sa kongregasyon sang Listra. Ang iya tatay Griego kag ang iya nanay Judiyo. Ang nanay ni Timoteo nga si Eunice kag ang iya lola nga si Loida ang nagtudlo sa iya parte kay Jehova halin sang gamay pa sia.

Sang nagbisita si Pablo sa Listra sa iya ikaduha nga paglakbay para magbantala, nakita niya nga palangga gid ni Timoteo ang mga kauturan kag gusto gid niya magbulig sa ila. Ginhagad ni Pablo si Timoteo nga mag-upod sa iya paglakbay. Ginhanas ni Pablo si Timoteo nga mangin maayo nga manugbantala kag manunudlo sang maayong balita.

Gingiyahan sang balaan nga espiritu si Pablo kag si Timoteo bisan diin sila magkadto. Isa ka gab-i, may tawo nga nagsiling kay Pablo sa palanan-awon nga magkadto sia sa Macedonia kag buligan sila. Gani si Pablo, si Timoteo, si Silas, kag si Lucas nagkadto didto para magbantala kag magtukod sing mga kongregasyon.

Madamo nga lalaki kag babayi ang nangin Cristiano sa Tesalonica, nga siudad sang Macedonia. Pero ang pila ka Judiyo nahisa kay Pablo kag sa mga kaupod niya. Gani nagtipon sila sang mga tawo, kag gindala nila ang mga kauturan sa mga manugdumala sang siudad, nga nagasinggit: ‘Ini nga mga tawo kaaway sang gobierno sang Roma!’ Delikado ang kabuhi ni Pablo kag ni Timoteo, amo nga gab-i sila nalagyo pakadto sa Berea.

Gusto gid sang mga taga-Berea magtuon parte sa maayong balita, kag ang mga Griego kag mga Judiyo didto nangin mga tumuluo. Pero sang ang pila ka Judiyo nga halin sa Tesalonica nag-umpisa sang kagamo, nalagyo si Pablo sa Atenas. Si Timoteo kag si Silas nagpabilin sa Berea para pabakuron ang mga kauturan. Dayon, ginpabalik ni Pablo si Timoteo sa Tesalonica para buligan ang mga kauturan nga maatubang ang grabe nga paghingabot didto. Sang  ulihi, ginpadala ni Pablo si Timoteo para bisitahon ang madamo nga kongregasyon kag pabakuron sila.

Si Pablo nagsiling kay Timoteo: ‘Ang mga gusto mag-alagad kay Jehova pagahingabuton.’ Si Timoteo ginhingabot kag ginpriso bangod sa iya pagtuo. Pero nalipay sia kay paagi sa sini mapamatud-an niya ang iya pagkamainunungon kay Jehova.

Si Pablo nagsiling sa mga taga-Filipos: ‘Pakadtuon ko si Timoteo sa inyo. Tudluan niya kamo kon ano ang buot silingon sang paglakat sa kamatuoran, kag hanason niya kamo sa ministeryo.’ Nahibaluan ni Pablo nga masaligan niya si Timoteo. Tinuig na sila nga nag-updanay sa hilikuton bilang mag-abyan kag masigkaulipon.