Pagkatapos sang madamo nga tuig nga ginpangunahan ni Josue ang katawhan ni Jehova, napatay sia sa edad nga 110. Sang buhi pa sia, ang mga Israelinhon nagsimba kay Jehova. Pero sang napatay si Josue, nagsimba sila sa butig nga mga dios pareho sang mga Canaanhon. Bangod wala na ginasunod sang mga Israelinhon si Jehova, ginpasugtan ni Jehova nga pabudlayan sila sang hari sang Canaan nga si Jabin. Nangayo sila sing bulig kay Jehova. Gani ginhatagan niya sila sing bag-o nga lider nga si Barak. Sia ang magabulig sa katawhan nga magbalik kay Jehova.

Si Debora, nga isa ka manalagna nga babayi, nagpatawag kay Barak. May mensahe sia kay Barak halin kay Jehova: ‘Upda ang 10,000 ka lalaki, kag sugataa ninyo ang mga soldado ni Jabin sa sapa sang Kison. Pierdihon ninyo didto si Sisera, ang pangulo sang mga soldado ni Jabin.’ Si Barak nagsiling kay Debora: ‘Malakat ako kon mag-upod ka sa akon.’ Si Debora nagsiling: ‘Maupod ako sa imo. Pero indi ikaw ang makapatay kay Sisera. Si Jehova nagsiling nga babayi ang magapatay sa iya.’

Nag-upod si Debora kay Barak kag sa iya mga soldado pakadto sa Bukid Tabor para magpreparar sa inaway. Sang nahibaluan ini ni Sisera, gintipon niya ang iya mga kangga sa inaway kag ang iya mga  soldado sa kapatagan sa ubos sang bukid. Si Debora nagsiling kay Barak: ‘Subong nga adlaw, magadaug ka sa bulig ni Jehova.’ Si Barak kag ang iya 10,000 ka soldado nagdulhog sa bukid para sugataon ang mabakod nga mga soldado ni Sisera.

Dayon, ginpaawas ni Jehova ang tubig sa sapa sang Kison. Naglubong sa lutak ang mga kangga ni Sisera. Nagpanaug si Sisera sa iya kangga kag nagdalagan. Napierde ni Barak kag sang iya mga soldado ang mga soldado ni Sisera, pero nakapalagyo si Sisera! Nagdalagan sia kag nanago sa tolda sang babayi nga si Jael. Ginpainom sia ni Jael sing gatas kag ginhabulan. Kapoy gid si Sisera gani natulugan sia. Dayon, naghinayhinay si Jael palapit sa iya kag ginpadulot ang palpal sa iya ulo. Napatay si Sisera.

Nag-abot si Barak nga ginapangita si Sisera. Naggua si Jael sa iya tolda kag nagsiling: ‘Dali, ipakita ko sa imo ang tawo nga ginapangita mo.’ Nagsulod si Barak sa tolda kag nakita niya si Sisera nga patay na. Nagkanta sing pagdayaw kay Jehova si Barak kag si Debora bangod ginbuligan niya ang mga Israelinhon nga magdaug sa ila mga kaaway. Sa masunod nga 40 ka tuig, nangin matawhay ang Israel.