Kinahanglan ang panikasog sa pagpangita sing abyan; kinahanglan ang panikasog sa paghupot sa isa ka abyan. Ang imo mga panikasog nga mangin abyan sang Dios kag magpabilin nga subong sini pakamaayuhon sing daku. Si Jesus nagsiling sa mga tawo nga nagtuo sa iya: “Ang kamatuoran magahilway sa inyo.” ( Juan 8:32) Ano ang kahulugan sina?

Matigayon mo ang kahilwayan karon. Mahimo ikaw mahilway gikan sa butig nga mga panudlo kag mga kabutigan nga ginapalapnag ni Satanas. Mahilway ikaw gikan sa pagkawalay paglaum nga ginabatyag sang minilyon ka tawo nga wala nagakilala kay Jehova. (Roma 8:22) Ang mga abyan sang Dios wala gani ‘nahadlok sa kamatayon.’—Hebreo 2:14, 15.

Matigayon mo ang kahilwayan sa bag-ong kalibutan sang Dios. Matahom gid nga kahilwayan ang matigayon mo sa palaabuton! Sa Paraiso nga duta, matigayon naton ang kahilwayan gikan sa inaway, balatian, kag krimen. Kahilwayan gikan sa kaimulon kag gutom. Kahilwayan gikan sa katigulangon kag kamatayon. Kahilwayan gikan sa kahadlok, pagpamigos, kag inhustisya. Ang Biblia nagasiling tuhoy sa Dios: “Ginahumlad mo ang imo kamot kag ginabusog ang handum sang tagsa ka butang nga buhi.”—Salmo 145:16.

 Ang mga abyan sang Dios magakabuhi sing dayon. Ang kabuhi nga walay katapusan isa ka hamili nga regalo nga ihatag sang Dios sa tanan nga nagapakig-abyan sa iya. (Roma 6:23) Hunahunaa lamang kon ano ang mangin kahulugan sa imo sang walay katapusan nga kabuhi!

May tion ikaw sa paghimo sing madamo nga butang. Ayhan luyag mo magtuon sa pagtokar sing isa ka instrumento sa musika. Ukon basi luyag mo magtuon sa pagpinta sing mga laragway ukon mangin isa ka panday. Ayhan luyag mo tun-an ang mga sapat ukon mga tanom. Ukon luyag mo siguro maglakbay kag makita ang nanuhaytuhay nga kadutaan kag katawhan. Posible ini tanan nga butang kon matigayon mo ang kabuhi nga walay katapusan!

May tion ka sa pagpangita sing madamo nga abyan. Posible nga makilala mo ang madamo pa nga nangin mga abyan sang Dios kon ikaw may dayon nga kabuhi. Mahibaluan mo ang ila mga kinaadman kag maayong mga kinaiya, kag sila man mangin mga abyan mo. Higugmaon mo sila, kag higugmaon ka man nila. (1 Corinto 13:8) May kahigayunan ka nga mangin abyan ang tanan sa duta kon ikaw may kabuhi nga walay katapusan! Labaw sa tanan, ang imo pagpakig-abyan kay Jehova magabaskog pa samtang nagaligad ang mga siglo. Kabay nga mangin abyan ikaw sang Dios sing dayon!