1, 2. (a) Kon naghalin ka na sa butig nga relihion, ano ang dapat mo ipamangkot sa imo kaugalingon? (b) Ngaa sa banta mo importante gid ini nga pamangkot?

IBUTANG ta nga nabal-an mo nga ginhiluan ang inyo komunidad. May isa nga sekreto nga nagahaboy sang makahililo nga basura sa inyo lugar, kag nabutang sa peligro ang mga tawo. Ano ang himuon mo? Sigurado gid nga mahalin ka. Pero bisan pa nakahalin ka na, siguro mamensar ka, ‘Basi bala nahiluan na ako.’

² Amo man sini ang sitwasyon kon parte sa butig nga relihion. Ang Biblia nagatudlo nga ang ila pagsimba ginhiluan sang mahigko nga mga panudlo kag mga buhat. (2 Corinto 6:17) Gani importante gid nga maggua ka sa “Babilonia nga Daku,” ang bilog kalibutan nga emperyo sang butig nga relihion. (Bugna 18:2, 4) Nahimo mo na bala ini? Kon huo, maayo gid. Pero indi lang paggua ukon pag-resign sa butig nga relihion ang dapat mo himuon. Pamangkuta ang imo kaugalingon, ‘May ginahimo pa bala ako nga may labot sa butig nga pagsimba?’ Hunahunaa ang pila ka halimbawa.

3. (a) Ano ang ginasiling sang Biblia parte sa mga imahen, kag ngaa nabudlayan ang iban nga batunon ang pagtan-aw sang Dios sa sini? (b) Ano ang dapat mo himuon sa imo mga pagkabutang nga may labot sa butig nga pagsimba?

³ Ang iban madugay na nga may mga imahen ukon mga altar sa ila balay. May ara ka man bala sini? Kon may ara, siguro para sa imo daw kasaw-a ukon sala nga mangamuyo sa Dios nga wala ini nga mga butang. Basi ang iban sa sini palangga mo gid. Pero ang Dios lang ang dapat magsiling kon paano sia simbahon, kag suno sa Biblia indi niya gusto nga maggamit kita sing mga imahen. (Basaha ang Exodo 20:4, 5; Salmo 115:4-8; Isaias 42:8; 1 Juan 5:21) Gani mapakita mo nga may panindugan ka sa matuod nga pagsimba kon gub-on mo ukon sunugon ang imo mga pagkabutang nga may labot sa butig nga pagsimba. Sunda ang pagtan-aw ni Jehova sa sini. Para sa iya, ini nga mga butang “makangilil-ad.”—Deuteronomio 27:15.

4. (a) Ngaa ang pagsimba sa katigulangan wala sing pulos? (b) Ngaa gindilian sadto ni Jehova ang iya mga sumilimba sa pag-entra sa tanan nga klase sang espiritismo?

 ⁴ Kinaandan man sa madamo nga butig nga relihion ang pagsimba sa katigulangan. Antes nabal-an sang iban ang kamatuoran sa Biblia, nagapati sila nga ang patay nagakabuhi gihapon sa lugar sang mga espiritu kag makabulig ini ukon makahalit sa mga buhi. Siguro nagatinguha ka gid nga mapalipay ang imo patay na nga katigulangan. Pero pareho sa natun-an mo sa Kapitulo 6 sini nga libro, ang mga patay wala na nagakabuhi sa iban nga lugar. Gani wala gid pulos ang imo pagtinguha nga mag-istorya sa ila. Ang bisan ano nga mensahe nga daw iya sang imo patay na nga pinalangga, naghalin sa mga demonyo. Amo nga gindilian sadto ni Jehova ang mga Israelinhon sa pagpakig-istorya sa mga patay ukon sa pag-entra sa tanan nga klase sang espiritismo.—Basaha ang Deuteronomio 18:10-12.

5. Kon nagagamit ka sadto sing mga imahen ukon nagasimba sa imo katigulangan, ano ang himuon mo?

⁵ Kon nagagamit ka sadto sing mga imahen ukon nagasimba sa imo katigulangan, ano ang himuon mo? Basaha kag pamalandungi ang mga ginasiling sang Biblia parte sa pagtan-aw sang Dios sa sini nga mga butang. Ipangamuyo kada adlaw kay Jehova ang imo handum nga magpanindugan sa matuod nga pagsimba. Pangabaya sia nga buligan ka nga sundon ang iya pagtan-aw sa sini nga butang.—Isaias 55:9.

6, 7. (a) Ginapatihan nga para sa ano ang pagselebrar sang Krismas, kag ginselebrar bala ini sang mga sumulunod ni Jesus sang unang siglo? (b) Sang panahon sang mga disipulo ni Jesus, diin gin-angot ang pagselebrar sang kaadlawan?

⁶ Ang popular nga mga selebrasyon sang butig nga relihion nagahigko man sa pagsimba sang isa ka tawo. Ang  isa sini amo ang Krismas. Ang Krismas ginaselebrar kay ginapatihan nga amo ini ang petsa sang pagkatawo ni Jesucristo, kag ginaselebrar ini sang halos tanan nga relihion nga nagasiling nga mga Cristiano sila. Pero wala sing ebidensia nga ang mga disipulo ni Jesus sang unang siglo nagselebrar sini. Ang libro nga Sacred Origins of Profound Things nagasiling: “Sa sulod sang duha ka siglo pagkatapos natawo ang Cristo, wala sing nakabalo, kag diutay gid lang ang interesado, kon san-o gid sia natawo.”

⁷ Bisan pa ibutang ta nga nabal-an sang mga disipulo ni Jesus ang eksakto nga petsa sang iya pagkatawo, indi man nila ini gihapon pag-iselebrar. Ngaa? Kay pareho sang ginasiling sang The World Book Encyclopedia, ang mga Cristiano sang una “nagapati nga ang pagselebrar sang kaadlawan sang bisan sin-o isa ka pagano nga kustombre.” Duha lang ka pagselebrar sang kaadlawan ukon birthday ang mabasa sa Biblia, kag ini amo ang kaadlawan sang duha ka manuggahom nga wala nagasimba kay Jehova. (Genesis 40:20; Marcos 6:21) Ang kaadlawan ginaselebrar man sadto bilang pagpadungog sa pagano nga mga diosdios. Halimbawa, kada Mayo 24, ginaselebrar sang mga taga-Roma ang kaadlawan sang diosa nga si Diana. Pagkadason nga adlaw, ginaselebrar nila ang kaadlawan sang ila dios nga adlaw nga si Apollo. Gani ang pagselebrar sang kaadlawan naangot sa paganismo, indi sa Cristianismo.

8. Konektado bala ang pagselebrar sang kaadlawan sa disparatis? Ipaathag.

⁸ May isa pa ka rason kon ngaa wala ginselebrar sang mga Cristiano sang unang siglo ang kaadlawan ni Jesus. Mahimo gid nga nabal-an sang iya mga disipulo nga ang pagselebrar sang kaadlawan konektado sa disparatis. Halimbawa, madamo nga Griego kag Romano sang una ang nagapati nga may espiritu nga presente kon mabun-ag ang isa ka tawo kag proteksionan sia sina nga espiritu sa  bilog niya nga kabuhi. “Ini nga espiritu may misteryoso nga kaangtanan sa isa ka dios nga pareho ang kaadlawan sa indibiduwal nga nabun-ag,” siling sang libro nga The Lore of Birthdays. Sigurado nga wala gid nalipay si Jehova sa bisan ano nga selebrasyon diin ginaangot si Jesus sa disparatis. (Isaias 65:11, 12) Ti, ngaa madamo subong ang nagaselebrar sang Krismas?

9. Ngaa sa Disiembre 25 ginbutang ang pagselebrar sang pagkatawo ni Jesus?

⁹ Ang pagkatawo ni Jesus ginaselebrar kada Disiembre 25. Nagsugod lang ini nga selebrasyon pagligad sang ginatos ka tuig sang wala na si Jesus sa duta. Pero indi Disiembre 25 natawo si Jesus, kundi mga Oktubre. * Ti, ngaa sa Disiembre 25 ginbutang ang pagkatawo ni Jesus? Kay man, mahimo nga ang iban nga nagpangangkon nga Cristiano sang ulihi “gusto nga idungan ang petsa sa pagano nga kapiestahan sang Roma diin ginaselebrar ang ‘kaadlawan sang indi mapierde nga adlaw.’” (The New Encyclopædia Britannica) Kon tigtulugnaw, ang adlaw daw maluya. Gani ang mga pagano may mga seremonya sadto para magbalik ining nagahatag sing init kag kapawa halin sa iya malayo nga ginkadtuan. Ginapatihan nga sa Disiembre 25 nagasugod sa pagbalik ang adlaw. Para makumbertir ang mga pagano, ginsunod sang mga lider sang relihion ini nga kapiestahan kag ginhimo nga daw “Cristiano.” *

10. Sang una, ngaa wala ginselebrar sang iban nga tawo ang Krismas?

¹⁰ Madugay na nga nabal-an nga ang Krismas naghalin  sa mga pagano. Bangod wala nabase sa Biblia ang Krismas, gindilian ini sang ika-17 nga siglo sa England kag sa iban nga lugar nga sakop sang Amerika. Sadto, ang bisan sin-o nga indi magtrabaho kon adlaw sang Krismas ginamultahan. Pero sang ulihi, nangin popular liwat ang daan nga mga selebrasyon, kag gindugangan pa ini sing bag-o nga mga kustombre. Nangin popular liwat ang Krismas, kag asta subong popular gid ini sa madamo nga pungsod. Pero ang Krismas konektado sa butig nga relihion. Gani kon gusto sang bisan sin-o nga malipay sa iya ang Dios, indi sia dapat magselebrar sini ukon sang bisan ano nga selebrasyon nga naghalin sa pagano nga pagsimba. *

11. Ngaa ang iban nga tawo nagaselebrar sing mga okasyon pareho sang Krismas, pero ano dapat ang pinakaimportante sa aton?

¹¹ Ang iban nagapati nga ang mga selebrasyon pareho sang Krismas naghalin sa mga pagano, pero para sa ila indi sala nga iselebrar ini. Kay man, wala ginapensar sang kalabanan ang parte sa butig nga pagsimba kon ginaselebrar nila ini. Mga okasyon man ini para makatipontipon ang mga pamilya. Amo man bala sina ang imo ginabatyag? Kon huo, ang gugma sa pamilya, indi ang gugma sa butig nga relihion, ang rason kon ngaa nabudlayan ka magpanindugan sa matuod nga pagsimba. Si Jehova ang nagtukod sang pamilya. Gani gusto niya nga mangin maayo ang imo relasyon sa imo pamilya. (Efeso 3:14, 15) Pero mapabakod mo ang imo relasyon sa ila sa mga paagi nga ginabaton sang Dios. Si apostol Pablo nagsulat parte sa kon ano dapat ang pinakaimportante sa aton: “Padayon ninyo nga pat-ura kon ano ang kalahamut-an sa Ginuo.”—Efeso 5:10.

12. Ngaa dapat naton likawan ang mga kustombre kag mga selebrasyon nga may mahigko nga ginhalinan? Maghatag sing halimbawa.

 ¹² Mahimo para sa imo, indi na importante subong kon ano ang ginhalinan sang mga selebrasyon. Pero importante gid bala ang ginhalinan sini? Huo! Halimbawa, ibutang ta nga nakakita ka sing dulse sa lamawan. Pudyuton mo bala ina nga dulse kag kaunon? Siempre indi! Ina nga dulse mahigko na. Pareho sina nga dulse, ang mga selebrasyon daw manami, pero mahigko ang ginhalinan sini. Para makapanindugan sa matuod nga pagsimba, dapat nga ang aton nabatyagan pareho kay propeta Isaias, nga nagsiling sa matuod nga mga sumilimba: “Indi kamo magtandog sang bisan ano nga mahigko!”—Isaias 52:11.

13. Ano ang posible nga mga problema kon indi ka mag-entra sa mga selebrasyon?

¹³ Mahimo nga problema gid kon magdesisyon ka nga indi mag-entra sa mga selebrasyon. Halimbawa, basi matingala ang imo mga katrabaho kon ngaa wala ka nagaselebrar. Ano ang himuon mo kon regaluhan ka sa panahon sang Krismas? Sala bala nga batunon ang regalo? Kamusta kon indi kamo pareho sing pagtuluuhan sang imo bana ukon asawa? Paano mo masiguro nga ang imo mga bata indi magbatyag nga ginapit-an ukon ginadingutan sila kay wala kamo nagaselebrar sang mga okasyon pareho sang Krismas?

14, 15. Kon may magtamyaw sa imo parte sa isa ka selebrasyon ukon may gusto magregalo sa imo, ano ang himuon mo?

¹⁴ Dapat nga mamensar ka sing maayo  para mabal-an mo kon ano ang himuon sa sini nga mga sitwasyon. Kon may magtamyaw sa imo parte sa isa ka selebrasyon, puede mo nga pasalamatan ang nagtamyaw. Pero kamusta kon ang nagtamyaw sa imo kaupod mo pirme, ukon katrabaho mo? Sa sina nga sitwasyon, mahimo nga dapat ka pa magpaathag sa ila. Pero himua ini sa eksakto nga paagi. Ang Biblia nagalaygay: “Maghambal kamo pirme sing mainayuhon, nga daw gintimplahan sing asin, agod mahibaluan ninyo kon paano sabton ang kada isa.” (Colosas 4:6) Tinguhai nga magpakita sing respeto sa iban. Ipaathag ang imo panindugan sa eksakto nga paagi. Klaruha nga wala problema sa imo ang paghatagay sing regalo kag ang mga pagtilipon, pero gusto mo nga himuon ini sa lain nga panahon.

¹⁵ Pero kamusta kon may gusto magregalo sa imo? Nagadepende ini sa sitwasyon. Halimbawa, silingan ka sang nagaregalo sa imo: “Kabalo ko nga wala kamo nagaselebrar sing Krismas. Pero, gusto ko gihapon nga ihatag sa imo ini nga regalo.” Puede mo batunon ang regalo, kay para sa imo, wala ka nagaentra sa sina nga selebrasyon bisan pa ginbaton mo ang regalo. Kon ang nagregalo wala kabalo sang imo pagtuluuhan, puede mo ihambal sa iya nga wala ka nagaselebrar sina nga okasyon. Paagi sini, mapaathag mo sa iya kon ngaa ginbaton mo ang regalo bisan pa wala ka sing ginbaylo sa iya. Pero kon ang regalo ginhatag sa imo para pamatud-an nga indi mo pagsundon ang imo pagtuluuhan ukon makompromiso ka para lang makabaton sing regalo, mas maayo nga indi mo ini pagbatunon.

16. Para mangin eksakto ang imo paagi sa pagpanindugan parte sa mga selebrasyon, ano ang himuon mo?

¹⁶ Paano kon indi kamo pareho sing pagtuluuhan sang mga miembro sang imo pamilya? Sa gihapon, dapat nga  eksakto ang imo paagi sang pagpaathag sa ila. Indi sila pagbaisa parte sa mga kustombre ukon selebrasyon nga gusto nila selebrahon. Respetuha ang ila kinamatarong nga magpili sang ila patihan, kay gusto mo man nga respetuhon ka nila. (Basaha ang Mateo 7:12.) Likawi ang bisan ano nga buhat nga magadalahig sa imo sa selebrasyon. Pero mangin rasonable man sa mga butang nga wala sing labot sa aktual nga selebrasyon. Siempre, dapat mo pirme tinguhaan nga mangin matinlo ang imo konsiensia sa tanan mo nga ginahimo.—Basaha ang 1 Timoteo 1:18, 19.

17. Bangod indi ka na magselebrar sang mga okasyon nga wala nabase sa Biblia, ano ang mahimo mo para ang imo mga bata indi magbatyag nga ginapit-an ukon ginadingutan?

¹⁷ Bangod indi ka na magselebrar sang mga okasyon nga wala nabase sa Biblia, ano ang mahimo mo para ang imo mga bata indi magbatyag nga ginapit-an ukon ginadingutan? Importante gid ang inyo ginahimo sa iban nga tion sang tuig. Ginaregaluhan sang iban nga mga ginikanan ang ila mga bata bisan wala sing okasyon. Ang isa sa pinakamaayo nga regalo nga mahatag mo sa imo mga bata amo ang imo oras kag pagpalangga.

18. Ngaa ang pagtambong sa pagtilipon sang mga Cristiano makabulig sa imo nga magpanindugan sa matuod nga pagsimba?

¹⁸ Para malipay sa imo ang Dios, dapat mo biyaan ang butig nga pagsimba kag magpanindugan sa matuod nga pagsimba. Ano pa ang himuon mo? Ang Biblia nagasiling: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.” (Hebreo 10:24, 25) Ang pagtilipon sang mga Cristiano makalilipay nga mga okasyon para masimba mo ang Dios  sa paagi nga ginabaton niya. (Salmo 22:22; 122:1) Sa sini nga mga pagtilipon, “makapalig-unay” ang matutom nga mga Cristiano.—Roma 1:12.

19. Ngaa importante nga isugid mo sa iban ang imo natun-an sa Biblia?

¹⁹ May isa pa ka paagi para makapanindugan ka sa matuod nga pagsimba. Isugid sa iban ang ginatudlo sang Biblia nga imo natun-an upod sa mga Saksi ni Jehova. Madamo nga tawo ang nagapanghayhay kag nagapanghakroy bangod sang malaut nga mga butang nga nagakatabo subong sa kalibutan. Basi may mga kilala ka nga amo sina ang ginabatyag. Maayo gid nga sugiran mo sila sang maayo nga palaabuton nga natun-an mo sa Biblia. Sa sigesige mo nga pagpakig-upod sa matuod nga mga Cristiano kag pagsugid sa iban sang makalilipay nga mga kamatuoran nga imo natun-an sa Biblia, mabatyagan mo nga amat-amat nga madula sa imo tagipusuon ang handum nga mag-entra sa mga kustombre sang butig nga pagsimba. Saligi nga malipay ka gid kag makabaton sing madamo nga pagpakamaayo kon magpanindugan ka sa matuod nga pagsimba.—Malaquias 3:10.