Pinalangga nga Masigkamanugbantala sang Ginharian:

HANDURAWA nga isa ikaw ka Bethelite sa Brooklyn sang Biernes sang aga, Oktubre 2, 1914. Nagapungko ka sa imo pulungkuan kag nagahulat kay Brother C. T. Russell. Dayon, gulpi lang nagbukas ang puertahan sang kalan-an kag nagsulod si Brother Russell. Nagdulog sia anay, kag subong sang ginahimo niya pirme, malipayon niya nga gintamyaw ang pamilya Bethel sing “Maayong aga sa inyo tanan.” Pero antes sia magpungko sa iya pulungkuan, nagpalakpak sia anay kag naghatag sining makakulunyag nga pahibalo: “Ang Panag-on sang mga Gentil nagligad na; natapos na ang adlaw sang ila mga hari!” Sigurado nga nalipay ka gid kay madugay mo na ini nga ginapaabot! Bangod sining makakulunyag nga balita, nagpalakpak ka sing mabaskog kag sing malawig upod sa pamilya Bethel.

 Madamo nga tinuig na ang nagligad sugod sang ginsiling ina ni Brother Russell. Ano na ang nahimo sang Ginharian sugod sadto? Madamo gid! Paagi sa kahimusan sang Ginharian, amat-amat nga ginpuro kag ginhanas ni Jehova ang iya katawhan​—halin sa pila lang ka libo sang 1914 asta sa sobra pito ka milyon kag tunga karon. Paano ka nakabenepisyo sa sini nga paghanas?

Sa karon, pirme naton mabatian ang aton kauturan nga nagasiling, “Nagalakat gid ang langitnon nga kangga ni Jehova!” kag husto sila. Pero ang matuod, halin pa sang 1914 nagalakat na sing tuman kadasig ang langitnon nga kangga, nga nagalaragway sa indi kitaon nga bahin sang organisasyon ni Jehova, subong sang makita naton kon basahon naton sing maayo ini nga libro. Para mabantala ang maayong balita sa bilog nga kalibutan, ang mga manugbantala sang Ginharian naggamit sing lainlain nga paagi subong sang pamantalaan, pagmartsa nga may karatula, piktyur nga presentasyon, testimony card, radyo pono, pagpalayag sa radyo, kag pati sang Internet.

Subong resulta sa pagpakamaayo ni Jehova sa aton hilikuton, nagabalhag na kita karon sang aton matahom nga mga literatura sa Biblia sa sobra 670 ka lenguahe kag nagatanyag sini nga wala sing bayad. May masinakripisyuhon man nga mga boluntaryo nga nagabulig sa pagtukod sing mga Kingdom Hall, Assembly Hall, kag mga pasilidad sang sanga, sa manggaranon kag pigado nga mga pungsod. Kag kon may kalamidad, ginabuligan dayon sang mahigugmaon nga mga kauturan ang mga biktima kag ginapamatud-an nila nga “masaligan [sila] sa tion sang kalisdanan.”​—Hulu. 17:17.

Kon kaisa, ang mga klero kag mga manugpamatok nagapahito sing “kagamo paagi sa kasuguan.” Pero ang ila pagtinguha pirme nagaresulta “sa pag-­uswag sang maayong balita,” kag makapalig-on gid ini sa aton pagtuo.—Sal. 94:20; Fil. 1:12.

Isa gid ka kadungganan nga mangin kaupod namon kamo subong bahin sang “panimalay.” Dumduma ninyo nga palangga gid namon kamo tanan. Ginapangamuyo namon nga ini nga publikasyon makabulig sa inyo nga pabaloran ang inyo espirituwal nga palanublion sing labi pa gid.—Mat. 24:45.

Kabay nga ara kamo pirme sa maayo nga kahimtangan.

Ang inyo mga utod,

Nagadumala nga Hubon sang mga Saksi ni Jehova