LEKSION 38
Apresyaha ang Regalo nga Kabuhi
Madamo kita sing maayo nga mahimo bangod buhi kita. Bisan pa may mga problema, may rason gihapon kita nga mangin malipayon. Paano naton mapakita nga ginaapresyar naton ang regalo nga kabuhi? Kag ngaa dapat naton himuon ina?
1. Ngaa dapat naton apresyahon ang ginhatag sa aton nga kabuhi?
Dapat naton apresyahon ang ginhatag sa aton nga kabuhi kay regalo ini halin sa aton mapinalanggaon nga Amay, si Jehova. Sia ang “tuburan sang kabuhi”—buot silingon sia ang nagtuga sang tanan nga kabuhi. (Salmo 36:9) “Sia mismo ang nagahatag sa tanan nga tawo sang kabuhi kag sang ginhawa kag sang tanan nga butang.” (Binuhatan 17:25, 28) Ginahatag sa aton ni Jehova ang aton mga kinahanglanon para mabuhi kita kag malipay.—Basaha ang Binuhatan 14:17.
2. Paano naton mapakita kay Jehova nga ginaapresyar naton ang iya regalo nga kabuhi?
Sang ara ka pa lang sa tiyan sang imo iloy, palangga ka na ni Jehova. Gingiyahan sang Dios ang isa niya ka sumilimba nga si David sa pagsiling parte sa iya: “Nakita mo na ako sang wala pa ako mabun-ag.” (Salmo 139:16) Importante gid ang imo kabuhi kay Jehova. (Basaha ang Mateo 10:29-31.) Masubuan gid si Jehova kon manginmatay ang isa ukon hungod niya nga patyon ang iya isigkatawo. a (Exodo 20:13) Masubuan man sia kon ginabutang naton sa delikado ang aton kabuhi ukon ang kabuhi sang iban. Kon ginahalungan naton ang aton kabuhi kag ang kabuhi sang iban, ginapakita naton nga ginaapresyar naton ang espesyal nga regalo nga kabuhi.
USISAA PA GID
Usisaon naton ang pila ka paagi nga mapakita mo ang imo apresasyon sa regalo nga kabuhi.
3. Halungi ang imo lawas
Gindedikar sang mga Cristiano ang ila kabuhi para alagaron si Jehova. Daw pareho nga ginpresentar nila ang ila lawas bilang halad sa Dios. Basaha ang Roma 12:1, 2, dayon binagbinaga ini nga mga pamangkot:
-
Ngaa dapat mo halungan ang imo lawas?
-
Ano ang pila ka paagi nga mahimo mo ini?
4. Maghalong para indi maaksidente ukon mapatay
Ang Biblia nagalaygay sa aton nga likawan ang mga butang nga delikado. Tan-awa ang VIDEO para mabal-an mo kon paano malikawan ang aksidente.
Basaha ang Hulubaton 22:3, dayon binagbinaga kon paano ka kag ang iban makalikaw sa aksidente . . .
-
sa inyo balay.
-
sa imo ulubrahan.
-
kon nagahampang sang sports.
-
kon nagadrayb ukon nagasakay sa salakyan.
5. Halungi ang kabuhi sang wala pa mabun-ag nga lapsag
Si David nagsiling nga importante kay Jehova ang kabuhi kag pagtubo sang lapsag sa tiyan sang iya iloy. Basaha ang Salmo 139:13-17, dayon binagbinaga ini nga pamangkot:
-
Para kay Jehova, ang kabuhi bala sang tawo nagsugod sang ginpanamkon sia sang iya iloy ukon sang ginbata sia?
Sa Israel sang una, may kasuguan si Jehova para proteksionan ang mga iloy kag ang ila wala pa mabun-ag nga lapsag. Basaha ang Exodo 21:22, 23, dayon binagbinaga ini nga mga pamangkot:
-
Ano ang ginabatyag ni Jehova sa isa ka tawo kon indi niya hungod nga napatay ang wala pa mabun-ag nga lapsag?
-
Ano ang iya ginabatyag sa isa nga hungod nga nagpatay sang wala pa mabun-ag nga lapsag? b
-
Ano ang masiling mo sa ginabatyag sang Dios parte sini?
Bisan ang babayi nga nagaapresyar sa kabuhi mahimo magpensar nga ang pagpahulog amo lang gid ang solusyon. Basaha ang Isaias 41:10, dayon binagbinaga ini nga mga pamangkot:
-
Kon gina-pressure ang isa ka babayi nga magpa-abort, kay sin-o sia dapat magpabulig? Ngaa?
KON MAGSILING ANG IBAN: “Pagusto ang isa ka babayi kon mapahulog sia ukon indi—iya man ’na lawas.”
-
Ano ang nagkumbinsi sa imo nga importante kay Jehova ang kabuhi sang iloy kag sang iya wala pa mabun-ag nga lapsag?
SUMARYO
Ginatudlo sang Biblia nga dapat naton apresyahon, pabaloran, kag halungan ang regalo ni Jehova nga kabuhi. Lakip sa sini ang aton kabuhi kag ang kabuhi sang iban.
Rebyu
-
Ngaa importante kay Jehova ang kabuhi sang tawo?
-
Ano ang ginabatyag ni Jehova kon manginmatay ang isa ukon hungod niya nga patyon ang iya isigkatawo?
-
Ngaa ginaapresyar mo gid ang regalo nga kabuhi?
DUGANG NGA IMPORMASYON
Paano naton mapasalamatan si Jehova sa iya regalo nga kabuhi?
Hibalua ang sabat sa pamangkot nga, Patawaron bala sang Dios ang isa ka babayi nga nagpa-abort?
“Ano ang Ginasiling sang Biblia Parte sa Aborsion?” (Artikulo sa website)
Hibalua kon paano ang pagtamod sang Dios sa kabuhi makabulig sa aton sa pagpili sang kalingawan.
Binagbinaga kon paano ang Biblia makabulig sa isa ka tawo nga nagapensar nga manginmatay.
a Nagaulikid si Jehova sa mga nagaantos. (Salmo 34:18) Naintiendihan niya ang ila ginabatyag nga kasakit nga mahimo magpensar sila nga maghikog, kag gusto niya nga buligan sila. Para mabal-an mo kon paano sila ginabuligan sang Dios, basaha ang artikulo nga “Gusto Ko Na Mapatay—Makabulig Bala ang Biblia sa Akon Kon Nagapensar Ako nga Manginmatay?” sa seksion nga Dugang nga Impormasyon sa sini nga leksion.
b Ang mga nagpahulog sang lapsag sang una indi dapat masubuan kay mapatawad sila ni Jehova. Para sa dugang nga impormasyon, basaha ang artikulo nga “Ano ang Ginasiling sang Biblia Parte sa Aborsion?” sa seksion nga Dugang nga Impormasyon sa sini nga leksion.
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
