LEKSION 53
Pilia ang Kalingawan nga Makapalipay kay Jehova
Si Jehova “malipayon nga Dios.” (1 Timoteo 1:11) Gusto niya nga mangin malipayon kita. Nalipay sia kon may tion kita sa pag-relaks pagkatapos sang trabaho. Sa sini nga leksion, tun-an naton kon paano naton gamiton ini nga tion para malipay kita kag si Jehova.
1. Ano ang dapat naton tandaan kon nagapili sang kalingawan?
Ano ang nanamian mo nga himuon kon nagarelaks ka? Gusto sang iban nga magtener lang sa ila balay kag magbasa sang libro, mamati sang musika, magtan-aw sang pelikula, ukon mag-internet. Gusto naman sang iban nga mag-hiking, mag-swimming, ukon maghampang upod sa ila mga abyan. Ano man ang gusto naton, dapat siguruhon naton nga ang aton ginapili nga kalingawan “kalahamut-an sa Ginuo.” (Efeso 5:10) Importante nga mahibaluan naton ini kay madamo subong sang kalingawan ang ginadumtan ni Jehova kay masingki ini, may seksuwal nga imoralidad, ukon may espiritismo. (Basaha ang Salmo 11:5.) Ano ang makabulig sa aton para makapili sang maayo nga kalingawan?
Kon ang aton mga abyan nagapalangga kay Jehova, maayo gid sila nga impluwensia sa aton kag sa aton ginapili nga kalingawan. Natun-an naton sa nagligad nga leksion nga “ang tawo nga nagaupod sa maalamon mangin maalamon man.” Pero, kon pirme kita nagaupod sa mga tawo nga wala nagasunod sa mga sugo sang Dios, “mapahamak” kita.—Hulubaton 13:20.
2. Ngaa importante nga limitahan ang ginagamit naton nga oras sa kalingawan?
Bisan pa maayo ang aton ginapili nga kalingawan, dapat naton limitahan ang oras nga ginagamit sa sini. Kay kon indi, basi wala na kita sing tion sa mas importante nga mga butang. Ang Biblia nagasiling nga dapat naton ‘gamiton sing maayo ang aton tion.’—Basaha ang Efeso 5:15, 16.
USISAA PA GID
Usisaon naton kon paano ka makahimo sing maayo nga desisyon parte sa imo kalingawan.
3. Likawi ang malain nga kalingawan
Ngaa dapat naton pilion sing maayo ang aton kalingawan? Tan-awa ang VIDEO, dayon binagbinaga ang masunod nga mga pamangkot.
-
Paano ang mga hampang sa Roma sang una pareho sa pila ka kalingawan subong?
-
Sa video, ano ang natun-an ni Danny parte sa kalingawan?
Basaha ang Roma 12:9, dayon binagbinaga ini nga pamangkot:
-
Paano ini nga bersikulo makabulig sa imo sa pagpili sang kalingawan?
Ano ang pila ka butang nga ginadumtan ni Jehova? Basaha ang Hulubaton 6:16, 17 kag Galacia 5:19-21. Pagkatapos mabasa ang kada teksto, binagbinaga ini nga pamangkot:
-
Ano ang pila nga ginsambit sa sini nga mga bersikulo ang makita mo sa mga kalingawan subong?
Kon paano ka makapili sang maayo nga kalingawan
Pamangkuta ang imo kaugalingon:
-
Ano ang akon kalingawan? May ara bala sa sini nga ginadumtan ni Jehova?
-
San-o ko ini ginahimo? Daku bala ang makuha sini nga oras sa mas importante nga mga butang?
-
Sin-o ang akon kaupod? Mga tawo bala sila nga wala nagapalangga kay Jehova?
Maayo gid kon maglikaw kita sa mga delikado. Amo kon ngaa dapat man naton likawan ang bisan ano nga kalingawan nga mahimo makahalit sa aton
4. Gamita sing maayo ang imo tion
Tan-awa ang VIDEO, dayon binagbinaga ang masunod nga pamangkot.
-
Sa video, bisan indi man malain ang ginatan-aw sang isa ka brother, paano ang iya paggamit sang tion nakahatag sang problema sa iya?
Basaha ang Filipos 1:10, dayon binagbinaga ini nga pamangkot:
-
Paano ini nga bersikulo makabulig sa aton kon daw ano kalawig nga tion ang aton gamiton sa kalingawan?
5. Pilia ang maayo nga kalingawan
Bisan pa may pila ka kalingawan nga ginadumtan ni Jehova, madamo man sing maayo nga kalingawan nga makapalipay sa iya. Basaha ang Manugwali 8:15 kag Filipos 4:8, dayon binagbinaga ini nga pamangkot:
-
Ano ang nanamian mo nga kalingawan?
May maayo nga mga kalingawan nga makapalipay sa imo
KON MAGSILING ANG IBAN: “Wala man sing malain sa kalingawan nga mapintas, imoral, ukon may espiritismo, basta wala mo man ina ginahimo.”
-
Ano ang isabat mo?
SUMARYO
Gusto ni Jehova nga malipay kita sa maayo nga kalingawan.
Rebyu
-
Ano nga kalingawan ang dapat likawan sang mga Cristiano?
-
Ngaa dapat kita maghalong kon daw ano kalawig nga tion ang aton ginagamit sa kalingawan?
-
Ngaa dapat mo pilion ang kalingawan nga nagapalipay kay Jehova?
DUGANG NGA IMPORMASYON
Binagbinaga kon sin-o ang may salabton sa ginapili naton nga kalingawan.
“Ginadilian Bala Ninyo ang Pila ka Pelikula, Libro, Ukon Kanta?” (Artikulo sa website)
Hibalua kon paano ka makahimo sing maayo nga desisyon parte sa kalingawan.
“Mapuslanon Bala ang Imo Kalingawan?” (Ang Lalantawan, Oktubre 15, 2011)
Sa eksperiensia nga “Nadula Na ang Akon Dumot,” hibalua kon ngaa ginbag-o sang isa ka lalaki ang iya kalingawan.
“Ang Biblia Nagapabag-o sang Kabuhi” (Ang Lalantawan, Pebrero 1, 2010)
Tan-awa kon paano nakahimo sing maayo nga desisyon ang isa ka iloy parte sa kalingawan nga may labot sa espiritismo.
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
