SANG magdaku si Jesus kag nahisayran niya kon paano sia gin-amligan sang gamay pa sia, sa banta mo ayhan nangamuyo sia kay Jehova kag nagpasalamat sa iya?— Ano sa banta mo ang ginsiling sang ulihi ni Jesus kay Maria kag kay Jose sang mahisayran niya nga ginluwas nila ang iya kabuhi paagi sa pagdala sa iya sa Egipto?—

Sa pagkamatuod, indi na isa ka lapsag si Jesus. Wala na gani sia nagapuyo sa duta subong sang una. Apang natalupangdan mo bala nga sa karon ginahunahuna gihapon sang iban nga mga tawo si Jesus subong isa lamang ka lapsag sa isa ka pasungan?— Matuod gid ini kon panahon sang Krismas kay makita mo sa madamo nga mga duog ang mga laragway ni Jesus subong isa ka lapsag.

Bisan pa wala na nagapuyo si Jesus sa duta, nagapati ka bala nga buhi sia?— Huo, ginbanhaw sia gikan sa minatay, kag isa na sia karon ka gamhanan nga Hari sa langit. Ano sa banta mo ang sarang niya mahimo agod amligan ang mga nagaalagad sa iya?— Bueno, sang si Jesus yari sa duta, ginpakita niya kon paano niya maamligan ang mga nagahigugma sa iya. Tan-awon naton kon paano niya ginhimo ini sang kaupod niya isa ka adlaw ang iya mga disipulo sa isa ka sakayan.

 Malapit na magsirum sadto. Bug-os adlaw nga nagpanudlo si Jesus sa higad sang Dagat sang Galilea, nga isa ka daku nga linaw nga mga 20 kilometros ang kalabaon kag 12 kilometros ang kalaparon. Ginsingganan niya ang iya mga disipulo: “Matabok kita sa pihak sang linaw.” Gani nagsakay sila sa isa ka sakayan kag nagtulak patabok sa linaw. Kapoy gid si Jesus, gani nagkadto sia sa ulin sang sakayan kag nag-ulon sa ulunan. Wala madugay natulugan sia sing mahamuok.

Nagpabilin nga nagamata ang mga disipulo agod giyahan ang sakayan. Maayo ang tanan sang primero, apang nagsugod sa pagmadlos ang hangin. Labi pa ini nga nagbaskog, kag nagdaku ang mga balod. Nagbasya ang mga balod sa sulod sang sakayan, kag napuno ini sing tubig.

Hinadlukan ang mga disipulo nga basi malunod sila. Apang wala mahadlok si Jesus. Nagakatulog sia gihapon sa ulin sang sakayan. Sang ulihi, ginpukaw sia sang mga disipulo, kag nagsiling: ‘Manunudlo, Manunudlo, luwasa kami; malapit na kita mapatay sa sini nga unos.’ Sa sina, nagbangon si Jesus kag ginhambal ang hangin kag ang mga balod. ‘Hipos! Maglinong kamo!’ siling niya.

 Sa gilayon nag-untat ang hangin, kag naglinaw ang tubig. Natingala gid ang mga disipulo. Wala pa gid sila anay makakita sing subong sini. Nagsinilingay sila: “Sin-o gid bala ini, kay ginamanduan niya bisan ang mga hangin kag ang tubig, kag nagatuman sila sa iya?”—Lucas 8:22-25; Marcos 4:35-41.

Nahibaluan mo bala kon sin-o si Jesus— Nahibaluan mo bala kon diin niya ginakuha ang iya daku nga gahom?— Indi kuntani dapat mahadlok ang mga disipulo sang kaupod nila si Jesus, bangod si Jesus indi ordinaryo nga tawo. Makahimo sia sing makatilingala nga mga butang nga indi mahimo sang bisan sin-o nga tawo. Sugiran ko ikaw sang isa pa nga ginhimo niya sang isa ka bes sa maunos nga linaw.

Natabo ini sang ulihi, sa iban naman nga adlaw. Sang maggab-i na, ginsugo ni Jesus ang iya mga disipulo nga magsakay na sa sakayan kag mag-una sa pihak sang linaw. Nian nagtaklad si Jesus sa bukid sing isahanon. Isa ini ka malinong nga duog diin makapangamuyo sia sa iya Amay, si Jehova nga Dios.

 Nagsakay ang mga disipulo sa sakayan kag nagtulak patabok sa linaw. Apang wala madugay nagmadlos ang hangin. Labi pa ini nga nagbaskog. Gab-i na sini nga tion. Ginlukot sang mga disipulo ang layag kag nagbugsay. Apang indi sila makaabante sing maayo bangod sang mabaskog nga hangin nga nagasumpong sa ila. Ginabulubalinsay sang dalagku nga mga balod ang sakayan, kag nagasulod ang tubig. Nagpanikasog sing lakas ang mga disipulo nga makapahigad sa linaw, apang indi nila mahimo.

Si Jesus didto gihapon sa bukid nga isahanon. Nadugayan sia didto. Apang nakita niya karon nga ang iya mga disipulo yara sa katalagman bangod sang dalagku nga mga balod. Gani nagdulhog sia gikan sa bukid padulong sa higad sang linaw. Luyag ni Jesus nga buligan ang iya mga disipulo, gani naglakat sia padulong sa ila sa maunos nga linaw!

Ano ang matabo kon maglakat ka sa ibabaw sang tubig?— Malugdang ka, kag mahimo nga malunod ka. Apang tuhay si Jesus. May pinasahi sia nga gahom. Malawig ang ginlakat ni Jesus antes makalab-ot sa sakayan. Gani kaagahon na sang makita sang mga disipulo si Jesus nga nagapadulong sa ila sa ibabaw sang tubig. Apang indi sila makapati sa ila nakita. Hinadlukan gid sila, kag nagsinggit sila bangod sa kahadlok. Nian naghambal sa ila si Jesus: “Pakaisog kamo, ako ini; indi kamo mahadlok.”

Sang makasakay na si Jesus sa sakayan, nag-untat ang unos. Natingala liwat ang mga disipulo. Nagyaub sila sa atubangan ni Jesus kag nagsiling: “Matuod gid nga ikaw ang Anak sang Dios.”—Mateo 14:22-33; Juan 6:16-21.

Indi bala matahom kuntani kon nagkabuhi kita sadto kag nakita naton si Jesus nga nagahimo sing mga butang kaangay sini?— Nahibaluan mo bala kon ngaa ginhimo ni Jesus ining milagruso nga mga butang?— Ginhimo niya ini bangod ginahigugma niya ang iya mga disipulo kag luyag niya nga buligan sila. Apang ginhimo man niya ini agod ipakita nga may daku sia nga gahom kag gamiton niya ini sa palaabuton subong Manuggahom sa Ginharian sang Dios.

 Bisan sa karon masami nga ginagamit ni Jesus ang iya gahom agod amligan ang iya mga sumulunod gikan sa mga panikasog ni Satanas nga punggan sila sa pagsugid sa iban tuhoy sa Ginharian sang Dios. Apang wala ginagamit ni Jesus ang iya gahom agod amligan ang iya mga disipulo nga indi magmasakit ukon agod paayuhon sila kon nagamasakit sila. Bisan gani ang tanan nga mga apostoles ni Jesus napatay sang ulihi. Ang utod ni Juan nga si Santiago ginpatay, kag si Juan mismo ginbilanggo.—Binuhatan 12:2; Bugna 1:9.

Amo man sa karon. Nagaalagad man ukon wala ang mga tawo kay Jehova, sila tanan mahimo magmasakit kag mapatay. Apang sa indi madugay, sa tion sang paggahom ni Jesus subong Hari sa gobierno sang Dios, mangin tuhay ang kahimtangan. Wala sing bisan sin-o nga mahadlok pa sa sina nga tion, bangod gamiton ni Jesus ang iya gahom para sa kaayuhan sang tanan nga nagatuman sa iya.—Isaias 9:6, 7.