NGAA ining pamangkot nga, Sin-o ang imo Dios? importante?— Bangod madamo nga dios ang ginasimba sang katawhan. (1 Corinto 8:5) Sang makabaton si apostol Pablo sing gahom gikan kay Jehova agod ayuhon ang isa ka tawo nga indi makalakat halin sa pagkatawo, ang katawhan nagsinggit: “Ang mga dios nangin subong sang mga tawo kag nanaug sa aton!” Luyag simbahon sang mga tawo si Pablo kag ang iya abyan nga si Bernabe. Gintawag nila si Pablo nga Hermes kag si Bernabe nga Zeus, nga amo ang ngalan sang butig nga mga dios.

Apang wala magtugot si Pablo kag si Bernabe nga simbahon sila sang katawhan. Nagpatunga sila sa katawhan kag nagsiling: “Magliso kamo gikan sa sining walay pulos nga mga butang padulong sa buhi nga Dios.” (Binuhatan 14:8-15) Sin-o ang “buhi nga Dios,” nga nagtuga sang tanan nga butang?— Huo, sia amo si Jehova, “ang Labing Mataas sa bug-os nga duta.” Gintawag ni Jesus si Jehova nga “ang lamang matuod nga Dios.” Gani, sin-o lamang ang takus simbahon?— Amo lamang si Jehova!—Salmo 83:18; Juan 17:3; Bugna 4:11.

Ang kalabanan nga mga tawo nagasimba sa iban nga mga dios sa baylo sang “lamang matuod nga Dios.” Masami sila nagasimba sa mga butang nga human sa kahoy, bato, ukon metal. (Exodo 32:4-7; Levitico 26:1; Isaias 44:14-17) Bisan gani ang bantog nga mga lalaki kag mga babayi ginatawag kon kaisa nga mga dios, mga bituon, ukon mga idolo. Husto bala nga himayaon sila?—

Sa tapos si Saulo mangin si apostol Pablo, sia nagsulat: “Ginbulag sang dios sining sistema sang mga butang ang painuino sang mga di-matinuuhon.” (2 Corinto 4:4) Sin-o ini nga dios?— Huo, amo si Satanas  nga Yawa! Nahaylo ni Satanas ang katawhan nga simbahon ang madamo nga mga tawo kag mga butang.

Sang nagtinguha si Satanas nga payaubon kag pasimbahon si Jesus sa iya, ano ang ginsiling ni Jesus kay Satanas?— “Si Jehova nga imo Dios ang simbahon mo, kag sa iya lamang ikaw maghimo sing sagrado nga pag-alagad.” (Mateo 4:10) Gani maathag nga ginpakita ni Jesus nga si Jehova lamang ang dapat simbahon. Basahon naton ang tuhoy sa pila ka pamatan-on nga mga lalaki nga nakahibalo sini. Ang ila mga ngalan amo sanday Sadrac, Mesac, kag Abednego.

Ining pamatan-on nga mga Hebreo mga katapo sang pungsod sang Dios nga Israel kag gindala nga bihag sa duta sang Babilonia. Didto, ang hari nga si Nabocodonosor nagpatindog sing isa ka daku nga imahen nga bulawan. Isa ka adlaw, nagmando sia nga kon magtokar ang lanton, dapat magyaub ang tanan sa imahen. ‘Ang sin-o man nga indi magyaub  kag magsimba ihaboy sa nagadabdab nga hurno,’ paandam niya. Ano ang himuon mo?—

Masami nga ginsunod anay nanday Sadrac, Mesac, kag Abednego ang tanan nga ginmando sang hari. Apang wala nila ginsunod ang mando nga magyaub sa imahen. Nahibaluan mo bala kon ngaa?— Bangod ang sugo sang Dios nagsiling: ‘Dili ka magbaton sing iban pa nga mga dios luwas sa akon. Dili ka maghimo para sa imo kaugalingon sing larawan nga tinigban kag magyaub sa sini.’ (Exodo 20:3-5) Gani gintuman nanday Sadrac, Mesac, kag Abednego ang sugo ni Jehova sa baylo sang sugo sang hari.

Naakig gid ang hari, gani sa gilayon ginpatawag niya ang tatlo ka pamatan-on nga Hebreo. Namangkot sia: ‘Matuod gid bala nga indi kamo mag-alagad sa akon mga dios? Hatagan ko kamo sing isa pa ka kahigayunan. Karon, kon mabatian ninyo ang lanton, maghapa kamo kag magsimba sa imahen nga ginhimo ko. Kon indi kamo, ihaboy kamo sa nagadabdab nga hurno. Kag sin-o inang dios nga makaluwas sa inyo gikan sa akon mga kamot?’

Ano karon ang himuon sang pamatan-on nga mga lalaki? Ano ang himuon mo?— Nagsiling sila sa hari: ‘Ang amon Dios nga ginaalagad namon sarang makaluwas sa amon. Apang bisan pa kon indi niya paghimuon  ini, indi kami mag-alagad sa imo mga dios. Indi kami magyaub sa imo imahen nga bulawan.’

Nagsingkal ang hari. Nagmando sia: ‘Inita ang hurno sing makapito pa!’ Nian nagmando sia sa iya makusog nga mga tinawo nga gapuson sanday Sadrac, Mesac, kag Abednego kag ihaboy sila sa hurno! Tuman kainit sang hurno amo kon ngaa ang mga tinawo mismo sang hari napatay sa init sang kalayo! Ano ang natabo sa tatlo ka Hebreo?

Sanday Sadrac, Mesac, kag Abednego nagtupa gid sa tunga sang kalayo. Apang nian nagtindog sila! Wala sila maano. Kag wala na sila sing gapos. Paano ini natabo?— Naglaaw ang hari sa hurno, kag hinadlukan sia sa iya nakita. ‘Indi bala nga tatlo ka lalaki ang ginhaboy naton sa kalayo?’ pamangkot niya. Ang iya mga alagad nagsabat: “Huo, O hari.”

Nian ang hari nagsiling: ‘Tan-awa! Apat ka tawo ang nakita ko nga nagalakatlakat didto, kag wala sila nagakasunog.’ Nahibaluan mo bala kon sin-o ining ikap-at nga tawo?— Amo ang anghel ni Jehova. Gin-amligan niya ang tatlo ka Hebreo.

 Ti, sang makita ini, nagkadto ang hari sa ganhaan sang hurno kag nagsinggit: “Sadrac, Mesac kag Abednego, kamo nga mga alagad sang Dios nga Labing Mataas, guwa kamo kag magpalapit diri!” Sang magguwa sila, nakita sang tanan nga wala sila masunog. Wala gani sila sing bisan ano nga baho sang kalayo. Nian ang hari nagsiling: ‘Pakamaayuhon ang Dios nanday Sadrac, Mesac kag Abednego, nga nagpadala sing anghel agod luwason ang iya mga alagad bangod indi gid sila magsimba sa bisan ano nga dios luwas sa ila kaugalingon nga Dios.’—Daniel, kapitulo 3.

Makatuon kita sing leksion gikan sa natabo sadto. Bisan sa karon ang mga tawo nagapatindog sing mga imahen, ukon mga idolo, agod simbahon. Ang The Encyclopedia Americana nagasiling: “Ang bandera, kaangay sang krus, sagrado.” Ang mga imahen mahimo nga human sa kahoy, bato, metal, ukon tela. Ang una nga mga disipulo ni Jesus wala maghimo sing isa ka buhat sang pagsimba sa Romanong emperador, nga siling sang istoryador nga si Daniel P. Mannix mapaanggid sa “indi pagsaludo sa bandera ukon sa pagpanumpa sing katutom sa pungsod.”

Gani sa banta mo bala importante sa Dios kon ang isa ka relihioso nga imahen human sa tela, kahoy, bato, ukon metal?— Husto bala nga ang isa ka alagad ni Jehova magsimba sa atubangan sini nga imahen?— Wala ini ginhimo nanday Sadrac, Mesac, kag Abednego, kag ginkahamut-an sila ni Jehova. Paano mo mailog ang ila halimbawa?—