Kita tanan makapili. Alagaron si Jehova ukon alagaron si Satanas kag ang iya mga demonyo. Indi naton mahimo ang duha. Daw ano ka maalamon ang alagaron si Jehova!

Subong sang nakita na naton, ang mga demonyo nalipay magsaklaw kag magdaya sa tawo. Indi amo sina si Jehova. Ginahigugma niya ang katawhan subong sang isa ka amay nga nagahigugma sa iya mga anak. Sia ang Manughatag sang “tagsa ka maayong hatag kag tagsa ka dulot nga himpit.” (Santiago 1:17) Wala sia sing ginadingot nga maayo sa katawhan, bisan may dakung bili sa iya kaugalingon.—Efeso 2:4-7.

Hunahunaa ang mga butang nga ginhimo sa duta ni Jesus, ang Anak sang Dios. Ginpahambal niya ang mga apa kag ginhatagan sing panulok ang mga bulag. Gin-ayo niya ang mga aruon kag mga piang. Ginpaguwa niya ang mga demonyo kag gin-ayo ang tanan nga sahi sang balatian. Si Jesus, paagi sa gahom sang Dios, nagbanhaw pa gani sang patay.—Mateo 9:32-35; 15:30, 31; Lucas 7:11-15.

Sa baylo nga magsugid sing butig sa pagdaya sa aton, ang Dios pirme nagasugid sang kamatuoran. Wala gid niya ginadaya ang bisan sin-o.—Numeros 23:19.

Subong nga ang balay sang damang nagasiod sing hugot sang langaw, minilyon ka mga tawo ang nasiod sing hugot sa disparatis kag kabutigan. Nahadlok sila sa patay. Nahadlok sila sa mga demonyo. Nabalaka sila sa mga sumpa, malain nga tanda, anting-anting, kag gahom. Nahigtan sila sang mga pagpati kag mga tradisyon pasad sa mga kabutigan ni Satanas nga Yawa. Ang mga alagad sang Dios wala nasiod sining mga butang.

Si Jehova mas gamhanan sang sa kay Satanas. Kon ginaalagad mo si Jehova, pagaamligan ka niya gikan sa mga demonyo. (Santiago 4:7) Ang mga sumpa indi magamadinalag-on sa imo. Halimbawa, sa Nigeria, tatlo ka gamhanan nga mga arbularyo ang nagsumpa agod patyon ang isa ka Saksi ni Jehova nga indi maghalin sa banwa. Sang napaslawan ang ila mga sumpa, ang isa sa ila hinadlukan, nagkadto sia sa Saksi, kag nagpakiluoy.

Kon ang demonyo nagagamo sa imo, sarang mo matawag si Jehova sa ngalan kag pagaamligan niya ikaw. (Hulubaton 18:10) Apang agod matigayon mo ang pangamlig sang Dios, dapat ka mangin hilway sing bug-os sa tanan nga may kaangtanan sa espiritismo kag pagsimba sa demonyo. Ginhimo ina sang mga sumilimba sang Dios sa dumaan nga Efeso. Gintipon nila ang ila tanan nga mga libro sa salamangka kag ginsunog ini. (Binuhatan 19:19, 20) Ang mga alagad sang Dios dapat man maghimo sing amo sina karon. Dulaa ang mga anting-anting, “nagaamlig” nga mga kulintas, gahom, mga libro sa salamangka, kag bisan ano nga may kaangtanan sa espiritistiko nga buhat.

Kon luyag mo pahamut-an ang Dios, indi lamang bastante nga bayaan ang butig nga pagsimba kag untatan ang paghimo sing malain. Dapat mo himuon sing aktibo ang matuod nga pagsimba. Ginapakita sang Biblia kon ano ang kinahanglanon:

Si Satanas kag ang mga demonyo may katawhan sa duta nga nagatudlo kag nagahimo sing malain. Apang si Jehova may katawhan man. Sila amo ang mga Saksi ni Jehova. (Isaias 43:10) Sa bug-os nga duta, may yara kapin sa anom ka milyon ka mga Saksi. Sila tanan nagapanikasog sa paghimo sing maayo kag sa pagtudlo sang kamatuoran sa mga tawo. Sa kalabanan nga kadutaan, makita mo sila sa Kingdom Hall, diin mainit sila nga magaabiabi sa imo.

Ang ila buluhaton amo ang pagbulig sa iban nga alagaron ang Dios. Magatuon sila sang Biblia upod sa imo sa imo puluy-an, nagabulig sa imo sa paghibalo kon paano simbahon si Jehova sa husto nga paagi. Wala ini sing bayad. Ang mga Saksi nalipay sa pagtudlo sang kamatuoran bangod ginahigugma nila ang katawhan kag ginahigugma nila si Jehova nga Dios.