Ang mga Demonyo mga Manugpatay!
Si Satanas kag ang mga demonyo pirme mapintas kag makatalagam gid kaayo. Ginpatay anay ni Satanas ang mga sapat kag mga alagad ni Job. Nian ginpatay niya ang napulo ka anak ni Job paagi sa “mabaskog nga hangin” nga nagguba sang balay nga sa sini didto sila. Pagkatapos sina ginsakit ni Satanas si Job sing “tama nga hubag kutob sa dapadapa sang iya tiil tubtob sa iya alimpuduhan.”—Job 1:7-19; 2:7.
Sang adlaw ni Jesus, ginhimo sang mga demonyo ang iban nga tawo nga mangin apa kag bulag. (Mateo 9:32, 33; 12:2) Ginsakit nila ang isa ka tawo kag ginpapilas nila sa iya ang iya kaugalingon sa mga bato. (Marcos 5:5) Ginpasinggit man nila ang bata, ginpukan sia sa duta, kag “ginpakibang sia sing tama.”—Lucas 9:42.
Sang nagligad, ang mga demonyo nagapamasakit sa mga tawo kag nagapakibang sa ila
Sa karon, si Satanas kag ang mga demonyo mga manugpatay gihapon. Sa katunayan, nagdugang pa gid ang ila malaut nga buhat kutob sang ginpalayas sila sa langit. Ang mga balita gikan sa bug-os nga kalibutan nagapamatuod sa ila kapintas. Ginasit-an nila ang tawo sang balatian. Ginatublag nila ang iban kon gab-i, wala sila ginapatulog ukon ginapadamgo sila sing malain. Ginaabusuhan nila ang iban sa sekso. Ginatiklod nila ang iban nga magbuang, magpatay, ukon maghikog.
Ang mga demonyo karon nagahimo sa iban nga tawo nga mangin masingki; nagatublag sa iban kon gab-i, nagapadamgo sa ila sing malain
Si Lintina, nga nagapuyo sa Suriname, nagasugid nga ang isa ka demonyo, ukon malain nga espiritu, nagpatay sa 16 ka katapo sang iya panimalay kag nagsakit sa iya sa pisikal kag hunahuna sa 18 ka tuig. Gikan mismo sa iya eksperiensia nagsiling sia nga ang mga demonyo “nalipay magsakit sa ila nagabatu nga mga biktima tubtob mapatay.”
Apang si Jehova sarang makaamlig sa iya mga alagad batok sa mga pagsalakay ni Satanas.—Hulubaton 18:10.
Basi Manamian Ka Man
SABAT SA MGA PAMANGKOT SA BIBLIA
Ang Yawa Bala ang Ginahalinan sang Tanan nga Pag-antos?
Ginasugid sang Biblia ang kabangdanan sang pag-antos sang tawo.
