Maggamit sang masaligan nga mga reperensia. Ibase ang imo ihambal sa Pulong sang Dios, kag basaha ini kon posible. Kon nagasambit sang impormasyon parte sa siensia, balita, eksperiensia, ukon iban pa nga ebidensia, pat-ura nga masaligan ini kag pinakabag-o.

Gamita sing nagakaigo ang mga reperensia. Ipaathag ang mga kasulatan suno sa konteksto, kabilugan nga mensahe sang Biblia, kag mga publikasyon sang “matutom kag mainandamon nga ulipon.” (Mat. 24:45) Gamita ang sekular nga mga reperensia suno sa konteksto kag buot silingon sang nagsulat sini.

Mangatarungan base sa reperensia. Pagkatapos mabasa ang kasulatan ukon mahambal ang reperensia, mamangkot sing mataktikanhon ukon iilustrar ang punto para buligan ang mga tagpalamati nga makahimo sang konklusion.