1. Sin-o ang naghatag sang aton kabuhi?

SI Jehova amo “ang buhi nga Dios.” (Jeremias 10:10) Sia ang aton Manunuga, kag sia ang naghatag sa aton sing kabuhi. Ang Biblia nagasiling: “Gintuga mo ang tanan nga butang, kag bangod sang imo kabubut-on nagluntad sila kag natuga.” (Bugna 4:11) Huo, gusto ni Jehova nga mabuhi kita. Espesyal gid niya ini nga regalo.—Basaha ang Salmo 36:9.

2. Paano mangin madinalag-on ang aton kabuhi?

² Ginhatagan kita ni Jehova sang aton kinahanglanon para mabuhi, pareho sang pagkaon kag tubig. (Binuhatan 17:28) Pero gusto man niya nga malipay kita. (Binuhatan 14:15-17) Para mangin madinalag-on, dapat naton tumanon ang mga kasuguan sang Dios.—Isaias 48:17, 18.

3. Ano ang ginhimo ni Jehova sang ginpatay ni Cain si Abel?

³ Ginatudluan kita sang Biblia nga importante kay Jehova ang kabuhi sang mga tawo. Halimbawa, sang si Cain—ang bata nga lalaki ni Adan kag ni Eva—akig gid sa iya manghod nga si Abel, ginpaandaman sia ni Jehova nga dapat kontrolon niya ang iya kaakig. Pero wala namati si Cain, kag bangod sa iya kaakig “ginpatay [niya] si Abel nga iya utod.” (Genesis 4:3-8) Ginsilutan ni Jehova si Cain kay ginpatay niya si Abel. (Genesis 4:9-11) Gani indi gid maayo ang kaakig kag dumot kay mahimo kita mangin bayolente ukon mapintas. Ina nga klase sang tawo indi makabaton sing kabuhi nga wala sing katapusan. (Basaha ang 1 Juan 3:15.)  Malipay gid si Jehova kon palanggaon naton ang tanan nga tawo.—1 Juan 3:11, 12.

4. Ano ang ginatudlo sa aton sang isa ka sugo sang Dios nga ginhatag sa mga Israelinhon parte sa kabuhi?

⁴ Linibo ka tuig sang ulihi, ginpakita ni Jehova nga importante sa iya ang kabuhi sang ginhatag niya ang Napulo ka Sugo kay Moises. Ang isa ka sugo nagasiling: “Indi kamo magpatay.” (Deuteronomio 5:17) Kon hungod nga ginpatay sang isa ang isa ka tawo, patyon man sia.

5. Ano ang ginabatyag sang Dios sa aborsion?

⁵ Ano ang ginabatyag sang Dios sa aborsion? Bisan ang kabuhi sang lapsag nga wala pa mabun-ag ginapabaloran ni Jehova. Sa Kasuguan nga ginhatag ni Jehova sa mga Israelinhon, nagsiling si Jehova nga kon mahalitan sang isa ang nagabusong nga iloy kag napatay ang bata, dapat sia patyon. (Basaha ang Exodo 21:22, 23; Salmo 127:3.) Ginatudluan kita sini nga sala gid ang aborsion.—Tan-awa ang Endnote 28.

6, 7. Paano naton mapakita kay Jehova nga ginapabaloran naton ang kabuhi?

⁶ Paano naton mapakita kay Jehova nga ginapabaloran naton ang aton kabuhi kag ang iya sang iban? Paagi sa paglikaw nga mabutang sa delikado ang aton kabuhi kag ang iya sang iban. Gani wala kita nagapanigarilyo ukon nagamama ukon nagadroga, kay makahalit ini kag makapatay sa aton.

⁷ Ginhatagan kita sang Dios sing kabuhi kag lawas, kag dapat naton ini gamiton suno sa gusto niya. Gani dapat naton halungan ang aton lawas. Kay kon indi, mangin indi kita matinlo sa panan-aw sang Dios. (Roma 6:19; 12:1; 2 Corinto 7:1) Indi naton masimba si Jehova, nga naghatag sa aton sing kabuhi, kon wala naton ginapabaloran ang aton kabuhi. Bisan pa mabudlay untatan ang malain nga mga bisyo, buligan kita ni Jehova kon nagapanikasog kita kay ginapabaloran naton ang kabuhi.

8. Ano ang himuon naton para indi mahalitan ang aton kabuhi ukon ang iya sang iban?

 ⁸ Natun-an naton nga espesyal nga regalo ang kabuhi. Nagapaabot si Jehova nga himuon naton ang aton masarangan para indi mahalitan ang aton kabuhi kag ang iya sang iban. Mahimo naton ini kon nagadrayb kita sang salakyan, motor, ukon iban pa. Ginalikawan naton ang delikado ukon bayolente nga mga sports. (Salmo 11:5) Ginatinguhaan man naton nga malayo sa disgrasya ang aton balay. Nagsugo si Jehova sa mga Israelinhon: “Kon magpatindog kamo sing bag-o nga balay, himuan ninyo sing barandilya ang inyo atop agod wala sing mahulog kag indi makasala sa dugo ang inyo panimalay.”—Deuteronomio 22:8.

9. Paano naton dapat trataron ang mga sapat?

⁹ Importante man kay Jehova kon paano naton ginatratar ang mga sapat. Ginpasugtan niya kita nga patyon ang mga sapat para kaunon kag himuon nga bayo, kag kon mabutang sa delikado ang aton kabuhi. (Genesis 3:21; 9:3; Exodo 21:28) Pero indi kita dapat mangin mapintas sa mga sapat ukon patyon sila bangod sa sports.—Hulubaton 12:10.

10. Ngaa masiling naton nga ang dugo nagarepresentar sang kabuhi?

¹⁰ Ang dugo balaan kay Jehova kay nagarepresentar ini sang kabuhi. Pagkatapos ginpatay ni Cain si Abel, ginsilingan sia ni Jehova: “Ang dugo sang imo utod nagasinggit sa akon halin sa duta.” (Genesis 4:10) Ang dugo ni Abel nagarepresentar sa iya kabuhi, kag ginsilutan ni Jehova si Cain kay ginpatay niya si Abel. Pagkatapos sang Baha sang adlaw ni Noe, ginpakita liwat ni Jehova nga ang dugo nagarepresentar sang kabuhi. Ginpasugtan ni Jehova si Noe kag ang iya pamilya nga kaunon ang karne sang mga sapat. Nagsiling sia: “Mangin kalan-on ninyo ang tanan nga buhi nga sapat. Ginahatag ko ini tanan sa inyo, pareho sang paghatag  ko sa inyo sang berde nga pananom.” Pero may ginsugo si Jehova nga indi nila dapat pagkaunon: “Apang indi ninyo pagkaunon ang karne nga may dugo, kay ang dugo amo ang kabuhi.”—Genesis 1:29; 9:3, 4.

11. Ano ang ginsugo sang Dios sa pungsod sang Israel parte sa dugo?

¹¹ Pagligad sang mga 800 ka tuig sa tapos ginsugo ni Jehova si Noe nga indi pagkaunon ang dugo, ginsugo niya liwat ang iya katawhan: “Kon ang isa ka Israelinhon ukon ang dumuluong nga nagaistar sa tunga ninyo magpangayam kag makadakop sia sing ilahas nga sapat ukon sing pispis nga makaon, dapat niya iula ang dugo sini kag tabunan ini sing yab-ok.” Dayon nagsiling pa sia: “Indi kamo magkaon sing dugo.” (Levitico 17:13, 14) Gusto gihapon ni Jehova nga tamdon sang iya mga katawhan ang dugo nga balaan. Puede nila kaunon ang karne pero indi ang dugo. Kon magpatay sila sang sapat para kaunon, dapat nila patuluon ang dugo sa duta.

12. Paano ginatamod sang mga Cristiano ang dugo?

¹² Mga pila ka tuig pagkatapos mapatay si Jesus, nagtipon ang mga apostoles kag mga gulang sang Cristianong kongregasyon sa Jerusalem para desisyunan kon ano pa nga mga Kasuguan nga ginhatag sa mga Israelinhon ang maaplikar sa mga Cristiano. (Basaha ang Binuhatan 15:28, 29; 21:25.) Ginbuligan sila ni Jehova nga maintiendihan nga bilidhon gihapon sa iya ang dugo kag dapat tamdon nila ini gihapon nga balaan. Ang mga Cristiano sadto indi dapat magkaon sing dugo ukon mag-inom sini ukon magkaon sing karne nga wala napagua ang dugo. Kon himuon nila ini, daw pareho lang nga nagsimba sila sa mga idolo ukon naghimo sing seksuwal nga imoralidad. Sugod sadto, ang mga Cristiano wala nagakaon sing dugo ukon nagainom sini. Kamusta subong? Gusto gihapon ni Jehova nga tamdon naton ang dugo nga balaan.

13. Ngaa wala nagapatughong sing dugo ang mga Cristiano?

 ¹³ Buot bala silingon sini nga indi man dapat magpatughong sing dugo ang mga Cristiano? Huo. Ginsugo kita ni Jehova nga indi magkaon ukon mag-inom sing dugo. Kon ginsilingan ka sang doktor nga indi mag-inom sang makahulubog nga ilimnon, iindyeksion mo bala ini sa imo lawas? Indi gid! Sing kaanggid, ang sugo nga indi magkaon ukon mag-inom sing dugo nagapakita nga indi man kita dapat magpatughong sing dugo.—Tan-awa ang Endnote 29.

14, 15. Ngaa importante sa mga Cristiano nga respetuhon ang kabuhi kag tumanon si Jehova?

¹⁴ Ano abi kon magsiling ang doktor nga mapatay kita kon indi kita magpatughong sing dugo? Ang kada isa sa aton ang dapat magdesisyon kon bala tumanon niya ang sugo sang Dios parte sa dugo. Ginarespeto gid sang mga Cristiano ang regalo sang Dios nga kabuhi, kag nagapangita kita sing iban pa nga paagi sang pagbulong para padayon nga mabuhi; pero indi kita dapat magpatughong sing dugo.

¹⁵ Ginatinguhaan naton nga mangin maayo ang aton panglawas, pero bangod importante sa Dios ang kabuhi, wala kita nagapatughong sing dugo. Mas importante ang pagtuman kay Jehova sangsa palawigon naton ang aton kabuhi pero wala nagatuman sa iya. Nagsiling si Jesus: “Ang bisan sin-o nga luyag magluwas sang iya kabuhi madula niya ini, apang ang bisan sin-o nga madula ang iya kabuhi tungod sa akon makatigayon sini.” (Mateo 16:25) Bangod palangga naton si Jehova gusto naton nga tumanon sia. Nahibaluan niya ang pinakamaayo para sa aton, gani ginatamod naton ang kabuhi nga bilidhon kag balaan, pareho sang pagtamod niya.—Hebreo 11:6.

16. Ngaa ang mga alagad sang Dios nagatuman sa iya?

¹⁶ Determinado gid ang mga matutom nga alagad sang Dios nga tumanon ang iya sugo parte sa dugo. Wala sila nagakaon  ukon nagainom sing dugo, kag wala man sila nagapatughong sing dugo. * Pero ginabaton nila ang iban nga paagi sang pagbulong para maluwas ang ila kabuhi. Nagapati sila nga nahibaluan sang Manunuga sang kabuhi kag dugo kon ano ang pinakamaayo para sa ila. Nagapati ka bala nga nahibaluan niya ang pinakamaayo para sa imo?

17. Ano ang lamang nga paggamit sing dugo ang ginpasugtan ni Jehova sa mga Israelinhon?

¹⁷ Sa Kasuguan nga ginhatag sang Dios kay Moises, ginsilingan ni Jehova ang mga Israelinhon: “Ang kabuhi sang unod yara sa dugo, kag ginahatag ko ini sa halaran agod maghimo kamo sing pagtumbas [ukon, pagpangayo sing patawad] para sa sala ninyo. Ang dugo amo ang nagatumbas sa sala.” (Levitico 17:11) Kon makasala sila, makapangayo sila sing patawad kay Jehova paagi sa paghalad sang sapat kag mangabay sa saserdote nga ibubo ang iban nga dugo sini sa halaran sang templo. Amo lamang ini ang paggamit sing dugo nga ginpasugtan ni Jehova sa mga Israelinhon.

18. Ano ang mahimo naton mabaton bangod sa halad ni Jesus?

¹⁸ Sang ari si Jesus sa duta, ginbuslan niya ang kasuguan parte sa paghalad sang mga sapat paagi sa paghatag sang iya kabuhi, ukon dugo, para mapatawad ang aton mga sala. (Mateo 20:28; Hebreo 10:1) Daku gid ang balor sang kabuhi ni Jesus amo nga sa tapos sia ginbanhaw ni Jehova para sa kabuhi sa langit, mahatagan na ni Jehova ang mga tawo sing paglaum nga mabuhi sing wala katapusan.—Juan 3:16; Hebreo 9:11, 12; 1 Pedro 1:18, 19.

19. Ano ang dapat naton himuon para “wala [kita] sing salabton sa dugo sang bisan sin-o nga tawo”?

 ¹⁹ Nagapasalamat gid kita kay Jehova kay ginhatagan niya kita sing bilidhon nga kabuhi! Kag gusto naton sugiran ang mga tawo nga kon magtuo sila kay Jesus, mahimo sila mabuhi sing wala katapusan. Bangod palangga naton ang mga tawo, himuon naton ang tanan para tudluan sila kon paano mabaton ang kabuhi. (Ezequiel 3:17-21) Dayon pareho ni apostol Pablo, makasiling kita: “Wala ako sing salabton sa dugo sang bisan sin-o nga tawo, kay wala ako magpugong sa pagsugid sa inyo sang kabubut-on sang Dios para sa katawhan.” (Binuhatan 20:26, 27) Huo, ginatahod naton ang kabuhi kag dugo kon ginasugid naton sa iban ang parte kay Jehova kag nga importante sa iya ang kabuhi.