1. Ano ang katuyuan sang Dios para sa mga tawo?

ANG Dios may matahom nga katuyuan para sa mga tawo. Gintuga niya ang una nga lalaki kag babayi, si Adan kag si Eva, kag ginpaistar sa matahom nga hardin. Katuyuan niya nga manganak sila, himuon nga paraiso ang bilog nga duta, kag atipanon ang mga sapat.—Genesis 1:28; 2:8, 9, 15; tan-awa ang Endnote 6.

2. (a) Ngaa makasiguro kita nga himuon sang Dios ang iya katuyuan? (b) Ano ang ginasiling sang Biblia parte sa pagkabuhi sing wala katapusan?

² Makaistar pa bala kita sa paraiso? Nagsiling si Jehova: “Gintuyo ko ini, kag himuon ko man ini.” (Isaias 46:9-11; 55:11) Huo, himuon niya ang iya katuyuan, kag wala sing makapugong sa iya. Nagsiling si Jehova nga may rason sia kon ngaa gintuga niya ang duta. ‘Wala niya ini gintuga sa wala sing pulos.’ (Isaias 45:18) Gusto niya mabuhi ang mga tawo sa bilog nga duta. Ano nga klase sang mga tawo ang gusto sang Dios nga mag-istar diri, kag daw ano kadugay? Ang Biblia nagasiling: “Ang mga matarong [ukon, matinumanon] magapanubli sang duta, kag magapuyo sila sa sini sa wala sing katubtuban.”—Salmo 37:29; Bugna 21:3, 4.

3. Bangod nagamasakit kag nagakapatay ang mga tawo, ano ang mahimo mo ipamangkot?

³ Pero subong, ang mga tawo nagamasakit kag nagakapatay. Sa madamo nga lugar, nagailinaway sila kag nagapatyanay. Sigurado gid nga indi ini ang katuyuan sang Dios. Gani ano ang natabo, kag ngaa? Ang Biblia lang ang makasabat sina.

4, 5. (a) Sin-o ang nagpakig-istorya kay Eva sa hardin sang Eden paagi sa man-ug? (b) Paano ang tampad nga tawo mangin kawatan?

⁴ Ginasugiran kita sang Biblia nga may kaaway ang Dios “nga ginatawag Yawa kag Satanas.” Gingamit ni Satanas ang man-ug para maistorya si Eva sa hardin sang Eden. (Bugna 12:9; Genesis 3:1) Ginhimo niya ini nga daw ang man-ug ang nagahambal.—Tan-awa ang Endnote 7.

⁵ Gani, ang Dios bala ang nagtuga kay Satanas nga Yawa? Indi! Ang anghel nga ara sa langit sang gintuga sang Dios si Adan kag si Eva nagbag-o kag nangin Yawa. (Job 38:4, 7) Paano ina natabo? Halimbawa, paano ang tampad nga tawo mangin isa ka kawatan? Wala sia ginbata nga kawatan. Pero ginhandum niya, ukon gusto niya kuhaon, ang indi iya. Pirme niya ini ginapamensar, kag nagbaskog pa gid ang iya sala nga handum. Gani sang may tsansa na sia, ginkawat niya ini. Sia mismo ang naghimo sa iya kaugalingon nga kawatan.—Basaha ang Santiago 1:13-15; tan-awa ang Endnote 8.

6. Paano ang isa ka anghel nangin kaaway sang Dios?

⁶ Amo sini ang natabo sa isa ka anghel. Sa tapos gintuga ni Jehova si Adan kag si Eva, ginsilingan niya sila nga magpanganak kag ‘pun-on ang duta.’ (Genesis 1:27, 28) Siguro namensar ina nga anghel, ‘Puede nga ako ang simbahon sang tanan nga tawo imbes nga si Jehova!’ Samtang ginapamensar niya ini pirme, mas gusto na gid niya kuhaon ang iya ni Jehova. Gusto sina nga anghel nga magsimba ang mga tawo sa iya. Gani nagbutig sia kay Eva kag gindayaan sia. (Basaha ang Genesis 3:1-5.) Amo ini ang rason kon ngaa nangin Satanas nga Yawa sia, ang kaaway sang Dios.

7. (a) Ngaa napatay si Adan kag si Eva? (b) Ngaa nagatigulang kita kag nagakapatay?

 ⁷ Wala gintuman ni Adan kag ni Eva ang Dios kag nagkaon sila sang prutas. (Genesis 2:17; 3:6) Nakasala sila kay Jehova, kag sang ulihi napatay, kay amo gid sini ang ginsiling ni Jehova nga matabo sa ila. (Genesis 3:17-19) Ang mga anak ni Adan kag ni Eva mga makasasala, gani nagakapatay sila. (Basaha ang Roma 5:12.) Para maintiendihan naton kon ngaa nangin makasasala man ang mga anak ni Adan kag ni Eva, binagbinaga ang isa ka halimbawa. Imadyina ang tinapay nga ginaluto sa hurmahan nga may gupi. Sigurado nga ang gupi sang tinapay pareho gid sa gupi sang hurmahan. Sang wala gintuman ni Adan ang Dios, nangin makasasala sia. Bangod mga anak kita ni Adan, tanan kita makasasala man, ukon may pareho nga “gupi” sa iya. Gani, nagatigulang kita kag nagakapatay.—Roma 3:23; tan-awa ang Endnote 9.

8, 9. (a) Ano ang gusto ni Satanas nga patihan ni Adan kag ni Eva? (b) Ngaa wala dayon ginpatay ni Jehova ang mga rebelde?

⁸ Nagsugod ang pagrebelde kay Jehova sang gin-impluwensiahan ni Satanas si Adan kag si Eva nga indi magtuman sa Dios. Ginpapati niya si Adan kag si Eva nga butigon si Jehova, nga malain sia nga manuggahom nga indi gusto ang maayo para sa ila. Pareho lang nga nagsiling si Satanas nga indi kinahanglan sang mga tawo ang giya sang Dios, kag si Adan kag si Eva ang dapat magadesisyon kon ano ang insakto kag sala. Ano ang himuon ni Jehova? Puede niya patyon ang mga rebelde para matapos ang rebelyon. Pero mapamatud-an bala sina nga butigon si Satanas? Indi gid.

⁹ Gani wala dayon ginpatay ni Jehova ang mga rebelde. Ginpasugtan ni Jehova ang mga tawo nga maggahom sa ila kaugalingon. Paagi sini mapamatud-an nga butigon si Satanas, kag si Jehova amo ang nakahibalo sang pinakamaayo  para sa mga tawo. Matun-an pa gid naton ina sa Kapitulo 11. Pero ano ang masiling mo sa desisyon ni Adan kag ni Eva? Insakto bala nga nagpati sila kay Satanas kag wala nagtuman sa Dios? Si Jehova ang naghatag sang tanan nga kinahanglanon ni Adan kag ni Eva. Ginhatagan niya sila sing perpekto nga kabuhi, matahom nga ilistaran, kag manami  nga trabaho. Pero wala gid sing ginhatag si Satanas nga maayo para sa ila. Kon ikaw abi, ano ang himuon mo?

10. Ano nga importante nga desisyon ang ginaatubang naton?

¹⁰ Kada isa sa aton dapat man magdesisyon, kag ang aton kabuhi nagadepende sa kon ano ang aton pilion. Puede naton pilion nga si Jehova ang aton Manuggahom kag pamatud-an nga butigon si Satanas. Ukon puede man naton pilion si Satanas bilang aton manuggahom. (Salmo 73:28; basaha ang Hulubaton 27:11.) Diutay lang gid subong ang nagatuman sa Dios. Ang matuod, indi sia ang manuggahom sini nga kalibutan. Kon indi sia, sin-o?

11, 12. (a) Ano ang matun-an naton sa gintanyag ni Satanas kay Jesus? (b) Ano nga mga bersikulo ang nagapamatuod nga si Satanas ang manuggahom sini nga kalibutan?

¹¹ Kilala ni Jesus ang nagagahom sa kalibutan. Isa ka bes, “ginpakita sa iya [ni Satanas] ang tanan nga ginharian sang kalibutan kag ang gahom kag manggad sini.” Dayon nagpromisa si Satanas sa iya: “Ini tanan ihatag ko sa imo kon magyaub ka kag maghimo sing isa ka buhat sang pagsimba sa akon.” (Mateo 4:8, 9; Lucas 4:5, 6) Pamensari ini, ‘Itanyag bala ni Satanas kay Jesus ina nga mga ginharian kon indi ini iya?’ Indi. Ang tanan nga gobierno iya ni Satanas.

¹² Mahimo magpalibog ka: ‘Paano nangin manuggahom si Satanas sini nga kalibutan? Indi bala nga si Jehova nga Labing Gamhanan nga Dios ang nagtuga sang uniberso?’ (Bugna 4:11) Huo, Sia ang nagtuga, pero maathag nga nagsiling si Jesus nga si Satanas “ang manuggahom sini nga kalibutan.” (Juan 12:31; 14:30; 16:11) Gintawag ni apostol Pablo si Satanas nga Yawa nga “dios sini nga sistema sang mga butang.” (2 Corinto 4:3, 4) Kag si apostol Juan nagsulat nga “ang bug-os nga kalibutan yara sa gahom sang isa nga malauton.”—1 Juan 5:19.

13. Ngaa kinahanglan naton sang bag-o nga kalibutan?

¹³ Delikado na gid ini nga kalibutan. Bisan diin ka lang may mga inaway, korapsion, butigon nga mga tawo, kag krimen. Bisan ano pa nga tinguha sang mga tawo, wala gid nila nasolbar ini nga mga problema. Pero sa ulihi, laglagon sang Dios ining malain nga kalibutan sa iya inaway nga ginatawag Armageddon, kag buslan niya ini sang matarong nga bag-o nga kalibutan.—Bugna 16:14-16; tan-awa ang Endnote 10.

14. Sin-o ang ginpili sang Dios nga mangin Hari sang Iya Ginharian? Ano ang gintagna sang Biblia parte kay Jesus?

¹⁴ Ginpili ni Jehova si Jesucristo nga mangin Hari sa Iya gobierno sa langit, ukon Ginharian. Linibo ka tuig ang nagligad, gintagna sang Biblia nga si Jesus magagahom bilang “Prinsipe sang Paghidait” kag ang iya ginharian wala sing katapusan. (Isaias 9:6, 7) Gintudluan ni Jesus ang iya mga sumulunod nga ipangamuyo ini nga gobierno: “Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:10) Sa Kapitulo 8, matun-an naton kon paano buslan sang Ginharian sang Dios ang mga gobierno sa kalibutan. (Basaha ang Daniel 2:44.) Dayon paagi sa Ginharian sang Dios, himuon nga matahom nga paraiso ang duta.—Tan-awa ang Endnote 11.

15. Ano ang “bag-o nga duta”?

¹⁵ Nagpromisa ang Biblia: “May bag-o nga langit kag bag-o nga duta nga ginahulat naton,” kag “sa sini magapuyo ang pagkamatarong.” (2 Pedro 3:13; Isaias 65:17) Kon kaisa, kon magsiling ang Biblia nga “duta,” ang mga tawo sa duta amo ang ginatumod sini. (Genesis 11:1) Gani ang buot silingon sang matarong nga “bag-o nga duta,” amo ang mga tawo nga nagatuman sa Dios kag ginapakamaayo niya.

16. Ano nga matahom nga regalo ang ihatag sang Dios sa mga maistar sa iya bag-o nga kalibutan, kag ano ang himuon naton para mabaton ini?

 ¹⁶ Nagpromisa si Jesus nga ang mga maistar sa bag-o nga kalibutan sang Dios makabaton sang “kabuhi nga wala sing katapusan.” (Marcos 10:30) Ano ang dapat naton himuon para mabaton ini nga regalo? Palihug basaha ang Juan 3:16 kag 17:3 para mahibaluan mo ang sabat. Aton subong hibaluon ang ginasiling sang Biblia kon ano ang aton mangin kabuhi sa Paraiso sa duta.

17, 18. Ngaa makasiguro kita nga sa ulihi may paghidait sa bilog nga duta kag wala na kita sing kulbaan?

¹⁷ Madula na ang mga malain, inaway, krimen, kag kapintas. Wala na sing magahimo sing malain sa duta. (Salmo 37:10, 11) Pauntaton sang Dios “ang mga inaway sa bug-os nga duta.” (Salmo 46:9; Isaias 2:4) Mapuno ang duta sang mga tawo nga nagapalangga kag nagatuman sa Dios. May kalinong na asta san-o.—Salmo 72:7.

¹⁸ Wala na sing kulbaan ang katawhan ni Jehova. Sa panahon sang Biblia, kon ginatuman sang mga Israelinhon ang Dios, ginaproteksionan niya sila. (Levitico 25:18, 19) Sa Paraiso, wala na kita sing kahadlukan. Wala na sing mahalit sa aton!—Basaha ang Isaias 32:18; Miqueas 4:4.

19. Ngaa makasiguro kita nga may pagkaon na para sa tanan sa bag-o nga kalibutan sang Dios?

¹⁹ May pagkaon na para sa tanan. “Mangin bugana ang mga uyas sa duta; sa putukputukan sang kabukiran magahapayhapay ini.” (Salmo 72:16) Si Jehova, “ang aton Dios, magapakamaayo sa aton,” kag “ang duta magahatag sang iya patubas.”—Salmo 67:6.

20. Ngaa makasiguro kita nga mangin paraiso ang duta?

²⁰ Mangin paraiso na ang bilog nga duta. Ang mga tawo may matahom na nga mga balay kag mga hardin.  (Basaha ang Isaias 65:21-24; Bugna 11:18.) Mangin pareho katahom ang duta sa hardin sang Eden. Hatagan kita ni Jehova sang tanan naton nga kinahanglanon. Ang Biblia nagsiling parte sa iya: “Ginahumlad mo ang imo kamot kag ginahatag ang handum sang tagsa ka buhi nga butang.”—Salmo 145:16.

21. Ngaa makasiguro kita nga sa ulihi may paghidait na sa tunga sang mga tawo kag sapat?

²¹ May paghidait na ang mga tawo kag mga sapat. Indi na paghalitan sang mga sapat ang tawo. Bisan ang mga bata indi na paghalitan sang mga sapat nga delikado subong.—Basaha ang Isaias 11:6-9; 65:25.

22. Ano ang himuon ni Jesus sa mga nagamasakit?

²² Wala na sing magamasakit. Sang ari si Jesus sa duta, gin-ayo niya ang madamo nga tawo. (Mateo 9:35; Marcos 1:40-42; Juan 5:5-9) Pero bilang Hari sang Ginharian sang Dios, ayuhon ni Jesus ang tanan nga tawo. Wala na sing magasiling: “Nagamasakit ako.”—Isaias 33:24; 35:5, 6.

23. Ano ang himuon sang Dios sa mga patay?

²³ Mabuhi liwat ang mga patay. Nagpromisa ang Dios nga banhawon niya ang minilyon nga napatay. “May pagkabanhaw sang mga matarong kag mga indi matarong.”—Basaha ang Juan 5:28, 29; Binuhatan 24:15.

24. Ano ang nabatyagan mo parte sa pagkabuhi sa Paraiso?

²⁴ Kita ang magadesisyon. Puede naton pilion nga tun-an ang parte kay Jehova kag mag-alagad sa iya, ukon himuon kon ano ang gusto naton. Kon pilion naton nga mag-alagad kay Jehova, mangin maayo ang aton palaabuton. Sang ginpangabay si Jesus sang tawo nga dumdumon sia antes sia napatay, nagpromisa si Jesus sa iya: “Mangin kaupod ko ikaw sa Paraiso.” (Lucas 23:43) Tun-an pa gid naton ang parte kay Jesucristo kag kon paano niya tumanon ang matahom nga mga promisa sang Dios.