1-3. (a) Ilaragway ang nakita kag nabatian ni Ezequiel. (Tan-awa ang piktyur sa umpisa sini nga kapitulo.) (b) Ano nga gahom ang nagbulig kay Ezequiel nga makita kag mabatian ang palanan-awon, kag ano ang epekto sini sa iya?

SI Ezequiel may ginahimutaran sa unhan, sa malapad kag balason nga kapatagan. Gulpi lang nagdaku ang iya mga mata. Daw indi sia makapati sa iya nakita. May manug-abot nga bagyo. Pero indi ini ordinaryo nga bagyo. Samtang ginahampak sang mabaskog nga hangin halin sa aminhan ang iya buhok kag bayo, nakita niya ang madamol nga gal-um. Sa tunga sang panganod may nagakirab nga kalayo, kag ang inggat sini nagapahanumdom sa iya sang ginsamo nga malahalon nga metal. * Samtang madasig nga nagapalapit kay Ezequiel ang madamol nga gal-um, nagabaskog pa gid ang gahod, nga daw gahod sang madamo nga soldado.—Ezeq. 1:4, 24.

² Sa sina nga tion, mga 30 anyos si Ezequiel, kag nakita niya ang una sa mga palanan-awon nga indi gid niya malipatan. Nabatyagan niya “ang gahom ni Jehova” nga ara sa iya, ang indi mapanghiwala nga gahom sang balaan nga espiritu ni Jehova. Paagi sini nga espiritu, makita niya kag mabatian ang makahalawhaw nga mga butang, nga sobra pa sa mga pelikula subong nga may mga special-effect. Bangod sa sobra nga kahayanghag, naghapa si Ezequiel.—Ezeq. 1:3, 28.

 ³ Pero ginpakita ni Jehova ini nga palanan-awon indi lang para magdayaw si Ezequiel. Pareho sa iban nga palanan-awon sa iya libro, ang una nga palanan-awon ni Ezequiel madamo sing kahulugan para sa iya kag sa matutom nga mga alagad ni Jehova subong. Gani, usisaon naton sing maayo ang nakita kag nabatian ni Ezequiel.

4, 5. Ano ang kahimtangan sang mga tinapok kag sang Jerusalem sang nakakita si Ezequiel sing palanan-awon?

⁴ Basaha ang Ezequiel 1:1-3. Hibaluon anay naton ang kahimtangan. Ang tuig 613 B.C.E. Natun-an naton sang nagligad nga kapitulo nga bihag si Ezequiel sa Babilonia upod sa mga tinapok nga nagaistar sa higad sang suba sang Kebar. Ining malapad nga suba ginhimo sang mga tawo kag ginaagyan sang mga sakayan. Ang puno kag ang punta sini nagatabo sa Suba Eufrates.

⁵ Ang Jerusalem, nga lugar sadto sang mga tinapok, mga 800 kilometros ang kalayuon halin sa Babilonia. * Ang templo, diin nag-alagad bilang saserdote ang amay ni Ezequiel, nahigkuan sang butig nga pagsimba. Kag ang trono sa Jerusalem, diin naghari sing mahimayaon si David kag si Solomon, nangin isa na ka kahuy-anan. Ang wala sing pagtuo nga hari nga si Jehoiakin ara man sa Babilonia upod sa mga tinapok. Ang nagbulos sa iya nga si Sedequias, malaut nga hari kag nagasunodsunod lang sa hari sang Babilonia.—2 Hari 24:8-12, 17, 19.

6, 7. Ngaa mahimo nagbatyag si Ezequiel nga mabudlay ini nga tion para sa iya?

⁶ Mahimo amo ini ang pinakamabudlay nga tion para sa tawo nga may mabakod nga pagtuo pareho kay Ezequiel. Ang iban nga kaupod niya nga mga tinapok basi nagapamangkot: ‘Nalipat na gid  bala si Jehova sa aton? Buslan na gid bala sang gamhanan kag malaut nga Babilonia kag sang iya butig nga mga dios ang putli nga pagsimba kay Jehova, kag ang Iya paggahom sa duta?’

⁷ Pamensara ini nga mga impormasyon samtang ginabasa mo ang detalyado nga paglaragway ni Ezequiel sang iya una nga palanan-awon. (Ezeq. 1:4-28) Samtang nagabasa ka, imadyina nga ikaw si Ezequiel nga nagapamati kag nagatan-aw sang mga palanan-awon.

8. Ano ang nakita ni Ezequiel sa palanan-awon, kag ano ang ginarepresentar sini?

⁸ Ano gid ang nakita ni Ezequiel? Daw isa ka daku kag makahalawhaw nga salakyan nga ginlaragway bilang isa ka kangga. May apat ini ka dalagku nga ruweda kag sa tupad sini may apat ka tumalagsahon nga espiritu nga tinuga, nga sang ulihi nakilala nga mga kerubin. (Ezeq. 10:1) Sa ibabaw nila may daw salog nga nagabadlak kaangay sang yelo, kag sa ibabaw pa gid sini ara ang mahimayaon nga trono sang Dios, diin nagapungko si Jehova mismo! Pero ano ang ginarepresentar sina nga kangga? Isa lang ang ginarepresentar sang palanan-awon ni Ezequiel: ang langitnon nga bahin sang mahimayaon nga bug-os uniberso nga organisasyon ni Jehova. Ngaa nakasiling kita sina? Binagbinaga ang tatlo ka butang.

9. Ngaa ang kaangtanan ni Jehova sa iya mga tinuga sa langit daw pareho sa isa ka salakyan?

 ⁹ Ang kaangtanan ni Jehova sa iya mga tinuga sa langit. Talupangda nga sa sini nga palanan-awon, ang trono ni Jehova ara sa ibabaw sang mga kerubin. Sa iban nga teksto sa Biblia, ginlaragway man si Jehova nga nagapungko sa trono sa ibabaw sang mga kerubin ukon sa tunga sang iya mga kerubin. (Basaha ang 2 Hari 19:15; Ex. 25:22; Sal. 80:1) Siempre, indi literal nga nagapungko si Jehova sa ibabaw sang iya mga kerubin, nga daw subong bala kinahanglan sia hakwaton sining gamhanan nga espiritu nga mga tinuga. Indi man niya kinahanglan magsakay sa literal nga kangga. Pero ginasuportahan sang mga kerubin ang iya pagkasoberano, kag mapadala niya sila sa bisan diin nga bahin sang uniberso para himuon ang iya kabubut-on. Pareho sa tanan nga balaan nga anghel sang Dios, ginatuman nila si Jehova bilang iya mga alagad, ukon mga ahente. (Sal. 104:4) Gani masiling nga si Jehova “nagasakay” sa ila. Sia ang nagadumala sa ila bilang manuggahom, gani daw pareho sila sa isa ka daku nga salakyan.

10. Ngaa masiling nga indi lang apat ka kerubin ang ginarepresentar sang langitnon nga kangga?

¹⁰ Ang ginarepresentar sang salakyan indi lang mga kerubin. Apat ka kerubin ang nakita ni Ezequiel. Ang numero nga apat masami nga ginagamit sa Biblia para ilaragway ang pagkabalanse ukon pagkakompleto, buot silingon sakop ang tanan. Gani, ang apat ka kerubin nagarepresentar sang tanan nga mainunungon nga espiritu  nga mga anak ni Jehova. Talupangda man nga ang mga ruweda kag bisan ang mga kerubin puno sing mga mata, nga nagapakita nga indi lang apat ka kerubin ang alisto nga nagabantay. Ginapakita sang paglaragway ni Ezequiel nga daku katama ang salakyan, amo nga bisan ang gamhanan nga mga kerubin gamay tan-awon. (Ezeq. 1:18, 22; 10:12) Pareho sa sini, ang langitnon nga bahin sang organisasyon ni Jehova daku katama kag madamo sing sakop, indi lang apat ka kerubin.

11. Ano nga kaanggid nga palanan-awon ang nakita ni Daniel, kag ano ang masiling naton sa sini?

¹¹ Ang kaanggid nga palanan-awon nga nakita ni Daniel parte sa langit. Si propeta Daniel madugay na nga tinapok sa siudad sang Babilonia kag nakakita man sia sing palanan-awon parte sa langit. Talalupangdon nga sa sina man nga palanan-awon, ang trono ni Jehova may mga ruweda. Ang palanan-awon ni Daniel nagpokus sa kadakuon sang espiritu nga pamilya ni Jehova sa langit. Nakita ni Daniel ang “isa ka milyon . . . kag isa ka gatos ka milyon” ka espiritu nga mga anak sang Dios nga nagatindog sa atubangan ni Jehova. Nagtipon sila sa langitnon nga Hukmanan, kag ang kada isa may asaynment. (Dan. 7:9, 10, 13-18) Indi bala makasiling gid kita nga ginarepresentar man sang palanan-awon ni Ezequiel ining tanan nga espiritu nga tinuga?

12. Ngaa proteksion sa aton kon tun-an naton ang mga teksto pareho sang palanan-awon ni Ezequiel parte sa langitnon nga kangga?

¹² Nahibaluan ni Jehova nga proteksion gid sa mga tawo kon magpokus sila sa espirituwal nga mga butang—“ang mga butang nga indi makita,” suno kay apostol Pablo. Ngaa? Bangod mga tinuga kita nga may unod kag dugo, may huyog kita nga magpokus sa “mga butang nga makita,” ukon sa aton temporaryo nga mga kabalaka. (Basaha ang 2 Corinto 4:18.) Ginagamit ini ni Satanas nga paon para magpokus kita sa mga handum sang unod. Para mabatuan ini, mahigugmaon nga nag-aman si Jehova sing mga teksto pareho sang mga tagna ni Ezequiel, nga nagapahanumdom sa aton sang dalayawon nga pamilya ni Jehova sa langit!

13, 14. (a) Paano ginlaragway ni Ezequiel ang mga ruweda nga iya nakita? (b) Ngaa nagakaigo nga ang kangga ni Jehova may mga ruweda?

¹³ Sang primero, nagpokus si Ezequiel sa apat ka kerubin, kag sa Kapitulo 4 sini nga publikasyon, matun-an naton kon ano ang ginatudlo sa aton parte kay Jehova sini nga mga tinuga kag sang ila pinasahi nga hitsura. Pero sa tupad sang mga kerubin, nakita ni Ezequiel ang apat ka ruweda nga pakuadrado ang posisyon kay ara ini sa apat ka pamusod. (Basaha ang Ezequiel 1:16-18.) Ang hitsura sini daw malahalon nga bato nga krisolito, nga silangon kag nagaagaw-agaw nga dalag kag berde ang kolor. Nagainggat ining matahom nga ruweda.

¹⁴ Nagpokus ang palanan-awon ni Ezequiel sa mga ruweda sang kangga. Trono nga may mga ruweda! Indi bala tumalagsahon gid ini nga kombinasyon? Naanad kita nga ang trono ara lang sa isa ka  lugar, kag insakto gid ina kay ang awtoridad sang mga hari sang duta magamit lang nila sa ila ginagamhan nga lugar. Pero ang pagkasoberano ni Jehova indi pareho sa paggahom sang tawo. Matun-an sa ulihi ni Ezequiel nga ang pagkasoberano ni Jehova wala sing limitasyon. (Neh. 9:6) Gani, magamit sini nga Soberano ang iya awtoridad bisan diin!

15. Ano ang nakita ni Ezequiel parte sa hitsura kag kadakuon sang mga ruweda?

¹⁵ Nahayanghag gid si Ezequiel sa kadakuon sang mga ruweda. Nagsiling sia: “Ang palibot sang mga ruweda mataas kag makahalawhaw tan-awon.” Maimadyin naton nga nagatangla si Ezequiel sa sining tama kadaku kag nagainggat nga mga ruweda nga daw sakupon sini ang bilog nga langit. Dayon may ginsiling pa sia nga makatilingala: ‘Ang palibot sang apat ka ruweda puno sang mga mata.’ Pero ang makatilingala gid sa tanan amo ang hitsura sang mga ruweda. Sia nagsiling: “Daw subong ini sang isa ka ruweda nga may nagasaang nga isa pa gid ka ruweda sa tunga sini.” Ano ang buot silingon sini?

16, 17. (a) Ano ang buot silingon nga ang kangga may mga ruweda nga nagasaang ang isa sa isa? (b) Ano ang ginatudlo sa aton sang mga ruweda sang salakyan ni Jehova?

¹⁶ Ang kada ruweda nga nakita ni Ezequiel, duha ka ruweda nga pareho ang kadakuon nga nagasaang ang isa sa isa. Amo nga indi katingalahan nga mahimo sini nga mga ruweda ang suno sa ginsiling ni Ezequiel: “Makakadto ini sa bisan diin nga direksion nga indi na kinahanglan magliso.” Ano ang ginapahangop sini nga mga ruweda parte sa salakyan sa langit nga nakita ni Ezequiel?

¹⁷ Sa isa lang ka pagtiyog sining tama kadaku nga mga ruweda malapad na ang masakop sini. Suno sa palanan-awon, ini nga salakyan daw kirab sang kilat ang kadasigon! (Ezeq. 1:14) Isa pa, ang mga ruweda sini nga makahulag sa apat ka direksion mahapos maniobrahon. Gusto ini ilugon sang mga engineer pero indi gid nila masarangan. Ini nga salakyan makakadto bisan diin nga direksion nga indi na kinahanglan magbahar ukon magliso! Pero indi man buot silingon nga palagpat lang ang hulag sini. Ang mga mata sa palibot sang mga ruweda nagapahangop nga nahibaluan sini nga salakyan ang tanan nga nagakatabo sa palibot sini.

18. Ano ang matun-an naton sa kadakuon sang mga ruweda kag sa kadamuon sang mga mata?

¹⁸ Kon amo, ano ang ginatudlo ni Jehova kay Ezequiel kag sa tanan nga matutom nga tawo parte sa langitnon nga bahin sang Iya organisasyon? Binagbinaga ang mga nakita na naton. Matahom kag makahalawhaw gid ini, kay ang mga ruweda sini nagainggat kag tama kadaku. Nahibaluan sini ang tanan nga butang, kay ang mga ruweda sini puno sang mga mata. Makita sang mga mata ni Jehova ang tanan nga butang. (Hulu. 15:3; Jer. 23:24) Dugang pa, may minilyon sia ka mga anghel nga mapadala niya bisan diin nga bahin sang uniberso, kag makita nila sing maayo ang nagakatabo kag mareport nila ini sa ila Soberano.—Basaha ang Hebreo 1:13, 14.

19. Ang kangga ni Jehova madasig kag mahapos maniobrahon. Ano ang ginatudlo sini sa aton parte kay Jehova kag sa langitnon nga bahin sang iya organisasyon?

 ¹⁹ Nakita man naton nga ang kangga tama kadasig kag mahapos maniobrahon. Hunahunaa ang kinatuhayan sang langitnon nga bahin sang organisasyon ni Jehova sa mga gobierno, institusyon, kag organisasyon sang mga tawo. Palagpat lang ang paagi sang gobierno sang mga tawo sa pagsolbar sa mga problema sang kalibutan, kag indi sila makadungan sa nagabag-o nga kahimtangan. Gani wala sila nagamadinalag-on kag malaglag sa ulihi. Pero ang kangga ni Jehova makatarunganon kag mapasibusibuon kay amo gid sina ang mga kinaiya sang Dios nga nagakontrol sini. Ginapakita sang kahulugan sang iya ngalan nga mangin amo sia kon ano ang kinahanglanon para matuman ang iya katuyuan. (Ex. 3:13, 14) Halimbawa, sa isa lang ka pisok puede sia mangin isganan nga Hangaway nga nagapakig-away para sa iya katawhan. Pero sa hinali lang puede man sia mangin maluluy-on nga Manugpatawad sa mga sala nga nagaatipan kag nagapaumpaw sa mga mahinulsulon bisan pa grabe gid ang ila kasubo bangod sa ila mga sala.—Sal. 30:5; Isa. 66:13.

20. Ngaa dapat kita magdayaw sa kangga ni Jehova?

²⁰ Ang palanan-awon ni Ezequiel mahimo magpahulag sa aton nga pamangkuton ang aton kaugalingon, ‘Nagadayaw gid bala ako sa kangga ni Jehova?’ Dumdumon naton nga ang ginarepresentar sang kangga matuod gid kag padayon ini nga nagahulag subong. Indi gid naton paghunahunaon nga ang pila ka problema nga nagapaluya sa aton basi indi makita ni Jehova, sang iya Anak, kag sang tanan nga anghel. Indi man kita dapat magkabalaka nga basi indi dayon mahatag sang Dios ang aton mga kinahanglanon ukon indi makapasibu ang iya organisasyon sa nagabag-obag-o nga mga sitwasyon sa kalibutan. Dumdumon naton nga ang organisasyon ni Jehova aktibo kag padayon nga nagahulag. Nabatian pa gani ni Ezequiel ang tingog sa langit nga nagasiling: “Nagatiyog nga mga ruweda!” (Ezeq. 10:13) Indi bala nagadayaw gid kita kon pamalandungan naton ang paagi ni Jehova sa pagpahulag sang iya organisasyon? Pero labaw sa tanan, si Jehova gid ang dapat naton dayawon.

21, 22. Ano ang rason kon ngaa wala nagabulagay ang mga bahin sang kangga?

²¹ Nagsaylo naman ang atension ni Ezequiel sa ibabaw sang mga ruweda, diin nakita niya ang “daw salog nga nagabadlak kaangay sang makahalawhaw nga yelo.” (Ezeq. 1:22) Sa uluhan sang mga kerubin, may malapad nga salog nga nagainggat sa himaya. Pero, ang mga may ideya sa makina posible nga madamo sing pamangkot parte sa sini nga salakyan. Halimbawa, mamangkot sila: ‘Ano ang ginaangtan sining daw salog sa ibabaw sang mga ruweda? Paano makatiyog ang mga ruweda kay wala ini sang mga ehe?’ Dumdumon naton nga ini nga salakyan indi literal kundi simbuliko, nga nagalaragway sa nagakatabo sa lugar sang mga espiritu. Talupangda man ini nga mga tinaga: “Yara man sa mga ruweda ang espiritu  nga nagapanghikot sa buhi nga mga tinuga.” (Ezeq. 1:20, 21) Ano nga espiritu ang nagapanghikot sa mga kerubin kag sa mga ruweda?

²² Wala sing duhaduha, amo ini ang balaan nga espiritu ni Jehova, ang pinakagamhanan nga puersa sa uniberso. Ining aktibo nga puersa amo ang rason kon ngaa wala nagabulagay ang mga bahin sang salakyan, kag amo man ini ang nagapahulag kag nagagiya sa masulhay nga pagdalagan sini. Dumdumon naton ini, kag sundan si Ezequiel samtang ginatan-aw niya ang Isa nga nagakontrol sang kangga.

23. Ano nga mga ekspresyon ang gingamit ni Ezequiel sa paglaragway kay Jehova, kag ngaa?

²³ Basaha ang Ezequiel 1:26-28. Sa paglaragway ni Ezequiel sa sini nga palanan-awon, masami niya ginagamit ang ekspresyon pareho sang “daw may kaangay,” “kaangay,” kag “daw kaangay.” Pero sa sini nga mga bersikulo, mas pirme niya ini ginagamit. Nahalawhaw gid si Ezequiel sa iya nakita, amo nga nagapanglaghap sia sang mga tinaga para malaragway ini. Nakita niya ang ‘bato nga daw sapiro, kag daw kaangay ini sang trono.’ Maimadyin mo bala ang trono nga ginguhab sa daku, kag masili nga asul nga sapiro? Kag sa sini, may nagapungko nga importante nga Persona. Ang iya hitsura “kaangay sang tawo.”

24, 25. (a) Ano ang ginapahanumdom sa aton sang balangaw sa palibot sang trono ni Jehova? (b) Ano ang epekto sini nga mga palanan-awon sa mga tawo nga may pagtuo?

 ²⁴ Indi maklaruhan ni Ezequiel ining makahalawhaw nga persona kay ang himaya ni Jehova daw kalayo halin sa hawak paubos kag halin sa hawak paibabaw. Maimadyin naton ang propeta nga nagapiyong diutay kag ginabutang ang iya kamot sa ibabaw sang iya mga mata para indi sia masilawan samtang ginatan-aw niya ini. Dayon, talupangda ang katapusan nga nakita ni Ezequiel: “Ginapalibutan sia sang kasanag kaangay sa balangaw sa panganod sa tion nga nagaulan.” Nalipay ka man bala kon makakita ka sing balangaw? Nagapahanumdom gid ini sa aton sang himaya sang aton Manunuga! Ining matahom nga arko sa kalangitan mahimo man magpahanumdom sa aton sang katipan nga paghidait ni Jehova pagkatapos sang Baha. (Gen. 9:11-16) Bisan pa Labing Gamhanan si Jehova, Dios sia sang paghidait. (Heb. 13:20) Puno sang paghidait ang iya tagipusuon kag ang tanan nga nagasimba sa iya sing matutom.

²⁵ Ano ang epekto sa mga nakakita sang palanan-awon parte sa himaya ni Jehova nga Dios? Nagsiling si Ezequiel: “Sang makita ko ini, naghapa ako.” Bangod sa kahalawhaw kag kahadlok sa Dios, naghapa si Ezequiel. Amo man sini ang ginbatyag sang iban nga propeta sang nakakita sila sing mga palanan-awon halin kay Jehova. Nahalawhaw gid sila, kag natun-an nila nga mangin mas mapainubuson. (Isa. 6:1-5; Dan. 10:8, 9; Bug. 1:12-17) Pero sang ulihi, napabakod gid sila sang ginpahayag ni Jehova ang kahulugan sa ila. Sigurado nga napabakod man si Ezequiel. Gani, ano dapat ang epekto sa aton kon nagabasa kita sining mga kasaysayan sa Biblia?

26. Paano napabakod si Ezequiel sa nakita niya nga palanan-awon?

²⁶ Kon may pangduhaduha gid man si Ezequiel parte sa sitwasyon sang katawhan sang Dios sa Babilonia, sigurado nga napabakod sia sina nga palanan-awon. Pero ang maathag, indi isyu kon diin ang matutom nga katawhan sang Dios. Sa Jerusalem man sila, sa Babilonia ukon bisan diin, malab-ot gid sila sang dalayawon nga kangga ni Jehova! Bisan ano man ang himuon ni Satanas, indi gid niya mapunggan ang Dios nga amo ang nagakontrol sining mahimayaon nga organisasyon sa langit. (Basaha ang Salmo 118:6.) Nakita man ni Ezequiel nga indi malayo sa katawhan ining salakyan sa langit, kay ang mga ruweda sini nagalab-ot sa duta! (Ezeq. 1:19) Gani nagaulikid gid si Jehova sa iya tinapok nga matutom nga katawhan. Sigurado gid nga malab-ot sila sang mahigugmaon nga pag-atipan sang ila Amay!

27. Ano ang kahulugan sa aton subong sang palanan-awon ni Ezequiel?

²⁷ May kahulugan bala sa aton subong ang palanan-awon ni Ezequiel? May ara gid! Ginapabaskog pa gid ni Satanas ang iya pagsalakay sa putli nga pagsimba kay Jehova. Gusto niya kita papatihon  nga nagaisahanon kita, kag indi kita malab-ot sang aton Amay sa langit kag sang iya organisasyon. Indi gid pagtuguti nga paluyahon ka sining mga kabutigan! (Sal. 139:7-12) Pareho ni Ezequiel, madamo kita sing rason nga mahalawhaw. Indi man kinahanglan nga maghapa kita pareho sa ginhimo niya. Pero indi bala nagadayaw gid kita sa sining gamhanan, madasig, mahapos maniobrahon, mapasibusibuon, kag mahimayaon nga langitnon nga bahin sang bug-os uniberso nga organisasyon ni Jehova?

28, 29. Ano ang pamatuod nga ang kangga ni Jehova nagahulag na halin pa sang nagligad nga isa ka gatos ka tuig?

²⁸ Dumduma man nga may dutan-on nga bahin ang organisasyon ni Jehova. Bisan pa indi perpekto ang mga tawo nga bahin sini, pamensara ang mga nahimo ni Jehova diri sa duta! Sa bilog nga kalibutan, ginabuligan ni Jehova ang mga tawo nga mahimo ang mga butang nga indi nila masarangan kon sila lang. (Juan 14:12) Ginapahanumdom sa aton sang libro nga Nagagahom ang Ginharian sang Dios! ang kasangkaron sang pagbantala sang nagligad nga isa ka gatos ka tuig. Mabasa man naton ang madasig nga pag-uswag sang organisasyon ni Jehova sa pagtudlo sa matuod nga mga Cristiano, pagdaug sa mga kaso, kag paggamit sang pinakabag-o nga teknolohiya para matuman ang kabubut-on sang Dios!

²⁹ Kon binagbinagon naton ang tanan nga nahimo para ipasag-uli ang putli nga pagsimba sa katapusan nga mga adlaw sining malaut nga sistema sang mga butang, nagaathag pa gid sa aton nga nagahulag ang kangga ni Jehova. Daku gid nga pribilehiyo nga mangin bahin kita sining organisasyon kag mag-alagad sa aton Soberano!—Sal. 84:10.

30. Ano ang binagbinagon naton sa masunod nga kapitulo?

³⁰ Pero madamo pa sing itudlo sa aton ang palanan-awon ni Ezequiel. Sa masunod nga kapitulo, tun-an naton sing maayo ang apat ka tumalagsahon nga “buhi nga tinuga,” ukon ang mga kerubin. Ano ang ginatudlo nila parte sa aton mahimayaon nga Soberano, si Jehova nga Dios?