Sang una, ginapaathag sa aton mga publikasyon nga ang Cristiandad amo ang ginalarawan sang apostata nga Jerusalem. Ang ginhimo sadto sang indi matutom nga Jerusalem—lakip ang pagsimba sa mga diosdios kag lapnag nga kalainan—nagapahanumdom gid sa aton sang ginahimo subong sang Cristiandad. Pero sang nagligad nga mga tinuig, ang aton mga publikasyon, lakip ang ginabasa mo subong, wala na nagasiling nga ang isa ka tawo ukon hitabo may larawan ukon ginalarawan kon wala ini sing espesipiko nga basihan sa Kasulatan. May mabakod bala nga basihan sa Kasulatan nga ang Cristiandad ang ginalarawan sang Jerusalem? Wala.

Binagbinaga ang masunod: Ang Jerusalem nangin sentro anay sang putli nga pagsimba; sang ulihi, nangin apostata ang mga pumuluyo sini. Pero ang Cristiandad, wala gid nakahimo sing putli nga pagsimba. Sugod sang nagluntad ini sang ikap-at nga siglo C.E., butig na nga doktrina ang ginatudlo sang Cristiandad.

Isa pa, sa tapos nga malaglag sang Babilonia ang Jerusalem, ginpasag-uli kag ginkahamut-an ni Jehova ang siudad, kag nangin sentro liwat sang matuod nga pagsimba. Pero ang Cristiandad, wala gid nahamut-an sang Dios, kag kon laglagon na ini sa tion sang dakung kapipit-an, indi na gid ini magluntad liwat.

Base sa sini, ano ang masiling naton? Kon usisaon naton ang mga tagna sa Biblia nga natuman sa indi matutom nga Jerusalem, mahimo magsiling kita, ‘Daw pareho ini ukon ina sa Cristiandad subong.’ Pero wala sing basihan sa Kasulatan nga ang Cristiandad ang ginalarawan sang Jerusalem.