Ang templo sa palanan-awon ginpakataas “sa mataas nga bukid” (1). Ginapakataas bala naton ang putli nga pagsimba paagi sa pag-una sini sa aton kabuhi?

Ang pader (2), nga nagapalibot sa templo sa tunga sang malapad nga lugar (3), nagapahanumdom sa aton nga dapat indi naton pagtugutan ang bisan ano nga makahigko sang aton pagsimba kay Jehova. Kon ang “indi balaan” ukon kinaandan nga mga butang dapat ipahilayo sa putli nga pagsimba, ilabi na gid nga dapat ipahilayo ang mahigko ukon imoral nga paggawi sa kabuhi sang sumilimba ni Jehova subong!—Ezeq. 42:20.

Ang suba nga nagailig halin sa santuaryo sang templo amat-amat nga nagsulog, nagdalom, kag naghatag sing kabuhi kag kabuganaan sa duta (4). Ini nga mga pagpakamaayo binagbinagon sa Kapitulo 19 sini nga publikasyon.

Ang mataas nga nagua nga mga gawang (5) kag ang nasulod nga mga gawang (9) nagapahanumdom sa aton nga si Jehova may mataas nga talaksan sang paggawi para sa tanan nga magapakigbahin sa putli nga pagsimba. Talalupangdon nga ang nagua kag ang nasulod nga mga gawang pareho ang takus. Nagakaigo gid ini kay palareho ang matarong nga ginapatuman ni Jehova sa tanan niya nga alagad, bisan ano man ang ila katungdanan ukon pribilehiyo sa pag-alagad.

Ang kalan-an (8) nagapahanumdom sa aton nga sang una, ang katawhan ululupod nga makakaon sang mga bahin sang ila halad nga ginadala nila sa templo, nga daw pareho nga upod nila si Jehova sa pagkaon. Indi na pareho sa sini ang pagsimba sang mga Cristiano sa espirituwal nga templo subong kay nahalad na ang “isa lang ka halad.” (Heb. 10:12) Pero, nagahatag kita gihapon sang aton halad sang pagdayaw.—Heb. 13:15.

Mahimo nahalawhaw ka sa mga takus sa palanan-awon. Pero nagatudlo ini sang importante nga punto: Nagapasalig ini sa aton nga ang katuyuan ni Jehova nga ipasag-uli ang putli nga pagsimba sigurado kag sibu gid nga matuman, pareho sa insakto kag wala nagabag-o nga mga takus sang templo. Bisan pa wala sing ginsambit si Ezequiel nga may nakita sia nga tawo sa palanan-awon, ginrekord niya ang mabaskog nga laygay ni Jehova para sa mga saserdote, mga pangulo, kag sa katawhan. Dapat sundon sang tanan nga alagad sang Dios ang Iya matarong nga talaksan.