KAHON 1B
Sumaryo sang Ezequiel
Ang libro sang Ezequiel mahimo tungaon sa masunod:
KAPITULO 1 ASTA 3
Sang 613 B.C.E., sang si Ezequiel ara sa Babilonia kaupod sa tinapok nga mga Judiyo, nakita niya ang mga palanan-awon parte kay Jehova kag ginsugo sia nga magpanagna sa mga Judiyo nga nagaistar sa higad sang suba sang Kebar.
KAPITULO 4 ASTA 24
Halin sang 613 asta 609 B.C.E., nagpanagna si Ezequiel parte sa paghukom sa Jerusalem kag sa rebelyuso nga katawhan sini nga nagasimba sa mga diosdios.
KAPITULO 25 ASTA 32
Sugod sang 609 B.C.E., sang nagsugod ang katapusan nga pagkibon sang Babilonia sa Jerusalem, ang mensahe sang paghukom ni Ezequiel indi na sa Jerusalem kundi sa kaaway nga mga pungsod sa palibot—Ammon, Edom, Egipto, Moab, Filistia, Sidon, kag Tiro.
KAPITULO 33 ASTA 48
Sugod sang 606 B.C.E., guba na ang Jerusalem kag ang templo sini. Ginatos ka kilometro halin Jerusalem, ang mensahe ni Ezequiel nagpokus naman sa makalilipay nga paglaum nga ipasag-uli ang putli nga pagsimba kay Jehova nga Dios.
Ang pagsulat sa libro sang Ezequiel pasunod suno sa hitabo kag suno sa topiko. Mas nauna ang mga tagna parte sa kalaglagan sang Jerusalem kag sang templo sini sangsa mga tagna parte sa pagpasag-uli sang putli nga pagsimba. Nagakaigo lang ini kay ginapakita sang mga tagna parte sa pagpasag-uli nga nauntat ang pagsimba sa templo.
Dugang pa, ang mga tagna ni Ezequiel batok sa kaaway nga mga pungsod sa palibot (kapitulo 25 asta 32) ginpahayag pagkatapos sang mensahe sang paghukom sa Jerusalem kag antes sang mga tagna parte sa pagpasag-uli sang putli nga pagsimba. Parte sa mensahe sang paghukom ni Ezequiel sa mga pungsod, ang isa ka iskolar nagsiling: “Sibu gid nga ang pagpahayag sang kaakig sang Dios sundan sang Iya kaluoy sa Iya katawhan, kay ang pagsilot sa ila mga kaaway bahin sang pagluwas niya sa Iya katawhan.”
