1-3. (a) Ano ang ginabatyag sang madamo parte sa ila trabaho? (b) Ano nga mga pamangkot ang aton binagbinagon sa sini nga kapitulo?

ANG mga tawo sa bilog nga kalibutan nagapangabudlay gid para masakdag ang ila kaugalingon kag ang ila pamilya. Madamo ang wala nanamian sa ila trabaho, kag ang iban wala na gana magkadto sa ila ulubrahan kada adlaw. Kon amo ka man sini, ano ang himuon mo para mangin makalilipay ang imo trabaho? Ano ang himuon mo para manamian ka sa imo trabaho?

² Ginasilingan kita ni Jehova: “Ang tagsa ka tawo magkaon man kag mag-inom kag magkalipay sa tanan nga ginpangabudlayan niya. Dulot ini sang Dios.” (Manugwali 3:13) Gintuga kita sang Dios nga may handum nga magtrabaho. Gusto niya nga manamian kita sa aton mga ginahimo.—Basaha ang Manugwali 2:24; 5:18.

³ Kon amo, ano ang makabulig sa aton nga malipay sa aton trabaho? Ano nga mga trabaho ang dapat likawan sang mga Cristiano? Paano naton mabalanse ang aton trabaho kag pagsimba kay Jehova? Kag ano ang pinakaimportante nga hilikuton ang aton mahimo?

4, 5. Ano ang pagtamod ni Jehova sa pagpangabudlay?

⁴ Si Jehova nanamian gid sa pagpangabudlay. Ang Genesis 1:1 nagsiling: “Sa ginsuguran gintuga sang Dios ang langit kag ang duta.” Sang matapos sang Dios ang pagtuga sa duta kag sa tanan nga butang sa sini, nagsiling sia nga ini tanan “maayo gid.” (Genesis 1:31) Nalipay gid ang aton Manunuga sa tanan niya nga ginhimo.—1 Timoteo 1:11.

⁵ Si Jehova wala nag-untat sa pagpangabudlay. Si Jesus nagsiling: “Ang akon Amay padayon nga nagapangabudlay tubtob karon.” (Juan 5:17) Bisan pa wala naton mahibal-an ang tanan nga dalayawon nga butang nga ginahimo ni Jehova, nabal-an naton ang pila sini. Ginapili niya kon sin-o ang mangin kaupod nga mga manuggahom sang iya Anak, si Jesucristo, subong bahin sang Ginharian. (2 Corinto 5:17) Ginagiyahan man niya kag ginaatipan ang mga tawo. Bangod sa bug-os kalibutan nga pagbantala minilyon ang nakakilala kay Jehova kag may paglaum nga mabuhi sing walay katapusan sa paraiso nga duta.—Juan 6:44; Roma 6:23.

6, 7. Ano nga sahi sang manugpangabudlay si Jesus?

⁶ Pareho sang iya Amay, si Jesus nanamian man sa pagpangabudlay. Antes sia nagkari sa duta, si Jesus, ang “batid nga manugpangabudlay,” nagbulig sa Dios sa pagtuga sang tanan nga butang sa langit kag sa duta. (Hulubaton 8:22-31; Colosas 1:15-17) Sang ari sia sa duta, si Jesus mapisan gid. Sang bata pa sia, natun-an niya ang pagpamanday, posible nga nagapanghimo sia sing muebles kag sing mga balay. Nangin lantip gid si Jesus sa iya trabaho amo nga nakilala sia bilang “ang panday.”—Marcos 6:3.

⁷ Pero, ang pinakaimportante nga ginhimo ni Jesus amo ang pagbantala sang maayong balita kag ang pagtudlo sa  mga tawo parte kay Jehova. Dapat matapos niya sing tatlo ka tuig kag tunga ang iya ministeryo, gani nagpangabudlay sia halin sa aga asta gab-i. (Lucas 21:37, 38; Juan 3:2) Ginatos ka kilometro ang ginlakat ni Jesus sa yab-ukon nga mga dalan samtang nagabantala sang maayong balita sa pinakadamo nga tawo nga masarangan niya.—Lucas 8:1.

8, 9. Ngaa nanamian si Jesus sa iya ginpangabudlayan?

⁸ Para kay Jesus, ang paghimo sa buluhaton sang Dios daw pareho sa pagkaon. Amo ini ang nagahatag sa iya sing kusog. May mga adlaw gani nga bangod sa pagpangabudlay ni Jesus wala na sia sing tion sa pagkaon. (Juan 4:31-38) Ginkalitan niya ang tanan nga kahigayunan nga tudluan ang mga tawo parte sa iya Amay. Bangod sini nakasiling sia kay Jehova: “Ginhimaya ko ikaw sa duta, kay natapos ko ang buluhaton nga ginhatag mo sa akon.”—Juan 17:4.

⁹ Maathag nga si Jehova kag si Jesus mapisan gid kag nalipay sa ila mga ginpangabudlayan. Gusto naton ‘mangin manug-ilog sa Dios,’ kag ‘sundon sing maayo ang mga tikang [ni Jesus].’ (Efeso 5:1; 1 Pedro 2:21) Gani ginahimo gid naton ang aton pinakamaayo sa bisan ano naton nga trabaho.

10, 11. Ano ang makabulig sa aton nga mangin positibo sa aton trabaho?

¹⁰ Subong katawhan ni Jehova, nagapangabudlay gid kita para sakdagon ang aton kaugalingon kag ang aton pamilya. Gusto naton nga manamian kita sa aton trabaho, pero kon kaisa indi amo sini ang nagakatabo. Gani ano ang himuon naton kon wala kita nanamian sa aton trabaho?

¹¹ Mangin positibo. Posible nga wala na kita sing mahimo para mabag-o ang aton trabaho, pero puede naton  bag-uhon ang aton panimuot. Makabulig kon dumdumon naton kon ano ang ginapaabot sa aton ni Jehova. Halimbawa: Ginapaabot ni Jehova nga ang mga ulo sang pamilya magasakdag gid sa mga kinahanglanon sang iya pamilya suno sa iya masarangan. Ang Biblia nagasiling nga ang isa nga wala nagasakdag sa iya pamilya “malain pa sa tawo nga wala sing pagtuo.” (1 Timoteo 5:8) Kon ikaw ulo sang pamilya, magtrabaho sing maayo para sa imo pamilya. Nanamian ka man sa imo trabaho ukon wala, nakahibalo ka nga ang pagsakdag sa imo pamilya nagapahalipay man kay Jehova.

12. Ano ang mga benepisyo kon mapisan kita kag bunayag?

¹² Mangin mapisan kag bunayag. Kon amo ka sini, madali ka lang manamian sa imo trabaho. (Hulubaton 12:24; 22:29) Isa pa, saligan ka sang imo amo. Ginapabaloran gid sang mga amo ang bunayag ukon honest nga mga tinawo kay wala sila nagapangawat sing kuarta, pagkabutang, ukon tion. (Efeso 4:28) Ang mas importante, nahibaluan ni Jehova kon mapisan ka kag bunayag. May ‘bunayag ka nga konsiensia’ kay nalipay sa imo ang Dios nga imo ginapalangga.—Hebreo 13:18; Colosas 3:22-24.

13. Ano ang posible matabo kon bunayag ka sa trabaho?

¹³ Dumduma nga ang imo paggawi sa trabaho makadala sing kadayawan kay Jehova. Isa pa ini ka rason nga manamian ka sa imo trabaho. (Tito 2:9, 10) Matabo ini kon ang isa mo ka kaupod sa trabaho gusto magtuon sa Biblia bangod sa imo maayo nga halimbawa.—Basaha ang Hulubaton 27:11; 1 Pedro 2:12.

14-16. Ano ang dapat naton binagbinagon kon nagapili sing trabaho?

¹⁴ Ang Biblia wala nagaunod sang listahan sang mga trabaho nga puede ukon indi puede sa isa ka Cristiano.  Pero may mga prinsipio ini nga makabulig sa aton sa pagpili sang nagakaigo nga trabaho. (Hulubaton 2:6) Paagi sa sini nga mga prinsipio, masabat naton ang masunod nga mga pamangkot.

¹⁵ Ini bala nga trabaho magapahimo sa akon sang butang nga sala para kay Jehova? Natun-an na naton ang mga buhat nga ginadumtan ni Jehova, subong sang pagpangawat kag pagbinutig. (Exodo 20:4; Binuhatan 15:29; Efeso 4:28; Bugna 21:8) Gani wala kita nagabaton sang trabaho nga kontra sa mga talaksan ni Jehova.—Basaha ang 1 Juan 5:3.

 ¹⁶ Ini bala nga trabaho nagasakdag sa buhat nga ginapakamalaut ni Jehova? Halimbawa, ano abi kon mangin receptionist ka sa isa ka klinika sang aborsion? Wala man sing malain sa trabaho nga receptionist. Pero nahibaluan mo ang ginabatyag ni Jehova sa aborsion. Gani bisan pa indi ikaw ang maga-abort, indi ayhan nga magabatyag ka nga sa pagtamod ni Jehova nagasakdag ka sa sini?—Exodo 21:22-24.

17. Ano ang makabulig sa aton sa paghimo sang desisyon nga makapahalipay sa Dios?

¹⁷ Sa bulig sang mga prinsipio halin sa Dios, mangin sahi kita sang mga tawo nga ginalaragway sa Hebreo 5:14, nga “paagi sa paggamit sang ila mga ikasarang sa paghangop nahanas ini nga makilala ang maayo kag malain.” Pamangkuta ang imo kaugalingon: ‘Kon batunon ko ini nga trabaho, may masandad bala? Bangod bala sini nga trabaho, kinahanglan ko bayaan ang akon asawa ukon bana kag kabataan para magkadto sa iban nga pungsod? Ano ang mangin epekto sini sa ila?’

18. Ngaa indi mahapos ang pag-una sang aton pagsimba?

¹⁸ Mabudlay gid unahon ang aton pagsimba kay Jehova sa sining “makahalanguyos nga mga tion nga mabudlay atubangon.” (2 Timoteo 3:1) Mabudlay mangita kag magpabilin sa isa ka trabaho. Kinahanglan naton atipanon ang aton pamilya, pero nabal-an naton nga dapat naton unahon ang aton pagsimba. Indi naton dapat unahon ang materyal nga mga butang sa aton kabuhi. (1 Timoteo 6:9, 10) Gani paano naton ‘mapat-od ang mas importante nga mga butang’ kag sa amo man nga tion masakdag ang aton pamilya?—Filipos 1:10.

19. Paano makabulig ang pagsalig kay Jehova para mangin balanse kita sa aton trabaho?

 ¹⁹ Magsalig sing bug-os kay Jehova. (Basaha ang Hulubaton 3:5, 6.) Nakahibalo kita nga nahibaluan sang Dios kon ano gid ang aton kinahanglanon kag nagaulikid gid sia sa aton. (Salmo 37:25; 1 Pedro 5:7) Ginasugiran kita sang iya Pulong: “Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo. Kay ang Dios nagsiling: ‘Indi ko gid kamo pagbayaan, kag indi ko gid kamo pagpabay-an.’” (Hebreo 13:5) Indi gusto ni Jehova nga pirme kita mabalaka sa pagsakdag sa aton pamilya. Sulitsulit niya nga ginapakita nga sarang niya masakdag ang mga kinahanglanon sang iya katawhan. (Mateo 6:25-32) Ano man ang aton trabaho, dapat regular kita nga magtuon sang Pulong sang Dios, magbantala sang maayong balita, kag magtambong sa Cristianong mga miting.—Mateo 24:14; Hebreo 10:24, 25.

20. Paano naton mahuptan nga simple ang aton pagkabuhi?

²⁰ Hupti nga simple ang imo mata. (Basaha ang Mateo 6:22, 23.) Buot silingon sini nga dapat simple lang ang aton pagkabuhi kag magpokus sa pag-alagad kay Jehova. Nakahibalo kita nga kabuangan gid kon mas importante pa sa aton ang kuarta, magarbo nga pagkabuhi, ukon ang pinakabag-o nga gadyet sangsa aton kaangtanan sa Dios. Gani ano ang makabulig sa aton nga unahon ang mas importante? Dapat tinguhaan naton nga indi gid mangutang. Kon may ara ka na utang, mangita sing paagi nga maibanan ini ukon bayaran sing bilog. Kon indi kita maghalong, mahimo maubos ang aton tion kag kusog kag wala na kita sing tion para mangamuyo, magtuon, kag magbantala. Sa baylo nga himuon nga komplikado ang aton kabuhi bangod sa materyal nga mga butang, gusto naton  mangin kontento sa panguna nga mga kinahanglanon subong sang “pagkaon kag panapton.” (1 Timoteo 6:8) Ano man ang aton sitwasyon, maayo nga usisaon naton pirme ang aton kahimtangan kon bala puede pa naton madugangan ang aton pag-alagad kay Jehova.

21. Ngaa dapat kita magdesisyon kon ano ang unahon sa aton kabuhi?

²¹ Unaha ang mas importante. Dapat naton gamiton sing maalamon ang aton tion, kusog, kag materyal nga mga butang. Kon indi kita maghalong, mahimo ubuson  sang edukasyon ukon kuarta ang aton hamili nga tion. Si Jesus nagsiling: “Padayon ninyo nga unahon ang pagpangita sa Ginharian.” (Mateo 6:33) Makita paagi sa aton mga ginapili, ginahimo pirme, ukon rutina sa adlaw-adlaw, kag sa aton mga tulumuron kon ano gid ang mas importante sa aton tagipusuon.

22, 23. (a) Ano ang aton pinakaimportante nga hilikuton bilang mga Cristiano? (b) Ano ang makabulig sa aton nga malipay sa aton trabaho?

²² Ang aton pinakaimportante nga hilikuton amo ang pag-alagad kay Jehova kag pagbantala sang maayong balita. (Mateo 24:14; 28:19, 20) Pareho kay Jesus, gusto naton himuon ang aton masarangan sa sini nga hilikuton. Ang iban nagsaylo sa lugar nga mas madamo nga manugbantala ang kinahanglan. Ang iban nagatuon sing iban nga lenguahe para makabantala sila sa mga tawo nga nagahambal sina nga lenguahe. Istoryaha ang mga naghimo sini, kag pamangkuta sila. Sugiran ka nila kon paano nangin mas malipayon kag mabungahon ang ila pagkabuhi.—Basaha ang Hulubaton 10:22.

²³ Subong, madamo sa aton ang nagaobra sing malawig nga inoras kag ang iban indi lang isa ang obra para masakdag ang ila pamilya. Nahibaluan ini ni Jehova, kag ginapabaloran niya ang tanan naton nga ginahimo para sakdagon ang aton pamilya. Kabay nga padayon naton nga ilugon si Jehova kag si Jesus paagi sa pagpangabudlay sing mapisan, ano man ang aton trabaho. Kag dumdumon naton nga ang pinakaimportante nga hilikuton amo ang pag-alagad kay Jehova kag ang pagbantala sang maayong balita sang Ginharian. Amo ini ang nagadala sing matuod nga kalipay.