Sa mga nagahigugma kay Jehova nga Dios kag sa iya Pulong, ang Biblia:

“Mahibaluan ninyo ang kamatuoran, kag ang kamatuoran magahilway sa inyo,” siling ni Jesus. (Juan 8:32) Hunahunaa ang imo ginbatyag sang nahibaluan mo ang kamatuoran sa Biblia! Makalilipay nga matun-an ang kamatuoran sa kalibutan nga puno sang kabutigan.—2 Timoteo 3:1.

Luyag ni Jehova nga mahibaluan naton ang kamatuoran. Kag bangod palangga naton ang katawhan, luyag man naton isugid ini sa ila. Pero indi lang amo sina, dapat manikasog man kita nga magkabuhi bilang mga Cristiano bangod ginatahod gid naton ang mga prinsipio ni Jehova. Ginpaathag ni Jesus ang isa ka importante nga paagi para mapamatud-an naton nga ginahigugma naton ang Dios. Sia nagsiling: “Kon ginatuman ninyo ang akon mga sugo, magapabilin kamo sa akon gugma, subong nga ginatuman ko ang mga sugo sang Amay kag nagapabilin ako sa iya gugma.”—Juan 15:10.

Ginahigugma gid ni Jesus ang iya Amay, kag ginatuman niya ang tanan nga ginasugo sang iya Amay. Kon sundon naton si Jesus sa aton pagkabuhi, higugmaon kita ni Jehova kag mangin malipayon gid kita. Subong sang ginsiling ni Jesus, “bangod nahibaluan ninyo ini, malipayon kamo kon himuon ninyo ini.”—Juan 13:17.

Nagalaum kami nga ini nga publikasyon makabulig sa imo nga matun-an nga ikabuhi ang kamatuoran sa Biblia kag mangin abyan sang Dios. Ginapangamuyo namon nga magbakod pa gid ang imo gugma sa Dios kag makapabilin ka “sa gugma sang Dios . . . nga nagadul-ong sa kabuhi nga wala sing katapusan.”—Judas 21.