1-3. (a) Ano ang matun-an naton sa Hulubaton 13:20? (b) Ngaa dapat kita mangin maalamon sa pagpili sang aton mga abyan?

NAOBSERBAHAN mo bala kon paano ginapanilagan sang isa ka lapsag ang iya mga ginikanan? Bisan indi pa sia makahibalo maghambal, ginatun-an niya ang iya makita kag mabatian. Samtang nagadaku sia, indi hungod nga ginailog niya ang iya mga ginikanan. Gani indi katingalahan nga bisan ang mga adulto nagailog man sa panghambal kag panggawi sang mga tawo nga upod nila pirme.

² Matun-an naton sa Hulubaton 13:20: “Ang tawo nga nagaupod sa maalamon mangin maalamon man.” Sa sini nga teksto, ang “nagaupod sa” may ideya sang pagpili sang kaupod kag paghinguyang sing tion upod sa iya. Indi lang ini basta pag-upod sa isa ka tawo. Ang isa ka iskolar sa Biblia nagsiling nga ang pag-upod sa isa ka tawo nagalakip sing ideya sang paghigugma kag pagbatyag nga suod sa sina nga tawo. Ang mga tawo nga pirme naton kaupod may daku nga impluwensia sa aton, ilabi na kon nagabatyag kita nga suod sa ila.

³ May maayo ukon malain nga epekto ang aton mga abyan sa aton. Ang Hulubaton 13:20 nagpadayon:  “Apang ang tawo nga nagaupod sa mga buangbuang mapahamak.” Sa Hebreo, ang “nagaupod sa” nagakahulugan man nga nagapakig-abyan sa iya. Ang mga abyan nga nagahigugma sa Dios magapalig-on sa aton nga magpabilin nga matutom sa iya. Para mabuligan kita nga mangin maalamon sa pagpili sang aton mga abyan, binagbinagon naton ang sahi sang mga tawo nga ginapili ni Jehova nga mangin abyan.

4. Ngaa daku gid nga kadungganan nga mangin abyan sang Dios? Ngaa gintawag ni Jehova si Abraham nga “akon abyan”?

⁴ Si Jehova, nga Soberano sang Uniberso nagahatag sa aton sing kahigayunan nga mangin mga abyan niya. Daku gid ini nga kadungganan. Ginapili sing maayo ni Jehova ang iya mga abyan. Ginapili niya ang mga nagahigugma kag nagatuo sa iya. Hunahunaa si Abraham, handa sia nga himuon ang bisan ano para sa Dios. Sa tanan nga tion, ginpakita niya nga matutom kag matinumanon sia. Handa pa gani sia nga ihalad ang iya anak nga si Isaac. Nagtuo sia nga “ang Dios makasarang sa pagbanhaw sa iya bisan gikan sa mga patay.” (Hebreo 11:17-19; Genesis 22:1, 2, 9-13) Si Abraham matutom kag matinumanon, kag gintawag sia ni Jehova nga “akon abyan.”—Isaias 41:8; Santiago 2:21-23.

5. Paano ginatamod ni Jehova ang mga mainunungon sa iya?

⁵ Hamili gid kay Jehova ang iya mga abyan. Mas importante sa ila ang pagkamainunungon sa iya sangsa bisan ano nga butang. (Basaha ang 2 Samuel 22:26.) Mainunungon kag matinumanon sila bangod ginahigugma nila sia. Ang Biblia nagsiling nga “nagapakig-abyan [ang Dios] sing suod sa mga matarong.” (Hulubaton 3:32) Ginaagda ni Jehova ang iya mga abyan nga  magduaw sa iya “tolda.” Ginaagda niya sila nga magsimba kag mangamuyo sa iya sa bisan ano nga tion.—Salmo 15:1-5.

6. Paano naton mapakita nga ginahigugma naton si Jesus?

⁶ Si Jesus nagsiling: “Kon ang bisan sin-o nagahigugma sa akon, tumanon niya ang akon pulong, kag higugmaon sia sang akon Amay.” (Juan 14:23) Gani para mangin abyan ni Jehova, dapat man naton higugmaon si Jesus kag tumanon ang gintudlo niya sa aton. Halimbawa, ginatuman naton ang sugo ni Jesus nga magbantala sing maayong balita kag maghimo sing disipulo. (Mateo 28:19, 20; Juan 14:15, 21) Bangod ginahigugma naton si Jesus, ‘ginasunod naton sing maayo ang iya mga tikang.’ (1 Pedro 2:21) Nalipay si Jehova kon makita niya nga ginahimo naton ang aton bug-os nga masarangan nga ilugon ang iya Anak sa aton panghambal kag panggawi.

7. Ngaa mga abyan ni Jehova ang dapat naton pilion nga mangin abyan?

⁷ Ang mga abyan ni Jehova matutom, mainunungon, matinumanon, kag ginahigugma nila ang iya Anak. Mga abyan man bala ni Jehova ang ginapili naton nga mangin abyan? Kon ginailog nila si Jesus kag masako sila sa pagtudlo sa iban parte sa Ginharian sang Dios, mabuligan ka nila nga mangin mas maayo nga tawo kag magpabilin nga mainunungon kay Jehova.

8. Ano ang nanamian mo sa pag-abyanay nanday Rut kag Noemi?

⁸ Sa Biblia, madamo kita sing mabasa parte sa pag-abyanay, pareho ni Rut kag sang iya ugangan nga si Noemi. Lainlain ang ila ginhalinan kag gindak-an, kag mas magulang si Noemi sangsa kay Rut. Pero nangin suod  sila nga mag-abyan kay pareho nila nga ginahigugma si Jehova. Wala ginbayaan ni Rut ang iya ugangan nga si Noemi sang naghalin si Noemi sa Moab kag nagbalik sa Israel. Ginsilingan niya si Noemi: “Ang imo katawhan mangin akon katawhan kag ang imo Dios mangin akon Dios.” (Rut 1:14, 16) Maayo gid si Rut kay Noemi. Sang yara na sila sa Israel, nagpangabudlay gid si Rut para suportahan ang iya abyan. Palangga gid ni Noemi si Rut kag ginhatagan niya sia sing maayo nga panuytoy. Ginhimo ini ni Rut, kag bilang resulta, ginpakamaayo sila nga duha.—Rut 3:6.

9. Ano ang nanamian mo sa pag-abyanay nanday David kag Jonatan?

⁹ Isa pa ka halimbawa amo sanday David kag Jonatan nga pareho nga mainunungon kay Jehova. Si Jonatan mga 30 anyos nga mas magulang sangsa kay David kag sia ang nakalinya nga mangin masunod nga hari sang Israel. (1 Samuel 17:33; 31:2; 2 Samuel 5:4) Pero sang nahibaluan niya nga si David ang ginpili ni Jehova nga mangin hari, wala sia nahisa ukon nagbatyag nga kakompetensia si David. Sa baylo, ginsuportahan gid niya si David. Halimbawa, sang yara sa katalagman si David, ginbuligan sia ni Jonatan nga “magbakod ang iya pagsalig kay Jehova.” Ginrisgo pa gani niya ang iya kabuhi para kay David. (1 Samuel 23:16, 17) Si David mainunungon man nga abyan. Nagpromisa sia nga atipanon niya ang pamilya ni Jonatan, kag gintuman niya ini bisan pa patay na si Jonatan.—1 Samuel 18:1; 20:15-17, 30-34; 2 Samuel 9:1-7.

10. Ano ang matun-an mo sa pag-abyanay nanday Sadrac, Mesac, kag Abednego?

¹⁰ Ang mag-abyan nga pamatan-on nga Hebreo nga  sanday Sadrac, Mesac, kag Abednego mga bata pa sang gindala sa lugar nga malayo sa ila pamilya. Didto, nagbuligay sila nga magpabilin nga matutom kay Jehova. Sang adulto na sila, gintilawan ang ila pagtuo sang ginsugo sila ni Hari Nabocodonosor nga magsimba sa estatwa nga bulawan. Wala sila magsimba sa estatwa kag ginsilingan nila ang hari: “Indi kami mag-alagad sa imo mga dios ukon magsimba sa estatwa nga bulawan nga ginpatindog mo.” Sang gintilawan ang ila pagtuo, ining tatlo ka mag-abyan nagpabilin nga mainunungon sa ila Dios.—Daniel 1:1-17; 3:12, 16-28.

11. Paano nangin maayo nga mag-abyan sanday Pablo kag Timoteo?

¹¹ Sang nakilala ni apostol Pablo ang pamatan-on nga si Timoteo, nakita niya nga ginahigugma ni Timoteo si Jehova kag ginaulikdan gid niya ang kongregasyon. Gani ginhanas ni Pablo si Timoteo para buligan ang kauturan sa lainlain nga lugar. (Binuhatan 16:1-8; 17:10-14) Nagpangabudlay gid si Timoteo amo nga nakasiling si Pablo: “Nagpaulipon sia upod sa akon sa pagpauswag sang maayong balita.” Nahibaluan ni Pablo nga “magaulikid gid” si Timoteo sa kauturan. Samtang magkaupod sila nga nagpangabudlay sa pag-alagad kay Jehova, nangin maayo sila nga mag-abyan.—Filipos 2:20-22; 1 Corinto 4:17.

12, 13. (a) Ngaa dapat naton pilion sing maayo ang aton mga abyan bisan pa sa kongregasyon? (b) Ngaa ginhatag ni Pablo ang paandam sa 1 Corinto 15:33?

¹² Sa kongregasyon, makatuon kita sa aton kauturan kag mabuligan naton ang isa kag isa nga magpabilin nga matutom. (Basaha ang Roma 1:11, 12.) Pero bisan pa sa  kongregasyon, dapat pilion naton sing maayo ang aton suod nga mga abyan. Nagkalainlain ang kultura kag ginhalinan sang aton kauturan. Ang pila bag-uhan, kag ang iban naman madugay na nga nagaalagad kay Jehova. Kinahanglan ang tion para palambuon ang kaangtanan kay Jehova, pareho sa prutas nga kinahanglan ang tion para maluto ini. Gani kinahanglan naton ipakita ang pagkamapinasensiahon kag gugma sa isa kag isa, kag pirme gid mangin maalamon sa pagpili sang aton mga abyan.—Roma 14:1; 15:1; Hebreo 5:12–6:3.

 ¹³ Kon kaisa, may mga kahimtangan sa kongregasyon nga dapat kita maghalong. Mahimo may utod nga nagalapas sa ginasiling sang Biblia nga sala. Ukon may isa nga nangin palareklamo nga makahalit sa kongregasyon. Wala kita matingala, kay bisan gani sa kongregasyon sang unang siglo may mga problema man kon kaisa. Ang matuod, ginpaandaman ni apostol Pablo ang mga Cristiano sang una: “Indi kamo magpadaya. Ang pagpakig-upod sa malain nga mga tawo nagapalain sang mapuslanon nga mga batasan.” (1 Corinto 15:12, 33) Ginpaandaman man niya si Timoteo nga maghalong gid sa pagpili sang suod nga mga abyan. Amo man ang dapat naton himuon subong.—Basaha ang 2 Timoteo 2:20-22.

14. Paano makaapekto ang pagpili naton sang mga abyan sa aton kaangtanan kay Jehova?

¹⁴ Dapat naton amligan ang aton kaangtanan kay Jehova. Ini ang pinakahamili nga butang nga yara sa aton. Gani wala kita nagapakigsuod sa kay bisan sin-o nga makapaluya sang aton pagtuo kag makaguba sa sina nga kaangtanan. Subong nga indi kita makapaabot nga ang espongha masuyop sang tubig kon itusmaw sa langgaw, indi man kita makapaabot nga mahapusan kita sa paghimo sang husto kon makig-abyan kita sa mga nagahimo sang sala. Dapat naton pilion sing maayo ang aton suod nga mga abyan.—1 Corinto 5:6; 2 Tesalonica 3:6, 7, 14.

15. Ano ang puede mo himuon para makakita ka sing maayo nga mga abyan sa kongregasyon?

¹⁵ Sa kongregasyon, makakita ka sang mga tawo nga nagahigugma gid kay Jehova. Puede mo sila mangin suod nga mga abyan. (Salmo 133:1) Makig-abyan  indi lang sa mga kaedad mo ukon sa mga pareho sa imo sang gindak-an. Dumduma nga si Jonatan mas magulang sangsa kay David, kag si Rut mas manghod sangsa kay Noemi. Luyag naton sundon ang ginalaygay sang Biblia: “Buksi . . . ninyo sing masangkad ang inyo mga tagipusuon.” (2 Corinto 6:13; basaha ang 1 Pedro 2:17.) Kag kon padayon mo nga ginailog si Jehova, mas luyag pa gid sang iban nga mangin abyan mo.

16, 17. Kon may nagsaklaw sa aton sa kongregasyon, ano ang indi naton paghimuon?

¹⁶ Sa pamilya, lainlain ang kinaiya, opinyon, kag pamaagi sang kada isa. Amo man sini sa kongregasyon. Nagapasadya ini sa kabuhi, kag madamo kita sing matun-an sa isa kag isa. Pero kon kaisa, rason ini sang indi paghangpanay kag pagkairitar sa aton kauturan. May mga tion man nga masaklaw kita ukon masakitan. (Hulubaton 12:18) Tugutan bala naton ini nga mga problema nga magpaluya sa aton ukon magpahilayo sa aton sa kongregasyon?

¹⁷ Indi. Bisan pa may nagsaklaw sa aton, indi kita magpalayo sa kongregasyon. Indi si Jehova ang nagsaklaw sa aton. Ginhatagan niya kita sing kabuhi kag iban pa nga butang. Takus gid sia sang aton gugma kag pagkamainunungon. (Bugna 4:11) Ang kongregasyon dulot halin kay Jehova nga nagabulig sa aton nga mahuptan nga mabakod ang aton pagtuo. (Hebreo 13:17) Indi gid naton pag-isikway ang iya dulot bangod may nagsaklaw sa aton.—Basaha ang Salmo 119:165.

18. (a) Ano ang makabulig para mahuptan ang maayo nga kaangtanan sa aton kauturan? (b) Ngaa dapat naton patawaron ang iban?

 ¹⁸ Palangga naton ang aton kauturan kag luyag naton nga mahuptan ang maayo nga kaangtanan sa ila. Wala nagapaabot si Jehova sang kahimpitan sa kay bisan sin-o, kag dapat amo man kita. (Hulubaton 17:9; 1 Pedro 4:8) Tanan kita makasala, pero ang gugma makabulig sa aton nga “magpinatawaray . . . sing kinabubut-on.” (Colosas 3:13) Punggan kita sang gugma nga padakuon ang gamay nga indi paghangpanay. Mabudlay gid man malimtan kon may nagsaklaw sa aton, mas mahapos pa gani nga maakig kag dumtan ina nga tawo. Kon amo sini, mangin indi kita malipayon kag maghinakit. Pero kon patawaron naton ang nagsaklaw sa aton, may kalinong kita, mahiusa ang kongregasyon, kag labaw sa tanan, may maayo kita nga kaangtanan kay Jehova.—Mateo 6:14, 15; Lucas 17:3, 4; Roma 14:19.

19. San-o naton dapat untatan ang pagpakig-upod sa isa sa kongregasyon?

¹⁹ Sa isa ka mahigugmaon nga pamilya, ang kada isa nagahimo sang iya bahin para malipay ang bug-os nga pamilya. Pero imadyina kon may isa nga magrebelde. Sulitsulit sia nga ginabuligan sang iya pamilya, pero wala niya ginabaton ang bulig. Mahimo magdesisyon sia nga magbiya sa ila puluy-an, ukon pahalinon sia sang ulo sang pamilya. Posible matabo ang kaangay sini sa kongregasyon. Ang isa ka tawo posible nga padayon nga nagahimo sang mga butang nga wala nagapahamuot kay Jehova kag makahalit sa  kongregasyon. Wala niya ginabaton ang bulig kag ginapakita nga indi na niya luyag mangin bahin sang kongregasyon. Posible magbiya sia sa kongregasyon, ukon kinahanglan sia i-disfellowship. Kon matabo ini, maathag nga ginasiling sang Biblia nga dapat naton “untatan . . . ang pagpakig-upod” sa iya. (Basaha ang 1 Corinto 5:11-13; 2 Juan 9-11) Mabudlay gid ini kon abyan naton sia ukon kapamilya. Pero sa amo sini nga kahimtangan, dapat mas labaw ang aton pagkamainunungon kay Jehova sangsa kay bisan sin-o.—Tan-awa ang Endnote 8.

20, 21. (a) Ngaa mahigugmaon nga kahimusan ang pag-disfellowship? (b) Ngaa importante nga pilion naton sing maayo ang aton mga abyan?

²⁰ Ang pag-disfellowship isa ka mahigugmaon nga kahimusan halin kay Jehova. Ginaproteksionan sini ang kongregasyon sa mga wala nagatuman sa mga talaksan ni Jehova. (1 Corinto 5:7; Hebreo 12:15, 16) Nagabulig ini nga mapakita naton ang gugma sa balaan nga ngalan ni Jehova, sa iya mataas nga mga talaksan, kag sa iya mismo. (1 Pedro 1:15, 16) Kag ang pag-disfellowship pagpakita sang gugma sa isa nga indi na bahin sang kongregasyon. Ini nga disiplina mahimo makaparealisar sa iya nga sala ang iya ginahimo kag makapahulag sa iya nga magbag-o. Madamo sa na-disfellowship ang nakabalik kay Jehova kag gin-abiabi gid sang kongregasyon.—Hebreo 12:11.

²¹ Ang aton mga abyan may epekto gid sa aton. Gani importante gid nga pilion naton sila sing maayo. Kon higugmaon naton ang mga ginahigugma ni Jehova, mapalibutan kita sang mga tawo nga makabulig sa aton nga magpabilin nga matutom sa iya sing dayon.