TAN-AWA ang tao sa tubig. Inang isda magalamon sa iya! Kilala mo bala ining tao? Sia si Jonas. Tan-awon naton kon paano sia nakasulod sa kagamo.

Si Jonas manalagna ni Jehova. Wala madugay pagkapatay ni Eliseo si Jehova nagsiling kay Jonas: ‘Kadto ka sa Nineve. Tuman kalain sang mga tao didto, kag luyag ko nga hambalon mo sila nahanungod sini.’

Apang indi luyag magkadto ni Jonas. Nagsakay sia sa barko nga manugpakadto sa tuhay nga direksion gikan sa Nineve. Wala mahamuot si Jehova kag nagpadala sia sing mabaskog nga unos. Hinadlokan ang mga marinero nga basi maglugdang ang barko. Nangayo sila sing bulig sa ila mga dios.

Nian, si Jonas nagsiling sa ila: ‘Nagasimba ako kay Jehova. Nalagyo ako sa ginsugo ni Jehova nga kadtoan ko.’ Gani namangkot ang mga marinero: ‘Ano ang himuon ta agod mapahunong ang bagyo?’

‘Ihaboy ako sa dagat,’ siling ni Jonas. Wala magsugot ang mga marinero, apang nagbaskog pa ang unos nga sang ulihi ginhaboy nila si Jonas. Sa gilayon, naghunong ang unos.

Ginlamon si Jonas sing daku nga isda. Apang wala sia mapatay. Sa tatlo ka adlaw kag tatlo ka gab-i didto sia sa sulod sadtong isda. Naghinulsol si Jonas nga wala niya pagtumana si Jehova kag nagkadto sa Nineve.

Nangayo sing bulig si Jonas kay Jehova. Nian ginpaluad ni Jehova si Jonas sa isda sa mamala nga duta. Sa tapos sadto, nagkadto si Jonas sa Nineve. Wala bala ini nagatudlo sa aton kon daw ano ka importante nga himuon pirme ang ginasiling ni Jehova?